《我與劉德華的歌影回憶》

街中飄雨車蓬半開我身濕透水～獨自飛馳追憶揮不去憂慮～當天的我不曾愛惜妳痴心暗許～常令妳獨垂淚弄得愛路極崎嶇～

早排幫姑姑部電話入歌嗰陣重溫咗好多首經典“華歌”，一堆封麈N年嘅昔日回憶隨即湧上心頭……

而家同班後生提起劉德華呢三個字，所得到嘅評價幾乎全部都係負面嘅！因乜解究呢位曾經畀外界吹捧為民間特首嘅超級偶像會忽然間從神枱跌落坑渠？我諗應該係由佢幫老懵董錄嘅一條「明日大嶼」宣傳聲帶出街嗰日開始……


有關網民對劉天王嘅各項指控入面，有三件事我係非常認同！一係佢盲目支持填海但又完全冇就真正核心問題“150配額”出過半句聲；二係佢喺2002年拍咗個爛鬼廣告搞到一眾服務性行業嘅前線人員雞毛鴨血；三就係十年前嘅“劉德華板鴨侵權事件”，至於其餘嘅批評我認為就真係冇乜大不了！

你話佢有段時間一直收埋個老婆死口唔認？咁事實上啲咁私人嘅嘢又確係冇需要大鑼大鼓公告天下嘅！你話佢間接害死楊麗娟老豆？換轉係你唔知又敢唔敢以身犯險去滿足一名終日鍾意一哭二鬧三上吊嘅瘋狂Fans？你話佢份人好鬼虛偽兼夾無情無義？咁請問又有幾多個藝人願意花咁多心神去經營同歌迷之間嘅關係？再講，無論係圈中人好似藍潔瑛、鄭則士、張衛健、鄭秀文、李克勤、林家棟、黃秋生、杜汶澤、馮德倫、鄭中基、古巨基、羅志祥同曹格，抑或係前殘奧運會金牌得主蘇樺偉……喺人生遇上低潮時都分別受過劉德華嘅協助，而作為一個演藝工作者，佢又確實為演藝界出過唔少力，仲培育咗一班影壇新血！你話佢係為咗眼前嘅利益而選擇轉投祖國嘅擁抱？公平啲講，喺97過後，每逢國慶華大俠都必定會着住唐裝出嚟大唱中國人，由此可見，佢嗰份濃厚嘅愛國情懷絕對唔係一朝一夕！你話佢喺風頭火勢之下唱首歌畀醫護聽係一件好嘔心嘅行為？何解當主角變咗做陳奕迅嘅時候，大家就即刻一反常態諗盡方法幫佢狂搬龍門？



好！言歸正傳！而家就正式同各位分享一吓我所喜愛嘅一啲“華歌華碟”！記得喺90年代初，屋企部黑膠唱片機大概有90％時間都係播住回到你身邊、可不可以同再會了呢幾隻碟，而當時長期高踞熱播排行榜十大嘅金曲就包括情感的禁區、下雨晚上、回到你身邊、永遠記得你、誰人、可不可以、緣盡、十全十美、愛不完、再吻我吧、再會了、絕望的笑容、一起走過的日子、長夜多浪漫、愛人皇后、真我的風采等等……



明明有咁多首Hit歌任我揀，但係小弟偏偏就特別鍾情一首播放次數極少嘅非熱門作品流浪，原因係乜？咪就係Like佢份歌詞填得夠貼地夠寫實囉！我的家～雖擁有但空蕩～凝聚空虛怕回望～情還是冷人還是凍～害怕歸家再看著牆上～當年我出名人神鬼大，每日就借住呢幾句歌詞扮吓憂鬱小生感懷身世，有時仲會聽到匿埋一角狂流馬尿𠻹！


呼～幾經辛苦，終於摷返呢隻陳年古董出嚟！榮登本人最喜愛嘅Andy Lau Album Chart NO.1～答案就是妳！

喺90年代尾，劉德華就先後推出咗三張頗有質素嘅華語唱片，當中就以喺1998年7月發行嘅粵語專輯你是我的女人最為突出！能夠請嚟美國Saxophone巨星Kenny G以及華語樂壇兩位幕後大師黃國倫、金武林跨刀合作，仲搵埋啱啱冒起嘅吳彥祖拍他的女人個MV，再利用由朝打到晚嘅Ericsson特工廣告做第二波主打掛念嘅宣傳，成個Package簡直係配合得天衣無縫呀！



