2015年7月21日 星期二

《亂寫一通利物經 × 生日飯大放送!》

經過一個極不如意嘅球季之後,令利物浦幕後大老闆FSG痛定思痛,
決定要為球隊作出一次重大改變,勢要喺新一個球季再度捲土重來。

試問有邊個可以諗到,喺今個夏季嘅英超轉會市場暫時有最多搞作嘅……
會係一向都慢人半拍嘅利物浦呢?如果計埋外借完畢回歸嘅奧歷治
到目前為止利記就已經簽入咗十位新兵……而喺眾多位新兵當中,
就以從曼城免費轉會過嚟嘅占士米拿(James Milner)最受利迷爭議!
其實米拿呢類球員實而不華,又能夠勝任多個位置,橫睇掂睇呢次點都係一個good deal嚟!
不過鬼叫佢老哥好揀唔揀揀件傳奇7號嚟著咩?所以官方消息一出……
咪即刻畀某班利迷瘋狂炮轟同dislike囉!喂大佬~你揀呢個number之前有冇做過資料搜集㗎?
你知唔知呢個number歷代嘅擁有人係邊幾個?係杜格利殊奇雲基瑾比士利麥馬拿文呀!
呢班前輩個個都技術細膩又瀟灑,靈氣強又有創造性,正宗係扭得、射得、傳得又睇得!
仲可以靠一人之力去改變戰局!喺老麥之後,咁多年以嚟……
就只有來自烏拉圭嘅「南美星人」蘇亞雷斯能夠孭得起呢件7號波衫!其餘嘅……
唔係受傷患困擾就係慘變人球!所以話呢~呢件利物浦7號波衫真係仲重過件黃金聖衣呀!
之但係講到尾……其實球衣號碼就只不過係一個象徵意義嚟!
再者,阿占士哥夠膽著起呢件7號波衫亦都證明咗兩樣嘢……
一就係佢個人好有自信,二就係佢為人不拘小節,並且抗壓能力極高!
我都明白……好似佢呢一類型嘅工兵型球員,向來喺大部分球迷心目中都係唔起眼!
仲記得佢喺2010南非世界盃替英格蘭國家隊上陣嗰時……我就成日都喺個Blog批評佢!
仲曾經講過:「吓?出占士米拿?咁你不如畀傷咗嘅碧咸落場做紙牌斬下角球同射下罰球仲好啦!」
到後嚟佢以當時嘅高價2600萬磅由維拉轉投曼城,我第一個反應就依然都係:「嘩~佢值唔值呀?」
直到曼城呢隊波漸漸崛起,電視台開始播多咗佢哋嘅比賽,
我先真正有機會慢慢認識到呢位「多功能工匠」喺隊波入面嘅重要性!
講真,你要佢呢一類型嘅球員喺大賽度有一鳴驚人嘅表現同諗住靠佢一個人去改變戰局,
咁就梗係唔太可能啦!但係如果你將佢放入漫長嘅聯賽爭逐戰上……
你就會發現佢嘅經驗同埋勤力、有紀律嘅踢法其實真係幫到隊波好多!
坦白講,呢幾年占士米拿喺曼城已經贏過哂英格蘭本土嘅所有錦標,
而佢今次為咗爭取更多出場機會,毅然放棄征戰歐聯舞台轉投利記,
就足見28歲嘅占士哥對比賽嘅嗰一份渴望同衝勁!
衷心希望佢呢一團火喺今季能夠協助利記重回正軌,
並且可以用行動嚟打爆我哋一眾利迷嘅眼鏡!加油啊占士哥!
睇過丹尼艾格斯(Danny Ings)嘅球王片同佢喺U21裡面嘅表現之後,
真係不禁為利記抹一把汗……心諗:「喂~呢條友仔普通料嚟咋喎!你哋簽佢番嚟做乜?」
不過,上星期我睇咗利記對泰國明星隊場波,
然後又上網仔細咁去查下呢位Danny仔嘅一啲數據資料……
先發現原來呢個前般尼射手其實又唔係我想像中咁曳!
艾格斯上季總共為般尼射入咗11個聯賽入球同交出咗4次進攻,
仲分別喺利物浦兩大宿敵愛華頓同曼聯身上都有取得入球。
以一支升班馬嘅射手嚟講,絕對係一個相當可觀嘅數字!
另外,喺上場對住澳職球隊阿德萊德聯嘅賽事入面,
我就睇到呢位球員除咗有唔錯嘅射術之外,仲有一定嘅速度同控球能力……
講真,如果你話簽艾格斯番嚟係諗住想搵個人去頂替波仔個位置,
咁呢一單「點對點」嘅交易就當然係合情合理啦!
之但係如果你係想搵佢嚟頂替史杜去出戰季初嘅多場聯賽嘅話,
咁我就真係好擔心佢會因為受唔住壓力而大大影響表現,隨時變成下一個艾斯柏斯
提到「點對點」,我認為喺利記暫時咁多宗交易裡面就以前修咸頓右閘佳尼(Clyne)畀到我最大信心!
呢位入選過2012年英冠最佳陣容嘅黑人鐵閘身體對抗性強,狀態穩定,而且仲有唔錯嘅遠射能力。
現任修咸頓領隊朗奴高文就曾經高度讚揚同畀咗頂高帽佳尼,話佢係當今英超嘅最佳右後衛。
隨著格連莊臣嚴重跌watt,利記右閘呢個位就一直後繼無人……
所以我認為今次呢個收購就絕對係對症下藥!至於佳尼會唔會繼拉蘭拿
林拔路夫蘭之後成為第四位沉沒晏菲路嘅修咸頓球員?球季開鑼之後就自有分曉!
個樣足無線藝人袁偉豪嘅18歲新秀祖高美斯(Joe Gomez)係利記今季所簽入嘅第三位英藉球員,
佢司職中堅,同時亦能勝任左右閘,喺上季佢總共為查爾頓喺英冠上陣咗21場。
另外,佢亦都係英格蘭國家隊青年軍成員,仲聲稱自己自細就係利迷,
而領隊羅渣士就更加係佢加盟利物浦嘅最大原因。嘩~呢個小朋友年紀輕輕就咁識講嘢,
將來一定前途無限!不過得把口係冇用嘅!最緊要係有真材實料!喺近呢幾場熱身賽當中……
我就睇到呢位新秀嘅表現都算幾淡定,並且有速度、夠硬淨,甚有大將之風!
而喺賽後羅渣士就更表示會將高美斯留喺隊中,唔會將佢借出去畀其他球隊!
咁即係話……喺嚟緊嘅球季,呢位通天小老倌就分分鐘可以直接上一隊跟一班大哥學嘢,
甚至有機會同佢哋並肩作戰。嗱!豪仔!我睇好你㗎!
你一定要生生性性做番齣好戲畀大家睇!咁就唔使成日屈喺電視台度做閒角啦!
占士米拿艾格斯佳尼祖高美斯……利記喺今季除咗一如以往簽入咗多位英藉球員之外
喺培育青訓方面亦不遺餘力!繼祖高美斯之後,球隊就陸續簽入咗多位U18球員,
當中就包括阿仙奴青訓Elijah Dixon-Bonner(16歲)、 美國小將Brooks Lennon(17歲),
仲有就係巴塞青訓,人稱「新洛賓」嘅荷蘭藉小將Bobby Adekanye(16歲)。
前、中、後、青訓都補咗人,咁龍門呢?隨著巴特鐘斯約滿離隊,
利物浦就立刻搵咗保頓嘅二號門將阿當保丹(Adam Bogdan)過嚟做米奴列副手。
呢粒保丹到底係何方神聖?佢係匈牙利國腳,曾經榮膺保頓2012年度最佳球員。至於佢身手有幾犀利?
相信有睇過上季利記喺足總盃第四圈對住保頓嗰場賽事嘅球迷,應該都唔會忘記呢個癲佬有幾屈機啩?
若果要數今夏暫時最令利迷感到興奮同雀躍嘅一單收購,
相信就一定巴西國腳費明奴(Roberto Firmino)嘅來投!
呢位喺德甲打滾咗四個年頭嘅賀芬咸王牌嘅轉會費為2900萬英鎊,
係利物浦歷史上第二高轉會費(第一位係3500萬鎊嘅卡路爾)。
坦白講,我好少睇德國波,所以真係唔知費明奴啲料有幾堅!
但我之前睇過一篇訪問,曾經執教過賀芬咸嘅前利物浦後衛巴布就有咁嘅評價,
佢話:費明奴十分適合利物浦,佢唔係一個典型嘅巴西球員,
比起德國球員佢更加德國。費明奴非常有紀律,而且充滿自信。」
至於德甲足球分析師賀夫文就認為利物浦簽入費明奴係非常明智,簡直就係執到寶!
仲話呢位23歲嘅巴西仔將來一定會成為一個超級巨星。
另外,巴西一代球王朗拿甸奴就話利物浦能夠同時擁有費明奴古天奴係一份莫大嘅福氣
佢深信佢哋將會組成全英超最出色嘅一隊進攻組合,
而一眾利記前鋒史杜歷治奧歷治艾格斯亦都肯定會因為費明奴嘅加盟而受惠。
聽完一班球圈人士咁講,我真係非常期待古天奴費明奴盧卡斯呢一隊巴西LFC組合
Lucas、Firmino、Coutinho希望費明奴喺嚟緊嘅球季可以盡快適應英超節奏同打出身價啦!
上季畀利記借咗出去法甲嘅比利時新晉國腳前鋒奧歷治(Origi),
喺過去嘅一個球季佢為里爾上陣咗33場賽事,但就只係取得8個聯賽入球,
更曾經陷入長達20場嘅入球荒,最後仲入選埋2014/15年賽季法甲最差陣容,
表現絕對可以稱得上係強差人意!到底利物浦係咪〝又〞入錯貨?
我認為一切仲係言之尚早!不過喺近幾場熱身賽當中,
我就睇到呢個喺2014巴西世界盃大放異彩嘅後生仔相當有潛質!
佢有速度有身位有頭鎚,仲有好強嘅入球慾!之但係佢啲跑位、搶點同埋門嗰腳呢~
就真係睇到人眼火爆!咁我當然知道……奧歷治而家先得嗰廿歲仔,仲有排執嘅!
希望佢喺未來會畀心機同好好把握每一個機會,醒醒定定……千祈唔好成為下一個尼高治
喺上季因為「玻璃射手」史杜歷治長期養傷嘅關係,令到球隊嘅攻力大打折扣!
而陣中其餘三位前鋒巴洛迪利波連尼林拔全季加埋就只係取得4個聯賽入球。
三個前鋒加埋先入得嗰4球,真係一個相當嚇人嘅數字!所以球會有見及此,
就立刻四周圍去物色一啲有級數嘅星級前鋒嚟頂替「容易受傷的史杜」……
每年都總係會有一啲莫名奇妙嘅轉會傳聞發生喺利物浦身上……
而今年我認為傳得最離譜嘅……就係「鋒神呂布」伊巴謙莫域同埋阿根廷射手希古恩
吓?想買我?得!左腳2500萬磅,右腳2500萬磅,再加多一張歐聯入場卷就可以喇!(設計對白)
咦~呢個咪法國黃秋生Jérémy Menez
回咗塘好耐㗎囉喎!做乜呀?你想簽佢番嚟整叉燒包定係散播伊波拉病毒呀?
乜嘢話?小豆?你有冇病呀?佢係獌狗嚟㗎喎!係呀!我都知佢係一隻獌狗……
但係,乜有明文規定曼聯嘅球員係唔可以直接過檔利記嘅咩?
