2007年7月27日 星期五

李克勤《My Cup Of Tea》聽後感

我自問都算係一個幾標準嘅李克勤歌迷!
基本上除咗佢隻《我著十號EP》同一D冇新歌夾雜嘅精選,
佢所出嘅每一隻唱片我都有買!喺最近,克勤就出咗隻新碟叫做《My Cup Of Tea》……
佢今次隻碟比我嘅感覺係較為小品,同《Concert Hall》可以話係兩種唔同嘅風格。
喺兩次陣容強大嘅演奏廳加冕之後,
冇再出現《演奏廳Ⅲ》,對克勤嚟講絕對係一件好事!
連續食咗兩次豪華大餐,都係時候要食番D清淡少少嘅家常小菜喇啩!
其實,喺克勤呢隻新碟推出之前……
我對隻碟嘅期望就唔算好大,仲曾經考慮過唔買添!
點解?咪全因為佢呢隻碟嘅第一首派台歌囉!
頭一次聽到就令我覺得……克勤真係變質得緊要!
我心諗:「阿勤哥你搞乜呀?個唱腔點解會變得咁鬼做作㗎?」
我知道克勤近年係好想改變自己嘅唱腔去迎合一D年輕聽眾……
但出嚟個效果就好刻意,仲掩蓋咗佢以往嗰種行雲流水嘅自然美!
我記得喺克勤嘅前幾張唱片入面,
佢改變唱腔之餘都仲係沿用番佢嗰種獨有嘅〝勤式唱法〞去演繹歌曲……
聽落去我都仲勉強接受得到!直至有次喺電台聽到佢首派台歌「花落誰家」,
嘩~當堂就聽到我火都嚟埋!冇錯!呢首歌本身想帶出嚟嘅訊息係幾好!
但當克勤一開口唱嗰陣……嗰種嚴重漏氣嘅唱法簡直就令人忍無可忍!
我諗,我都係唔太接受Eric Kwok嘅嗰一套咁獨特嘅歌唱理論!
吓?乜呢D就係你哋所謂嘅「好有感情」呀?唱到死下死下咁……
仲要〝撚〞埋聲添!而家成首歌似係喺度無病呻吟多D囉!
但幸好,及後嘅一首「紙婚」就令我對克勤有番少少信心!
有時候……淡淡然嘅演繹就已經好足夠,根本就無需要走去畫蛇添足!
我覺得……李克勤就係李克勤……
一個闖蕩多年嘅歌壇老將係唔使為咗人哋幾句批評就刻意去改變自己!
適當嘅轉型係可以,但改得太多就會顯得有D矯枉過正。
將《My Cup Of Tea》成隻碟聽咗幾十次,撇除首「花落誰家」……
呢隻碟其餘歌曲嘅質素都算唔錯,嗰種簡約嘅風格令人聽得好舒服!
但係呢隻碟同克勤近幾年所推出嘅專輯一樣,就依然有兩個毛病!第一就係欠缺一D搶耳嘅旋律,
第二就係碟內大部分嘅歌詞依舊都係填得好空洞,更比人有一種「交行貨」之感。
成隻碟填得最好嘅一份歌詞……
我認為就反而係克勤親自操刀嘅「分岔口」!呢隻歌係講一對情侶嘅關係開始冷卻,
雖然仲未去到分手嘅階段,但互相就經已有D厭倦對方……
剛好我同女友之前就發生過類似嘅情況,所以聽落就特別有feel……
歌詞填得好,克勤喺呢首歌入面嘅演繹亦相當到位,嗰種慢慢滲出嚟嘅感情……
不禁就令我諗起林志炫喺《星光大道》裡面嘅一句經典評語,就係:
「詮釋情歌的最高境界是,唱到最後的時候是眼淚在眼框裡打轉,而且只准滴下一滴。」

「紙婚」我自己就較為鐘意克勤李嘉齡合作嘅嗰個Piano版本多D!
呢個配搭嘅震撼力比Violin版嚟得更強,只可以講克勤把聲都係同Piano最夾!
至於佢同David Garrett合作個版本……就比我有一種〝你有你拉,我有我唱〞嘅感覺。

「Twins」同「巴西女子隊」,我開頭都比呢兩首歌個歌名嚇一嚇!但估唔到聽落又唔錯喎!
尤其係「巴西女子隊」份歌詞確係填得好抵死!道出晒大部分男人嘅偷食心態!

「單身繼續」比我有一種好soft好fresh嘅味道!
但聽到首歌最尾嗰下假音就比阿克勤哥嚇鬼死!
喂~ 個〝吹〞字使唔使放到咁輕嚟唱呀!比你咁吹一吹,真係連冷氣都唔使開!哈~

「生命四重奏」個旋律毫無起伏,非常單調,
而歌詞方面亦欠缺記憶點,其沉悶程度同上張碟首「粒粒皆幸福」有得揮!

