《名副其實長話短說 之 乜都噏大集匯》

喵～今日我就想同大家講吓耶穌～你未必鍾意聽不過聽咗好過冇～

最近屋企對面個單位進行翻新工程，搞到我朝朝都冇覺好瞓！
唉～拜託佢哋班友盡快完工啦！朝朝咁樣鑽法，我真係就嚟癲㗎喇！

有咁多嘢想講，講乜嘢先好呢？首先就講吓我班老友記先啦！
早排同返咗香港冇耐嘅新地妹加埋經已失蹤多時嘅倪匡佑先生去咗Neway唱通宵K，
唔經唔覺，原來我哋三個都相識咗有十一年咁耐……

好開心可以借住呢次機會懷緬一下昔日一齊唱K唱通頂嘅青䓤歲月！～XDXDXD～



與其日夜懷念，不如立刻Action，實行玩個夠本！
當晚，各人放下拘束開懷暢飲，仲唱咗好多首飲歌，真係非常痛快！

要約埋聚舊嘅又點只一班舊K友？仲有三位識咗接近十七年嘅中學老死！
自從Alan生日之後都有成三個幾月冇圍埋一齊吹水喇！搵日一定要出嚟啤啤佢先得！ 

古語有云：「酒逢知己千杯少」，有好嘢梗係要同一班老友一齊分享！
嗱！有興趣嘅朋友，記住要盡早報名？因為名額有限，先到先得呀！

講完老友，又講吓波經，踏入2014年，利記個勢頭確實係鋭不可擋，
除咗喺聯賽保持不敗之身，仲打出咗多場令人拍案叫絕嘅代表作。
先喺白鹿徑大炒熱狗公，再返晏菲路淨食四粒拖肥糖，
而數到最經典嘅，都莫過於係喺主場強姦兵工廠一幕。

我夠膽講，今屆嘅英超聯賽絕對係近年嚟鬥得最難分難解兼夾最難爭逐嘅一季，
勢估唔到喺亂世底下，紅軍領隊羅渣士嘅表現完全令人刮目相看，
尤其係佢激活球員嘅功力，更加令小弟深深折服！
佢行事好有膽識，而且勇於求變，仲好肯畀機會同埋鼓勵班新仔，
此外，佢亦多次嘗試用一班現有球員去填補隊中嘅一啲空缺位置，
雖然球隊喺一開始仲未適應新陣式同新打法嘅情況之下曾經甩轆過幾次，
不過幸好成班波就越打越順，仲越嚟越有信心，講真呀～
如果渣哥喺季尾能夠以現時呢個殘缺不全嘅陣容保住前四甚至後上奪冠嘅話，
咁佢就好有機會瞬即成為晏菲路嘅新一代傳奇人物！
加油呀渣哥！我知你好快就會證明到畀所有人睇，球迷一直以嚟對你嘅等待係值得嘅！

教頭領導有方，球員亦輪住發威，先有SAS，後有SSS，
然後再有SSSS（Suarez + Sturridge + Sterling + Skrtel），

再加埋擁有無限體力嘅軒達臣以及越老越可愛嘅隊長謝拉特，
利記今季強勁嘅攻力確實令一眾英超守衞聞風喪膽，

其中謝記仲創下咗個人職業生涯裡面嘅助攻次數新高。

前線如狼似虎，後防卻一如以往似足一隻性感小野貓，
呢種「有前冇後，打死罷就」嘅踢法，不禁就令我諗起伊雲斯時代嘅利物浦。
咁當然，米仔、副隊同大抽嘅個人質素就肯定好過當年占士、凡美同巴比多多聲，
我諗今季之所以失球咁多，可能只係因為班後防球員仲未習慣球隊個新陣式啫！
希望佢哋同將會復出嘅沙高、盧卡斯喺嚟緊嘅賽事上都可以打醒十二分精神，
唔好再要一眾利迷㩒爆屋企個平安鐘喇！ ～XDXDXD～
 
「海鮮拼盤」惡鬥「鳩斬滷味」，最終到底誰勝誰負？3月16號晚即自有分曉！

「笑聲笑聲～～獌家拎～～快樂發心內～～」
強烈支持我最愛嘅莫椰子再度刷新佢嘅驕人紀錄，繼續推動世界球壇進步！

獌聯牌正宗齋滷味、一支富含大檸賓，再加多粒萬壽無「薑」嘅莫椰子糖……
呢個係我喺獌狗逼和富咸之後post上利迷群組嘅「找數套餐」，
只要可以睇住獌狗一路沉淪落去，本人係絕唔介意食多十幾餐齋滷味㗎！

唔知道我最尾嗰個願望到球季結束之後會唔會實現呢？喺現階段我真係完全唔敢諗！
事關一個經歷過焗桑拿同鶴頂紅年代的利迷，喺諗嘢方面係會比較負面少少！哈～

波經噏完就輪到食經，近日，我漸漸迷上咗公司附近一間叫做《風神》嘅外帶壽司店，
自從食過呢間位於必嘉街83號嘅「優質平價壽司」之後，我就冇再幫襯過《爭鮮》喇！

食完「優質平價壽司」，又帶咁多位嚟到紅磡一間好好味嘅茶記度開餐，
誠意推介呢樹嘅羅漢齋炒麵同埋XO醬雞絲炒一丁，夠鑊氣之餘又唔太油，實在係頂呱呱！

 
超抵價早餐之選，$24就有交易，我開早一定會食佢！

睇住呢間茶記開張，到後來仲漸漸成為咗佢哋嘅常客，
到而家，我同呢度個老闆娘同伙記已經熟到一個就算齋坐都會有例湯飲嘅程度，
咁都唔只呀！有時候我仲會自己斟茶同落單㖭！～XDXDXD～
 
