弦續李克勤．港樂演唱會（第三場）觀後感想

歡迎各位光臨由AXA安盛保險主辦嘅大型商演現場，今次呢個Event大會好榮幸可以請到香港管弦樂團嚟幫手助興，至於Rundown方面，為咗照顧一班新加入同埋嚟自中國大陸嘅專貴客戶，個編排亦會秉承住本公司一直以來堅守嘅原則同宗旨，係絕對唔會有任何意外風險嘅～好！事不宜遲～即刻有請我哋今晚嘅星級表演嘉賓 - 李～克～勤先生！📢

15/5/2023 弦續李克勤．港樂演唱會（第三場）Rundown

開Show時間：晚上八點十五分

完Show時間：晚上十一點五分

01.一個人飛

02.兩人行

03.一千零一夜

04.一個都不能少

05.開學禮

06.愛不釋手

07.舊歡如夢

08.護花使者

09.飛花

10.你是我的太陽

11.紙牌屋

12.C3PO

13.愛一個人 (伍珂玥合唱)

14.刻不容緩 (伍珂玥合唱)

15.最愛 (伍珂玥獨唱，原唱：周慧敏)

16.九月中的陌生人

17.回首

18.花落誰家

19.我們都是這樣長大的 (原唱：鄭秀文)

20.Victory (梁玉瑩合唱)

21.天水圍城 (梁玉瑩合唱)

22.祝君好 (梁玉瑩獨唱，原唱：張智霖)

23.再見演奏廳

24.大會堂演奏廳

25.希望

26.紅日

27.夏日之神話

28.月半小夜曲

29.我不會唱歌

30.弦續

31.告別校園時

Encore

32.合久必婚

33.一生不變

闊別紅館舞台6年嘅克勤叔叔身穿紅色西裝登場，率先打頭陣嘅〈一個人飛〉以色士風襯底，係香港著名作曲家陳輝陽嘅早年作品，李生口中嘅滄海遺珠，一首曾經入選過1996年勁歌金曲第三季季選，仲搵埋蔡少芬做MV女主角嘅派台主打歌。聽得出克勤把聲未係幾開，除咗有出現低音斷、中音矇、高音弱嘅情況之外，亦未有呈現出歌中嗰一份平靜而冷冽嘅陰暗氛圍。🌑

第二首揀選嘅曲目〈兩人行〉確實係令我意想唔到，2010年《罪人》專輯嘅第三Plug，「一代硬膠詞神」陳詠謙少數見得吓人嘅得意詞作。由最初嘅甜蜜溫馨，到後來日久生厭＞冷戰＞拉鋸，再決定攜手互相扶持，繼續同呼同吸，克勤將呢種既複雜又純樸嘅感情關係詮釋得有板有眼，表現漸入佳境，唯一美中不足嘅係喺頭兩段Verse部分不停唱錯歌詞。另外，首歌本身所散發嘅嗰一陣輕微嘅Dark ambient氣味，同豎琴配合起嚟亦有啲格格不入。🙅🏻‍♂️

緊接落嚟嘅一堆選曲全部都係意料之內嘅例牌菜式，主要用小提琴作伴奏嘅〈一千零一夜〉靚聲依舊，係衰在啲高音位有少少緊；勁難唱、超長氣嘅〈一個都不能少〉盡顯歌者功力，整個演唱過程一氣呵成毫無甩漏，兼且感情充足，百分百冇揸流灘，堪稱完美One take；喺編曲上加咗啲馬戲團音樂元素入去嘅〈開學禮〉本來幾有創意，奈何李生Hea唱似背書，淨係一味掛住收利是，搞到我恰晒眼瞓；聽完成首〈愛不釋手〉只能搖頭輕嘆一句歲月不饒人，處處力不從心，最精彩嘅副歌部分基本上係全炒收場，甚至連旋律之中原有嘅抑揚頓挫都表達唔到，真係唔明點解佢要將個Key定得咁高嚟玩自己？🤷🏻‍♂️

三十年如一日嘅〈舊歡如夢〉經過大幅度改編後感覺煥然一新，先以史詩式配樂揭開序幕，再慢慢轉化成敲擊樂二重奏，兩個段落銜接得天衣無縫，算係全晚玩得最好嘅一首歌，更加冇諗過嘅係，當嗰個叫做Chris嘅黑人樂手開口唱頭一句歌詞，我竟然就隱約聽到有些少譚炳文嘅影子喺入面，認真係撞鬼囉！👻

