日式生日大餐 - 旺角板前壽司（4/7/2009）

老實講，其實咁多年以嚟，我都冇去過《板前》食壽司，

而對呢間嘢嘅印象亦一向都唔多好，

事關之前唔記得係《板長》定《板前》咪曾經畀人揭發過幾單嘢，

當中就包括陰毛刺身同埋多宗中毒事件，

所以當琪姐同我講話今晚嘅目的地係《板前》嘅時候，我個心當堂涼咗一大截！

到後嚟呢位阿姐仲要話我知原來佢同我一樣，都係從來冇去過《板前》度食嘢...

我當時心諗：「姐姐妳玩嘢咩？查實係妳自己想食咋吓嘛？」

最後，我懷住博一博嘅心態去櫃枱攞位，

嗯～我相信呢啲case應該都係佔好少數嘅je！生日流流冇奶油咁Q好彩啩？

哼！等咗成粒鐘，終於都有位喇！！

咦？個茶杯又幾盞鬼喎！

三文魚壽司、北寄貝壽司、帆立貝壽司

抓貝壽司、象拔蚌壽司、鱆紅魚壽司

魚背壽司、吞拿魚壽司、平目魚壽司、天使蝦壽司、油甘魚壽司

芥辣墨魚軍艦壽司

佐賀和牛壽司（琪姐極度推介，可惜我係唔食牛㗎！）

呵呵～估唔到呢度啲壽司食落又OK喎！
我認為如果你係嗰種去親日式食肆都好鐘意嗌到成枱都係壽司嘅人嘅話，
咁《板前》絕對係一個非常不俗嘅選擇！
整體嚟講，佢哋嘅食物質素同服務態度都好好，
但都係嗰句啦！喺我食過嘅日本料理店裏面，最正而又價錢合理嘅...

始終都係《大埔御八築地》，哈哈～埋單$350，多謝晒琪姐！

《板前壽司》

地址：旺角登打士街56號家樂坊1樓1-8號舖 

電話：2385 8160
 
各項評分（五個㊣為滿分）

食物質素：㊣㊣㊣㊣
抵食程度： ㊣㊣
服務態度：㊣㊣㊣㊣
環境： ㊣㊣㊣
衛生：㊣㊣㊣

時間過得真快，轉眼間我已經廿五不再，

而家我仲老過譚校長呀！至於我今年嘅生日願望係乜？

嗯～都係同往時一樣啦！就係希望我同身邊所有人仲有一眾Blog友...
大家都身體健康、事事順利同開開心心咁去過每一日，衷心祝福各位！