《史上最強之天南地北擺明居馬長篇大論亂噏一通》

各位哥哥姐姐，遠近馳名嘅口水佬又要嚟講故喇！大家快啲閃呀！

呵呵～呢個月嘅生日飯好似食極都食唔完咁，簡直係飽到黐肺！

喺呢度，再一次感謝晒咁多位請飲請食請玩請唱嘅兄弟姊妹！

我最愛嘅壽司大餐，勁豐富，超好味，多謝琪姐！

多謝晒我嘅好兄弟華Dee，呢間打冷的確係超正！

尤其係店入面嘅招牌芥辣墨魚片，真係好食到停唔到口！

所有喜歡打冷嘅朋友，請你哋好好認住呢間嘢！信我！認真係一級棒㗎！

 一班麻甩佬聚埋一齊最好去邊？咁就梗係齊齊去滾啦！
呢間位於旺角好景商場隔離嘅《厚福海鮮酒家》啲嘢確實係超級抵食，
$1一個蜑家雞／豬骨鍋、$38一客新鮮嘅三文魚刺身、$20一支大青島，
咁都唔只，到夜晚九點後入座大部分火鍋配料仲一律六折㖭！

有好嘢當然要同多啲老友分享啦！

同我兩位好兄弟輝哥同文鋒老弟滾完之後，
前幾日我又約埋幾位多年老友嚟《厚福》再滾過，

當晩，我哋開懷暢飲，談天說地，直頭係快活過神仙！ 

講開食嘢，最近公司附近又開咗一間新茶記，
呢間茶記嘅早餐好鬼特別，無論早午晚都印住「全日供應」，

嗱～呢啲老闆咪識做生意囉！下下墨守成規，遲早就聽執笠！

本人近日瘋狂迷上嘅零食新寵，大大包份量又多，可以當零食又可以當早餐。

講完食經，又講吓波經，近嚟關於阿蘇轉會離隊嘅傳聞可謂眾說紛紜，
而阿蘇多次接受傳媒訪問所講嘅嘢，亦引嚟部分球迷嘅謾罵同批評，
我唔知其他球迷點諗啦！個人就始終認為……只要阿蘇一日仲係利記嘅人，
一眾球迷就應該要一致對外，停止紛爭，咁先至係真正嘅YNWA精神呀嘛！ 

喺現階段，作為利迷最需要做嘅，就係畀啲耐性等羅渣士慢慢重組球隊，
至於阿蘇去留與否真係關我Q事咩？須知道呢個世界冇話冇咗邊個係唔得嘅！

更何況只係一支球隊，再講呀！既然做得利迷，你嘅抗壓能力就一定要比其他球迷高，
喺英超成立以嚟，利物浦一直大起大落，佢哋拎過三冠，拎過歐聯，
同時又試過瀕臨降班邊緣、星散，仲曾經面臨破產危機㖭！
所以話呢～就算最後隊波堅係冇咗蘇亞雷斯咁又點啫？
記得贏歐聯嗰年利記前面咪又係一個星級前鋒都冇！