我的震音假音早已太熟練～然而情歌總唱不厭～劉德華嘅歌手身份喺咁多年以嚟都係備受行內外人質疑，佢一出道就畀譚詠麟勸佢專心拍戲，1992年，佢為電影九二神鵰俠侶之痴心情長劍寫咗首主題曲情是那麼笨，點知就畀一代詞壇教父黃霑鬧足佢三年！1997年，喺一張名叫愛如此神奇嘅國語碟裡面，佢居然仲夠膽死越級挑戰齊秦、趙傳、張信哲、周華健同黃大煒呢班殿堂級實力派嘅首本名曲，一句聽得人騰騰震嘅放不下你是我不該～久唔久就會畀啲高登仔、連登仔攞嚟鞭屍！蜂擁而至嘅負評並冇打擊到華神嘅自信心，喺2010年，佢再接再厲拎住首被遺忘的時光厚住面皮走去同蔡琴取經，結果就只係換嚟一句：「算吧啦你！」



到底劉德華喺歌唱呢個領域上面係咪真係半點可取之處都冇呢？只可以講，受聲帶所限，加上一成不變嘅大戲腔口，所以每首歌喺佢嘅華式演繹底下都會立刻變得好有“劈歌”Feel，註定一世難登大雅之堂！不過當搵到一條適合自己嘅歌路，佢間唔中又會將某類歌種發揮得淋漓盡致！例如喺2000年嘅一首男人哭吧不是罪，就徹底道出咗大部分中年麻甩嘅心聲！



我又再舉多個例子，論唱功，劉德華當然就拍馬都追唔上孤兒淚嘅原唱鄧麗君啦！但佢一貫滄桑嘅獨特唱法反而就更表達到歌中嗰一份應有嘅意境同味道。相反，聲線甜美嘅鄧麗君同首歌碰撞起嚟，就畀人有一種格格不入嘅感覺。



總括嚟講，我覺得劉德華喺某個範疇之中都算得上係一位合格嘅歌手！大前提係佢要肯乖乖哋……唔好再成日自曝其短亂玩Ad-Lib、假音、拉音就OK！


嚴選最喜愛的二十首劉德華經典獨唱歌曲

1. 流浪 (收錄於共你傷心過專輯) 試聽
2. 男人哭吧不是罪 (收錄於男人的愛專輯) 試聽
3. 緣盡 (電影龍鳳茶樓主題曲) 試聽
4. 真永遠 (收錄於真永遠專輯) 試聽
5. 永遠寂寞 (收錄於答案就是妳專輯) 試聽
6. 無出息的漢子 (電視劇烈火雄心插曲) 試聽
7. 不可不信…緣 (電影九一神鵰俠侶主題曲) 試聽
8. 你是我的女人 (電影龍在江湖片尾曲) 試聽
9. 仍唱我的歌 (收錄於真我的風采專輯) 試聽
10. 誰人知 (收錄於5時30分專輯) 試聽
11. 你說他是你想嫁的人 (收錄於真永遠專輯) 試聽
12. 絕望的笑容 (收錄於再會了專輯) 試聽
13. 情未鳥 (收錄於情未鳥專輯) 試聽
14. 忘了隱藏 (收錄於真永遠專輯) 試聽
15. 暗裡著迷 (收錄於答案就是妳專輯) 試聽
16. 情感的禁區 (收錄於情感的禁區專輯) 試聽
17. 我和我追逐的夢 (收錄於我和我追逐的夢專輯) 試聽
18. 愛不完 (收錄於愛不完專輯) 試聽
19. 謝謝你的愛 (收錄於真我的風采專輯) 試聽
20. 一起走過的日子 (電影至尊無上II之永霸天下主題曲) 試聽

嚴選最喜愛的二十首劉德華非熱門獨唱歌曲

1. 去年煙花特別多 (電影去年煙花特別多主題曲) 試聽
2. 你震撼我的心靈 (電視劇巨人主題曲) 試聽
3. 愛太難 (收錄於真生命專輯) 試聽
4. 月老...你的野蠻男友 (收錄於如果有一天專輯) 試聽
5. 死剩把口 (和音：黃秋生，電影龍在江湖插曲) 試聽
6. 上帝創造女人 (收錄於人間愛專輯) 試聽
7. 最後…你也走了 (電影廟街十二少插曲) 試聽
8. 人生捕手 (電影嚦咕嚦咕新年財插曲) 試聽
9. 痴心錯付 (電影旺角卡門插曲) 試聽
10. 笑著哭 (收錄於再見了專輯) 試聽
11. 無法一天不想 (收錄於愛不完專輯) 試聽
12. 同名男子  (收錄於相思成災專輯) 試聽
13. 這一生是給你一個 (收錄於答案就是妳專輯) 試聽
14. 繼續... (收錄於人間愛專輯) 試聽
15. 潮水 (電影½次同床插曲) 試聽
16. 無情天 (叱咤903廣播劇我心不死主題曲) 試聽
17. 繼續流浪 (收錄於愛無知專輯) 試聽
18. 與孤獨在奔往 (電影五虎將之決裂片尾曲) 試聽
19. 為何帶他走 (電影天地雄心主題曲) 試聽
20. 十年 (電影奇異旅程之真心愛生命主題曲) 試聽

