我的漫畫風雲

又係一篇一直好想寫但就一路冇落到筆嘅Blog文，
今次都係多得雅虎嘅「溫馨提示」，我先至記返起六年前同自己嘅一個約定咋！～

每個人心入面都總會有一套心愛嘅卡通，小弟亦唔例外，
喺呢度，不如就等我同大家分享吓一啲陪住我一齊成長嘅卡通片同動漫人物啦！～

第一套想同各位分享嘅，係喺80s永垂不朽嘅經典名作《聖鬥士星矢》，
佢係我第一套迷上嘅漫／動畫，記得細個為咗追呢套嘢，幾乎搞到晚晚都要捱眼瞓，
因乜解究我會咁鍾意《星矢》？答案好簡單啫～連歌仔都有得唱啦！～
正所謂：無敵嘅聖衣～金剛璀璨好美麗～唔係鐵～係聖衣～著咗打都打得勁啲呀嘛！～
仲有呀～嗰班聖鬥士連啲絕招都有型有款過人㗎！～
乜嘢天馬流星拳、鑽石星塵拳、廬山昇龍霸、星雲鎖鏈、鳳翼天翔……
每招每式都有特定名堂，實在係型棍到不得了！～ 

《聖鬥士星矢》嘅角色有如天上嘅繁星一樣數之不盡，
而喺咁多位聖鬥士當中，我最鍾意嗰個就係白鳥座冰河（Cygnus）。
冰河係一名日俄混血兒，佢擁有一把飄逸嘅金髮同埋一雙迷死人嘅藍眼晴，性格冷傲憂鬱，
加上擅長用冰（可以食一世免費刨冰～XDXD～），所以又有「冰原貴公子」呢個稱號。
佢為人好孝順但弊在有鋪戀屍癖，每日都要咬住支花潛落海底下面探佢過咗身嘅阿媽，
佢命犯天煞孤星，先剋死老豆同師父，之後仲要被迫殺死埋自己嘅老友同師公卡妙，
而佢同卡妙用「曙光女神の寬恕」決鬥嗰幕，更堪稱係《聖鬥士》裡面其中一場最精彩嘅戰役。

最鍾意《聖鬥士》邊個章節？仲使問！梗係百看不厭嘅《黃金十二宮》啦！～

但唔知車田正美條友仔係咪同我哋巨蟹座有不共戴天之仇呢？
將佢畫到成個人渣敗類咁都算啦！仲要次次都死得咁鬼樣衰！～XDXDXD～

除咗《黃金十二宮》，《冥王篇》亦都係本人極之喜愛嘅章節……

「這種觀音兵  偉大到令你窒息  捨身出擊  當炮灰去送命  就是被犧牲  也是整定」
呢次大鑊喇！星矢嘅小宇宙消失咗呀！唉～為女死為女亡，為女入埋大棺材，值得咩？

當年睇完呢個結局個心真係好唔舒服，永遠打不死嘅星矢，終於都要同各fans講聲Bye Bye喇！～

想問有邊個麻甩仔嘅屋企係從來冇捐過錢畀BANDAI？

我相信大部分80後嘅家長，都應該跌過唔少錢畀呢間公司，
足以證明《聖鬥士》嘅玩具系列喺當時真係每個細蚊仔嘅收藏夢想嚟㗎！～

事隔23年，《聖鬥士星矢》嘅正統續集總算係正式面世，本來收到呢個消息我都幾期待㗎！～

之但係，你整到班雄糾糾嘅聖鬥士成個變咗性嘅美少女戰士咁，真係搵鬼睇咩大佬？

《龍珠》，可能係世界上最受歡迎嘅一套漫／動畫，

佢嘅影響力有幾大？睇怕都唔使我多講喇！先唔講亞洲地區先……
你淨係睇吓歐洲，連班鬼佬都要拍返套真人版電影嚟向《龍珠》致敬你就知佢有幾堅啦！～
問心嗰句，當年我對呢套嘢查實係又愛又恨（指動畫版），
理由係乜？咪就係因為佢哋經常鍾意搞到啲情節又長又唚囉！～
變隻猩猩又要講一集，變次超西又要拖幾集，儲個元氣彈又要儲成幾個禮拜。