In response to Arsenal's latest bid，Henry tweeted：

「What do you think they're smoking over there at Emirates？」

喂～雲膠！收到未呀？叫你唔好成日high大咗咁亂鳩咁噏呀！
搞搞震冇幫襯，係咪想做搞屎棍呀？唔係就麻煩你快啲過主啦！

嚟到新一個球季，利物浦一口氣簽咗多位新球員，而喺咁多位新兵當中，
我最期待嘅就係「比利時新一代門神」米勞列同埋「新9號仔」艾斯柏斯。

老將方面，買嚟頂替副隊長加歷査嘅前曼城中堅高路托尼喺熱身賽亦都有相當不俗嘅表現。

艾加同盧卡斯，最後邊個會頂上利記新副隊長呢個位置呢？
我自己就肯定撐硬艾加！點解？貪佢夠型夠雷夠響又夠霸氣囉！

嘩～你呢個古天奴呀～正宗係一場勁過一場！
睇嚟呢位巴西小將如無意外應該好快會成為晏菲路嘅新一代寵兒，我拭目以待。

唉～你話你個人呀！當日你有人唔做走去做狗都算㗎啦！
而家你仲要幫份白粉報寫專欄？計我話，你呢條友仔真係豬狗不如，人神共憤呀！

喺呢個7月，我又重新迷上電影，仲一口氣睇咗好多部猛片㖭……

前幾日喺公司睇咗由PIXAR製作，Disney發行嘅《怪獸大學》，

冇諗過套嘢又幾好睇喎！特別係王祖藍同張繼聰嘅配音，確係夠晒鬼馬！

《怪獸大學》所講述嘅其實係前作《怪獸公司》嘅前傳故事，

佢主要係交代返大眼仔同毛毛喺大學時期所發生嘅事，以及同大奸角藍道嘅交惡經過。

唔講你唔知，毛毛同大眼仔呢對最佳拍檔，原來曾經係一對貼錯門神嘅死對頭，

而狡猾自私嘅藍道，以前居然係一個性格溫和、待人親切嘅好學生，
而且仲同大眼仔做過室友㖭！實在係unbelievable呀！

若只論娛樂性，《怪獸大學》節奏明快，笑料豐富，都算得上係合格有餘，

但係以整體嚟講，就依然係前作《怪獸公司》比較出色。

呢套名叫《Dead Man Down》嘅西片（香港呢邊譯做《與敵同仇》），

係原版《龍紋身的女孩》導演Niels Arden Oplev花咗六年時間去完成嘅新作，

套嘢開頭嗰30分鐘都算係拍得唔錯㗎！劇情緊湊得嚟佈局又幾有心思，

只係去到後來就有少少虎頭蛇尾趕收工嘅feel，

而睇到尾段男主角突變Rambo橫掃千軍一幕更加係令人啼笑皆非。

既然套戲咁鬼平平無奇，咁點解我又會眼都唔眨坐定定繼續睇落去呢？
哈哈～冇計啦！鬼叫佢搵咗我新一代女神Noomi Rapace做女主角咩？
不過講開又講，自從我女神憑住《龍紋身的女孩》一片爆紅過後……
班仆街導演就經常無厘啦更安排外型硬朗嘅佢去做一啲弱不禁風嘅花瓶角色，
而今次佢喺《與敵同仇》入面仲要畀人整鳩爛埋塊面，真係屌你老味呀！

睇完Quentin Tarantino嘅新作《黑殺令》之後……
我對呢位鬼才導演嘅欽敬就有如滔滔江水連綿不絕，又有如黃河氾濫一發不可收拾！
坦白講，一個咁癲咁喪咁瘋狂嘅Leonardo DiCaprio，我真係從來都冇見過！

好多朋友同blog友都先後推介我去睇嘅《誣網》，果然係一部極之出色嘅好電影，
喺戲入面，天才童星Annika Wedderkopp超齡嘅表現都稱得上係技驚四座，
嗰種複雜嘅眼神加上深層嘅內心演技，係唔可能出現喺一個咁細嘅細路女身上。

世人總認為「童言」同「無忌」必定係掛勾嘅，人人都深信小朋友一定係天真無邪，

但喺《誣網》之中，呢種無邪嘅特質卻充當整部電影當中最巨大嘅邪惡軸心，
小妹妹Klara萬料唔到自己因為一時之氣、由愛生恨而射出嚟嘅呢一支「無心箭」，

其殺傷力竟然係可以大到幾何級數咁勁揪，仲幾乎摧毀咗男主角Lucas嘅一生。

「你哋在座有邊個認為自己唔係一個仆街，就攞起嚿石頭掟呢個仆街啦！」

黃子華喺佢嘅棟篤笑《無炭用》裡面曾經講過。
男主角Lucas喺事件發生後畀人一沉百踩，又受到一眾隔離鄰舍唾棄，
除咗畀人打、吐口水同禁入超巿之外，連最心愛嘅寵物都跟住佢無辜受害，
當睇到Lucas嘅狗狗被殺，一股難過沉重嘅心情隨即湧上心頭。
呢班自以為是嘅「道德判官」表面上就滿口正義，實則上就個個都「心中無鏡」，
人人都想明哲保身，又想身處道德高地，真相係點？喺佢哋心目中根本就一啲都唔重要。