好坦白咁講,小豆速度快過林拔,走位好過巴神,把握力就至少高波仔三班!
佢某程度上有啲似全盛時期嘅「晏菲路過街老鼠」奧雲
只係衰在膽色唔夠同淨係打後備先交到貨,如果唔係應該一早就上到一線!
我始終都認為,好似佢呢類咁靈活同把握力咁強嘅finisher,就正正係利物浦而家最需要嘅人!
我唔知道其他利迷點諗啦!我自己就真係無乜所謂!
正所謂唔理黑貓白貓,捉到老鼠嘅就係好貓!你過到嚟入到波幫到球隊,
我理得你係獌狗定饅頭呀!總之啱用就得啦!雖然,我都知道呢單傳聞會成事嘅機會真係好微…
路蘭迪(Llorente)同馬里奧高美斯(Mario Gomez)?
哈哈~喺咁多個傳聞對象入面,最笑死人冇命陪都應該係呢兩兜友喇!
喂羅生~乜你識得用高大中鋒嘅咩?咁如果你識用,當初又何必放逐卡路爾,仲要將佢半價拋售呢?
再講呀!呢兩條高佬一個就傷多過踢,一個喺祖記就直頭係毫無立足之地,就連個後備席位都保唔住……
嘩~個倉已經有一大堆水貨仲未賣得出去,而家你又話要簽多兩件番嚟?屌!真係未畀人笑夠咩!
唓~其實講咁多做乜呀!上面嗰堆前鋒……
明眼人一睇就知係煙幕嚟㗎啦!因為賓迪基(Benteke)已經係我哋嘅人喇!
當知道利記有可能會簽賓迪基嗰陣……大部分利迷(包括我)都即刻耍手擰頭!
有人話有過嚴重傷患紀錄嘅佢根本就唔值3250萬磅,
又有人話羅渣士好明顯就冇能力去用呢類咁高大嘅黑人中鋒,買佢番嚟就盞做多次水魚
亦有人話賓迪基呢類中鋒就只有摩佬先識用!(冇記錯嘅話呢條茂利應該係我……)
有一個利迷就仲搞笑佢話賓迪基無論點努力,最多都只會係下一個希斯基!(呢條茂利一定係我
九成利迷都對呢單交易投反對票,但多位利記名宿嘅睇法就剛好相反!
好似科拿就大讚賓迪基力量、速度、體型、埋門能力兼備,夠哂全面!
係利記現時最需要嘅前鋒。而夏文叔就認為賓迪基身價雖然高達3250萬磅,
但就絕對係物有所值。點解呢班名宿同一班利迷對賓迪基嘅評價會咁兩極嘅呢?
或者係佢哋心水清啦!睇到一啲我哋普通球迷睇唔到嘅嘢……
講真,做得球迷嘅……有時候就唔多唔少都會畀自己嘅私人情緒影響判斷!
其實我哋又真係可以樂觀啲咁睇……賓迪基而家先24歲,打開英超……
至少完全唔存在適應問題!另外,佢喺維拉呢隊波嘅人腳供應之下,
每季聯賽嘅入球數字都可以達到雙位數,咁就已經證明佢絕非泛泛之輩!
所以,既然呢單交易都有99%嘅機會會成為事實,咁我哋不如就放開懷抱……
一齊祝福呢個新大舊喺嚟緊嘅一個球季唔好有咁多傷患,健健康康咁踢番季好波啦!
乜嘢都係假,我要真防中!坦白講,好似羅渣士呢種以快打慢同控球在腳嘅迫搶踢法,
其實真係好需要一個爛打嘅掃蕩型防中同一個可以喺中間做駁腳串連嘅全能中場!
但係試問呢個世界又有幾多個馬斯查蘭奴沙比阿朗素呀!
當然,如果你想搵啲比較近似而又平平哋嘅……喺呢個市場上都仲有兩個嘅!
佢哋分別就係皇馬嘅伊亞拉文迪(Illarramendi)同埋國際米蘭嘅米度爾(Medel)……
前者啲路數同tackle都似足沙比,亦曾經有「新阿朗素」之稱
而後者就球風勇猛,攔截能力出色,喺智利國內仲擁有「鬥犬」呢個稱號。
哈哈~雖然係B級貨,不過我相信佢哋就應該點都會好過而家球隊班客串防中嘅!
屌!你哋班利迷咪繼續抗議囉!我係唔買防中呀!你吹咩?
有我契仔威爾斯沙維喺度,我搵佢一個人打防中crossover中中都已經夠照啦!(設計對白)
風繼續吹,不忍遠離……隨著土耳其中場艾達杜蘭(Arda Turan)加盟巴塞,
多蒙特男神萊斯(Marco Reus)就正式成為利物浦喺轉會市場入面嘅「年經人物」之首
咁又係嘅!呢個德國萬人迷靚仔又好波,個人仲有情有義……簽到佢番嚟淨係賣波衫都賣到笑啦!
不過,好波還好波,靚仔還靚仔……理性啲咁睇,呢位哥哥仔份傷病file仲厚過賓迪基同史杜兩份加埋……
先唔好計佢適唔適應到英超呢個問題呀!你哋淨係諗下,如果佢嚟到一個唔好彩又整親啲舊患……
跟住就場場著住套老西喺場邊睇波,到時你都咪話唔揼春呀!
上季有歐聯打,球隊就高追一班二線兵……而今季喺冇歐聯嘅情況之下,
估唔到就竟然會簽到佳尼費明奴呢種級數嘅球員……
坦白講,喺上面呢一張「候選名單」裡面,就算最後只係簽到賓迪基一個……
總括嚟講,我認為利記喺今個夏季轉會窗都算係得到一個幾令人滿意嘅結果。
我想講,無論最後個結果啱唔啱大家心水都好,至少我哋見到今季隊波係肯揼本,
點都係好事嚟!(Btw,賓迪基其實真係幾襟睇㗎!望耐啲分分鐘仲靚仔過萊斯!)
阿媽我得咗喇!柒咗咁多年,今次都總算係光宗耀祖囉!
唔使再日日著住十條牛仔褲保住個後欄!(設計對白)
舊嘅唔去,新嘅唔嚟!擾攘咗咁耐……
史達寧呢條反骨仔終於都以高價4900萬磅正式過檔曼城
4900萬磅,呢個數字對利記嚟講絕對係一個好價,
但對曼城嚟講就係一場好大嘅賭博!(雖然曼城班主啲錢真係多到洗唔哂……)
平心而論,撇除球品同人格唔講,史達寧就的確係一個潛質優厚嘅超級新秀!
佢速度高,夠靈活,盤扭技術同執行戰術嘅能力比起同齡對手亦尤勝一籌!
仲記得上季呢條反骨真係一眾利迷到佢屎忽開花……
鬼咩!你條友仔敗家獨食又鐘意死扭,真係唔畀人屌死至奇!
但公道啲講,自從阿蘇走咗之後,嗰陣得嗰19歲嘅250就立刻成為咗紅軍嘅進攻重心,
從突破、組織到攻門,大部分時間都係由一條友全部包辦。
而喺王牌射手史杜歷治受傷缺陣之下,佢就更要肩負起球隊嘅入球重擔,
所承受嘅巨大壓力真係唔係一般人可以想像得到。
咁當然,到後來我哋都知道……壓力呢啲嘢對於宇宙最強嘅屎球王嚟講就只不過係浮雲嚟!
之不過歌仔都有得唱啦!宇宙最強,間中都會受傷……我理得你條友仔幾有潛質都好呀
若然你過到曼城都仲係繼續keep住呢種不可一世嘅態度,場場波都好似葉問上身咁!
咁到時你就只會變成下一個胡禮菲臘斯!唉~但係講到尾……
無論屎球王今次走嘅方式有幾咁鳩屎都好,最後佢都總算為球會留低咗一筆巨大嘅轉會費
而佢走咗之後亦都冇講過利物浦半句壞話(暫時)……
相比起某位晏菲路過街老鼠/奧脱福名宿便/曼聯後備球員,
其實史達寧都可以稱得上係一個不可多得嘅聖人嚟㗎喇!
所以大家真係唔好再繼續屌佢後欄喇!祝福唔落,咪唱首歌歡送佢囉!今天我……
除咗史達寧之外,喺今季離開晏菲路嘅紅軍球員仲有……
喺利物浦效力咗六個年頭嘅「芥蘭強」格連莊臣(Glen Johnson)。
一借冇回頭嘅「烏拉圭奪命鉸剪腳」高亞迪斯(Sebastián Coates)。
切爾達無敵神鋒,晏菲路第一角球好手艾斯柏斯(Iago Aspas)。
勇敢嘅好丈夫、好爸爸,「利記森崎」巴特鐘斯(Brad Jones)。
到而家我都係覺得放走文基路(Manquillo)呢個決定實在係非常危險!
大家試諗下!根仔受傷復出無期,安利簡打右閘嘅表現又未如理想,
至於智慧仔呢啲就算把啦!根本一睇就知係英冠料!所以你話呀~
如果佳尼喺開季有乜嘢三長兩短嘅話……到時就真係仆街過仆街喇!
其實文基路剛加盟利記冇耐,我就已經畀佢嗰種鍥而不捨嘅拚搏精神深深吸引,
仲一度睇好佢會成為下一個芬倫或者係艾比路亞。只可惜事與願遺……
估唔到開季冇耐佢就成為咗羅渣士新戰術之下嘅最大犧牲品!
不過點都好啦!我相信我哋一眾利迷就點都唔會忘記你為球隊所付出嘅每一滴汗水,
仲有就係你喺歐聯努力換番嚟嘅嗰一球十二碼!Good Luck文仔!YNWA!
除咗一班已經確定離開嘅球員之外,喺今季好大機會將會執包袱離開晏菲路嘅仲有以下呢幾位人兄!
例如係深受一眾香港利迷愛錫嘅盧卡斯(Lucas Leiva)……
有心無力、資質有限嘅意大利前鋒波連尼(Fabio Borini)……
有心有力,但就成日遲到嘅「89分鐘先生」域奇林拔(Rickie Lambert)……
當年佢係擁有無限體能,並且攻守皆備嘅「身位王」,
今日佢係利物浦康樂組組長乒乓波高手同Twitter串咀天王!佢個名……叫做傻西安歷基
情感上,真係好想巴神可以喺利物浦留多一季去證明自己嘅實力!
但每當我諗起佢上季嘅入球數字……呢個念頭就會自動打消……
其實大家對巴神有期望都好正常嘅!畢竟佢真係而家隊中唯一一個比較有星味嘅球員,
加上佢嚟咗利記之後個人又生性咗咁多,所以一眾利迷(包括我)對佢仲存有半點幻想實在係人之常情!
但現實啲咁睇,巴神嗰種思考人生嘅踢法同現時羅渣士個戰術體系事實上就係風馬牛不相及!
所以與其留佢喺度繼續大家累鬥累、衰鬥衰……倒不如就盡早分手啦!咁樣對雙方嚟講都係一件好事!
取代屎球王嘅人選早已在陣中?講完一班已經離開同埋有可能會離開嘅紅軍,又講下一班現役紅軍……
「佢擁有史杜歷治嘅身型、史達寧嘅速度。」謝拉特曾經咁樣形容過艾比
作為利物浦喺上個冬季轉會窗嘅唯一一項重要「收購」,
艾比好快就憑著其高速嘅盤球技巧同過人嘅膽識嶄露頭角,
並以實力證明自己絕對係英超甚至係世界球壇嘅潛力股。
