希貓撞正講故王 2 の 八月搞乜鬼

上集反應熱烈，現應徇眾要求推出第二輯！🎬

Chapter 1：天氣這麼熱

天氣這麼熱我那裡通通不想去～只想躲在家看著我的電視吹冷氣～😾

天氣那麼熱我那裡通通不想去～只能一直睡因為我不想發脾氣～😾

天氣那麼熱～天氣那麼熱～天氣那麼熱～天氣那麼熱～💤

天氣那麼熱～天氣那麼熱～天氣那麼熱～天氣那麼熱～💤

Chapter 2：流感襲港

本港流感持續肆虐，有好多人都紛紛中招，就連小弟都唔例外！唉～話時話都好耐冇試過病得咁犀利！喺患病呢段時間我食又食得唔好，瞓又瞓得唔好，晚晚就鼻水長流，咳到甩肺！不過好在，經過幾個禮拜時間嘅休養同調節，我而家就已經好返好多喇！😷

係人都知乾咳呢樣嘢就最難搞㗎喇！但早排多得姑姑拎咗幾包神奇藥丸比我，估唔到只係食咗短短一個星期，個功效竟然仲犀利過我飲十晚咳藥水，真係講都冇人信呀！💪

呼～大病初癒，就梗係要即刻食返碗冬蔭功湯粉賀一賀佢啦！順便又可以驅下寒！😜

咁當然，無論外面嘅誘惑有幾吸引，為咗自身嘅健康著想，我每日嘅主餐基本上依然都係以齋菜為主。🙏

Chapter 3：新房客

喺上星期又有幾位新朋友搬咗入嚟我屋企，其中一個就係全亞洲最靚仔嘅一代宗師涼茶偉！咦～阿偉哥，而家冇Camera影住你喎～你因乜解究成日都要對住我擺出一副喺《色戒》入面嘅死人漢奸表情呢？😐

仲有就係呢三位好鐘意揸砵砵車嘅多啦A夢三兄弟！😉

咳咳～唔好意思呀撒旦先生～今個月嘅booking已經full晒喇～暫時仲未有地方比你入嚟住！😆

Chapter 4：九月觀影小記

片名：保鑣救殺手（The Hitman's Bodyguard）

導演：Patrick Hughes

主演：Ryan Reynolds、Samuel L. Jackson

片長：118分鐘

級別：IIB

語言：英語

上映日期：2017-08-17

個人評分：★★★

本片賣點：

荷里活綠葉王Samuel L. Jackson難得擔正，屌你正呀喂～

片名：軍艦島（The Battleship Island）

導演：柳承完

主演：黃晸玟、蘇志燮、宋仲基

片長：132分鐘

級別：IIB

語言：韓語、日語

上映日期：2017-08-10

個人評分：★★

本片賣點：

耗資高達220億韓圓，青龍獎最佳導演柳昇完，仲有韓國男神宋仲基。

片名：多啦A夢電影：大雄之南極凍冰冰大冒險

導演：高橋敦史 

片長：101分鐘

級別：I

語言：粵語

上映日期：2017-08-03

個人評分：★★

本片賣點：

咁獨立咁勇敢嘅野比大雄，你哋見過未？

片名：原子殺姬（Atomic Blonde）

導演：David Leitch

主演：Charlize Theron、James McAvoy

片長：114分鐘

級別：IIB

語言：英語

上映日期：2017-07-27

個人評分：★★★

本片賣點：

型格金像影后Charlize Theron、好聽到爆嘅電影配樂

片名：鄧寇克大行動（Dunkirk）

導演：Christopher Nolan

主演：Fionn Whitehead、Tom Glynn-Carney、Jack Lowden、Tom Hardy

片長：106分鐘

級別：IIA

語言：英語

上映日期：2016-07-20

個人評分：★★☆（☆為半粒星）

本片賣點：

Rotten Tomatoes 98%正評、Metacritic 96分、

IMDB 8.4分，各地影評有口皆碑（but it's not my cup of tea）

Chapter 5： Let The Money Burn！

實在要非常感謝《CD Warehouse》始創中心分店嘅一位靚女店員，唔係妳特登幫我留住呢一千零一隻《Atomic Blonde》原聲大碟，我都唔知要等到幾時先可以同佢相認！😭