正所謂「明刀易擋，暗箭難防」，喺片尾嘅「Last Shot」証明咗一個道理，

就係「賴屎容易抺屎難」，呢件事到最後不論誰是誰非，

喺所有人嘅心入面，都留低咗一個「不能磨滅的烙印」。

男主角酷愛打獵、食鹿肉，最終卻成為眾人狩獵嘅一頭獵物……

呢啲到底係因果報應、天理循環？定抑或係冥冥中自有主宰？
只可以講，呢齣戲留畀觀眾思考同反思嘅空間確實係太多。

此外，《誣網》嘅劇情亦令我諗起《聖訴》同《愛．誘．罪》呢兩套電影，

但前者嘅描述手法同探討嘅角度就同後兩者有啲分別。
《聖訴》同《愛．誘．罪》所表達嘅大多數都係集中喺誣告人嘅矛盾、掙扎同悔疚上面，
而《誣網》所呈現嘅就係被誣告人嘅遭遇、心路歷程同埋現實社會嘅「眾生相」。

《一代宗師》令我知道，原來王家衛都可以拍出一部好商業嘅武打電影，

雖然全片依然充斥住好多好玄嘅精警對白，但對比起以往嘅王氏作品就明顯簡單易明得多。

有一篇影評寫得好啱，佢話《一代宗師》呢套戲想帶出嚟嘅係「一代宗師」呢個概念，
而唔係一部純粹嘅武打片或者係描寫葉問嘅傳記電影，正因為咁……
大家喺片度就唔會見到葉問大戰日本仔，亦唔會見到「我要打十個」等熱血場面，
但係黑超王呢種淡淡然嘅拍攝手法，反而就帶到一份自然又舒服嘅感覺畀我。

相比起葉偉信，王家衛顯然就比較著重意境多過武打場面，
開場嘅雨中打鬥、葉問喺金樓大戰各大高手、中段同宮寶森嘅玩餅遊戲……
仲有結尾宮二同宮寶森大弟子馬三喺火車站嘅終極決戰，
一幕幕精彩嘅武打片段都極具意思，並唔係純粹拳來拳往嘅激烈互鬥。

「我們相識多年，卻從未相知。」呢陣輕輕吹來嘅漣漪，真係令人痛不欲生……

「葉先生，說句真心話，我心裡有過你。

我把這話告訴你也沒什麼喜歡人不犯法，可我也只能到喜歡為止了。」

宮二同葉問兩個從未開始，但喺宮二嘅心靈深處卻一直默默暗戀對方多年，
呢份睇落平淡但至死不渝嘅堅持，比唔少轟轟烈烈嘅愛情故事都嚟得更浪漫更感人。

「在最好的時間遇到你，是我的運氣，

可惜我沒有時間了。我選擇留在我自己的歲月裡了。」

從台詞、眼神到功架，章子怡憑住出神入化嘅演技，成功力壓群雄，
真正做到戲裡戲外兩個人，成為全片嘅最大亮點，
我諗嚟緊喺金像、金馬同百花獎嘅影后寶座，應該都係非佢莫屬㗎喇！