講返《龍珠》本身嘅歷史，佢係日本名漫畫家鳥山明喺1984年開始創作嘅漫畫，

故事嘅概念同初期嘅角色設定，有唔少都係嚟自明代文學家吳承恩嘅著作《西遊記》，
早期嘅劇情大部分比較偏重於搞笑多於打鬥，係去到後期先變得越嚟越暴力。

呢一本絕版珍藏你哋見過未？封塵多年……估唔到仲可以搵得返！～

角色方面，《龍珠》嘅主角孫悟空係全世界心地最善良嘅一位漫畫人物，

佢重情重義、樂於助人、唔記仇，又願意犧牲小我，完成大我，
而且份人仲一啲機心都冇，絕對稱得上係一名絕種好男人，
同呢類人做朋友認真一流之極，至於做佢老婆同個仔呢～就……

有個全宇宙最好打嘅老公都唔係咁過癮㗎咋！你睇吓悟空個老婆芝芝就知啦！～
我認為佢都算得上係全套《龍珠》入面最陰功嘅女人，

個老公成日冇尾飛陀，日日淨係掛住練功同拯救地球，完全冇理過屋企嘅嘢，
佢一個女人要撐起成頭家，含辛茹苦咁湊大兩個仔，又時時都要為家計而奔波勞碌。

另外，呢嚿可憐嘅望夫石仲有兩項極之慘情嘅記錄，可以話係前無古人，後無來者，
一係佢無啦啦要接受一個同自己個孫年紀一樣咁大嘅老公（GT篇），
二係佢唔經唔覺已經做過三次寡婦（同一個男人），唉～直程係慘過白燕呀！～

孫悟空個大仔孫悟飯係我喺《龍珠》入面最鍾意嘅一個角色，

你淨係睇吓我細個嗰陣個髮型就知道我舊時係有幾咁迷佢啦！～XDXDXD～
記得打斯路大戰嗰陣，我差唔多晚晚都會捕住個電視機等睇戲，
因為喺《斯路篇》嘅悟飯的確係威水到盡，身為當輯世上最強嘅龍珠戰士，