我話比你哋知～呢隻原聲大碟真係好聽到上太空！唔信？不如我就喺入面求其抽四首歌出嚟播比大家聽下先啦！Ladies & Gentlemen～德國著名樂團Nena嘅成名作，新德意志浪潮搖滾經典，諷刺美蘇冷戰嘅99 LuftBallons！🎶



英國新浪潮團體After The Fire翻唱奧地利已故男歌手Falco一首轟動全球各國嘅爭議性作品Der Kommissar。🎶

Glam Rock教父David Bowie喺92年為驚悚片《Cat People》製作嘅電影主題曲Cat People（Putting Out Fire）。🎶



波士頓樂隊Til Tuesday嘅Voices Carry，你哋咪睇佢哋個靚女主音Aimee Mann嘅造型好似好時髦咁呀～喺單飛之後佢就立刻轉型成為一個療傷系民謠歌手，連名導演Paul Thomas Anderson都係佢嘅fans，喺99年仲特登搵佢幫自己套《Magnolia》創作咗八首作品。🎶


有聽開英文老歌嘅朋友，應該都不會對以上呢堆曲目感到陌生！👆

嘿嘿～一場嚟到，冇理由就咁買一隻碟就走人㗎嘛！你哋話係咪？😈

另外，老母部Galaxy S II唔經唔覺都用咗四年咁耐，都係時候要買返部新電話比佢！😄

嗯～數數手指，因為某啲原因，我都有成廿五年以上冇同過自己屋企人出外旅遊喇！所以喺嚟緊嘅10月我就決定要請三位美女（姑姑、老母、細姨）同我一齊去台北盡情咁玩返幾晚，到時仲可以順道探下一班好炫友，真係諗起都開心呀！😁

Chapter 6：今期好書推介

講起旅行，最近有一位Blog友就自資出咗一本書，內容係講佢同另一半喺非洲各個地方遊歷嗰陣所發生嘅一啲大小事。雖然我同呢位Blog友唔係認識咗好耐，不過我就非常欣賞佢嗰種不求名利純為享受過程嘅精神。呢本書喺一啲比較有名嘅書局都可以買得到，如果你同我一樣都認為自己一世都唔可能會去呢啲地方旅遊嘅話，咁就可以嘗試買一本返屋企了解一下人哋嘅文化同我哋想像嘅究竟有乜嘢分別。👈

Chapter 7：秋後算帳

前幾日有人問我對於雙學三子判囚一事嘅一啲睇法，雖然曾經應承過一個人唔會再喺自己嘅網上平台度發表任何有關政治嘅嘢，但喺呢件事上面，有啲嘢實在係令我不吐不快！我身邊有好多人都恥笑呢三個後生仔，笑佢哋戇鳩，笑佢哋抵死，仲話佢哋肯定係收咗美國佬好多錢。好老實講，如果你一直都係支持建制同十分愛國愛黨，咁我就完全冇說話好講，因為我一向都好尊重每一個人嘅政治立場！之不過，若然你同我一樣都係相當痛恨而家呢個中共政權嘅話，咁我就唔係好明到底你哋喺度笑乜春？須知道呢三位年輕人十幾歲就出嚟搞社運，面對社會上嘅種種壓力，冇返咁上下嘅堅持同決心都好難有勇氣企出嚟同一班老奸巨猾嘅「愛港之星」周旋！我當然明白，一開始一條心為理想，到後來事情慢慢發展得越來越複雜，要考慮嘅嘢就越來越多，喺十字路口不停咁作出思考同取捨之後，有時候就多多少少都會有啲偏離初衷，呢種心態上嘅轉變我相信有好多人都曾經試過，政客如是，升斗市民亦如是。喂～就算大家喺意見上有分歧都冇必要喺呢個時候踩多佢哋幾腳啫～正所謂「他朝君體也相同」，做人都係有返少少良知比較好啲。 👀

Chapter 8：亂噏一通利物經

今晚歐聯附加賽次回合，利物浦將會返到主場迎戰賀芬咸，而領隊高普喺記者會上就透露古天奴仲未可以上陣：「我100%歡迎佢！我哋之間完全冇問題！佢而家有背傷在身，雖然唔係傷得好重，但就需要啲時間康復。」⚽