近年突然紅爆整個大陸嘅〈護花使者〉睇得出李生都盡晒人事去跳好呢一Part復健操，仲重現返當年嘅經典手指指動作，係就係好鬼老套，不過佢冇走去揀埋啲乜Q嘢〈秒針〉同〈野狼Disco〉嚟唱，其實我已經要阿彌吉帝、謝天謝地㗎喇！🙇🏻‍♂️

昔日喺Studio錄得近乎完美嘅〈飛花〉自從喺《情情塔塔演唱會》上為樂迷帶嚟一個極為驚豔嘅現場版本之後就冇次唱得似樣，踏入2023年，克勤老師更充分展示九成香港歌手喺北上比賽時嘅各種惡習，例如係不停濫用Laid-back技巧同用實音嚟去處理一啲輕柔嘅半假音部分，係差在冇喺啲唔應該拉音嘅地方度拖長音咋！😆

溫情滿瀉嘅〈你是我的太陽〉擺明係獻畀佢至愛嘅李太，糖份指數直達滿分，但如果李生肯接落去唱埋〈等妳願意 (Marry Me) 〉、〈在我身邊〉、〈三千零一夜〉同〈你不會唱歌〉，到時候全場觀眾一定會即時冧到爆！嗯～計我話，下次開Show咪索性整返首〈李盧淑儀專屬Medley〉曬吓命囉！反正大家又唔會介意嘅～🥰

特別引用星戰Bgm做Intro嘅〈C3PO〉 聽落Grand咗好多，成功洗走原曲嗰一浸十分難頂嘅兵歌臭味，相比之下，〈紙牌屋〉就比較求求其其、敷衍了事，直情係搬字過紙照住唱，全無誠意可言。🙄

Ladies and gentlemen～請用最熱烈嘅掌聲去歡迎一位名叫伍珂玥 (翠華) 嘅靚女貴賓入嚟陪李總一齊唱K！吓？咩嘢話？乜原來呢位唱功平平無奇嘅小姐係【2021中國好聲音】嘅年度總冠軍嚟㗎！實在係失敬失敬！😲

嚟到筆者最期待嘅Unplugged自選環節，克勤喺今場所演唱嘅冷門曲目，係我分別喺《李克勤慶祝成立30週年演唱會》同《李克勤 ＆ 香港小交響樂團演唱會2011》都有聽佢唱過嘅〈九月中的陌生人〉，寫到呢度不禁悲從中來，真係好羨慕喺第二場有幸聽到〈時差〉嘅朋友呀屌！😭

下兩首隨機曲目〈回首〉同〈花落誰家〉一出即被本人歸類為唔聽冇損失嘅“廁所位系列”，〈花落誰家〉純粹係個人喜好問題，麻煩先自動Skip過！將〈回首〉拖到咁慢嚟唱，仲要放得咁鬆唔用實聲，最唔好嘅地方係令人冇法子感受得到原版獨有嘅嗰份瀟灑同穿透力；翻唱鄭秀文嘅〈我們都是這樣長大的〉反而幾有驚喜，係衰在甩咗一句歌詞，feel到佢唱完都好介意自己犯咗呢種低級錯誤。🤣

同樣係嚟自“茅台好聲音”嘅冠軍級人馬，「表妹」梁玉瑩嘅歌唱功底就明顯超班得多，尤其喺合唱〈天水圍城〉嗰陣，一流嘅聲帶閉合示範，字字鏗鏘，句句有力，同導師克勤一唱一和夾到無倫，澎湃激昂嘅氣勢，深深撼動場內嘅每一位觀眾，更難得嘅係，呢位廣西姑娘居然仲能夠將粵語流行曲應有嘅獨特音韻展露出嚟，顯然係有下過一番苦功，實事求是嘅專業態度，足以叫一眾不學無術只係識得譁眾取寵嘅本土病壞新星汗顏。😷

愛徒獨唱完畢，都係時候要讓個台畀克勤師傅盡情Show吓Quali，〈再見演奏廳〉高音粒粒清脆響亮，可惜又係刻意避開嗰20秒長音唔唱；〈大會堂演奏廳〉都係Keep住採用近幾年嗰種較為偏向Chest voice嘅新唱法，以彌補生理機能上嘅逐漸退化，簡單嚟講就係氣量不足以激情搭夠，每次唱到台下彈奏～Woo～克勤都會特登將佢唱成Ah～方便佢好唱啲，而喺最後嗰一吓關鍵嘅弱音收尾亦做得唔係咁完善，之但係話分兩頭，成55歲人都仲可以保持到呢個水平，你又何必再吹毛求疵呢？🤨