比老豆悟空仲要犀利，之後鳥山明更打算用佢嚟暫代悟空做主角，
只係當時日本嗰面啲Die-hard fans嘅反對聲音太大，

鳥山明先至迫住要將悟飯越畫越弱，仲要貶埋佢做大茄喱啡，威力之低，

令網民紛紛發出恥笑之聲，仲抵死到幫佢起咗個花名叫「野比飯」。

外型俊朗嘅杜拉格斯都係我喺《龍珠》另一個幾鍾意嘅角色，

佢嗰個「中間分界」髮型，都吸引過唔少80後男仔爭相模仿。

你哋睇吓郭天王初出道個髮型，係咪同杜拉格斯個髮型有幾分相似呢？

以前有本漫畫仲曾經咁樣惡搞過佢哋，相當之抵死好玩！～XDXDXD～

嘩嘩嘩～呢個封面就夠晒經典喇！～
有冇人認得呢張相嘅原型係嚟自城城邊張唱片嘅Cover呢？

講到呢度，我腦裡面忽然間有一個突發奇想，就係除咗郭富城之外，

仲有啲乜嘢藝人係會同《龍珠》啲人物掛到勾嘅呢？好似比達咁呀……

「呀～格古洛～」哈哈～如果你哋唔識佢係邊個嘅話，
就嗱嗱聲去租返套《陀槍師姐II》嚟睇吓啦！～XDXDXD～

吓？乜嘢話？莫非你就係傳說中嘅超級撒亞人？～XDXDXD～

咁撒旦個女，即係悟飯個老婆比迪麗，又會令大家聯想到邊一位藝人呢？

吓？我？唔係吓化？

係呀！妳再望真啲睇吓添啦！～

哦哦～～咁我而家明白晒喇！～

喺《龍珠》度曾出現過無數個膾炙人口嘅反派角色，而當中我喜愛嘅就係佢，

一個只係會喺劇場版出現嘅型爆奸角，個名叫做布羅連，又或者係博洛尼。

喺《布歐篇》完結後，《東映動畫》就順勢推出咗一套《龍珠》嘅非正統續集叫做《龍珠GT》，

呢套動畫並唔係由鳥山明本人所原創嘅，啲畫功亦明顯比以前粗糙咗好多，
而個故事大綱更加係鬆散得很，較為可取嘅，就係佢所設定嘅嗰一個感人Ending同埋堆主題曲／插曲。

《聖鬥士星矢》喺80s成功掀起咗一股聖衣熱潮，而《龍珠》喺90s就引爆出一陣閃卡風暴，

乜嘢單閃、暗閃、閃中閃我之前都儲咗唔少，足足有成本簿咁厚㗎！～

提起鳥山明，當然就唔可以唔提埋佢嘅另一部大熱卡通《IQ博士》啦！～

作為無厘頭文化嘅開山鼻祖，段段情節都令人笑到碌地。

喺成套《IQ博士》入面我最鍾意嘅角色就係小雲、小吉同埋嗰舊粉紅色嘅米田共，

諗返起細個嗰陣，我成日都會取笑我表姐係米田共皇后，原因係佢個樣真係生得好似小雲！～哈哈哈～

真正嘅「Chok界始祖」並唔係林峯，亦唔係劉華，而係瀟灑又得，猥瑣仲得嘅則卷千平。

《IQ博士》同《龍珠》一次絕無僅有嘅Crossover，充分見證小雲力大無窮嘅神秘力量！～XDXDXD～

由冨樫義博所創作嘅《幽遊白書》，係小弟從小至今最喜愛嘅一套日本動漫，

冨樫喺呢本漫畫中發揮出天馬行空嘅想像力，創造出一段段令人難忘嘅經典情節。
套嘢一開始係以短篇故事形式去描述主角浦飯幽助點樣變成靈界偵探嘅過程，
但去到後期，冨樫就唔知點解會忽然將佢轉型為格鬥漫畫。

妖狐藏馬係我喺成部《幽遊白書》入面最鍾意嘅一個角色，
佢頭腦冷靜、聰明機智，應善良時善良，應冷酷時冷酷，係一個極受異性歡迎嘅紅髮美男。

小閻王嘅下屬、幽助嘅靚女助手牡丹，係一個近乎完美嘅漫／動畫女角色，
傻大姐嘅樂天個性加上百變嘅潮爆造型，真係教我如何不愛她呀？
我自己就特別Like喺動畫裡面口頭禪多多又古靈精怪嘅牡丹，

一句幾乎集集都會出現嘅「咦喂～」，仲鬼咁鍾意叫桑原做桑仔，
多得香港名配音員鄭麗麗嘅精彩演繹，直接令牡丹呢個角色變得更為生動同有趣。

而喺整套漫／動畫入面，我喜愛嘅奸角就係「黑天使」仙水忍。
呢個角色嘅性格非常複雜，佢本身同主角浦飯幽助一樣都係一名靈界偵探，
只係後來見識過人類極醜惡嘅一面，先漸漸走上成魔之路，仲決定要令所有人類滅亡。
我對仙水印象最深刻嘅一幕，係當佢見啲人類用盡各種超殘忍嘅方式嚟虐殺一班小妖怪，
跟住佢就當場崩潰，仲殺晒在場嘅所有人類，然後就同阿樹講咗一句：「呢度一個人都冇。」
除此之外，佢多重人格嘅特質，亦都引起好多《幽遊》迷探討同研究佢，
好佩服冨樫能夠創造出一個咁具人性化嘅動漫角色，真不愧係業界公認嘅天才。

