2007年1月3日星期三

好歌難求

剛聽完譚校長推出咗冇耐嘅新專輯《ALAN‧聽》,
再一次見證同欣賞到呢位樂壇王者寶刀未老嘅魅力同爐火純青嘅精湛歌藝。

今次呢張4CD套裝嘅新曲+精選大碟,
其中一個最大嘅特色係除咗Disc 1收錄咗全新派台作品「大大時代」之外,
其餘嘅九首歌都係從譚校長過往嘅數百首精彩作品當中挑選出嚟再重新灌錄一次,
並選用鋼琴同木結他等音色和諧嘅樂器伴奏,
呢種風格統一嘅做法,既保留到歌曲嘅原味,同時又增添咗一份現代感。
另外值得一提嘅係,呢堆「新瓶舊酒」其實全部係改編自譚校長多年嚟嘅一啲Side Track,
當中就包括「小珊瑚」、「世外情」、「欠了你」、「Baby」等等……
至於Disc 2/3/4就輯錄咗50首譚校長嘅另一啲非常襟聽嘅遺珠金曲。
嘩~可以一次過重溫校長咁多首「新歌」,呢一張《ALAN‧聽》認真係大件夾抵食呀!

一個歌手嘅最高境界,係懂得將每一首歌轉化成一個個故事,
而且仲應該擁有強烈嘅個人風格同感染力,並且唱功穩定。
喺而家香港樂壇能夠有此本事嘅,就只有Alan Tam!

噚晚好無聊咁睇咗電視轉播嘅一個某電台樂壇頒獎典禮……
哈哈~簡直係笑到我肚痛!當一場Show咁睇絕對係一個好好嘅娛樂!
雖然呢個台喺咁多年以嚟都始終如一,依然係懶感性、懶公正,
同埋勁鍾意Hard sell一班歌手夾硬谷出嚟嘅馬尿,
喺最近,網上更加有人特登整咗一張一絕嘅改圖去暗串呢個黑箱作業嘅頒獎禮,
但係話分兩頭,有時我哋又確係吹班友仔唔漲嘅,
事關呢個頒獎禮又的而且確係咁多個台之中做得最好睇嘅一個,
而最重要嘅一點,係佢哋至少會畀歌手唱晒成首歌,真正做到「尊重歌者」呢一點。

不過,睇返一班歌手當晚嘅表現,Oh My God!我係咪喺度睇緊《笑笑小電影》呀?
睇住呢班擦鞋DJ口中嘅專業歌手齊齊爭住出招去娛樂大眾,
一係就一入咪即走音,唔係就個個以為大聲就等如唱歌,
一味淨係識得用個喉嚨夾硬狂嗌,一於就嗌到爆晒咪為止!
咁如果唱唔到高音又點呢?咪即刻扮喊扮笑囉!正所謂側側膊,唔多覺呀嘛!
睇咗成晚,我覺得最好笑都莫過於係有一Part……
有一個畀外界極為推崇嘅新一代實力派女歌手,
唱現場竟然走音連連,仲將一句「恨人」唱到變成一粒「杏仁」。

基本上全晩就只有陳奕迅、張敬軒、王菀之、何韻詩同容祖兒叫做係唱得好啲,
起碼人哋真係有用個心去演繹首歌,仲有最緊要嘅,係作為歌手最需要有嘅音準。

近年實在係好歌難求,尤其係喺香港樂壇……
但講係咁講,喺06年,我認為都有唔少華語歌係唔錯嘅!
粵語歌就有以下數首

楊千嬅 - 她成功了他沒有、毅行、水月鏡花、我的生存之道、我只能跳舞
王菀之 - 畫意、(巴黎沒有) 摩天輪、幸福、滿天星、恨也講資格
關淑怡 - 關於我、帶我去跳舞
衛蘭 - 離家出走
容祖兒 - 摩登時代
關心妍 - 玉石樂隊
李克勤 - 一場兄弟、時代廣場、情比紙薄、Paris Hilton、公主太子
陳奕迅 - 不如不見、黑擇明、富士山下、粵語殘片、最後今晚
黃貫中 - 踩界、原罪犯、阿博二世
鄭中基 - 三生有幸、美女與野獸、黑風暴雨
古巨基 - 愛得太遲、愛恨交纏
許志安 - 大愛、任白
藍奕邦 - 蓬萊、盲年
張敬軒 - 老了十歲
譚詠麟 - 大大時代
譚耀文 - 分支路

而國語歌方面就有……

楊培安 - 我相信、這該死的愛、男人心、風中的羽翼
庾澄慶 - 靜靜的、戒不掉、對峙、午夜公路
張信哲 - 做你的男人、說謊、遠方、妳應該飛的
陳昇 - 狗臉的歲月、告訴媽媽、青鳥日記、在上海走開
周華健 - 雨人、愛玫瑰、我們不哭、江湖笑
周杰倫 - 迷迭香、菊花台、夜的第七章
周杰倫 + 費玉清 - 千里之外
曹格 - Superwoman、沉默玩具、背叛、3-7-20-1
范逸臣 - 放生
林俊傑 - 曹操 
李玖哲 - 我會好好過
蕭煌奇 - 你是我的眼
李聖傑 - 眼底星空
A-Lin - 失戀無罪
蔡依林 - 舞孃
彭靖惠 - 這一秒
阿桑 - 跟我說愛我
藍又時 - 曾經太年輕
莫文蔚 - 如果沒有你
林憶蓮 - 相信、南方的風
張惠妹 - 人質、我要快樂?
楊乃文 - 女爵、我離開我自己、今天清晨、電視機
雷光夏 - 黑暗之光、造字的人、別人的天使、發光房子
蘇打綠 - 小情歌、被雨困住的城市
昊恩家家 - 不自由、不愛你、迷路、星星數不清、記得說再見
Tizzy Bac - Sideshow Bob、田納西恰恰、瘋狂的豬、灰燼、鞋貓夫人,Madame!!!

喺06年令我感到好難頂嘅爛歌,數數手指都有幾多!
但若然要我只係選十大嘅話,咁就一定會有以下呢十首份:

1.自由女神(Orange與陳慧琳合唱)
2.鄭希怡 - Up And Down
3.周麗淇 - 上海人
4.戴夢夢 - 帶智慧射球 
5.Sun Boy'z - Tic Tak Toe
6.Orange - 東方之珠
7.陳小春 - 劫數難逃
8.衛詩 - 可可
9.Orange接班人梁詠琪 - 北京之夏
10.李克勤 - 香港仔

假如有「最難頂歌手大獎」呢個選舉,我必定會瞓身支持汪阿姐(Orange)!

2 則留言:

  1. 外星人╮ ( ︶ o ︶ ) ╭2007年1月5日 下午1:54

    汪阿姐唱歌真係好惡頂ar,愛得太遲真係今年的至尊金曲。

    回覆刪除
  2. 自由女神當年第一次聽到真係嚇親…

    回覆刪除