命運就算顛沛流離～命運就算曲折離奇～命運就算恐嚇著你做人沒趣味～別流淚心酸～更不應捨棄～我願能一生永遠陪伴你～大玩互動拍手遊戲嘅〈希望〉、掀起全場大合唱嘅〈紅日〉，再搭多隻握手位必備嘅〈夏日之神話〉，睇到現場觀眾嘅熱烈反應，我諗我都理解克勤班幕後團隊何解開親大Show個Rundown都例必會掛返呢三塊招牌上門口綁住班新客嘅～🤔

講到尾，1995年嗰10場佈滿空凳嘅《聆的接觸演唱會》的確係帶畀克勤太多陰影，以致原本心高氣傲嘅佢都不得不向現實低頭，仲開始變得越來越保守，眼見林憶蓮、楊千樺、容祖兒、鄭秀文、梁漢文都先後開過Side-track Concert去氹吓班Die-hard fans，反觀李生呢？莫講話〈舊日的小提琴〉、〈牡丹亭・驚夢〉、〈世界末日〉、〈秋止符〉、〈進退兩男〉、〈花犯〉、〈Paris Hilton〉呢堆好適合同管弦樂團大玩Crossover嘅超冷門，抑或係收錄喺“倉底新碟”《大人的童話》裡面嘅〈回魂夜〉同〈這個故事教訓我們〉，就連〈此情此境〉、〈紅樓夢〉、〈依依不捨〉呢啲曾經hit過嘅派台歌佢都唔敢唱，你話激死唔激死？😤

或者有某班勤迷會認為我呢個Blog主寫啲嘢成日都好Mean又乞鬼人憎，但作為一個由純情處男等到變麻甩中坑都仍然係未等到勤哥開“遺珠Show”嘅30年忠粉，間唔中發一兩次牢騷，相信咁多位哥哥姐姐肯定會多多包涵嘅～😬

唔肯唱Side-track咪落力唱好啲金曲囉！逢Show必有嘅〈月半小夜曲〉少咗份安穩，多咗份肉緊，最值得一讚嘅係句與句之間嘅連貫性處理得相當流暢，完全有別於過往所用嘅Phrasing表達方式；〈我不會唱歌〉 好遺憾我睇嗰場唔係郎朗做嘉賓，但可幸嘅係克勤嘅演繹真係非常出色，係自《左麟右李04開心演唱會》後唱得最好嘅一次，簡直可以用「扣人心弦」呢四個字嚟到形容。👍🏻

將今次個Show首主題曲〈弦續〉放到咁後先唱，都算得上係一個幾錯嘅安排，因為當把聲一開咗，啲低音同假音就好難控制自如，仲隨時會瀕臨喺走音邊緣無法自拔，而事實上，克勤兩次唱到時間樂隊～成長伴侶～我都有暗自為佢抹一把汗。😅

OOh...曾同遇上～今孤身走遠方～誰願這樣～OOh...昂然踏上～雖分開走遠方～明晨能共創～演奏完〈告別校園時〉，香港管弦樂團隨即收工離場，去到Encore部分，唔知係咪EEG嗰面怕畀人罰錢嘅關係啦！克勤只係是但求其唱咗〈合久必婚〉同〈一生不變〉兩首歌，然後就立刻閃人。👋🏻

選擇沿用上次喺30週年演唱會合作過嘅何丙，冇搵返阿姐級指揮葉穎詩同最熟悉嘅音樂總監趙增熹，得出嚟嘅結果係爆聲頻頻，亦冇突顯出成隊管弦樂團嘅重要性，為咗遷就大陸市場，又強行加插咗一啲不必要嘅“急停位”，整體效果只屬一般，幸好克勤把聲同狀態都唔錯，至少唱得比2017年同2011年嗰兩次個唱認真同落力好多，證明網上嗰堆批評言論查實都係鳩噏居多，而對於有網民三番四次踩佢風格唔改、變化唔大兼且歌路狹窄，我覺得就嘥鳩氣啦！須知道聲底係天生嘅，即係你冇奶油無稽到要張信哲同費玉清轉型唱Heavy Metal㗎！正如你走入去一間中式酒樓都唔會叫廚房整碟法國生蠔過你食啩？🦪