坦白講,論天分、論資質艾比的確係及唔上史達寧,但就勝在乖仔、謙虛、唔扭計!
我深信喺未來如果佢可以好好鍛鍊一下自己嘅射術同傳球技巧嘅話……
咁佢同賓迪基史杜歷治奧歷治沙高奧祖冼佳亞所組成嘅呢股「晏菲路黑色力量」,
就將會成為一眾英超後防同講波佬(尤其係和仔同大哥瑜)嘅終極惡夢。
相比某啲反骨仔,作為球隊副隊長大熱門嘅史基泰爾嘅態度就明顯爽快得多!
佢向記者表示自己曾經拒絕過國際米蘭嘅邀請,並一再重申利物浦永遠都係佢心目中嘅第一位。
加油啊大抽!今季紅軍條後防線就要靠你呢支定海針守住喇!
你一定好好睇實沙高路夫蘭呢兩條失魂魚呀!哈哈哈哈哈~
身體條件同體能皆一流嘅沙高曾經令一眾球迷對佢寄予厚望,
不過佢奇差嘅球感同過份高章嘅踢法,就周不時都會令身邊嘅隊友吃盡苦頭。
雖然感覺上有啲貨不對辦,但到現時為止我自己就仍然對呢位法國國腳充滿信心!
我堅信喺將來佢一定可以成為紅軍後防嘅核心主力,我以此Blog立誓!
喺上季,我哋一班利迷每次只要一睇到首發陣容裡面有路夫蘭
就必須要準備一個平安鐘同埋幾箱救心!唔知道係適應問題定還是係八字問題,
路夫蘭每次正選落場都係撞板多過食飯,就連射十二碼都會一飛衝天!
呢種荒失失同手忙腳亂嘅醜態,就不其然令我諗起當年史譚……
記得呢位荷蘭名將喺加盟獌聯初期亦曾經出現過類似嘅情況……
希望路夫蘭喺往後嘅日子能夠盡快重拾信心,
再用行動嚟去向所有人證明自己嘅身價同質素!努力啊Dejan
真係冇諗過球隊竟然會同托尼叔續約!不過都好嘅!正所謂家有一老,如有一寶呀嘛!
速度有如風馳電掣嘅西班牙左後衛艾拔圖摩蘭奴
佢喺加盟首季初登場雖然表現失準,不過其後好快就漸漸回復應有水平。
而佢喺上季作客大勝熱刺所射入嘅嗰一球電光火石嘅「絕頂金球」
就不其然令我諗起前利物浦重炮鐵閘懷斯
老實講,我覺得摩仔嘅速度同體能都屬世界頂級水平,
但係佢嘅位置感、判斷力同舞技就真係有待磨練!
而喺佢老豆謝拉特離隊之後,估計佢今季嘅狀態應該會持續低迷……
所以,喺傻西去向未卜嘅情況之下,我認為球隊實在有補購左閘呢個需要。
若要成才,先放雪櫃!喺上季曾經一度失去正選位置嘅米奴列
喺經過一輪冷凍之後果然立刻破冰重生,仲成功協助球隊創下29年來連續5場作客不失球紀錄。
坦白講,如果米仔可以一直keep住呢個狀態嘅話,咁利記就唔使成日都要為門將呢個位置傷盡腦筋喇!
利物浦上季利用蘇亞雷斯嗰筆巨大嘅轉會費一口氣簽入九位球員,
而喺呢九位新兵當中,就以德國小將安利簡嘅表現最令人刮目相看!
呢位年僅21歲嘅通天老倌踢法成熟穩重、沉著冷靜,甚有領袖風範。
從佢身上我睇到基迪拉波歷克巴布馬圖斯等德國名將嘅影子,由此可見呢位Can哥真係潛力無限。
坦白講,只係用975萬磅就可以買到一個咁實用嘅球員,實在係物超所值
外型俊朗、踢法瀟灑嘅拉蘭拿加盟利記冇耐就迅速成為一眾香港女利迷眼中嘅新男神!
而呢位靚仔亦冇辜負球迷對佢嘅期望同支持,每次落場都必定會拚盡全力……
一再用表現嚟證明自己並唔係虛有其表!左右腳皆能,技術又十分全面嘅拉蘭拿……
既擁有麥馬拿文秀麗純熟嘅腳法,同時亦擁有古治嗰份打不死嘅拼搏精神!
我認為喺整隊利物浦入面,就以佢同祖阿倫最適合領隊羅渣士現時個戰術體系。
上季呢位利記男神因為受傷患困擾而影響咗佢喺球場上嘅發揮,
不過我始終都覺得佢嗰種滿場飛嘅迫搶踢法就一定會令佢喺利記取得成功!唔信?開季你就知!
祖阿倫有乜嘢缺點?飄忽、易傷、視野窄囉!
不過到而家我就依然堅信佢喺將來一定會成為利物浦陣中一個不可或缺嘅無名英雄!
我深信佢嘅護球能力同埋喺中後場所做的串連工作一定可以羅渣士個戰術run得更流暢!
講真,如果阿倫每場都可以打番上季主場對曼城嗰陣咁嘅水準嘅話,
咁到時一眾批評佢嘅球迷自然就會立刻收嗲!哼!你哋即管繼續鬧!我就繼續等!寂寞到夜深……
利物浦上季成績大倒退,我認為其中一個主要原因就係因為射手史杜歷治全季傷多過踢。
呢位玻璃王牌射手喺上季因為屁股傷勢一再惡化而被迫提早收咧,
全季只係喺英超正選上陣過7次,入咗4球。唉~史獨啊史獨!
希望你以後能夠一直健健康康啦!有你嘅長期坐陣,真係有如星級猛將加盟呀!
利記成績,還看古仔!據《鳩crazy》記者西門淋報導,
除咗剃刀射球同滑翔衝力射球之外,最近不停閉關修練嘅古仔……
仲練成咗經已失傳已久の終極奧義「展翅射球」嘿嘿嘿~你哋一班龍門等住變紙牌啦!
若單計足球智慧呢方面,我認為喺隊中能夠跟古天奴並駕齊驅嘅就只有馬高域一人!
記得呢位塞爾維亞新星喺上季季初嗰種Hea過Hea碧嘅踢法曾經令我一度對佢失去信心……
不過幸好後來佢就漸漸適應咗英超嘅比賽節奏,而佢嘅足球天賦亦慢慢得以呈現。
希望喺新一個球季羅渣士唔好再安排一啲九唔搭八嘅位置畀佢打啦!
如果唔係我諗馬仔一世都唔使旨意喺利記有得上位!
喺度等待發酵嘅又何馬高域一人?
貌似有線講波佬、《Make Us Dream》主持陳公子嘅「新迪高」泰斯拿(Teixeira)、
謝拉特外貌同列納踢法於一身嘅羅士達(Rossiter)、
跑得仲快過C朗嘅葡萄牙中堅艾羅尼(Ilori)、
傷癒復出,並且喺U21有出色表現嘅耶斯爾(Yeşil)同奧祖(Ojo)、
冼佳亞(Jerome Sinclair)呢一對「晏菲路黑色孖寶」……
佢哋同樣都係喺度等待緊一個機會……一個可以喺球壇揚名立萬嘅好機會!
咦~睇落呢個後生仔又幾眉清目秀喎!好啦!呢個隊長臂章以後就交畀你啦!(設計對白)
由昔日嘅2000萬水貨變成現時利記一個不可或缺嘅核心球員,
新任隊長軒達臣一再以行動嚟打破大家對佢嘅種種疑惑!
為咗提升自己嘅表現同催谷體能,佢經常都會留喺Melwood訓練場額外加操,
並且喺球場上用佢跑唔完嘅氣力同打不死嘅鬥志,大大聲咁話畀所有人聽,
佢係絕對能夠勝任隊長呢個位置!亦印證咗一句話,
就係:「只要你夠努力,凡人其實都唔一定會輸畀天才。
為咗進行一次徹底性嘅大改革,除咗球員方面有大變動之外,
利物浦嘅教練團喺一個月前亦上演咗一幕人事大地震!
不過呢……你搵個連喺英甲、英乙都撈唔掂嘅Sean O'Driscoll番嚟做助教,究竟係咪痴撚咗線呢?
嗱!搵呢啲名宿番嚟幫手就似樣喇!正所謂唔打得都嚇呀嘛!麥伯,你話啱唔啱?
今季到底打乜陣?羅神話:「開季前未諗到,開季後諗唔到……」
有睇開我個Blog嘅人應該都會知,其實小弟都算係半個迷羅黨嚟!
嗱!先旨聲明!我唔係話要幫羅渣士講好說話!我自己都覺得上季個成績唔好……
作為領隊嘅就至少都要負番一半以上嘅責任!之只係大家又有冇諗過……
王牌射手史杜長期受傷,前面完全冇人入到波!貴價中堅路夫蘭頻頻失準,令到後面經常不設防……
再加上近呢幾季英超班波隊隊都開始肯揼本,有某幾隊仲好似有無限金錢咁季季玩金手指……
所以,利物浦上季最後以第六名結束球季,呢個成績查實又係咪真係差到完全唔見得人
我自己就唔係咁樣認為喇!另外,有啲人話羅渣士乜球員都唔識用,正一廢柴!
但我又想問下你哋……前季令人聞風喪膽嘅SAS組合到底係邊個打造出嚟嘅呢?
史達寧呢條反骨仔又係邊個畀機會佢上位嘅呢?米奴列能夠破冰重生,
阿蘇打到風山水起仲拎埋雙料足球先生……呢一切一切係咪真係同羅渣士完全冇關係呢?
不過……有樣嘢可以肯定嘅……就係呢條友確實係一個非常莫薑嘅領隊!
點解我會咁講?你淨係睇下佢每次一遇到強強對碰都會出事就知啦!
呢條友仔……成日都好似好驚得罪佢師父摩連奴同佢師公雲高爾咁,
次次同佢哋埋親牙就冇哂火!喂大佬呀!你唔好玩啦!
睇清楚!呢兩條茂利唔係你老闆呀下下玩禮讓……家陣叫你嚟選友誼先生咩?
你睇下以前肥賓會唔會好似你咁鵪鶉?但係又話分兩頭喎!
你話羅渣士呢個人係咪好冇自信呢?呀~佢又唔係喎!
反而佢個人就好似江華話齋,就係衰在太有自信……而且個人仲死牛一邊頸添!
大哥,有時你明知自己嗰套唔work唔該你就認衰啦!
你繼續堅持唔打防中,場場打開個閪門,咁我就算比個幾一流嘅中堅你都冇用啦!
你死都要打單箭頭,嘩~你估呢個世界真係有咁多個阿蘇咩傻佬!
之但係咁!既然而家羅渣士留任已經成為事實,而FSG又好似好睇佢台戲咁!
咁我哋大家不如就放長雙眼睇下佢喺今個球季可唔可以嚟一次絕地反擊,實行一舖過剝哂我哋棚牙啦!
各位,我要走喇!以後利物浦嘅未來就靠哂你哋喇!(設計對白)
最後喺呢度,衷心祝福我哋永遠嘅隊長謝拉特一家喺美國生活愉快、一切安好。
StevenYou'll Never Walk Alone Forever & Ever!
「跟住一齊講阿渣阿渣!跟住一齊講阿渣阿渣!阿渣!阿渣!阿渣!阿渣!」
當然,仲要恭喜羅神終於都攞到佢喺利記嘅第一隻盃仔!Yeah!好嘢!手足!掟壽包!
嘩!好撚好笑呀屌你老味!(設計對白)
喂~你到底講完未呀?餐餐鳩噏多過呼吸!大佬~夠鐘開飯喇!(設計對白)

