2007年6月28日 星期四

細看足球風雲 - 一球成名(Goal !)

記得喺上年年頭我睇咗一部既感動又令我十分難忘嘅電影,
呢部就係本人認為可能係本世紀最精彩嘅足球電影一球成名(Goal !)。
《一球成名首部曲》係講述一個熱愛足球並且天才橫溢嘅年輕人Santiago Munez……
佢由最初嘅一個無名小子,到後來被球探發現……
之後仲憑著佢超卓嘅球技而獲得加盟英超勁旅紐卡素嘅機會。
Santiago由一開始喺紐卡素受盡球場內外嘅無數白眼……
到最後喺連番激戰中過關斬將,一舉成名,仲成為球迷心目中嘅寵兒。
呢部電影除咗可以欣賞到一啲客串演出嘅超級球星之外,
仲可以睇下一個年青人點樣去努力追逐自己嘅夢想……
雖然我承認電影中嘅某啲橋段的確係非常老套,
尤其係有一幕講Santiago老豆偷偷哋去Pub度睇個仔比賽……
然後到Santiago入波,佢老豆就喺人群中大叫:「佢係我個仔!佢係我個仔!我係佢老豆!」
仲有就係當Santiago老豆過身後,Santiago就喺一場重要比賽入面射入致勝球……
然後佢就對住個天向佢老豆作出一個致敬嘅手勢……
老實講,呢啲情節其實真係好鬼死老套,但就至少可以感動到我!
不過,《Goal!》嘅最後一戰……即係紐記反勝利記奠定參加歐聯席位嘅嗰一場……
呢個編排就真係令到我呢個多年利迷相當不滿喇!
哼!點解要拍利記輸而唔係拍49000輸㗎?而家咁樣收尾成套戲咪非常之美中不足囉!
計我話,如果導演可以將最後一戰改成係反勝49000嘅話,咁整套電影就一定更加完美喇!哈哈~
睇完首部曲之後,我等咗呢套《Goal II》就足足等咗有一年多!
雖然有好多人喺睇完《Goal II》之後都話呢套二部曲完全比唔上第一集……
仲話呢套戲其實只不過係一部皇馬嘅廣告片!不過,當我睇完成齣戲之後……
我自己就真係完全冇呢種感覺!仲覺得幾好睇添!完全唔似係一部皇馬廣告片喎!
咁今集本身就係講Santiago轉投皇馬之後嘅故事㗎嘛!
我諗可能係因為皇馬呢隊波嘅星味實在係太濃嘅關係啦!所以先會令大家有呢個錯覺啫!
好似上集咁……就唔會有人話《Goal!》係一套紐卡素嘅廣告片喇!
我覺得《Goal II》成套戲基本上都算唔錯!感情/友情/親情線都有,亦寫得幾好!
喺感情線上,Santiago一度迷失……但究竟佢最後有冇背住女友同個西班牙大口妹搞埋呢?
套戲就冇明確交代到!但Santiago同佢女友Roz嘅嗰段感情線……
唔知點解就令我諗起我同自己女朋友嘅一啲故事!不過,就絕對唔包括偷食嗰段! 哈哈~
喺友情線方面,我自己就幾鐘意有一段……
講另一位男主角Harris因為經常夜蒲,所以就搞到比賽嗰陣成日失準!
之後仲比Santiago搶埋個正選位!Harris俾人貶為後備,非常不滿……
不過勢估唔到Santiago第一場正選就俾人紅牌出場!然後仲受埋傷……
令到Harris好快就搶番個正選位,之後仲狀態回勇為球隊射入多個致勝球添!
不過,再一次失去正選嘅Santiago並冇因為咁而放棄自己!
喺傷癒之後佢好快就回復比賽狀態,仲成為球隊入面嘅後備殺手。
Santiago同Harris都咁fit,令到皇馬領隊非常頭痕……
喺同一位置上,究竟決賽對阿仙奴嗰陣出Harris定Santiago好呢?
不過喺決賽前夕……Santiago為咗大局就竟然要求領隊將佢列入後備名單……
令Harris可以順利擔正正選!但其後皇馬喺比賽中落後……
領隊就決定將Santiago換埋入去同Harris一齊作戰!喺成套戲入面,我最鐘意就係呢一幕!
至於喺親情線方面,我自己就覺得Santiago同佢阿媽/細佬相認嗰度就好似拍得趕咗啲!
求其草草幾筆就帶過咗……感覺上好似好唔夠時間咁!
總括嚟講,呢套《Goal II》嘅內容基本上都算幾豐富!
除咗有講到一啲球員嘅私生活同傷患問題之外,仲有描寫到球員之間嘅一啲心病……
喺整體上,我認為呢部戲真係絕對唔比《Goal!》差。
不過,我自己就對《Goal II》個Ending就有少少意見……
喺最尾碧咸入完球致勝球之後……套戲竟然就即刻起字幕!
喂!使唔使趕收工趕成咁呀? Santiago同Roz條感情線好似仲未交代番喎!
仲有一點就係碧咸作為客串演出嚟講,風頭就好似有啲過大!直頭就成個第三男主角咁!
哈~咁都未止呀!就連喺《Goal II》張電影海報度,碧咸嘅位置就幾乎同兩位主角平起平坐!
另外,喺外國嗰面亦有聽聞話喺《Goal III》入面,碧咸嘅戲份就將會比先前嗰兩集更多……
哈哈~又踢波又做Model,而家就連電影界都比你撈埋!喂!咸哥,你呢啲係咪叫做恃靚行兇呀?
另外,喺《Goal II》呢套戲入面最令我驚喜嘅……就係我偶像麥馬拿文嘅客串演出!
雖然喺戲度佢只係得幾個鏡頭……但喺我心目中佢就依然都係最型嗰個!
英格蘭福山雅治,果然唔係浪得虛名!哈哈哈哈哈哈~
我諗就算唔係一個球迷,都有可能會一睇就愛上呢個系列嘅電影!更何況係我呢個標準球迷
真係好期待《一球成名三部曲》嘅最後一部呀!但我就希望導演喺呢一集入面……
就真係唔好將啲焦點放得太多落去碧咸哥身上!老實講,我唔討厭碧咸……
不過如果《Goal III》到最後真係拍到好似「Beckham自傳」咁!到時我諗我真係會暈低!哈~

2 則留言: