唱死不離3兄弟

一年一度嘅狂歡三傻癲唱會又嚟喇！各位準備好未？

眨吓眼呢個三傻K聚活動原來有成六年歷史，
仲記得我哋三個以前最鍾意就係去Green Box唱K，
點解？貪佢價錢夠平又可以唱通頂囉！
不過後來隨住Green Box全線執笠，大家先決定轉場到Neway。

我成日都覺得，唱K係要同呢兩個死仔唱先至夠過癮夠盡情，
最起碼我點一D偏門少少嘅歌嗰時，都唔怕會畀人當我係另類份子。

有唔少朋友都好鍾意界定我為作風古怪嘅人，
例如係經常撇低條女自己一條友去睇戲，
又或者係約埋三四丁友走去唱足一晚〝齋K〞，
乜嘢為之〝齋K〞？即係冇猜枚，冇骰盅，冇劈酒，
成晚落去淨係齋唱K，期間仲要不含半杯酒精飲品。

我真係一個能夠坐喺K房乜都唔玩乜都唔傾，只係揸住支咪就可以唱足全場嘅嗰種人，
有D朋友仲幫我起咗個花朵叫做「咪神」，要數到最癲嘅一次，

就要講返去幾年前有某個女仔friend生日，我哋七個人由夜晚八點半一直唱到凌晨五點九，

直至間舖閂門先肯執包袱離開，嗰晚我好記得除咗個壽星女之外，幾乎成班人都係〝骰魔〞嚟，

所以全程差唔多有四分三嘅時間都係得我一個人喺度猛咁唱，
然後唱到凌晨三點鐘左右，我仲喺度唱緊成版林子祥 + Beyond……
搞到我嗰位女性朋友每次同我唱完K，都會驚嘆我個喉嚨唔知係乜嘢構造！哈哈～

諗返細個嗰陣同班朋友去唱K，
基於當時份人勁怕醜嘅關係，次次落到去通常都係〝陪坐〞居多，
到大個咗個人唔怕醜喇！但同佢哋落親去，耐唔耐就要同一班三唔識七嘅人爭咪唱，
有時坐足成晚先唱到一兩首歌，仲慘到要同班蛋散甲乙丙share唱添！
你話咁樣，對於我呢個〝超級K佬〞嚟講，係幾咁冇癮同掃興呢？
坦白講，你話要我吓吓同人哋爭插歌爭先後次序，確係極之無聊兼無撚謂！

亦因為呢D經歷，以致我後嚟就極少再出席呢類人山人海嘅K聚，
廢事去到全晚戇狗狗，仲要〝貼錢買難受〞。
 
我始終認為人越大，就越會清楚同每一個朋友應該適合做D乜？

啱傾嘅，唔一定啱玩；啱玩嘅，又唔一定啱傾！去到後期，我甚至會將各個人都分門別類，

一於就吹嘅吹，滾嘅滾，劈嘅劈，唱嘅唱，細佬好慶幸喺唔同時期都搵到一班志同道合嘅〝K友〞相伴左右，

特別係華Dee同柏盛呢兩條比我更傻嘅傻佬，直頭係上天送畀我嘅兩份寶貴禮物。

呢排日日咳過不停，D鼻水又流到停唔到，足足折磨咗我幾個月，睇極醫生都睇唔好，
直到前幾日我先發現自己患嘅係寒咳，之後咪即刻煲返幾劑冬蔭功驅吓寒，咁先至好返DD，
我女友嗰日問我做乜咳到咁都仲要死去唱K？我就同佢講：「家吓你條仔已經冇乜接觸煙酒，

平時又冇乜途徑發洩，如果而家連歌仔都冇得唱，咁就真係慘無人道喇！」

卒之喺唱K之前嗰一晚，我就一個人去九龍灣睇咗兩場戲，
返到屋企就發夢都諗住Woody Allen套新片嘅橋段，搞到成晚都瞓得唔好，
跟住第朝早一起身，我就好似變咗個「山寨版毓民」咁！XDXDXD～
但話晒係一年一度嘅三傻K聚，而大家又咁啱就到時間，咁作為首領嘅我就梗係要奉陪到底啦！

喂～阿伯！有嘢睇未㗎？你咪咁Q多口水啦好唔好！

OKOK！咁就先嚟帶各位Blog友認識一下呢三條傻佬究竟係何方神聖先？

狂歡三傻嘅圍基八科 

三傻之首 - Time Is Changing（理由係年紀最大最老餅） 

英文名：上面咪有囉！
暱稱：迪淫杰、終極霸王代言人、超級爛聲王
年齡：28歲
職業：放映佬
宗教信仰：滿天神佛
配偶：巴辣琪（2003年至今）
簡介：失眠症候群，鳩嗌當秘笈

