短暫的生命

早排幫呢齣戲打trailer，齋睇個戲名仲以為係一部法國文藝片，
點知後來發現佢原來係一套非常寫實嘅港產片嚟！ 

喺預告中佢哋特別強調呢部戲有「絕少電影夠膽採用的三級題材」，
的確，呢類題材喺港產片入面確實係較為少見，喺外國反而就見怪不怪，

不過，能夠勇於放棄北上市場，呢一點已經好值得我哋多多鼓勵！
望返近年香港有好多電影都好似淨係想拍畀班大陸人睇咁，

有D仲係純粹為咗個市場而拍，搞到拍出嚟嘅嘢就無晒港片嘅原有風味。

言歸正傳，我起初對呢部《短暫的生命》都幾期待㗎！
原因係我一向都幾鍾意睇一D比較寫實化嘅港產片，
例如係《香港製造》呀～《三五成群》呀～

同埋早年徐克嘅《第一類型危險》等等…… 

好可惜嘅係，當我知道呢套戲嘅導演……
係出晒名「誠意十足，但技巧好俗」嘅羅守耀之後，

我個心就當堂涼咗一截，事關呢類題材係好考導演本身嘅功力，
拍得太激又怕過唔到電檢，說教意味太重又會悶親D觀眾，
要喺呢兩點中間取得平衡，實在要花多D功夫先得！ 

咁究竟羅守耀嘅執導功力比起上幾套作品嚟講又有冇少少進步呢？

哈～大致上都係差唔多風格嘅嘢啦！D鏡頭又係疾下疾下矇查查咁，

D剪接直頭係亂Q咁嚟，但值得一讚係喺差館盤問嘅嗰幾場戲拍得幾有張力，

而嚴刑迫供嗰幾幕就疑似抄襲《賊王》同《發條燈》。
另外，喺戲嘅中段開始D文戲就略嫌過多，搞到成個feel似係喺度睇緊港台節目咁，

最後係戲中嘅一D爆粗同血腥場面，我認為都唔算好over喎！
一係唔好爆，一爆梗係要爆到盡啦！就住就住咁咪仲唔自然！

只係，要邵美琪一下子handle咁多粗口，就真係有D難為佢喇！

寫到邵美琪，又寫下呢套戲嘅選角問題，先講成套戲最令我有驚喜嘅女一唐寧，
一向都覺得呢位女演員冇乜演技，次次做戲淨係識得瞪大對眼嚟講對白，
把聲又勁唔自然，但今次佢演呢個既可恥又可憐嘅白痴老母就確係演技大躍進。
坦白講，碧琪呢個角色雖然係可以畀到演員有好多空間去發揮，但就唔係咁容易演㗎！
嗰種內心嘅矛盾同掙扎，係需要有一定功力嘅演員先掌握得到，
而唐寧呢次喺戲中嘅演繹，嚴格嚟講唔算係好出色，但絕對合格有餘，

尤其係有場戲佢求邵美琪唔好再打佢，你睇到呢幕嗰陣唔多唔少都會有少少同情呢個女人。

另一個演技大躍進嘅演員我覺得係張文慈，

估唔到佢收起性感去演一個爛撻撻嘅差婆又幾入型入格喎！

 
而邵美琪所飾演嘅警務助理處長，
除咗有我之前所講佢handle唔到粗口呢個問題之外，
個角色其實都幾適合佢做，首先邵美琪本身個外型就好smart，
要佢演呢類女強人角色，單靠個款基本上就事半功倍，
咁當然我又唔係話佢入唔到戲，佢係入到局，表情亦做到足，
但邵美琪喺演技上向來都有一個好大嘅致命傷就係講對白講得好生硬，
所以你要佢一次過handle咁多粗口簡直等同喺傷口度灑鹽一樣！

至於喺戲中飾演受害女童嘅嗰位小妹妹嘅演出就優點缺點各佔一半，
佢嘅優點係唔似得時下嘅小演員咁，個個都畀人包裝到成個明星一樣，
正因為呢位妹妹接近零星味，先至令到成套戲個真實感更強烈，
而缺點呢……就係佢真係毫無演技可言囉！哈哈哈～
之但係佢本身喺戲度嘅戲份查實都係得好少。

 
寫完女演員，又寫下呢套戲嘅主線男角彭敬慈，
個人認為，佢做呢個變態仆街佬角色好似做得唔係好夠投入喎！
特別係佢D眼神畀人個感覺似係陰濕多過鹹濕！哈～

講到呢度，忽然間我就諗起一位演變態仆街演到上晒身嘅男演員，
佢就係當年喺影圈被人稱為「四大惡人」之首嘅何家駒，
話時話，呢類演員而家喺香港真係經已賣少見少喇！

喺呢套戲入面仲有好多位演員參與客串演出，
最值得一提嘅係導演拎張兆輝同Benz雄用嚟做閒角真係浪費到極點，

而羅芷晴、鄧上文同呂慧儀呢個公仔箱組合更加係完全唔掂！

聽聞《短暫的生命》呢齣戲係改篇自真人真事，
我對呢單新聞都有少少印象，但就唔係太記得個詳情係點……
唉～每次睇到呢類慘無人道嘅風化虐殺案都會覺得好心酸好難過，
我相信喺戲裡面嘅一幕經典對白真係代表晒大部分市民嘅心聲！

「做人我唔X理你攞你個X畀邊個X，
你攞X埋你個屎「忽」窿都唔關我事！

但係你唔可以搞你個女呀！佢只係得十一歲咋！」

好佩服羅導演有如此膽量，無奈始終都係力不從心，

我真心認為呢類題材如果交畀邱禮濤同陳果去拍嘅話，個效果肯定會更為討好。

 
講開又講，呢張Poster我一開頭驟眼睇仲以為個女人係楊千嬅嚟！
請問有冇人同我一樣有呢種感覺呀？