確實係鳩撚到震，但聽得我好過癮：恭碩良《No Where Man》🥁

第一次認識到恭碩良呢個名，係因為喺電視機睇到〈你著幾號鞋〉個MV，當時第一印象係：「黐脷筋ABC，唱腔勁鳩，把聲好似剝光豬沖完凍水涼出嚟屙緊篤尿嗰陣時一樣，腦海裏成日縈住佢唱〈萬惡淫為首〉一定超正！🤩」不過日子耐咗，我發現原來只要畀佢遇到啲啱feel嘅歌，然後溝埋上面提及過嘅一堆表面上睇起嚟係缺點嘅signature，成件事又會即刻變得好撚match，唔信？請大家去聽吓阿Jun喺2001年推出嘅首張大碟《No Where Man》，自然就會清楚明白。😌

呢張album係標誌着恭碩良從鼓手身分正式轉型為創作歌手嘅重要一頁，碟名靈感聽聞係嚟自Beatles嘅同名歌曲，混合Funk、Rock、Jazz、Pop等style，跳躍生動嘅曲風變化多端而且相當有個性。同包以正合作嘅〈喺你嗰度〉火花四濺，你以為入咗一間熱鬧嘈吵嘅Jazz Bar，查實仔細嗒吓份歌詞根本係好funny好real，簡直貼地到暈，相信凡係打工仔聽到都會會心微笑。呻完一大輪之後飲住杯Cocktail欣賞包大師solo嘅〈喺Eugene嗰度〉，成個人當堂relax晒；搖滾味十足嘅〈一米七四〉不禁令我諗起台灣才子黃舒駿嘅經典名曲〈她以為她很美麗〉，明嘲暗諷底下實則係自卑心作崇，即是「吃不到的葡萄是酸的」囉！🍋🤭

〈In My Dreams〉滲透着濃濃嘅愛爾蘭音樂特色，即使拎上世界各地同班鬼佬battle亦唔覺失禮；〈Germs Olo〉x〈Sailing〉唔太識分類，當佢Alternative Rock咁聽，地踎得嚟有點‘’瀟‘’，好chill好有attitude；〈無地自容〉嘅中心主題係漂泊＆無根，Wyman巧妙咁運用交通工具、季節轉換同多個景點，細膩地傳達出一種馬不停蹄且無處容身嘅疲憊漂泊感。🎒🧳✈️

〈好去處 (總有些用處) 〉完全符合標題同頭一段所描述嘅「剝光豬屙住篤尿唱歌，雖然鳩撚到震，但聽得我好過癮」，重點推介畀所有鍾意沖凍水涼嘅朋友；〈全日遊街〉融入咗啲80年代嘅復古Canton Disco元素，旋律超洗腦，滿滿嘅夜生活vibe，非常適合喺Party Room play住嚟玩；由Jun親自作曲、編曲嘅〈Missing You〉近似Keane、James Blunt嗰類感染力極強嘅British Ballads，真摯直白毫不掩飾，正宗冧死女冇命賠。😍

〈六日七夜〉彷彿用緊太空人嘅視角去俯瞰塵世間嘅情情愛愛，迷幻而美麗，同類型題材比周杰倫嘅〈開不了口〉仲行早咗一年，用嚟做Discovery Channel嘅香港版主題曲就最啱；〈老幼咸宜〉實驗意味重，播完過咗25分鐘，忽然無啦啦整多段純結他Demo，認真嚇鬼。👻

整張專輯偏向小眾嘅Indie Music，但製作水準絕對一流，尤其係恭碩良對Groove嘅強大掌控力，令成隻碟聽起嚟超有現場感，同時亦充分展現阿Jun曲／詞／編／監等多方面嘅才華。🤟🏻

同場加映 - 24/1/2026 - 30/1/2026 生活寫真 📸

魔鏡～魔鏡～邊個係世上最靚嘅喵？計我話兩位公主都咁四正，直頭係靚爆鏡！💋

Indie厭世日常四連拍postcard，由於數量有限，每人只限派一張，先到先得，送完即止。✋🏻

嫌唔夠喉？等我私人醒多張美艷動人五連拍畀各位星級會員！嚟～講多謝！😎

足足花咗接近一年時間去治療Indie嘅心靈創傷，而家終於修成正果，你哋睇吓個衰妹嗲到呢！😘

嗯～見妳近排肥咗又精靈咗，就獎條啜啜妳嘆啦！喂～慢慢食，咪咁猴擒呀！🤨

OK～呢度冇你嘅事喇！咪阻住本宮享受暖爐之樂，速速退下！喵～😼

Latte每朝起身第一時間會做啲乜？a) 扭零食，b) 要零食，c) 攞零食，估中冇獎。🐈‍⬛

嚟緊要進行地獄式減肥呀Latte～唔好以為扭計賣橙就有用！🍊

Hey～妳兩個郁多啲得唔得？撩人玩又懶到死！😒

哈哈～阿b妳咁肉緊做乜？係咪諗住冧掂姐姐就有大餐食？😆

OK～呢度冇你嘅事喇！咪阻住本公主瞓晏覺，速速退下！喵～💤

放假同姑姑食咩好？晏晝粗粗哋整返碗足料車仔麵，麻辣雞腎、玻璃魷魚、蘿蔔 + 油麵 配 沙嗲汁 & 凍檸茶少甜，盛惠$56。🥢

咦～呢款Oreo碎意大利芝士望落又幾盞鬼，但感覺好睇唔好食。🙊

天口咁冷凍，最好梗係去牛大人打個靚邊爐啦！嗱～先旨聲明，我只負責掃蝦，其餘隨量得㗎喇！🦐

生生發 ($338) 澳洲極上和牛120分鐘食到飽套餐，另加送四隻鮮甜鮑魚，屌你正呀喂！🤤

台灣特色小吃大集匯：士林鹽酥雞、真豬小香腸、養顏爽花膠、豐原排骨酥、酒糟嫩牛舌、滷水五香鷄胗 🇹🇼

呵呵～食飽飽，再嘆返杯低糖珍珠奶茶 + Dreyer's芒果雪糕先至夠完滿。🧋

吓？臨近尾聲仲要淥返個出前一丁？姐姐您都幾擦得吓喎！😦

滾完經過Mini One聞到香噴噴，嗱嗱臨買嚿柚香芒酥返去畀Mom做甜品。😊

今期新片免中伏，【Song Sung Blue：藍色情歌】同Neil Diamond本人一樣冇亮點、冇驚喜、冇高潮，敘事形式一塌糊塗，劇情過目即忘，配樂亦馬馬虎虎；【末世綠洲2：絕地遷徙】能夠拍到續集已經係奇蹟，低成本科幻片，全程大場面欠奉，內容千篇一律，刻意營造嘅主角光環加上為拍而拍嘅失散衝突，實在睇到人火都滾。😤

同樣係低成本製作，由Sam Raimi執導嘅【腦細天劫】就討好得多，典型爆谷片格局，角色全員爛人心智扭曲，故事反轉再反轉，有唔少情節擺明係致敬導演舊作【鬼玩人】，Rachel McAdams女王上身殺得性起，一改昔日甜心形象。💀

上咗10日左右即匆匆落畫嘅【今天應該很高興】以一部獨立電影嚟講完成度算幾高，係衰在份劇本又犯咗近年港片嘅多項毛病，矯情零碎口水多，而且亦睇唔出啲單元同移民困境有乜嘢關係？咪純粹係追夢失敗、寂寞難耐、沉溺“嚿屎” + 中年危機，將個故仔搬出加拿大放去其他地方，其實照樣講得通。黃秋生、譚耀文、鮑起靜演技上線／楊詩敏表現浮誇實屬意料之中，反而李綺虹洗淨鉛華嘅演出先係最驚喜，令人眼前一亮。👀

