曲終人散

等了足足十六個年頭，終於等到這一日……

坦白說，我還是第一次對一場世界盃決賽那麼著緊的！
由我接觸足球賽事的第一天開始，荷蘭就從未殺入過世盃決賽，

就這樣，四年又四年，我足足等了四個四年，才等到今日。

儘管到最後荷蘭仍是落敗了，但我心裡面卻沒有太大的失落感，

原因是對著如日中天的西班牙，今仗果真是輸得心服口服，
的確是荷蘭技不如人，其實他們能夠捱到加時已經算是超額完成。

橙色軍團，四年後再來吧！Sneijder，加油！

要選這場賽事的Man of the Match，我肯定會毫不猶豫選擇屢救險球的Casillas，
看到他在賽後喜極而泣的表現，作為荷蘭死忠的我亦深被感動。

當然，在加時尾段取得致勝入球的Iniesta，同樣也是功不可沒的一員。

再一次恭喜西班牙！恭喜Xabi！恭喜Torres！Congratulations！

此外，我還要向新鮮出爐的金球獎得主Diego Forlan作出最崇高的致敬！
這位31歲的烏拉圭射手在今屆世界盃的表現確實是相當出眾，絕對是實至名歸。

《我的2010南非世盃記事本》

2010-06-21

巴西 VS 科特迪瓦賽後感:

好一場世紀大龍鳳，批肘、擒拿手、兜巴星、收山腳樣樣有齊，
再加上一班球員的浮誇演出，簡直可以提名奧斯卡最佳動作電影！

2010-06-22

西班牙 VS 洪都拉斯賽後感:

西班牙最終雖以2-0獲勝，但這隊狂牛軍團的出線形勢仍不是十分樂觀，
還有在下半場初段，我就稍嫌他們踢得有點hea，而韋拿射失的那球十二碼則只能說聲可惜。

我並不是西班牙的支持者，不過還是希望他們能夠進身次圈，
理由是以一個純球迷的角度來看，西班牙的踢法的確是 賞心悅目，
再者，本人亦不想在十六強淘汰賽中再看到一大堆如希臘這樣拚命死守的悶蛋球隊，
因此，希望西班牙可以繼續好好加油吧！另外，亦衷心祝願王子能早日重拾佳態，
盡快擺脫利記天才型射手早熟早殘的慣例，切勿步入科拿以及曼聯後備名宿奧雲的後塵。

2010-06-22

個人心水預測:

A組：烏拉圭（首名）、墨西哥（次名）
B組：阿根廷（首名）、尼日利亞（次名）
C組：美國（首名）、英格蘭（次名）
D組：德國（首名）、塞爾維亞（次名）
E組：荷蘭（首名）、丹麥（次名）
F組：巴拉圭（首名）、意大利（次名）
G組：巴西（首名）、葡萄牙（次名）
H組：瑞士（首名）、西班牙（次名）

2010-06-24

英格蘭 VS 斯洛文尼亞賽後感: 

若論精彩程度，呢場波遠遠唔及對面嘅美阿大戰咁好睇，
但都恭喜晒順利進身次圈嘅英格蘭，雖然佢哋今場贏得一D都唔輕鬆，

但比較慶幸嘅係，成班波總算係漸漸打出個隊形，

同埋一如我先所講，一出迪科爾果然馬上立竿見影，
希望卡比路會繼續keep住用呢位後備奇兵打正選啦！
而經過今場比賽之後，亦再一次證明「雙特組合」根本係唔work，
謝拉特今場打得好好，甚至比對美國嗰場打得仲好，表現絕對合格，
可惜佢個拍檔林伯依然係踢到荒失失，好似六神無主咁。
後防方面，穩守右後防嘅Johnson Baby今日就瞻前顧後，好鬼搶鏡！
至於占士……哈哈～你真係好鬼有型呀！仲越打越有信心添！
咁辛苦先入到十六強，拜託卡比路叔叔就唔好再做縮頭烏紗喇！

除此之外，亦要恭喜晒首名出線嘅美國，回顧佢哋喺分組賽嘅表現，絕對值得我哋大力鼓掌！

2010-06-25

意大利 VS 斯洛伐克賽後感:

呢場波我只可以用「優勝劣敗」呢四個字嚟到形容，
意大利整個上半場都喺度發緊白日夢，一直要等到派路出嚟，成隊波先叫做似樣返D！
想當年，意粉兵團曾經擁有一隊令一眾星級前鋒頭痕非常嘅頂尖後防，