圖片來源：特別鳴謝Blog友阿呆嘅提供 

二傻 - 盛盛

英文名：Patrick
暱稱：人渣盛、翻版王祖藍、勁舞蔡瘋華
年齡：28歲
宗教信仰：瞓教
簡介：眼神夠迷人，台風殺死人

細傻 - 華Dee

英文名：Vincent
暱稱：超級巨聲、澎漲哥、慈雲山炮灰哥
年齡：25歲
職業：廚房佬
配偶：今年會有㗎喇！信我啦！
簡介：感染王傳人，勁過李克勤

好！廢話就無謂再講太多喇！馬上去歌！

夠膽你就㩒入去睇啦！嘿嘿嘿～

由於D歌只係用部I Pad 2嚟錄，用speaker嚟聽可能會勁拆聲，

奉勸一班唔識死嘅勇士，盡量就摷返個headphone出嚟嚟用啦！

「2011狂歡三傻癲唱會」Rundown & 足本收看

地點：旺角中心Neway
日期：21/9/2011
時間：21-30 - 01:30

01. 那誰（炮灰華）Click here！
02. 沙龍（炮灰華）Click here！
03. 情深緣淺（迪淫杰）Click here！
04. 無人之境（炮灰華）Click here！
05. 一絲不掛（炮灰華）Click here！
06. 電波中年絕食記（迪淫杰）Click here！
07. Victory（迪淫杰）Click here！
08. 活色生香（迪淫杰）Click here！
09. 花街70號（迪淫杰）Click here！
10. 敢愛敢做（炮灰華、迪淫杰合唱）Click here！
11. 活著多好（炮灰華）Click here！
12. 大會堂演奏廳（迪淫杰）Click here！
13. 郭富城舞林正傳聽傲江湖傳奇再現Medley（迪淫杰）Click here！
14. Medley:痴心的廢墟/愛的逃兵/變奏/偏愛/曾經（迪淫杰）Click here！
15. 大俠霍元甲（炮灰華）Click here！
16. 家變（炮灰華）Click here！
17. 好歌獻給你（炮灰華）Click here！
18. 紋身獵人（炮灰華）Click here！
19. 愛不是遊戲（人渣盛）Click here！
20. House of the Rising Sun（迪淫杰）Click here！
21. 讓一切隨風咸濕版（人渣盛、迪淫杰合唱）Click here！
22. 靜夜的單簧管（迪淫杰）Click here！
23. 同是寂寞人（炮灰華）Click here！
24. 黑擇明（炮灰華）Click here！
25. 黑夜不再來（迪淫杰）Click here！
26. 頭髮亂了（人渣盛）Click here！
27. 吓（炮灰華）Click here！
28. 放開你的頭腦（迪淫杰）Click here！
29. 月球上的人（炮灰華）Click here！
30. 誰能明白我（迪淫杰）Click here！
31. I Honestly Love You（迪淫杰）Click here！

《21/9/2011狂歡三傻癲唱會嘅部份實錄》

留住溫度、速度、溫柔和憤怒嘅〈沙龍〉！

經已有成N年冇唱，嚟自咖哩王子嘅〈情深緣淺〉。

華Dee喺當晚唱到入晒戲嘅〈無人之境〉，掌聲唔該！

好Q翹口，好叉難唱嘅數白欖神曲〈Victory〉。

濃痰久久化不開，又例牌要唱返首阿Lam叔嘅歌嚟開開聲！

唱完〈活色生香〉，再嚟多首〈花街70號〉，

身邊有班friend成日都講笑咁話我點親D歌接近80%都係喺度玩命，
但我就係好享受呢種感覺，試諗吓！

若然唱歌唔嗌破個喉嚨，又點可以盡情宣洩心裡面嘅抑鬱呢？

兩兄弟合作整多首〈敢愛敢做〉，實行唱到虛脫為止！

華Dee嘅〈活著多好〉，個死仔講過話佢第時唔喺度嘅話個葬禮要播呢支歌喎！

我嘅童年回憶，香港一代舞台王者著褲城至尊Medley！！

華Dee嘅飲歌〈紋身獵人〉，家陣冇得fing咪睇落點都係爭D嘅！

登登登～有請二傻盛盛！亦都係成晚唯一一個有勇氣願意出鏡嘅人！

等我嚟唱返首經典英文歌先，The Animals嘅〈House of the Rising Sun〉。

同盛盛合唱〈讓一切隨風〉嘅咸濕版〈做一晚泥工〉，

此片段只適合年滿十八歲並且心智成熟嘅人士觀看。

王菲嘅〈靜夜的單簧管〉，講起上嚟首歌都有好耐歷史。

華Dee唱畀心上人聽嘅〈同是寂寞人〉，感覺極之lonely。

唱到我青筋爆現嘅〈黑夜不再來〉，總之揀返個正常版本嚟唱啦！

有冇人仲記得呢首收錄喺《地踎搖滾》嘅side track呀？

梅姐嘅〈放開你的頭腦〉，係我第一首認識嘅梅艷芳國語歌。

華神獻上Encore前最後一曲，嚟自《認了吧》專輯嘅〈月球上的人〉。

掌聲我向夢想裡尋～儘管一切是狂〝想〞～

呵呵呵～嚟到呢個moment，終於都忍唔住要嚟個大走音喇！

現在係凌晨一點半，連全場嘅only one粉絲（我女友）都瞓鬼埋，
就只剩低小弟一人，唱埋呢首ending歌〈 I Honestly Love You〉……

「Woo～曲終人散！撒溪錢……撒D鹽……送客！」

二人變三人，三人變四人，細房轉大房…… 
呢一晚，我完全感受到自己個喉嚨好似喺度燃燒緊咁，
睇嚟，我都真係要〝封咪〞返一排先得喇！嗚嗚嗚嗚～

正所謂「歲月催人老」，喺呢段日子裡面，大家嘅外貌同性格都改變咗唔少，

依舊冇變過嘅，係我哋之間嗰份深厚嘅友誼，我只想講，你哋嘅人生就由你哋自己去決定，
無論係對定錯，我都冇權去同兩位揸主意，但係，當需要我出現嘅時候，

只要係能力上幫到嘅，我都必定樂意隨時侯命，直到有一方老死為止。 

過多一分鐘就係我老友細傻華Dee嘅牛一，

於是我就依佢意思將呢篇嘢喺佢生日當日post出嚟！

嗱～華仔，又大一歲喇！都係時候要學識堅強D去面對所有逆境，
喺新嘅一年，祝你心想事成，早日「一矢中的」啦！