同場加映 - 生日飯日日有得食 の 中日韓泰開心放題
哈哈~呢個月嘅生日飯真係好似食極都食唔完咁!簡直係飽到黐肺呀!
喺呢度,真係要再一次感謝哂各位請飲請食嘅兄弟姊妹!勁開心!超滿足!
關於姑姑為我準備嘅驚喜生日party,
我喺上一篇《好久不見》就經已同大家開心share咗!
至於《紅伶飯店》《金媽媽韓國配菜》……
我亦曾經喺《Welcome to my foodcourt!》呢篇Blog度同大家詳細咁介紹過!
所以喺呢度就唔再repeat喇!今日小弟我呢~
就淨係想帶大家去一間價錢昂貴嘅居酒屋同一間水準每況愈下嘅泰國菜度睇真啲!
首先講下呢一間越嚟越曳嘅泰國菜館先啦!
記得兩年前我喺一篇名為《食在紅磡 2》嘅飲食Blog度都有略略介紹過呢間嘢!
呢間舖係三個泰國女人開嘅坦白講,佢哋以前啲嘢都算係色香味俱全㗎!
不過估唔到只係兩年冇嚟……呢間昔日嘅紅磡NO.1泰國菜館就竟然變咗做劣食天堂……
嘩屌~呢八隻異形究竟係乜嘢嚟㗎?咪係小弟至愛嘅生蝦刺身囉!嗚嗚~
呢煲冬蔭功個味道都算正路嘅!不過就甜咗少少囉!
$38一個大椰青,抵唔抵就真係見人見智喇!
泰式炒菜苖加半隻海南雞,中規中矩,冇乜特別。
講真,食完呢一碟炸蝦餅……我真係有啲感動!
因為我終於都食到一樣似樣嘅嘢喇!嗚嗚嗚
不過咁!能夠有幸食到盛哥餐生日飯……
就算啲嘢有幾咁唔好食,我都係一樣會食得好開心!
老友,真係好多謝你送畀我嘅呢一份生日禮物!
喺呢度再一次祝你工作順利,All the best!
《金香茅泰國菜館》