同「生命四重奏」相比,
「父子」個旋律同樣都係平平淡淡,但份歌詞就填得幾有意思。

喺「小寶寶」入面,我完全感受到克勤將為人父嘅嗰份喜悅!
佢個唱腔好sweet好warm,但聽落就有D骨痺,仲有少少難頂添!

「晚安」呢首歌嘅旋律同歌詞就忽然令我諗起克勤嘅一首舊歌「Kiss U Goodnight」,
我認為用佢嚟做整張碟嘅結尾實在係最適合不過!

作為專輯裡面嘅Bonus Track,「天這樣藍」 就爆冷成為全隻碟最搶耳嘅一首作品!
呢首歌係無線電視劇《歲月風雲》嘅主題曲,係克勤同香港樂壇教父顧嘉輝嘅首度合作!
對於顧嘉輝大師嘅功力,我哋就梗係唔需要懷疑啦!
但比較令人意外嘅係克勤小剛(周傳雄)呢兩位唔同style嘅歌手把聲竟然就異常咁夾!
種種因素加起嚟,就成功打造出呢一首火花四濺嘅佳作。

成隻碟本身我想比75分!但一首氣若游絲嘅「花落誰家」……
再嚟多首肉麻兼骨痹嘅「小寶寶」,加加埋埋就扣咗隻碟唔少分數!
仲有呀~喺DVD入面個自選樂器演奏功能,我一開始仲以為係有得選擇唔同嘅樂器去配搭!
但後來發現原來就只係可以分開嚟聽,成個feel令我覺得有D搵笨!呢度又扣多你幾分!
哈哈~不過總括嚟講,呢隻碟查實都ok買得過嘅!嗯~就比佢65分啦!
另外值得一提嘅係,「紙婚」MV個景真係好靚!喺克勤嘅MV當中,確實係十分少有!

My Cup Of Tea Choice  : 分岔口、紙婚(Piano版)、晚安、天這樣藍


我真係幾鐘意克勤呢次新碟個碟名!佢都幾能夠代表到我哋一班克勤歌迷嘅心聲!
咁多年以嚟,克勤嘅唱功好多人都公認係一流!但比佢厲害嘅人亦都大有人在!
例如係林志炫殷正洋齊秦庾澄慶張學友等等……
只係,無論其他歌手唱得有幾好,有幾感動我,我最愛嘅歌手就始終都係得克勤一個!
有人話……李克勤?老乜套啦!感情唔夠,歌路又窄,字正腔圓冇嚟變化……
講到尾就係一部零瑕疵嘅發聲機器咋嘛!但咁又如何!?
我哋就係鐘意呢一種自然唔浮誇,並且用丹田而唔係用性器宮去唱歌嘅專業歌手!
我太另類?跟唔上現代人嘅聽歌態度?哈~現代人聽歌乜都要講求個feel!
走音可以當做缺陷美,震音拉音就等於老套!乜都勢係假,最重要就係有heart!
只要你有heart……音準?拍子?咬字?Who Cares?
夠癲夠放先係最重要㗎嘛!高音唱唔到點算?咪大笑大喊搏過骨囉!
講真,如果夾硬要我去接受呢種畸形嘅聽歌文化,咁我不如就求其去間K房度聽人唱歌好過啦!
人哋飲大兩杯嗰陣都唱得好放好有heart㗎!仲唔會收你幾百蚊張飛添!
以後若果再有人同我講話聽李克勤就等如係唔識聽歌嘅話.……
咁我就會鄭重聲明咁同你哋講:「He is not your cup of tea!Get out!You!Now!」

3 則留言:

  1. 你好啊!我係路過ga! 我好認同你講ge野啊! 近來愈黎愈多人話克勤唱歌冇感情, 好似一部機器咁! 我覺得佢地真係好唔明白! 唔通要唱到斷氣, 好激動先叫有感情咩! 我都相信, 鐘意克勤ge人, 自然會feel到佢唱歌時ge感情! ^^

    回覆刪除
  2. 不理別人說甚麼,鐘意就是鐘意~~ 十七年的支持....不是盲亦不是聾的~~~

    回覆刪除
  3. 周傳雄應是台灣人, 在內地走紅, 現在應常在內地, 他被稱為情歌教父,最出名的歌是"寂寞沙洲冷", "黃昏", "男人海洋"等.....周與星加坡音樂人陳信榮是最住拍擋
    http://hk.myblog.yahoo.com/thai-gting/article?mid=21
    李克勤的櫻花涉抄一首泰文歌, 可比較是否抄.
    http://hk.myblog.yahoo.com/thai-gting/article?mid=125

    回覆刪除