感情線方面，幻海大師同戶愚呂（弟）之間嘅呢一段微妙關係亦都係為人津津樂道。

喺我心目中，冨樫義博係當之無愧嘅鬼才，同時亦都係一個出晒名嘅超級大Hea精，

當年佢突然草草咁結束咗個故仔，搞到《幽遊白書》個結局落得一個爛尾收場，
不過整體嚟講，《幽遊白書》就依然係一套值得大家回味再回味嘅A級漫畫作品。

「圓圈加一點  圓圈加一點  下面畫枝波板糖  再畫個呼拉圈  再畫個呼拉圈」

《叮噹》應該係唔少人心入面一個恆久而美好嘅童年回憶，
曾經有一段時間，叮噹喺我心目中嘅地位甚至比聖誕老人仲要高，
我諗有好多人喺以前都有機會會同我一樣有幻想過自己有日身邊會出現一個叮噹常伴左右。

《叮噹》本身到底有冇一個正確官方結局？呢個問題到今時今日都仲有人喺度不停談論緊，
而當中傳得最熱嘅一個結局，都莫過於話大雄本來係一個植物人，而且仲患有嚴重嘅妄想症，
乜嘢叮噹、靜宜、技安、阿福，全部都只不過係佢腦裡面嘅一啲幻想嚟……
嗰陣聽到呢個結局，真係搞到我內心極度不安，心諗阿不二雄你唔係咁大整蠱呀？

好彩到後來大個咗，我就確定呢個Dark到爆嘅結局原來只係啲人吹出嚟嘅，
妖～我真心覺得放流料呢班友簡直係罪大惡極囉！居然咁樣去傷害班小朋友嘅弱小心靈！～

《俏皮扮嘢貓》，仲有冇人記得呢套嘢呀？
佢係全世界最正嘅一套貓貓卡通片，仲好睇過紅爆全球嘅《加菲貓》。

《足球小將》係高橋陽一最出名嘅一套代表作，亦都係世界上最死唔斷氣嘅漫畫作品，
由《少年篇》、《世青篇》到《ROAD TO 2002》、《Golden-23》……
仲有一大堆短篇故事同外傳，咁樣睇嚟，高橋陽一都幾等錢使喎！～

筆者學生時期所畫嘅劣作，咳咳～真係不堪入目……再一次證明封筆是對的！～XDXDXD～

好老實講，呢套漫畫個頭係開得幾好嘅，但係本嘢去到後期啲劇情認真係拖得太離譜，
所以喺《ROAD TO 2002》之後，我就決定以後都唔會畀高橋陽一呢條友再呃到我一亳子，
去到而家，就算係唔使畀錢我都懶得再去睇呢本嘢，費事睇到眼冤！～
但有樣嘢幾搞笑嘅係，高橋陽一由我出世嗰年就一路打飛機打到上大空，
但勢估唔到打吓打吓，日本足球又真係變得越來越勁揪，最近喺奧運仲殺埋入四強添！～