地址:紅磡必嘉街地下90B號舖
電話:2334 6452
營業時間:星期一至日:11:30 - 23:30

各項評分(五個為滿分)

食物質素:㊣ ㊣ 
抵食程度:㊣ ㊣ ㊣
服務態度:㊣ ㊣ ㊣ 
環境:㊣ ㊣ ㊣ 
衛生:㊣ ㊣ ㊣

喺咁多位兄弟入面,華Dee一向都係最抵錫同最有我心嗰個!
佢為咗滿足我呢個壽司怪,成日都會四處幫我去搜羅一啲正斗嘅日本料理店……
而今次適逢小弟牛一,佢就帶咗我嚟呢一間位於尖沙咀赫德道嘅貴價居酒屋度開餐……
呢度個環境都算唔錯,幾適合一班三五知己約埋一齊摸下酒杯底傾下心事。
呢兩個公仔到底係嚟自邊套漫畫嘅呢?我真係諗極都諗唔到……
店長推介、時令鮮魚、和食推介……喺呢個貴價餐牌度我哋就總共試咗三樣嘢!
嘻嘻~喺食好嘢之前梗係要整番個前菜沙律先啦!
主角嚟喇!先嚟就係呢兩隻鮮味長崎岩蠔!
再嚟就係呢兩隻珍寶牡丹蝦!(咦乜咁細隻嘅……)
切咗嘅蝦頭拎咗嚟做軍艦壽司,夠哂環保!
和食推介 - 櫻花蝦餅,用嚟佐酒就一流喇!
喂靚女~麻煩整多客雞軟骨添呀唔該!
好!生日咁開心,就破戒飲番杯透心涼嘅沖繩啤酒啦!爽呀!
Yeah!好嘢!我最愛嘅壽司放題時間終於都嚟喇!
首先出場嘅……係帆立貝壽司同鰻魚壽司!
三文魚壽司、吞拿魚壽司、油甘魚壽司、劍魚壽司
是日重點推介 - 赤貝壽司、烏賊壽司
哈哈~食咗咁多生冷嘢,整番碗稻庭烏冬暖下個肚先!
兩個人埋單要成$1400……嘩~兄弟呢次真係大手筆!
多謝哂!下次你生日我一定要請你食番餐勁嘅先得!
《石亭居酒屋》

地址:尖沙咀赫德道11C地下
電話:2722 1881
營業時間:星期一至六:12:00 - 14:30,18:00 - 23:00;星期日休息

各項評分(五個為滿分)

食物質素:㊣ ㊣ ㊣ ㊣ ㊣ 
抵食程度:
服務態度:㊣ ㊣ ㊣ ㊣  
環境:㊣ ㊣ ㊣ ㊣  
衛生:㊣ ㊣ ㊣ ㊣ 

「喵~你個死佬去食好嘢又唔預我?㗅~~~」
喂貓仔呢啲相係之前影落㗎!你睇清楚先啦!
「喵~我理Q得你呀!死人頭!咬死你!喵~」哎吔~~~

170 則留言:

  1. 好波啊~~
    總覺得球員有紋身.......型仔好多^^

    回覆刪除
  2. ✬*¨✫º好友★・*☾.•☁甜夢・゚。Zzz
    ▓╔╗╔╗╔╗╦╗ ╦╗╗╦╔╗╗╔ ╦
    ▓║╦║║║║║║ ║║║║║╦╠╣ ║
    ▓╚╝╚╝╚╝╩╝ ╩╚╝╩╚╝╝╚ ║
    ♬*♪Ϡ₡*•♫*Ϡ₡*♫•Ϡ₡*♩♪•.Ϡ₡*•

    回覆刪除
  3. 成篇文連隊長個名都唔提一下 真係犀撚利

    回覆刪除
    回覆
    1. 你肯定自己有睇哂篇文?定還是你唔知隊長個名叫Steven?