除咗以上四齣新戲，越拍越鳩嘅【阿凡達3】、依然玩緊瘋狂謝票嘅【尋秦記】，將繼續死唔斷氣上映中⋯⋯📽

另外，請各Edan fans密切留意2026馬年賀歲片 【金多寶】嘅首映場日期。🎬

好多謝放映部同事峰師兄專誠喺福岡買咗兩份手信畀我，勁有心，超鍾意，極感動。🥰

海洋世界海之中道 x 蠟筆小新磁石貼，呢個喺香港真係有錢都未必買得到。💝

究竟當日係邊位天才諗到要強制班孕婦、老人家同買餸經常揸住一抽二掕嘅三姑六婆攬‘’巴帶‘’？嚴重擾民、徒增社會不安不特止，仲引起一連串批鬥 + 流血事件，前日更搞出有乘客不幸被困45分鐘而需要消防救援嘅國際大笑話，全城畀你玩到氹氹轉，永遠整嗰樣衰邊樣！超～既然覺得自己冇錯咪企硬唔好縮囉！學龜婆嫻姨姨話齋不如取消企位，又或者跟「逆線車后」陳家珮齊齊罰企，總之支持政府實冇死。🙂‍↕️

本年度官方球迷會新會員證及續會禮物已到，整體觀感尚算可以啦！😉

喺歐聯戰場持續發威，keep住生龍活虎，雖則話對手弱雞過英冠，But Who Fuckin' Cares？一於有理冇理J住先！😬

16強對邊隊最穩陣？最理想咪布魯日，加拉塔沙雷都唔錯，祖雲達斯算中下籤，最難哽唔使諗肯定係馬體會。🙅🏻‍♂️

雲大將軍加盟利記後首次刷出助攻帽子戲法，傻波一路保持靚仔數據，曾經一度被恥笑為「水貨007」嘅域斯越踢越有，美中不足嘅係費林邦早段因傷退場，令本來殘缺不堪嘅陣容更加雪上加霜。🫤

引用資深Blog友蒲飛路貝加嘅一段留言：「陣中3隻右閘都玻璃特質，真係唔知光頭同曉士諗乜柒？既然當費林邦翼咁用，巴特利唔夠班打正選，高美斯又年年都傷幾段，傷撚晒1月都唔肯補隻右閘，傻閪大對決，死都唔撚買 VS 死都唔輪換，兩個大仆街攬住隊波攬炒！🤬」

報告總司令，最新消息，現時陣內嘅常規後防只剩三位，分別係歸隊冇耐嘅干拿迪、小弟卻基斯、隊長雲迪克，仲有你局鳩住要用嘅羅拔臣、遠藤航，同埋你睇唔起兼且唔柒會用嘅奇雲·藍斯 & 利斯·威廉斯 (設計對白)。🫡

Yo～冇中堅之嘛！使乜驚呀？有識得自動導航嘅「荷蘭萬金油」加雲貝治頂住，萬大事通通解決晒！🇳🇱

喺前線上，「士哥」源源不絕嘅伊基迪基固然係好重要，而從非國盃失落而回嘅沙拿亦迅速重拾射門鞋，並輕拍胸前隊徽向球會示愛，之前被貶後備公開對傳媒控訴嘅叛變風波，似乎已一掃而空，衷心希望阿Mo能攞返全盛時期嘅一半水平出嚟，協助紅軍走出當前低谷。🇪🇬💪🏻

時至今日，我仍然比較相信F$G係100%冇同沙比傾過嘅～事關每次傳得最行嘅教頭通常都唔會成事，係得高普嗰次例外。💁🏻‍♂️

因乜解究要喺記者會度失驚無神串鳩高普最後一季帶隊踢歐霸出局？皇基入波埋齋你居然閪面？請問呢啲係一朝得志，語無倫次，定還是係偷食咗誠實豆沙包？放走昆沙、冷待艾利諾、同鍾斯吵大鑊，企圖將本土青訓滅門連根拔到底又係咩玩法？面對成績下滑、戰術錯配、用人唯親等批評，史諾表示淡定冇有怕！坦白講，若果一陣喺主場輸畀紐卡素，掟光頭Slot落鑊我並唔反對，但前提係要有晒補救方案先好落刀，千祈咪撚癲到走去搵雲邦賀斯做看守領隊，須知道利物浦個case同49000唔同，班現役教練團冚唪唥唔係留緊Anfield嘅血，畀佢哋嚟搞盞死多兩錢重。🤥