2007年1月3日 星期三

好歌難求

剛聽完譚校長推出咗冇耐嘅新專輯《ALAN‧聽》,
真係再一次可以見證同欣賞到呢位香港樂壇真正王者寶刀未老嘅魅力同爐火純青嘅精湛歌藝。

今次呢張4CD套裝嘅新曲+精選大碟,
其中一個最大嘅特色就係除咗Disc 1收錄咗譚校長嘅新歌「大大時代」之外,
其餘嘅九首作品都係從譚校長過往嘅數百首精彩作品當中挑選出嚟並且重新灌錄。
而呢九首重唱作品就全部都係選用鋼琴同木結他等音色和諧嘅樂器伴奏,
呢種風格統一嘅做法,既可以保留原曲嘅調子,又增添咗一份唔同嘅感覺。
另外值得一提嘅……就係呢九首重唱作品其實全部都係譚校長多年嚟嘅一啲Side Track!
當中就包括「小珊瑚」、「幸運星」、「欠了你」同埋「Baby」等等……
至於其餘嘅三張大碟,就輯錄咗五十首校長嘅另一啲非常精彩嘅遺珠金曲。
嘩!可以一次過重溫譚校長咁多首「新歌」,呢一張《ALAN‧聽》真係大件夾抵食呀!

一個歌手嘅最高境界,係可以真正將每一首歌都唱成一個個故事……
而且仲應該擁有強烈嘅個人風格同感染力,並且唱功穩定。
我覺得而家喺香港樂壇可以有此本事嘅……就只有Alan Tam!
噚晚好無聊咁睇咗電視轉播嘅一個某電台樂壇頒獎典禮……
哈哈~真係好鬼死好笑!當一場Show咁睇絕對係一個好好嘅娛樂!
雖然呢個台喺咁多年以嚟都始終如一,依然都係懶感動、懶公正……
同埋咁鐘意勁sell一班歌手狂谷嘅眼淚……
而最近網上就更加有人特登整咗一張一絕嘅改圖去暗串呢個黑箱作業嘅頒獎禮……
不過講真呀!其實有時我哋又真係吹佢哋唔漲嘅……
事關佢哋個頒獎禮又的而且確係咁多個台之中做得最好睇嘅一個!
而最重要嘅一點,就係佢哋至少真係會俾歌手唱哂成首歌,真正做到「尊重歌者」呢一點。

不過,噚晚睇番一班歌手嘅表現同埋佢哋所謂嘅專業推介十大……
Oh My God!我係咪喺度睇緊《笑笑小電影》呀?
睇住佢哋一班專業歌手都齊齊爭住出招去娛樂大眾……
一係就一入咪就走音,唔係就個個以為大聲就係唱歌……
一味用喉嚨夾硬狂嗌,一於就嗌到爆哂咪為止!
咁如果唱唔到高音又點呢?咪即刻扮喊扮笑囉!正所謂側側膊,唔多覺呀嘛!
睇咗成晚,我覺得最好笑都莫過於係有一Part……
有一個佢哋所謂嘅新一代實力派女歌手……
唱現場竟然走音連連,仲將一個「恨人」唱到變成一粒「杏仁」……

基本上全晩我覺得就只有陳奕迅、張敬軒、王菀之、何韻詩同容祖兒叫做係唱得好啲!
起碼人哋都真係有用個心去演繹首歌,同埋最緊要嘅……就係起碼都有音準先啦!
近年真係好歌難求,尤其係喺香港樂壇……
不過喺06年……我認為都有唔少嘅華語歌係唔錯嘅!
粵語歌就有以下數首

李克勤 - 一場兄弟、公主太子、Paris Hilton、時代廣場
陳奕迅 - 不如不見、黑擇明、富士山下、最後今晚
黃貫中 - 踩界、原罪犯、阿博二世
古巨基 - 愛得太遲、重複犯錯
許志安 - 大愛、任白
譚詠麟 - 大大時代
鄭中基 - 美女與野獸
張敬軒 - 老了十歲
王菀之 - 畫意
關心妍 - 玉石樂隊

而國語歌方面就有……

楊培安 - 我相信、這該死的愛、男人心、風中的羽翼
庾澄慶 - 靜靜的、戒不掉、午夜公路
張信哲 - 做你的男人、說謊、遠方
周杰倫 - 迷迭香、菊花台
周杰倫 + 費玉清 - 千里之外
周華健 - 雨人、我們不哭
曹格 - Superwoman、背叛
范逸臣 - 放生
李玖哲 - 我會好好過
蕭煌奇 - 你是我的眼
李聖傑 - 眼底星空
A-Lin - 失戀無罪
張惠妹 - 人質、我要快樂?

至於06年嘅難頂歌曲其實都真係有好多!
不過如果要我只係選十大嘅話,咁就一定會有以下呢十首份:

1.自由女神(Orange與陳慧琳合唱)
2.鄭希怡 - Up And Down
3.周麗淇 - 上海人
4.戴夢夢 - 帶智慧射球 
5.Sun Boy'z - Tic Tak Toe
6.Orange - 東方之珠
7.陳小春 - 劫數難逃
8.衛詩 - 可可
9.Orange接班人梁詠琪 - 北京之夏
10.李克勤 - 香港仔

如果有「最難頂歌手大獎」呢個選舉,我一定會瞓身支持汪阿姐(Orange)!

2 則留言:

  1. 外星人╮ ( ︶ o ︶ ) ╭2007年1月5日 下午1:54

    汪阿姐唱歌真係好惡頂ar,愛得太遲真係今年的至尊金曲。

    回覆刪除
  2. 自由女神當年第一次聽到真係嚇親…

    回覆刪除