      刪除
    2. 睇果陣仲打緊未update 完咪冇神軒個名

      刪除
  4. good job巴打..寫得好好
    分析獨到之餘又不失幽默 , 好文..support

    回覆刪除
  5. 呢篇我肯定睇唔晒,因我要去開飯,brother!

    回覆刪除
    回覆
    1. 睇埋下半截啦,不過有得睇就冇得食,都幾吊胃!

      刪除
    2. 呵呵~又辛苦哂Shu兄了!

      刪除
  6. 補祝你生日快樂,最緊要身體健康,開開心心

    回覆刪除
  7. 呢篇我一路拖拖拖...到最後張9宮格, 睇完,多謝哂XXD

    回覆刪除
    回覆
    1. 哈哈哈哈~阿毛,你正話睇嗰陣篇嘢仲未寫完㗎!我寫寫下瞓著咗!哈哈哈哈哈哈哈~

      刪除
    2. 係佐敦都好似有間3姊妹泰國菜, 野食唔錯, 但係間鋪細到冇盆友, 要縮埋, 好似罰坐咁, 食得超辛苦XXD
      又睇左啦, 再次多謝哂 ~~~

      刪除
    3. 好!下次同姑姑去試下先!些些!

      刪除
  8. 嘩﹗真係好利害,亂寫一通都一樣犀利﹗

    回覆刪除
    回覆
    1. 心血來潮!連珠爆發!⊙_⊙

      刪除
  9. 精彩絕倫,功力深厚,佩服佩服。

    回覆刪除
  10. 迷軒不須道理2015年7月22日 下午1:22

    James milner只係一個好普通同average既球員
    簽佢都係貪佢英人同埋可以打幾個位
    佢著七號其實有啲打破傳統
    希望廢羅可以有耐性等馬高域收成
    心目中佢先係最適合嘅七號人選

    btw等左你成年先再出文真係等到頸都長
    咪咁鬼懶啦巴打

    回覆刪除
    回覆
    1. 哈哈~冇法啦!唔係成日得閒,亦唔係成日有mood!

      刪除
  11. 你真係好有心機寫,犀利!

    回覆刪除
  12. ⊹┌─┐.. ─┐
     │▒│ /▒/
     │▒│/▒/
     │▒ /▒/─┬─┐
     │▒│▒|▒│▒│
    ┌┴─┴─┐-┘─┘
    │▒┌──┘▒▒▒│
    └┐▒▒▒▒▒▒┌┘ ♥
    ♡└┐▒▒▒▒┌\ /
    ❥•ೋ♦ღ。*❤.°❣。*
    好友♦・゚黃昏好&傍晚好喇喂*☁`・✱
    超快又是快樂星期三*¨*落雨天好收衫呢

    回覆刪除
  13. 狂兄每次出blog定必圖文並茂,超正。生日飯日日食,證明你人緣甚好。

    回覆刪除
    回覆
    1. 真心朋友越來越少,真係要好好珍惜!

      刪除
  14. 補祝你生日快樂~~生日大晒, 放縱吓都應該!!!!
    養貓仔易唔易打理架??

    回覆刪除
    回覆
    1. 鐘意一樣嘢,就算幾難打理,就係一種幸福。

      刪除
  15. 見到曼城用天價買史達寧,我心中暗笑,希望我預測錯喇!一隊球隊成功與否?好講個別球員嘅狀態,球員之間有無合作精神,領隊是否壓得住場,同埋有無球運等等。利記太多新球員,要時間磿合,所以季初嘅成績未必會如羅渣士所願!我雖是阿記球迷,但假如利記對雙曼或者車仔,我都會企喺利記一方!

    回覆刪除
    回覆
    1. 希望今季大家一齊上前四!踢曼聯出去!

      刪除
  16. 利記英超成日排三三四四,幾時先可做下一哥.....

    回覆刪除
    回覆
    1. 我個人就唔係太貪心,年年有三三四四已經好滿足!

      刪除
  17. 食咩唔重要了,最重要有心知心為自己祝賀.

    回覆刪除
  18. 提起史達寧正一衰仔一名.
    好彩最後有好嘢食補番數!

    回覆刪除
  19. 間居酒屋好似好正咁wor。。。(=^・^=)。。。

    回覆刪除
  20. 哈犀利呀Time Is Changing!寫得好風趣抵死又多金句,就連我呢個非利迷都睇得好盡興好開心!同埋真係好鬼鐘意你post D嘢食圖,次次都睇到人流哂口水…

    回覆刪除
    回覆
    1. 哈哈~坦白講,呢篇我真係亂寫一通!

      刪除
  21. 長崎岩蠔正正正!!!!泰斯拿其實真係ok!!淡定,傳送到家,但呢位新迪高已經係一個年紀唔算好輕既新秀,古仔仲係當打,佢打呢個位置好難有發揮空間!!

    回覆刪除
    回覆
    1. 我覺得佢應該會成為下一個蘇素!

      刪除
  22. 加咗咁多新兵希望今季至少返返前四啦

    回覆刪除
  23. ─▄██▄──▄██▄
    ▐█░████████▌
    ─██▒███████
    ──▀██▓███▀
    ────▀█▀▀。・゚゚・。週末
    ╔══╗────╔╗╔╗╔╦══╦═╦═╦╗╔╗
    ║╔═╬═╦═╦╝║║╚╝║══║═║═║╚╝║
    ║╚╗║╬║╬║╬║║╔╗║╔╗║╔╣╔╩╗╔╝
    ╚══╩═╩═╩═╝╚╝╚╩╝╚╩╝╚╝═╚╝
    好友✬*¨✫•*☁*★晚安喇喂⊹・゚☾。Zzz*¨✱

    回覆刪除
  24. D食物唔錯啵,迪哥哥。

    回覆刪除
  25. hehe~呢篇我直接拉落下面睇~~~望到壽司同岩蠔好想食ar~~~~~

    回覆刪除
  26. Teddy早晨!
    生辰宴...吃不完!

    回覆刪除
  27. 你食下好嘢, 又食下無咁好的嘢, 人生交替, 唔怕啦

    回覆刪除
  28. 午安小子,總覺得賓迪基種打法會適合車仔多d.

    回覆刪除
    回覆
    1. 同意呢。佢似 tough 一點的戴倫賓特,啱晒車仔套路。

      刪除
    2. 同意呀山sir!所以我先會話賓迪基呢種前鋒就只有摩佬先會識用!

      刪除
    3. inanna:哈哈哈~想當年名震英超嘅大檸賓,而家到底人在何方呢?

      刪除
  29. 海南雞飯好食呀,久不久我都會出去食一餐。

    回覆刪除
    回覆
    1. 唉~阿姨!而家喺香港要食到一碟令人滿意嘅海南雞飯,真係談何容易啊!

      刪除
  30. 而家已經好難響香港食到好味嘅泰國菜,間居酒屋好似好正喎,d壽司睇落好新鮮!!