喺《足球小將》裡面咁多個角色當中，我最鍾意嘅就係「玻璃王子」三杉淳，

呢個曾經令戴志偉心服口服嘅天才球員，去到世青篇就開始慢慢畀高橋陽一嚴重弱化，
唉～冇法子啦！鬼叫佢唔係主角咩！試諗吓若果佢一直冇病冇痛，咁志偉哥咪唔使上位？

《男兒當入樽》係我有生以來睇過最熱血、最感動嘅一套體育卡通，
每當《君が好きだと叫びたい》第一個音符響起嘅時候，我嘅回憶之窗就會自動打開……

一向都覺得櫻木花道呢個角色根本就係井上雄彥所創造出嚟嘅Rodman卡通版，

同樣係籃板王，同樣係壞孩子，同樣係行為出位，同樣係野性難馴嘅壞孩子，

同樣係行為出位，亦同樣係一名充滿熱血嘅運動員，

而咁啱Rodman又係本人最愛嘅一位NBA名將，所以我對櫻木呢條紅毛仔就特別有好感。

敵對球員方面，我最欣賞嘅係被稱為「帝王牧」嘅海南隊王牌牧紳一。

佢擁有冷靜嘅頭腦、強健嘅體魄、充沛嘅體能同一流嘅分波能力，

並且攻守兼備，仲攞過三次神奈川縣大賽MVP，係一個天生嘅領導者。

《男兒當入樽》嘅經典場面有好多，最引起人共鳴嘅就肯定係流川同花道擊掌呢一幕，

呢一份男人嘅浪漫，真係好難再喺其他漫畫度搵得到㗎喇！～

童夢幻影球～～提起體育卡通，唔知又有冇人認識上面呢套嘢呢？

幾年前喺屯門做嘢嗰陣，《蠟筆小新》真係陪我度過咗好多個寂寞嘅晚上，

百厭嘅小新、可愛嘅小葵、單純嘅小白，每一個角色都帶畀我好多回憶同歡樂，
可惜嘅係，隨住作者臼井儀人嘅離世，以後就唔會再有全新嘅《蠟筆小新》出現。
喺度我好想再同呢位小新嘅“真爸爸”講一聲多謝，願你喺另一個世界可以快快樂樂咁過活。

夜晚有小新陪我食宵夜，朝頭早就有花師奶一家陪我食早餐，

呢家人令我知道，原來有時候，一啲日常生活上好無聊嘅瑣碎事都可以好好笑㗎！～

好多人都好鍾意睇美食漫畫，尤其係講日本料理嗰啲，

當睇完呢堆漫畫之後，大家就可以喺視覺上滿足到平時一啲好難實現嘅美食夢想，
而喺日本眾多本料理漫畫當中，我就最鐘意以上呢兩本。
鍾意《將太的壽司》嘅理由好簡單，因為小弟人生不能冇壽司！～XDXDXD～

而鍾意《伙頭仔昆布》嘅原因，首先係欣賞本嘢個作者嗰一份無窮無盡嘅創意，

其次係草蜢所唱嘅嗰首主題曲真係好入腦， 都稱得上係動漫界嘅香港區世紀名曲。

講起一啲好好聽嘅卡通片主題曲，嚟到呢一刻你／妳又會諗起邊一首？

個人喜好如下：《長腿叔叔》《機動警察》《達爾大冒險》《高智能方程式》

《Exam》，請問呢度有冇Blog友同我一樣都曾經有買過呢本周刊呢？

全因呢本嘢，先令我認識到一堆冷門得嚟又好好睇嘅漫畫。

《Boy聖子到》，呢套嘢當年喺日本都幾紅㗎！但喺香港好似就唔係咁多人識咁。

至於《魔界美少女》呢本嘢就有少少《奇幻潮》Feel，入面嘅每一段故事都好有警世作用。

男blog友們，仲記得自己第一次買鹹書嘅經過嗎？以上呢兩本H漫就係本人生平第一次去書報攤買嘅鹹書。

呢本嘢盞鬼又抵死，正宗係少少鹹，多多趣，直頭係笑死人冇命賠！～XDXDXD～

日本有好多電視劇同電影都係改編自一啲知名嘅漫畫作品，
而當中最令我留下深刻印象同拍得最好嘅，就要數到《GTO》同《Death Note》。
先講《GTO》，雖然套劇同電影都拍得幾好睇，但係我就始終都係鍾意漫畫版多啲，
我覺得喺呢個世界上，根本就唔會有演員演得到漫畫入面嗰個鬼塚英吉，
嗰種癲癲喪喪嘅表情同埋賤賤惹人愛嘅特質，真係淨係喺漫畫入面先可以感受得到。