其他角色方面，梁朝偉嘅表現依舊沉穩無破綻，真不枉其「一代戲精」嘅美名。

兩位主角都表演出色，各個配角如王慶祥、趙本山、尚鐵龍同張晉嘅演出亦同樣叫人難忘。

「都說人生無悔，那是賭氣的話，如果真無悔，該有多無趣啊。」
聽到呢句對白，唔知點解，我內心忽然有一種釋懷嘅感覺……


由趙薇執導嘅大陸電影《致我們終將逝去的青春》，好老實講，套戲本身咁鬼肉麻我就真係唔多Like㗎喇！唯一值得留意吓嘅，就只有王菲所唱嘅嗰首主題曲「致青春」。

同王菲一樣咁有性格嘅「台灣音樂才女」陳珊妮……

佢最近所推出嘅新專輯《低調人生》都算係近期一張幾有水準嘅佳作，

全碟暫時最愛「一個人」同「Dear You And The Boy」，

前者聽起嚟似係清清淡淡，內裡查實就down到HiHi兼且殺傷力驚人，

而後者就係陳珊妮同另一位唱作才女張懸嘅一次精彩結合，

加埋第二波主打「啟示路」同點題作「低調人生」，呢堆通通都係令人百聽不厭嘅好歌。

第三屆超偶冠軍朱俐靜醞釀四年終於推出咗佢嘅首張個人專輯，

我覺得呢隻碟以整體嚟講算係中規中矩啦！碟入面有好多首歌都具有唔錯嘅流行元素，

例如係喺YouTube破咗百萬點擊率嘅「一千萬次的淚水」同「我會在你身邊」，

呢兩首歌都係由張韶涵、郭靜同范瑋琪嘅御用音樂人王雅君所創作，

一首悲傷，一首甜蜜，兩者之間，個人就較為鍾意「一千萬次的淚水」多啲，

呢首歌嘅音域廣闊，難度甚高，非常考驗歌手嘅唱功；

點題作品「存在的力量」同「愧」就顯示出朱俐靜本人嘅寫作才華；

近排狂打緊嘅嗰首「女神」，喺曲風上就有啲似蔡依林嘅style，

可能佢間唱片公司係企圖想將佢打造成新一代嘅舞台女王啦！

但依我呢個局外人去睇，成件事畀人個觀感就十分之格格不入囉！

久違歌迷十三載嘅資深女唱將趙詠華喺今年三月尾再出新碟，靚聲依舊，

無論係新歌「家」、「雨林」、「唱歌給你聽」同「給媽媽的話」，

定係重唱「一代民歌天后」鄭怡嘅「天堂」都令人聽出耳油，回味無窮。

另一位我勁鍾意嘅台灣天后級歌手葉璦菱喺前排亦推出咗佢嘅全新台語專輯。
男歌手方面，「盲人歌王」蕭煌奇嘅全新國語大碟《好好先生》真係越聽越好聽，尤其係點題作「好好先生」同埋碟內嘅次波主打「男人有淚」，前者溫暖窩心，後者有血有淚，堪稱男人悲歌中嘅XO。至於第三、四波主打「簡單的快樂」同「過我的生活」嘅歌詞就充滿正能量，而蕭煌奇嘅演繹亦畀人一種隨性而自在嘅feel，以整張碟嚟計，《好好先生》嘅搶耳度同驚豔度都比唔上上一張國語專輯《孤獨的和弦》，但就勝在水準平均。另外，各樂迷亦唔好錯過「台灣三大男高音」之一嘅趙傳大哥喺今年年頭推出嘅新碟，歌聲紮實、高亢而響亮嘅佢，今次喺專輯度仲首次嘗試挑戰做Rapper，你話破格唔破格先？

自從達哥轉咗玩福音音樂之後，我已經好少去follow佢嘅作品，

但佢最近所發行嘅新歌「烏托邦」同「夢幻園地」，就令我感受返佢昔日嘅嗰一團火。

有「大馬歌神」之稱嘅巫啟賢喺香港會展舉行兩場個人演唱會，

諗返當年小弟都幾鍾意聽老巫唱歌㗎！亦買過佢幾張正版唱片，
所以當我聽到佢話要嚟香港開Show嗰陣，個心都曾經有閃過走去買飛呢個念頭，
不過後嚟當我知道佢喺嚟緊個演唱會度將會翻唱好多首「別人的歌」嘅時候，
我就即時掟彎轉呔冇回頭，事關我一向都認為，老巫嗰一種獨特嘅唱腔同演繹方式……

就只限適用於佢自己啲歌，唱人哋嘅歌？嘩！咁就真係咪撚搞我囉！

吓！乜嘢話？古惑仔演唱會？咁點解淨係得浩南哥、山雞哥、包皮、大天二同大頭仔㗎？蕉皮、基哥同大佬B呢？仲有大飛、十三妹同蔣天養又去咗邊？喂！佢哋都係洪興㗎喎！嗱！計我話不如咁啦！你哋當晚吹雞叫哂洪興成班兄弟上台……然後再請埋東星社嘅耀揚哥過嚟做嘉賓，咁樣就真係perfect池喇！各位試諗吓，「恨怨聲」、「愛我別走」、「地踎搖滾」……仲有「肥婆隻雞甩晒毛」同「今晚扑嘢夜唔夜」，我淨係睇到啲歌名已經鬼死咁興奮！若然有幸可以喺現場聽到呢堆名曲嘅話，咁細佬就真係此生無憾！

即使無緣聽到細蔣生同耀揚哥嘅動人歌聲，唔打緊！我哋仲有瘋華絕代柏盛哥！喺收筆之前，就等佢嚟為大家高歌一曲！可能你哋會問：「喂～呢條四眼佬究竟係乜水嚟㗎？」嗱！我講出嚟咁多位千祈唔好淆底呀！呢位四眼哥哥……之唔係喺《古惑仔之人在肛門》一槍辣低𡃁坤嘅「灣仔槍神」，嘿嘿～問你／妳怕未？

喵～你仲講？就嚟天光喇喂！早抖啦你條口水佬！