    回覆刪除
    回覆
    1. 可以參考下其他Blog友嘅推介!有時間我都會去試下!

      刪除
  31. $1400去《御八築地》好過

    回覆刪除
    回覆
    1. 咪就係!啲嘢個質素又唔差得好遠!個份量又大件過佢!呢個價錢喺築地四個人食都飽到嘔啦!

      刪除
  32. 米拿好洗好用,係鏝走寶
    佢出道到依家都keep住有表現
    大小球會都踢得好,轉會又唔洗轉會費
    何況都踏入3字頭啦,踢三四年度都走啦
    利物浦又有咩大賽要打,人地都肯來,
    米拿真係有實力架,係睇下個領隊會唔會有改善啦
    唔係既,簽咩人都死啦:o) :o) :o):o) :o) :o)

    回覆刪除
    回覆
    1. 傳聞佢會係球隊嘅新副隊長,咁我諗羅神搵佢打防中嘅機會率都好高!(¬_¬)ノ

      刪除
  33. 賓迪基真係比人低估得好緊要
    佢埋門力強,而且有大爆頂頭鎚,set二傳,配合佢走位埋門,j 得過:P:P:P

    史達寧係埋門同個agent 7d姐,突破能力速度起碼英超top 10
    有改變戰局能力而且佢而家先20歲仔,猁唔留佢一定後悔[369][369][369]

    回覆刪除
    回覆
    1. 就睇下賓迪基去到利記之後會變成杜奥巴定希斯基啦!至於250就……幾勁都冇用啦!一個已經變咗心嘅人你仲死留佢喺度托咩?

      刪除
  34. D人真係唔識睇波[sosad]
    利記宜家個陣,最重要係祖阿倫,好似阿記既阿迪達咁重要
    認真,有lucas補返防中位joe allen放心派牌,真係J出血[bomb]
    同埋猁宜家pass complete 95% 傳得最多波又係佢 :o) :o) :o)

    回覆刪除
    回覆
    1. 但係佢真係太易傷喇!仲要成日一打返起就傷嗰下先慘!

      刪除
  35. 資深球迷上季已經發現羅神鋪好晒條皇者之路
    你以為利記上季拎第6係偶然?真係話你on9怕你嬲
    我地今季專登唔踢歐洲賽,為既就係專心踢英超,一早plan鳩定晒喇!
    1) 我地係5次歐洲冠軍,歐洲賽踢少一年有乜所謂,
    即係屌少你老婆一晚半晚都唔會因此離婚架啦
    2) 成鳩日話big4 big4 ,逼你老母,今季我地劍指英超冠軍!
    3) 今季冠軍,下季踢歐聯,皇者再臨,其他球隊落場全部含撚!
    先講陣容,我地今季有神龍米洛連
    出左名反應快,就算你射個波上看台佢一樣save落度打快攻
    中堅有全歐洲最強之盾高路托尼,一個地面致命傳送,巴塞d短傳都行埋一邊
    其他球員(髮泥王神軒、新鄧加、威爾斯沙維)負責打氣,接應傳球既屎獨鬥志即刻幾何級上升。
    我地有全歐洲頂級攻擊線屎獨+賓迪基,場場入你3,5,7球根本唔撚係問題。
    同場加映歐洲金靴獎最強預測:

    15/16 屎獨
    16/17 賓迪基
    17/18 屎獨
    18/19 賓迪基
    19/20 屎獨

    老老柒柒,以波論波,理性討論
    咁既陣容,其實唔好講歐聯,世界盃都分分鐘拎埋你。
    岩岩聽國際足協果邊考慮緊破例俾5次歐聯冠軍利物浦參加2016世界盃
    睇怕空穴來風,事必有因。

    回覆刪除
    回覆
    1. 哈哈~小強又喺度鳩改啲濕鳩潮文!

      刪除
  36. 睇完波又有好嘢食,又一篇好好睇的BLOG。

    回覆刪除
  37. 咁多好嘢食!我都想日日生日咯!

    回覆刪除
    回覆
    1. 我全個七月都生日!呵呵呵~

      刪除
  38. 石亭我同bf之前都去過一次,D嘢都ok...刺身壽司新鮮不過舊飯就極之細舊,想喺度食到飽飽冇番千幾二千蚊根本就冇可能出門口...同埋我覺得嗰度D waiter好煩,一味sell你,你唔制就黑面,好狗眼看人低feel...

    回覆刪除
    回覆
    1. 我又冇呢個感覺喎!可能我好早就飲醉咗!哈哈哈哈哈~

      刪除
  39. 《金香茅泰國菜館》好似好抵食喎!
    煲冬蔭功....正!
    $38一個大椰青....好似貴咗D喎!

    回覆刪除
    回覆
    1. 嗯~D嘢食嘅水準仲要差咗咁多!

      刪除
  40. 我都好興趣試下間居酒屋,比個岩蠔吸引左~...

    回覆刪除
  41. 好久不見,
    仍然長篇,
    仍然張力十足。
    生日快樂!

    回覆刪除
  42. Time Time呢篇萬字波經好正啊!搞笑得來又到位!跟住仲有咁多野食睇!真係超掂呀!Like Like Like!

    回覆刪除
    回覆
    1. 呢篇寫得又快又爽!呵呵呵~

      刪除
  43. 你就好啦~~~咁多餐好味生日飯~
    祝你身體健康~

    回覆刪除
  44. 近廿年來以表現計可以承繼傳奇7號得老麥同蘇神,最記得老麥之後嘅史米沙咁就係抵受唔住壓力先讓埋件7號出嚟改著11號。

    左閘人選總係好似有d唔穩陣,摩仔睇黎暫時都係好難成才,安歷基大傷過後又一直打唔返昔日水準,你講得啱!買左閘係必需....

    回覆刪除
    回覆
    1. 起初我對基維蝦都好有期望㗎!只可惜……史sir都算係咁啦!話哂都係525功臣之一!

      刪除
  45. 居酒屋喺日本根本就係一啲好普遍嘅食店,估唔到嚟到香港竟然會變成超高檔食店。

    回覆刪除
    回覆
    1. 我未去過日本,所以唔太清楚!哈哈~不過隨著我個病慢慢復原,由今年十月開始,我就會多啲去一啲唔同嘅地方行下散下心!

      刪除
  46. 狂小子你隻貓真係好得意,表情多多咁,配埋你D抵死旁白,一絕啊!

    回覆刪除
    回覆
    1. 佢係性格演員,已經拎過N屆貓界奧斯卡最佳男主角!

      刪除
  47. GJ今年先30其實一D都唔老!!
    佢係衰在早熟早殘,古治一走咗佢就開始成日遊魂球場!!
    不過點都會記得佢上季拚命飛插果一球頭槌,祝佢幸福!!!

    回覆刪除
    回覆
    1. 芥蘭強嚟利記頭兩季真係勁到我J出血!佢同傻西當fit嗰陣真係左右兩路畀佢哋玩哂,不過隨著佢哋跌watt,隊波呢兩個位置就一直青黃不接!唉~

      刪除
  48. 兩隻鮮味長崎岩蠔買相好靚, 似是很新鮮!

    回覆刪除
    回覆
    1. 都幾鮮味,但就差咁啲海水味!

      刪除
  49. 好多居酒屋都係搵笨,會收好多附加費,所以埋單必定貴百多蚊

    回覆刪除
    回覆
    1. 我其實好少去,我呢啲麻甩佬都係鐘意去啲打冷舖同大排檔度同班friend開餐隊下啤!

      刪除
  50. 利記今季響轉會市場都算積極,
    但個人認為繼續比人渣士教隊波應該都唔會有乜起色.
    你睇下而家曼狗年年都狂洗溪錢鳩買球星,
    阿記肯冼錢,車仔曼城不嬲金錢足球鳩撚屎.
    睇現時情況,利物浦想靠一班二線兵殺出重圍當真唔係咁易!
    除非費明奴可以打到好似哨牙仔咁啦,仲要好好運用賓迪基呢件兇器.
    話到底我都想利記好,好過比班曼狗打番起然後日日到處大小便,乞鳩人憎!