至於《Death Note》我反而就比較鍾意嗰兩套改編電影多啲，尤其係個結局……

居然諗得到用L嘅假死同調換本死亡筆記嚟引夜神月跌落陷阱，哈哈～真係高招！～

我之所以咁Like呢個結局，原因只係得一個，就係我唔想L輸畀嗰條PK夜神月！～哼～

其實漫畫版個Ending都算唔錯嘅，流克夠狠，尼亞夠串，夜神月又死得夠樣衰，
但個結局就稍為有啲煽情過頭，而畀條PK咁死法亦太過便宜佢了。

講返套戲我就不得不讚扮演L嘅松山研一，佢的確係演得十分神似，

而畀人彈到九彩嘅藤原龍也，我認為佢都算演得唔錯嘅，
只係可能佢喺外型上缺少咗夜神月嗰份陰沉嘅感覺，
再加上佢又冇刻意去模仿原著，先至會畀人踩得咁盡啫！～

坦白講，我有時都會諗，假若畀我擁有一本Death Note嘅話，個結果究竟會變成點呢？

答案係：千祈咪鬼畀我攞到呀！事關我份人EQ咁低，到時候實搞到世界大亂！～

好～講咗咁耐日本漫畫，都係時候要分享返一啲正斗港漫，首先係由甘小文所畫嘅《至GOAL無敵》，

咪睇本嘢啲畫功睇落核核突突咁呀～入面嘅內容當真係正斗到暈！～

我成日都會諗，假如劉偉強今時今日再拍一輯《古惑仔》……
而戲裡面嘅劇情就跟足晒原著嚟拍嘅話，出嚟個效果就必定會爆到七彩，
你哋試諗吓，向來懶係正氣嘅浩南哥忽然變咗做條陰險大奸狗喎！真係諗起都興奮啦！～

由於《古惑仔》嘅成功，牛佬嘅出版社就食住個勢相繼出版咗一系列同類型嘅江湖漫畫，

而當中令我留下最深印象嘅，就係呢本巨星雲集嘅《江湖大家族》。
劉德華、郭富城、梁詠琪、陳曉東、任達華、邱淑貞、鄭秀文、吳孟達、萬梓良……
有一集仲連木村拓哉都有，真係齋睇明星都值回書價。

《街頭霸王》係好多人心目中嘅集體回憶，但上面呢本《街霸》港漫唔知又有幾多人睇過呢？
由許景琛同李中興所創作嘅第一代《街霸》港漫，當年細佬年少無知，曾經覺得呢套嘢故事性好強，
劇情離經叛道得嚟又幾精彩，而且仲將每位角色嘅個性特質都描寫得好細膩同鮮明深刻。
喺呢本漫畫入面，春麗係阿龍條女，又係赤目司令個養女，仲多次畀人老強（差啲）；
阿KEN個名叫做賓尼，畀鐵面域加撬咗條女之後就變咗做大奸狗，之後仲大膽到背叛師門添！～
另外，佢哋仲起咗一大堆自創嘅招式名，好似乜嘢皇者令呀～霸者令呀～等等……
自問對港漫認識唔深，到大咗之後，我先發現許景琛同李中興呢兩位人兄……

原來喺大部分港漫迷眼中同樣都係被視為漫畫界嘅人渣敗類，而李中興仲畀人起咗個花朵叫做雞姦興，

到底佢兩個做過啲乜嘢傷天害理嘅事而搞到神憎鬼厭呢？咁我就唔太清楚喇！～

因為除咗呢套《街霸》我就再冇睇過佢哋嘅其他作品。

《街霸》港漫或者有好多人冇睇過，但係上面呢隻街機Game，我諗都算係街知巷聞喇啩！～

仲有呢部《超級學校霸王》集合三大天王同BIG FOUR嘅兩位成員，

仲有鄭伊健、任達華、楊采妮、邱淑貞、劉小慧、苑瓊丹同吳耀漢， 

呢個咁強大嘅卡士陣容，真係可一不可再呀！睇過嘅請舉手！～XDXDXD～

呢篇Blog係我第一次寫嘅漫／動畫文章，如無意外亦都會係最後一次……

所以我就決定要一鋪過！實行要嚟一次卡通大晒冷！～XDXDXD～

停筆前，我想喺度再一次多謝呢一個月嚟請過我食生日大餐嘅所有朋友仔！～

能夠食足一個月嘅生日大餐，我覺得自己實在係太幸福喇！～XDXDXD～