諗唔到嚟到今日，呢支上屆世盃冠軍居然就交出一份咁難睇嘅成績表，

尤其係一班後衛嘅表現直程就錯漏百出，冇個集中，特別係年華已去嘅大簡，

而上場逼和巴拉圭嘅功臣迪羅斯喺今場波入面就突然化身成隱形俠，
講真呀～我覺得意大利之所以能夠喺最後階段連追兩球，
好大原因只係因為對面嘅斯洛伐克已經打到索晒氣嘅關係，並唔係佢哋打得特別好。

喺呢度再一次恭喜晒斯洛伐克同埋史基泰爾，意大利嘅意外出局，

我認為荷蘭好應該引以為鑒，千其唔好輕敵，一定要打醒十二分精神呀！

2010-06-28

十六強 - 德國 VS 英格蘭 賽後感:

英格蘭今場波雖然喺比數上畀德國大炒特炒，

但喺形勢上，德國查實都並唔係全場一面倒㗎！

我認為英格蘭之所以會輸到呢個地步，

同嗰球極具爭議嘅問題球確實有好大關係！
屌你！好明顯個波就入晒白界裡面㗎啦！

個球證同班旁證根本就全部發雞盲！
老實講，如果嗰球波入咗，成個結局可能就會有機會改寫！
不過又話分兩頭，可以一下子輸到四球咁多，

我覺得成班英格蘭球員都係要畀人打pat pat㗎喇！
先講巴利呢條友仔，我都唔明佢喺中間究竟有乜嘢作用？
叫佢分波又分唔到，缺乏創造力之餘又唔夠硬淨，
特別係第三球失波佢更加要負上90%嘅責任。
至於「雙特」喺今場裡面嘅表現就總算都叫做係有返D嘢睇，
謝老四一如以往夠搏夠搶，林伯特就冇再做隱形人，仲踢到滿場飛添！
已經射得咁Q靚都入唔到波，我只能夠講句：「你唔夠運！」

對於卡比路今場嘅種種戰術同調動安排，
小弟就依然係摸不著頭腦，點解球隊輸緊三粒畀人你都仲係咁鬼死板㗎？

仲要換走全隊最有威脅嘅老大哥迪科爾出去？
喂～你明知史力加（朗尼）經已唔見咗對射門鞋好耐㗎啦！
而家你仲要擺個更加唔識入波嘅大舊（希斯基）入嚟？
阿卡比路叔叔，家吓你有咁唔想贏咩？我諗極都諗唔明……
高治明明係現時英格蘭入面入球率最高嘅一位球員，
點解你到咗最尾關頭都死唔換佢入場博下奇蹟呢？

寫到最後，亦都要讚一讚德國今場D突擊的確係打得好好，

尤其係第三球波，德國小將奧斯爾實在係處理得相當冷靜，
睇住佢攞波嗰下已經攞得好靚，之後仲要望到定晒先交畀梅拿射入，
呢位日耳曼明日之星，真係好有前德國名將慕拿嘅影子。

除咗奧斯爾之外，鎮守中堅嘅費特列治，亦都係一位默默耕耘同付出嘅無名英雄。

2010-06-28

十六強 - 阿根廷 VS 墨西哥 賽後感:

今屆世界盃到目前為止都應該係歷年嚟最多錯判嘅一屆，
墨西哥開段表現出色，戰術靈活而且極具侵略性，
真係打到阿根廷班球員氣都咳，咁樣畀個錯判影響實在係相當唔抵！
墨西哥輸第一球波存有極大爭議，但第二球波就完全係輸自己喇！
因為後防嘅一個「白痴失誤」，令球隊再度陷入萬劫不復之地當中。

講開又講，阿根廷入嘅頭兩球都好似入得唔係好夠說服力咁，
但係迪維斯所入嘅第三球世界波，就認真令人無話可說！
嘩～個波靚到呀！十足十《足球小將》入面小志強嘅猛虎射球一樣，
墨西哥個龍門佩雷斯真係飛到盡都掂唔到個波皮。

墨西哥雖然輸咗場比賽，但成班波嘅整體表現絕對冇失禮街坊，
尤其係後衛沙斯度同埋新晉國腳查維亞.靴南迪斯更加係令我眼前一亮。
前者嘅腳頭甚重，D遠射腳腳有譜，後者嘅優秀演出比起對面嘅美斯更搶鏡，
呢位新仔速度快得嚟走位又靈活，埋門質素又高，唉～畀條死獌狗買到件好嘢添……

2010-06-29

十六強 - 荷蘭 VS 斯洛伐克賽後感:

荷蘭喺整場波入面畀我嘅感覺係佢哋根本仲未放盡晒嚟踢，

而班波踢出嚟個風格，就似足咸豐年前嗰隊意大利咁。

首先喺領隊方面，放棄咗名牌雲巴士頓，改用實而不華嘅雲馬維克，

喺踢法上雖然悶咗好多，但就比以前穩定咗好多。

須知道以往荷蘭畀人個觀感通常都係「有頭威無尾陣」，

但嚟到今屆，成隊波一路打起嚟就非常沉穩實際，

不過又話分兩頭，荷蘭由首圈到十六強，其實都冇遇過乜嘢棘手隊伍，

所以我希望下場佢哋真係可以踢得再進取D，

事關面對巴西呢類頂級球隊，如果仲係諗住打穩守波嘅話一定會久守必失，

加上假若荷蘭無咗洛賓，成班波嘅進攻範數就會立刻減少，

淨係單靠狀態仲未top fit嘅雲佩斯喺前面真係未夠㗎！

仲有就係好心下場荷蘭班球員守越位就守得好D啦！

若然頭先斯洛伐克班球員finishing好D嘅話，你哋可能已經要執包袱走人喇！

喺呢度，我仲想特別讚一讚荷蘭陣中嘅幾位贏波功臣，
首先係射入第一球嘅洛賓，好老實講，人人都知你係一招走天下，
但偏偏就係冇你符，就算捉晒路都照樣要食你塵，呢D咪級數囉！

而第二位功臣就係入第二球波嘅中場大腦史尼達，
佢唔只助攻助守分波準確，仲成功搶到中場個控制權，
論整體表現絕對稱得上係今場賽事中嘅MVP。
至於第三位功臣史迪基倫堡，呢位守門員除咗喺比賽尾段屢救險球之外，
喺之前嘅賽事入面，亦都一直保持著穩定嘅演出水平，
我相信，荷蘭一代門神雲達沙都應該可以放心退位讓賢喇！
最後一位要讚嘅，係利物浦嘅「金霸王先生」古治，
論技術佢當然係唔及雲佩斯同洛賓啦！但就勝在夠勤力，
成場不停走上走落，又幫波又拉邊又助守，為成隊荷蘭帶嚟無窮無盡嘅生氣同動力。

但係平心而論，以荷蘭今場嘅整體表現嚟計，確實係未夠班去挑戰皇者巴西。

2010-06-30 

十六強 - 西班牙 VS 葡萄牙賽後感:

正所謂「兩牙」相爭，必有一傷，而最後落敗的，是較為保守的葡萄牙。
提子國在初段的穩守突擊算是做得不錯，雖然攻勢不多但就踢得有板有眼，

較為可惜的是個別球員始終質素有限，以致未能好好把握多次機會，
但要數到全隊當中最令人失望的，相信應該非C.Ronaldo莫屬。
這位葡國新球王在今場的表現可說是乏善可陳，完全給對面的皇牌射手Villa搶盡風頭，
其實有留意C.Ronaldo的球迷大概都會知道他在一些大型賽事上通常都會化身成隱形俠，
今次亦唔例外，而他的失準演出，就導致葡萄牙的進攻範數大大減少。

反觀西班牙就是勝在隊中球員有質素，加上領隊Del Bosque調動球員得宜，
例如是果斷換入高大中鋒Llorente來代替演出平平的F.Torres，
這位後備巨人除了高大擅頂之外，其腳下功夫亦相當不俗，這個調動很快便收到成效，
Llorente的制空能力搭配David Villa的射手觸覺，成為了西班牙今場的取勝關鍵。

另外，我亦想讚讚西班牙一位無名英雄，他就是Joan Capdevila，
這名效力維拉利爾的左後防今場助攻助守表現搶鏡，
但完場前他到底有沒有被R.Costa侵犯？對此我就真是有所保留啦！哈哈～

雖說成王敗寇，但我都想讚揚一下兩位表現稱職的葡萄牙球員，
他們分別是金毛左閘Coentrao以及小動作多多的守門員Eduardo，
尤其是於完場後哭崩長城的Eduardo，我想若不是他的話，葡萄牙肯定不只輸一球。

2010-07-03

八強 - 荷蘭 VS 巴西賽後感:

荷蘭今場之所以贏到巴西，查實真係有D運仔，

基本上佢哋成個上半場都好似喺度遊緊白魂咁，
一直要去到下半場Melo球Own Goal出現，班友先至識醒。

巴西上半場踢得順風順水，個勢直頭係入梗四強咁制，
但係因為一個Own Goal，就搞到某幾位球員踢到慌失失兼走晒樣，
之後畀Sneijder頂入多粒，全隊波就即刻散晒，
而去到後尾Melo一腳踩落Robben度，呢張紅牌確實係食得極之無謂，
我真係唔明，堂堂一個足球王國，D球員嘅心理質素點解可以差成咁？
最好笑係一開始巴西領先緊一粒嗰陣，班球員經已好鬼躁底，
尤其係Robinho同埋領隊Dunga，講真，連身為教頭都咁容易失去冷靜，
嬴緊一粒都仲喺場邊十足乩童上身咁，真係唔知佢為咩？

仲有，我始終覺得Dunga喺前線調動方面的確係好有問題，
永遠只有Plan A冇Plan B咁！Fabiano係唔差，

但同巴西以往班World Class前鋒相比就仲係差好多皮，

你睇KaKa一冇狀態，球隊就無辦法搵到第二個進攻球隊員做替補。
Grafite？大熟大勇經已係前季嘅事！Nilmar？Sorry！完全唔知佢嘅作用係乜！
卒之睇來睇去，成堆前線根本冇一個孭得起入球重擔嘅重心人物喺度，
去到呢個時候，大家係咪會好懷念大細哨同Rivaldo佢哋呢？

至於荷蘭，我覺得除咗個別球員之外，整體嚟講佢哋其實都係打得好一般，

成隊波打得最Sharp嗰個，反而係最粗枝大葉嘅Kuyt。
今屆我已經唔只一次讚賞過這位球員，估唔到今場對住實力強橫嘅巴西，
佢嘅表現依然係相當對板，仲喺尾段救出咗一個空門，

而當荷蘭落後巴西一粒嗰陣，佢單人匹馬殺入對方禁區狂抽嗰球確實係非常勇猛。
另外，守門員Stekelenburg亦都Keep住有十分好嘅演出，
特別係救出Kaka嗰球絕妙遠射，實在係令人拍爛手掌。

但講到今場荷蘭嘅MVP，我認為一定非中場指揮官Sneijder莫屬，
今場Robben同Van Persie等前線主力都打唔出水準，
若果唔係Sneijder，荷蘭可能真係會一粒都入唔到，
咁當然，我仲要讚讚領隊Van Marwijk！當隊波領先巴西一粒嗰陣，
佢竟然夠薑用前鋒換前鋒，擺明唔同你死守，呢種做法真係好正面！
不過另一方面，我又好擔心荷蘭現時嗰班前鋒嘅埋門質素，
Touchwood講句！如果Van Persie有D乜嘢意外，Huntelaar同Babel點擔大旗呀？
計我話與其選呢班敗家仔入去，不如你就搵阿馬面徐榮返嚟幫拖仲好啦！

賽後有好多巴西球迷都話荷蘭好賤，唔只收買球證仲頻頻插水，
針對呢一點，我想講嘅係，查實巴西同荷蘭大家都係半斤八兩je！
先講黑哨呢個問題，係～荷蘭今場係好多毛手毛腳，
Van Bommel喺比賽尾段連環踢人，再加埋Sneidjer犯手球，
竟然就黃牌都冇張，之但係若果話球證全場係偏幫荷蘭嘅話，
咁Lucio喺禁區裡面犯手球點解又唔畀十二碼先？
跟住Daniel Alves蓄意踩Van Bommel咪又係一樣冇攞牌！
計我話，與其鬧人黑哨，倒不如就屌柒個亞洲球證亂鳩咁吹啦！
呢條友仔完全控制唔到個場面，但就真係冇黑哨冇偏幫囉！
再講Robben嗰一球插水，我初頭都以為佢係扮嘢，
然後睇返慢鏡先發現，原來真係有條友勾到佢隻後腳㗎！

唉～講開又講呀～今屆世界盃班球證嘅執法水平真係曳到一個點，
令到我哋一班球迷睇得極度無癮，就係因為你班契弟成日亂柒咁吹，
最終搞到贏嘅又唔光彩，輸嘅又覺得唔抵，認真係激Q死！

2010-07-03

八強 - 烏拉圭 VS 加納 賽後感:

呢場波實在係太經典，由開場一路精彩到完場，明明贏咗99%都可以輸返，

未到最後一分鐘，都唔知邊隊會贏，簡直係好睇過戲！

作為波迷睇到呢一場張力十足嘅世紀龍爭虎鬥，絕對係有今生無來世！

加納方面，首先我好想向Gyan鼓掌致敬，先射失一球關鍵嘅十二碼，
然後到互射十二碼嗰陣，佢竟然選擇第一個企出嚟射，

名副其實喺邊度跌低就喺邊度起返身，認真係叻叻豬！
但可惜嘅係，加納班球員就正宗係四肢發達、頭腦簡單，

尤其喺互射十二碼嗰陣更加明顯可以睇到呢一點，
喂～射十二碼唔好唔助跑，呢樣嘢阿叔以前已經成日講㗎啦！

至於最多人爭議嘅，肯定係Suarez嗰球手球救空門！
針對呢一幕，個人嘅睇法係，有時有D嘢冇話公唔公平嘅，
而家紅牌有畀，十二碼又有畀，咁你自己把握唔到真係關人Q事咩？
講真，就算打籃球都有犯規戰術啦！我相信畀著邊個球員都有機會會咁做！
不過最抵死嘅，都係球證畀紅牌Suarez嗰陣，

佢條友仔居然仲夠膽死扮晒嘢指一指自己個心口扮無辜！
嘩～你條哨牙仔呀！唔走去做戲真係嘥鬼咗你囉！

2010-07-04

八強 - 德國 VS 阿根廷 賽後感:

真係冇諗過阿根廷會畀德國炒四蛋，完全係無話可說！
德國隊證明咗現代足球係唔可以單靠一個人去踢嘅！
照而家咁睇，今年隊德國都幾卵恐怖，有技術之餘仲要有埋Teamwork，
而阿根廷方面就只能夠純粹靠幾位前鋒嘅個人技術去闖關。

我承認我之前的確係有少少低估咗德國隊嘅實力，
我一直都以為巴西同西班牙先至係今屆嘅大熱門，
而且就咁望落去德國隊班球員嘅個別質素又好似唔係好高咁，
例如係Klose，佢技術平平無奇，今季喺拜仁更加係踢到影都冇，
但估唔到一著起件國家隊波衫，佢就即刻變咗做另一個人咁。
其實唔只係老將Klose，今場一班德國新秀又係個個踢到曉飛咁，
上屆世界盃已經彈出咗Podolski同Schweinsteiger呢兩個金童，
今屆仲要加埋Ozil同Thomas Muller呢兩件老人精，嘩～認真係犀飛利！

2010-07-07

四強 - 荷蘭 VS 烏拉圭 賽後感:

呢場波幾好睇，每球入波都入得好靚，尤其係雲邦賀斯嗰球，

簡直稱得上係今屆世界盃嘅最佳金球（暫時）。

睇住荷蘭球球都瞄住個死角嚟入，烏拉圭個龍門應該都幾無奈。

荷蘭今場波同上幾場一樣，都係帶住D運仔咁贏，
但我覺得佢哋今場就至少打返應有嘅水準出嚟（進攻方面），
特別係第三球波，好明顯完全係戰術方面嘅成功，
咁當然，古治出波個落點又的確係靚絕嘅！

但係當荷蘭領先緊3-1嗰陣，班友仔嘅老毛病又再度發作，
除咗衰輕敵同唔集中，仲成鬼日玩回傳，認真係唔知衰！
同埋呢……阿保拉奴斯真係好鬼炸彈囉！下場可唔可以唔好再出佢呀？

雖然喺四強行人止步，但我亦要向落敗嘅一眾烏拉圭鬥士作出深深嘅致敬，
你哋今場真係打得好精彩好熱血，絕對係雖敗猶榮。

2010-07-10

四強 - 西班牙 VS 德國 賽後感: 

我覺得西班牙今場贏波完全係贏球員嘅個人質素，

真不愧為地上最強，控球指數高到爆晒燈，
成班波嘅表現夠晒穩定，除咗開段沙比傳失過幾腳波之外，
其餘時間佢哋嘅失誤都好少，令一向擅長打突擊嘅德國隊根本就無從入手。

我始終認為路維呢次嘅部署實在係有D過份保守，
唔敢搶攻之餘又搶唔到個主導權，仲輸埋個中場畀人，
最搞笑嘅係德國班高佬竟然就畀個矮佢哋成截嘅佩奧爾頂入致命一球，
哈哈～真係無計啦！西班牙繼Euro 08之後，又再一次格食格揮低大肉腸，

但係如果西班牙再係下下執意要將D波玩到咁幼細嘅話，
相信佢哋遲早就會害死自己！嘿嘿～本人熱切期待呢一日嘅來臨！

停筆前，我好想鬧爆柏度呢條on9仔！死獨食怪！你當王子透明㗎？