2009年8月21日星期五

園長首領的自白

「對唔住,雖然我個樣確係生得兇狠咗D,
但其實...我只係一個面惡心善嘅大叔嚟咋!」
園長先生

雙葉幼稚園的園長。42歲。本名高倉文太。樣貌雖然可怕,但是很和善,會投入幼教事業是因為在東京唸大學時有次迷路時問路被路人當作企圖襲擊他們,因而在數次被人懼怕後在某個地方意志消沉地坐着發呆,但當時有位小朋友看出他內心的善良,送他糖果,受到感動的他因而在畢業後投入幼教。小新稱其為「組長」(在日本是黑道老大的意思)。因為樣貌恐怖,一方面保證了兒童的安全。但去小新家拜訪時,被臨近的居民誤會,導致警察出動的鬧劇。園長先生寫了一手好書法,在「寫書法」的單元中曾讓園長秀出他的好筆功。
每次睇《蠟筆小新》,我都會覺得園長首領嘅遭遇同我好相似,
我哋同樣都係嘅人,齋睇就似匪徒,查實就好龜毛。
所謂「面」,即係話一張睇起嚟「邪惡的臉」,不過個心地就係善良嘅...
嘅人有一個好處,就係可以減少畀人恰同搵笨嘅機會,
但壞處就係成日都會畀人誤會你係一個大惡人。
園長首領同我嘅遭遇,亦令我忽然間諗起兩句《無間道》經典對白...
「對唔住,我係差()人!」「邊個知呀?」
雖則話以貌取人確實係好膚淺,但好老實講....
十三至二十歲呢段時間嘅我,又的確係抵人將我當賊扮嘅。
兇狠嘅眼神,一副「串串貢」嘅嘴臉,頭髮散亂、衣衫不整、飾物多多....
一隻超閃嘅耳環,滿手攻擊性戒指,再配上一頭勁搶眼嘅金色highlight,
一股獨一無二嘅MK味,真係諗起都想嘔呀喂!
或者係我個人自我保護心太強又太過情緒化啦
當發現有人企圖想恰我嘅時候,我一定會先發制人,
呢種性格,好聽D叫做有自衛能力實質上就係疑心病重同EQ唔夠高。
我之所以會有呢種燥狂性格,其實同我嘅成長環境都有好大關係,
我阿爸阿媽以前有段時間係住喺[薄扶林] ,村內龍蛇混雜,惡人齊集,
喺呢個「九反之地」經常出入,久而久之,我嘅性格亦因此而變得狂妄自大,
再加上嗰陣屋企嘅麻煩事又有一大堆,呢一切,令一個本性善良嘅細路頓時迷失咗方向....
唔只性格變得反叛難搞,仲成日自以為是,以為惡就係一切,
返到學校就日日撩事鬥非,頂撞老師,喺走廊食煙,喺天台隊酒....
仲最鍾意喺樓梯口「放飛劍」落去整蠱人,簡直係無法無天!
講真呀~家吓D咩嘢校園集體毆鬥個案,我地嗰陣真係差唔多樣樣都做齊,
但只係因為嗰陣唔流行拍片上網,先冇畀人揭發出嚟,
記得中學嗰陣有個女同學,就曾經用「恐怖」兩個字嚟形容我哋嗰時嘅惡劣行為。
有時候,假惡發得多就會變成癖,到最終只會損害自身嘅人際關係,
於是後來我就開始嘗試做返原本嘅自己,先卸下一身標奇立異嘅盔甲,
然後再將個「數字頭」染返自然嘅黑色,跟住盡量收斂一下自己嘅脾氣,笑多D,
雖然到依家,一D同我唔熟嘅人,對我嘅第一個感覺依然都係離唔開「臭串」同「賤格」呢四個字,
但係至少佢哋就唔會好似以前D人咁睇我,咁就証明我所做嘅決定係冇錯嘅!
咁當然啦!當D壓力積聚到某個位,就好應該要爆出嚟!
等佢唔好成日谷住谷住,但當發完惡心情輕鬆咗之後就好㩒「Stop」喇!
千祈唔好再去重新點著個火頭,近年喺呢方面,全靠女朋友嘅「嚴密監管」,
我已經明顯有好大嘅進步,希望以後我都可以繼續好好咁keep住啦!
喂喂~嗰D咩嘢姨媽姑姐呀!三姑六婆呀!人哋老母呀!
你哋真係唔好再屈我教壞你哋D仔女喇!
事關我而家只係一個戇居嘅廿六歲老派宅男嚟咋!
哈哈~有日無意中畀我喺網度搵到一張好抵死嘅惡人面相圖...
嘩~真係仆你個臭街呀!除咗第四樣之外,我全部中Q晒!
麥玲玲師傅話,惡人惡相有以下四點特質:

1.眉粗、頭髮硬:不論男女,都會較有男子氣概,多數有對關刀眉,殺氣大。

2.三白、四白眼:心胸狹窄較小器,心地無咁仁慈,經常目露兇光。

3.顴骨高、鼻樑直:顴骨主權力,顴骨生得高,為人鍾意話晒事;鼻樑直,為人主觀,唔鍾意聽人意見。

4.嘴翹、哨牙:呢類人唔嘈唔安樂,特別鍾意嗌交,成日搵人撩交嗌。

15 則留言:

  1. 上面個公仔好醜樣!!
    [版主回覆08/21/2009 03:10:00]
    死啦!~我覺得除咗個髮型同棚哨牙之外,我有幾分似佢添!!~

    回覆刪除
  2. 我5信 !!!!!!!!!!!!
    [版主回覆08/21/2009 03:20:00]
    我都唔(想)信 !!!!!!!!!!!!

    回覆刪除
  3. Hehehehehe
    [版主回覆08/21/2009 03:26:00]
    條眉真係好似!~

    回覆刪除
  4. 條眉......都似我 !!
    其他......冇忽似 !!
    [版主回覆08/21/2009 03:40:00]
    原來大家都係"粗......眉"人!~

    回覆刪除
  5. 小粗啦 !!
    [版主回覆08/21/2009 04:10:00]
    我大粗呀!!~

    回覆刪除
  6. 佩服佩服...................
    [版主回覆08/21/2009 04:19:00]
    不敢不敢..................

    回覆刪除
  7. 利害利害 !!
    好高興認識您....
    [版主回覆08/21/2009 04:43:00]
    我都係!!

    回覆刪除
  8. 咁飲杯啦 !!
    [版主回覆08/21/2009 05:00:00]
    CHEERS!!!!~

    回覆刪除
  9. 玲玲出黎又睇掌喇

    回覆刪除
  10. 哈哈......原來你個樣生得好惡0架!
    不過, 惡相雖然係天生, 但後天都可以補救0既.....
    咁你以後就多些笑容, 或者時刻保持微笑啦!
    [版主回覆08/22/2009 06:54:00]
    努力中!~

    回覆刪除
  11. 再誇張d ar你 你係痴漢ar 痴線個痴ar ma
    [版主回覆08/24/2009 22:31:00]
    邊有誇張呀!?無呀....無呀....

    回覆刪除
  12. 講真呀 我第一眼見你果陣真係覺得你好死串架
    成日射哩眼望人 笑得又奸 行路又un下un下
    [版主回覆08/22/2009 06:53:00]
    妳似係形容緊D痴漢多D wor!~
    挑!~妳以前咪又係冷口冷面!!~連D MK仔都怕咗妳....

    回覆刪除
  13. 係呀...園長比一個天真無邪的小朋友感動...
    要立志成為一個培育孩子的工作...個集好感動呀...
    外表真係好難判斷一個人...所謂佛口蛇心...衣冠擒獸
    [版主回覆08/24/2009 22:30:00]
    哈哈~~園長成日都俾小新玩!~仲有阿梅(其中一個Miss)!~

    PS:原來果日《頭文字D》只係做一晚....之後又做番小新!!~

    回覆刪除
  14. 頭文字D也敵不過小新呀......魅力是沒法擋

    回覆刪除
  15. ♣♠惜福妃♠♣2009年10月5日 下午8:27

    呵呵 )))

    回覆刪除