    回覆刪除
    回覆
    1. 今季爭前四真係難上加難,車仔已經預咗一個席位,然後阿記又開始肯洗錢班新秀又漸漸上力,曼聯自從沉咗一季之後近兩季就用自己嘅品牌效應發哂癲咁大灑金錢買咗多位球星,曼城雖然開始有啲跌watt但始終班主身家雄厚差極都有個譜,此外,利記仲要同熱刺、愛華頓甚至係修咸頓爭頭七席位,所以話,如果利記想繼續keep住用一班二線兵打天下,就只會偏離BIG4位置越來越遠……

      刪除
  51. $1400蚊嘅生日飯 , 我咁大個女都未有人請我食 , 証明你呢位老友真係對你好好呢~!!

    回覆刪除
    回覆
    1. 下次請番佢食魚翅撈飯、鮑魚花膠湯!XDXDXDXD~

      刪除
  52. 文章對球員嘅描術可謂單刀直入。無論觀點上是否有出入、但感覺上是正的!

    回覆刪除
  53. 這間居酒屋看來很吸引,但價錢方面真的偏貴。

    回覆刪除
    回覆
    1. 係呀!我哋兩個都估唔到!

      刪除
  54. 嘩我最愛ge壽司ar~~不過咁貴我就食唔起 !
    講起黎你位朋友都好闊綽wor~~

    回覆刪除
    回覆
    1. 所以我先至會話呢個兄弟最抵錫!

      刪除
  55. 你的Blog文就是有一種會令人一看不可收拾的神奇魔力,明明以為快要完了,怎知底下還有一大篇,哈哈,有趣有趣。

    回覆刪除
    回覆
    1. 你估我唔到!你估我唔到!呵呵呵呵呵~

      刪除
  56. 冬蔭功好蝦人煲
    鮮味岩蠔睇見就想食
    沖繩啤酒夏天飲一流

    回覆刪除
    回覆
    1. 但可能一年冇飲酒嘅關係,而家隊兩杯就暈陀陀……

      刪除
  57. Hendo is going to be a great captain. I know Skrtel is good too. But Hendo is the chosen one ,

    回覆刪除
    回覆
    1. 我比較buy CAN哥!不過球會竟然畀得軒仔做,做球迷嘅都係會照樣支持嘅!

      刪除
  58. 睇好Ibe做新班尼斯,希望暫時唔好吹咁大先,BR就係成日話250世界級幾勁幾勁,搞到佢不思進取又耍大牌

    有賓廸基,有希望佢唔好傷的史獨,有可客串的費明奴,及表現暫時對辦的Ings,巴神其實都有乜運行,而且佢人工都唔低,走都正常嘅

    文仔...仲記得歐聯不斷跑上去出高波,跑翻落黎逼搶,又後生,識用真係好好用

    回覆刪除
    回覆
    1. 巴神拍賓鳩其實有得諗,只係渣屎哥死要面係要打單箭!

      刪除
    2. 貝加兄:艾比只要唔好咁多傷患,上位指日可待!巴神我感情上想佢留低,但理性上佢走其實係對自己同球會都好,免得再大家喺度嘥時間!文仔的確好使好用,有心有力嘅球員真係幾多個都唔嫌多,可惜……

      刪除
    3. 作者已經移除這則留言。

      刪除
    4. 兄弟:羅神死打單箭唔打防中是常識吧?

      刪除
  59. 居酒屋上星期同老婆去過尖沙咀漆咸道南間大吉居酒屋都唔錯,D野食OK,夜晚兩個人去食的話就3百幾左右,但記得早少少去,一晏左好多人排隊

    泰國菜我食開一間城南道既叫鴻陞小食,價錢比起小曼谷既平,但D野食一d都唔差!講起都想食佢個生蝦同燒烏頭!仲有果個蝦醬炒飯

    回覆刪除
    回覆
    1. 謝謝貝加兄提供超有用資料!

      刪除
  60. 居酒屋我推介位於銅鑼灣告士打道280號世貿中心P502號舖的《目利きの銀次》,這間居酒屋至今仍然是我最喜愛的食店之一。我特愛他們的壽司拼盤,種類夠多,份量十足,同樣新鮮甜美,非常優質,美味しい。

    回覆刪除
    回覆
    1. 謝謝寂寞先生提供極有用資料!

      刪除
  61. 放走林拔利記一定會後悔!

    回覆刪除
    回覆
    1. 一轉會打友賽就梅開二度!唉~其實一個有heart有射術又肯做後備嘅青訓點解唔留?又賣唔到乜錢!

      刪除
  62. 去d大間d ge居酒屋個價錢會冇咁貴~不過個格調就會比較冇feel d lor~~

    回覆刪除
    回覆
    1. 似放題feel囉可能會,不過啲嘢食就一定高質好多!

      刪除
  63. 作者已經移除這則留言。

    回覆刪除
  64. 長崎岩蠔是怎樣? 兩件幾多錢?
    軍艦壽司那綠色是??

    回覆刪除
  65. Liverpool vs HJK Helsinki 2 0 ~ All GOALS Highlights [1/8/2015]
    https://www.youtube.com/watch?v=uM-rYRWz0Ws

    回覆刪除
    回覆
    1. Malaysia XI vs Liverpool (1-1) All Goals 2015
      https://www.youtube.com/watch?v=cCALqY3w8Uo

      刪除
    2. Brisbane Roar FC Vs Liverpool (1-2) ALL GOALS
      https://www.youtube.com/watch?v=Dgo9HIIUN8E

      刪除
    3. Thailand All Stars 0 - 4 Liverpool FC. Highlights
      https://www.youtube.com/watch?v=zS6AYcKCOeI

      刪除
    4. Liverpool vs Adelaide United 2-0 All Goals Highlights
      https://www.youtube.com/watch?v=HvTAm4uGwg0

      刪除
  66. James Milner ● Welcome to Liverpool FC ● Skill & Goal
    https://www.youtube.com/watch?v=A89lzRQRuuM

    回覆刪除
    回覆
    1. Roberto Firmino - Welcome to Liverpool FC - Skills & Goals 2015
      https://www.youtube.com/watch?v=6NRoXbvBkEg

      刪除
    2. Christian Benteke - On And On - Welcome to Liverpool FC - 2015
      https://www.youtube.com/watch?v=_lcwVuBXTS4

      刪除
    3. Divock Origi - Welcome to Liverpool FC 2015
      https://www.youtube.com/watch?v=mfZeRYDzo9k

      刪除
    4. Danny Ings - Skills, Passes, Goals 2015 Welcome to Liverpool FC
      https://www.youtube.com/watch?v=DKTJhYiy-qM

      刪除
    5. Nathaniel Clyne - Welcome to Liverpool FC 2015
      https://www.youtube.com/watch?v=BtM8PZrXpP0

      刪除
    6. Joe Gomez - Welcome To Liverpool FC
      https://www.youtube.com/watch?v=SIGMtN5T4r4

      刪除
    7. Adam Bogdan - Welcome to Liverpool FC
      https://www.youtube.com/watch?v=PtL9X3GOVbw

      刪除
    8. Bobby Adekanye - Welcome to Liverpool FC
      https://www.youtube.com/watch?v=HTv_B8WwP3g

      刪除
    9. Brooks Lennon - Welcome to Liverpool
      https://www.youtube.com/watch?v=9u2_RCrh7P8

      刪除
    10. Allan Rodrigues de Souza - Welcome to Liverpool F.C
      https://www.youtube.com/watch?v=BhYtHiur-7k

      刪除
  67. 利記成績,還看古仔!據《鳩crazy》記者西門淋報導,
    除咗剃刀射球同滑翔衝力射球之外,最近不停閉關修練嘅古仔……
    仲練成咗經已失傳已久の終極奧義「展翅射球」!嘿嘿嘿~你哋一班龍門等住變紙牌啦!

    大哥預言成功.

    回覆刪除