嘻嘻～你哋睇吓！連公司嘅開年飯我哋都係搵佢哋一手包辦埋！

《永勝茶餐廳》

地址：紅磡必嘉街95號地下
電話：2365 3683
營業時間：星期一至日：08:30 - 01:00

各項評分（五個㊣為滿分）

食物質素：㊣㊣㊣
抵食程度： ㊣㊣㊣㊣
服務態度：㊣㊣㊣㊣
環境： ㊣㊣
衛生：㊣㊣㊣

前日係姑姑嘅生日，本身佢同我講話諗住去食韓燒嘅！
咁我就同佢講話，既然生日就梗係要食豪啲啦！起初佢都話好㗎！
但到咗當日，我哋就由深水埗行到太子，再由太子行到尖沙咀……
沿途仲經過好多間韓燒舖頭，但係最後，姑姑就突然轉駄話唔想食，
我事後問佢點解？佢就答我話因為佢睇到個餐牌之後發覺啲嘢太貴，所以唔捨得食……

呵呵～喺嗰一刻，我忽然間覺得自己真係好幸福呀！可以搵到一個咁為我著想嘅女人！

唔食貴價韓燒，我同姑姑就決定轉移陣地去食潮洲打冷，唔知各位Blog友仲記唔記得呢？
呢間打冷其實我喺一篇口水多過茶嘅Blog入面老早就介紹過，
亦同多位兄弟喺度開過餐，不過帶姑姑嚟食就係第一次。 

不厭其煩要再次推介呢度嘅招牌芥辣墨魚片，簡直係人間美味！ 
 
另外，佢哋嘅生腸拼鵝腸又係令人好食到停唔到口！

嗱！有相為證㗎！上年柏盛同輝少嘅生日飯我都係帶佢哋嚟呢度搞掂！
個個食完之後都讚不絕口，證明絕無老點！～XDXDXD～

《紅伶飯店》

地址：佐敦吳松街19號地下
電話：2385 3524
營業時間：星期一至日：18:00 - 04:00

各項評分（五個㊣為滿分）

食物質素：㊣㊣㊣㊣㊣
抵食程度： ㊣㊣
服務態度：㊣㊣㊣
環境： ㊣㊣
衛生：㊣㊣㊣

同姑姑打完冷，趁個肚仲有空位就嗱嗱淋去咗附近一間甜品舖度食糖水……

咳咳～呢排個人咁燥，都係時候要食返碗清熱滋潤嘅綠豆沙下一下火！

食完糖水，姑姑竟然意猶未盡，仲話想繼續掃街，
於是，我就去咗佐敦寧波街一間幾出名嘅街舖度買咗一堆口立濕畀佢同伯母做宵夜。

嘩～飲飽食醉之後仲包埋外賣宵夜，今次您應該滿載而歸喇啩？ 

正所謂無論愛得有幾深，買粒鑽石至均真！咦～睇過！又真係幾閃喎！
計我話，姑姑您就唔應該再將佢收埋喺屋企嘅床下底養曱甴喇！

間唔中都要喺適當時候畀佢出嚟見吓光先得㗎嘛！～XDXDXD～

屌～講呢啲！我同您仲邊度有計㗎衰鬼！～XDXDXD～
 
姑姑，古語有云：「女人四十先開花」，
喺呢度，先祝您年年歲歲，青春不老；再祝您歲歲年年，一生平安；
最重要係快快樂樂，幸福美滿，希望喺未來嘅日子我可以向您繼續多多學習！嘻～ 

同場加映 - 好戲在後頭之我和邱導有個約會

近排朋友、家人同姑姑都異口同聲話我成個人發福咗，
嗯～對於呢種講法，我只係想講……你哋班友真係有所不知喇！
朕近期不斷瘋狂增肥，查實係為咗新片《人肉叉燒包第三集之獌記滷味齊齊斬》、
《伊波拉病毒第二集之決戰狄波拉》以及《陰陽路第689集之睇你點死》嘅拍攝，
而企喺我旁邊嘅就係鼎鼎大名嘅「Cult片教父」邱禮濤大導演，嘿嘿～大家期待唔期待先？

除咗我之外，CoCo前排亦都落實咗要接拍一齣斥資億萬嘅驚世鉅作，
個戲名就暫定為《希特貓傳奇》，以上兩部猛片都係由《鳩噏院線》榮譽發行。

身兼《Ghostbusters》系列創作人，
兼喺戲中飾演四位捉鬼敢死隊成員之一嘅美國男星Harold Ramis，
於美國時間2月24日喺佢芝加哥嘅住所中過身，享年69歲。
 
呢個捉鬼組合，相信唔少八十後睇到都必定會深有感觸……

停筆前，亦衷心希望馬航事件嘅死難者家屬能夠早日振作，並誠心祈求會有奇蹟出現。

好喇！同大家吹住咁多先！要上床瞓覺囉！886！喵～Zzzzzz～