昔日有乞衣米蘭，今日有疤菜燶娜，擾攘咗咁耐，本來以為古天奴同仆街疤狗呢一場轉會鬧劇應該可以暫時告一段落啦！點知話口未完，呢一隊世紀閪波居然就一再反口向利記作出第四次報價！屌～好心你條死疤狗就收撚皮啦！叫你唧牙膏咩而家？堂堂一間大球會啲死人作風可唔可以唔好成日都咁撚嗱喳呀？次次喺出價之前都要出一輪口術然後就喺度左𢯎右𢯎，呢啲咁嘅濕鳩技倆確係令人感到極之煩厭！不過阿古仔你又係傻豬豬嘅！比人氹兩氹就心花怒放，仲夾埋個經理人搞場咁撚肉酸嘅大龍鳳出嚟，卒之就搞到自己兩面不是人。🎭

之前喺網上睇到有某班利迷分別引出一大堆陰謀論嚟批評FSG，話佢哋同巴塞私底下其實一早就傾掂數，又將托里斯好多年前嘅一篇訪問舊事重提，仲話今時今日嘅利物浦經已徹徹底底變成一間Selling Club。對於佢哋嘅呢番言論，我想講嘅係，無論誰是誰非都好，除咗嗰位獌聯後備球員、奧脫福廁所獎門人、晏菲路過街老鼠、白粉報專欄作家之外，我真係從來冇嬲過任何一位離開利記嘅球員，就連迪奧夫呢條口水多過茶嘅撚人我都可以對佢一笑置之！坦白講呀～呢個世界確實唔係有咁多個艾加、托迪、馬甸尼同拿鐵斯，講到尾球員咪又係打工仔一名！至於FSG同托里斯之間嘅恩恩怨怨，呢類錯綜複雜嘅羅生門事件我實在冇興趣花時間去深究！而呢班美國佬一直以嚟嗰種算死草嘅經營手法雖則又的確係唔抵幫嘅！但係作為球迷嘅我就唔會將每一件事都諗得咁深入，因為我清楚知道，就算我坐喺度日屌夜屌，都唔會屌到有油王光速入主利記㗎啦！同埋再講呀～即使古仔最後堅係走咗，我覺得大家亦唔需要太過悲觀喎！事關我一向都認為佢喺球隊個作用根本就仲未去到以前謝拉特同哨牙蘇嗰種單天保至尊嘅級數，而且心理質素又差到無倫，咁當然佢喺隊中絕對係有一定嘅重要性，但相比之下我就比較擔心高普遲早會劈炮唔撈多啲囉！要知道喺FSG掌權之下，呢個球壇係肯定唔會有人比高普更適合教利記。😕

首回合領先2:1，次回合返到晏菲路，記住未去到最尾一分鐘都唔好放鬆呀！唔係嘅話就會白白浪費晒之前所付出嘅汗水同努力㗎喇！😬

Chapter 9：送禮勤遇著癲佬歌迷

某日，有一位新讀者留言比我，話李克勤有次喺一個電台節目度用咗大概幾分鐘嘅時間去講我喺兩個月前寫嗰篇《30克》發噏風聽後感。其實，當我聽到佢話篇嘢有成二萬字咁多仲要話係香港人寫嗰陣，基本上我就覺得佢九成九係講緊我，然後再聽埋佢對「姐姐」嘅嗰段回應我就更加肯定！而經阿勤哥咁樣講一講之後，我個Blog嘅瀏覽數字就瞬即好似香港個樓價咁不斷飆升！哈哈～希望佢睇完篇文喺嚟緊個演唱會度會唱返多啲星光同藝能時期嘅冷門歌啦！咁就算我去唔到現場欣賞個Show，喺未來都可以買隻碟返屋企收藏下呀嘛！😂

Chapter 10：天外飛鴿

最後喺度想提醒一下各位， 颱風飛鴿已經殺到嚟喇！一定要多啲愛護街上嘅浪浪呀！😊

喂～你發完噏風未呀？我又有啲眼瞓喇～喵～💢

OKOK～唔好勞氣～唔好勞氣～暫時就講住咁多先！有乜嘢留返下次再傾！好唔好？😘

喂～Darling呀～呢條口水佬終於都肯斷氣囉！我仲以為佢會講到2047添！（設計對白）