數數手指，對上一次同女朋友手拖手入紅館睇Show經已係12年前嘅事，咁啱企喺台上嘅歌手又係同一個人，正所謂世上歌星何其多，但有啲回憶、有啲感動、有啲感覺，始終就只有李克勤先能夠帶到畀我。🎤

有人問我，為乜到今日都仲要入場支持出名熱愛舐共嘅送禮勤？首先，身處喺現時呢個咁愚昧腦殘嘅敗壞年代，我仲需要煞費思量去分辨由一班「嗰頭影人食元氣，轉頭走去食M記」嘅偽黃人士所界定嘅顏色同立場咩？與其陪佢班友仔混吉，不如以後就我有我聽歌，你有你抽卡，無謂再喺度整色整水。再講，畀着你係李克勤同G.E.M，一個係香港各大論壇永恆嘅袋底泥，三日唔埋兩日就畀班無知樂迷串佢係AI機器屎過穿屎 (Twins)，但轉過頭上到大陸就人人老師前老師後咁叫佢；另一個仲慘，細細個畀本土樂壇國民教育“搞靚衫”杯葛完，又畀幾個虛偽到爆嘅前輩撳住嚟砌，若果唔係靠住【我是歌手】喺上面打響個名堂，可能老早就變咗做“娛樂圈失蹤人口”。咁人哋兩個家吓難得喺其他地方得到前所未有嘅一級待遇，再望吓香港呢一代興啲乜嘢歌手，咪好自然會慢慢捨棄呢邊個市場囉！同楊千樺、譚詠麟個Case正好係剛剛相反！自己唔諗住養活人又屌鳩人親吻祖國？成件事根本係打橫嚟講！🦀

呢兩日忙住執喼同Plan行程，直到而家先得閒整理篇文，跟住話咁快又要準備飛去台北度嘆世界喇！Blog友們，我哋6月再見！✈

PS：部分相片係轉載自李克勤嘅Instagram／霍汶希嘅微博／英皇娛樂嘅Facebook專頁／勤迷Anita Chan小姐／勤迷Chan Ka Wing先生／hk01同各大報章。📰

如對類似嘅文章感興趣，請移玉步到以下網址：

李克勤慶祝成立30週年演唱會（尾場）觀後感

http://timeischanging2013.blogspot.com/2017/09/HackenLee30th.html

李克勤 ＆ 香港小交響樂團演唱會2011觀後感

http://timeischanging2013.blogspot.hk/2011/07/HackenLeeHongKongSinfoniettaLive201.html

林子祥X李克勤拉闊音樂會2011觀後感

http://timeischanging2013.blogspot.hk/2011/09/HackenLamx2011.html

穿著窄身西裝的潮店老闆 - 李克勤三十周年紀念專輯《30克》

http://timeischanging2013.blogspot.com/2017/06/30.html

穩中求勝的未完成品 - 李克勤《紙牌屋》

http://timeischanging2013.blogspot.com/2013/11/hackenleehouseofcard.html

李克勤《復克》聽後感：誠意欠奉，靚聲依舊

http://timeischanging2013.blogspot.com/2013/08/the-key.html

《在森林和原野》聽後感：教我如何喜歡這樣的一個李克勤？

http://timeischanging2013.blogspot.hk/2012/08/HackenLeeInTheForestandTheWild.html

國語樂壇再出發．李克勤《似曾相識》

http://timeischanging2013.blogspot.hk/2011/10/hacken2011.html

克勤2010全新專輯 - 《罪人》聽後感

http://timeischanging2013.blogspot.hk/2010/09/2010.html

Let's Talk About…Hacken Lee Part I（寶記、星光、藝能年代的克勤碟評）

http://timeischanging2013.blogspot.hk/2010/05/lets-talk-abouthacken-leepart-1.html

Let's Talk About…Hacken Lee Part II（環球年代的克勤碟評）

http://timeischanging2013.blogspot.hk/2010/05/lets-talk-abouthacken-leepart-227.html

最喜愛的李克勤經典歌曲／滄海遺珠／個人大碟

http://timeischanging2013.blogspot.com/2009/08/hackentop20.html