嚴選最喜愛的十首劉德華合唱歌曲

1. 彈彈琴跳跳舞 (合唱：梅艷芳，收錄於梅艷芳的With專輯) 試聽
2. 相依、相戀 (合唱：陳嘉露，收錄於答案就是妳專輯) 試聽
3. 無間道 (合唱：梁朝偉，電影無間道主題曲) 試聽
4. 笨小孩 (合唱：柯受良、吳宗憲，收錄於笨小孩1993-1998國語精選) 試聽
5. 高高在下 (合唱：張衛健，電視劇齊天大聖孫悟空主題曲) 試聽
6. 秋意中等我 (合唱：吳婉芳，電視劇奇幻人間世主題曲) 試聽
7. 別說愛情苦 (合唱：梅艷芳，收錄於愛在刻骨銘心時專輯) 試聽
8. 向世界喝采 (合唱：李克勤，1996年亞特蘭大奧運香港區主題曲) 試聽
9. 心中愛你口難言 (合唱：何詠琳，電影嘩！英雄插曲) 試聽
10. 盲愛 (合唱：鄭秀文，電影盲探主題曲) 試聽

電影方面，若果要數劉德華喺銀幕上嘅出色演出，第一部我就會揀由“爛片教父”王晶執導嘅龍在江湖，雖然呢齣戲一上映就畀班影評人彈到飛起，但華哥所飾演嘅過氣江湖大佬狗仔祥就令人感到佢嘅演技有逐漸開竅嘅跡象……

講起劉德華最深入民心嘅大哥角色，相信好多影迷都會先諗起雷洛同賀新，但個人就比較欣賞龍在邊緣嘅飛龍哥，尤其喺醫院呢一幕霸氣側漏嘅名場面，實在係型到核爆！

經過大師杜琪峯嘅悉心調教加上同鄭秀文一拍即合嘅絕妙默契，喺千禧年頭就成功孕育出張華紹 (華少) 呢個十分貼地嘅喜劇角色。好記得孤男寡女有一幕係華少上深圳幫Kinki補鑊，卒之就畀人噴到佢一面屁！當聽到個商家佬串佢死𦧲好賤嗰陣，華少嗰一句：「幾㗎！哈～」真係將香港某班無賴高層嘅性格特質表露無遺。

邊一個電影角色係華神從影以來嘅演技巔峰？仲使問！梗係門徒入面嘅腎虧毒品莊家林昆啦！其他場口唔好講，淨係睇返昆哥同阿力 (吳彥祖飾演) 喺電器舖嗰場精彩嘅內心戲同埋結尾嗰一幕血淋淋嘅跪地求饒就足以粉碎各界對佢嘅懷疑！

儘管劉德華經已攞過多個重要嘅電影獎項 (三次金像影帝、兩次金馬影帝、一次金紫荊最佳男主角、一次電影評論學會最佳男主角加一次金像獎最佳男配角)，但就仍然得唔到普羅觀眾嘅認可。的確，早年嘅劉天王喺鏡頭前面嘅每一個眼神、表情同肢體語言真係分分秒秒都要Keep住Chok到行，仲因此而樹立咗“動作很劉華”呢個標記，呢種壞習慣即使嚟到今時今日佢始終都係戒唔甩，偶然就會喺堆爛片度發作，而未來警察、我知女人心、天機：富春山居圖、風暴、賭城風雲III就係當中最著名嘅“金草莓代表作”。

嚴選劉德華從影至今演得最好的十個電影角色

第一位 - 林昆 (來自電影門徒，由爾冬陞執導)
第二位 - 了因 (來自電影大隻佬，由杜琪峯執導)
第三位 - 趙二虎 (來自電影投名狀，由陳可辛執導)
第四位 - 華少 (來自電影孤男寡女，由杜琪峯執導)
第五位 - Roger (來自電影桃姐，由許鞍華執導)
第六位 - 孟虎 (來自電影阿虎，由李仁港執導)
第七位 - 雷澤寬 (來自電影失孤，由彭三源執導)
第八位 - 張華 (來自電影暗戰，由杜琪峯執導)
第九位 - 韋吉祥 (來自電影龍在江湖，由王晶執導)
第十位 - 王薄 (來自電影天下無賊，由馮小剛執導)


最喜愛嘅劉德華 (擔正做主角) 電影TOP 10？頭三名我會揀無間道、大隻佬、暗戰，再數落去就童夢奇緣、孤男寡女、旺角卡門、天地雄心、五億探長雷洛傳：雷老虎、五億探長雷洛傳II之父子情仇、無間道III：終極無間，排名不分先後……

至愛造型方面我就會揀華Dee、金毛碧咸、白頭King、楊過同葉孤城，依順序排列。

PS：部分相片／影片是轉載自香港各大報章網站以及AndyLau Supporter Youtube Channel。

想睇類似嘅文章，請移玉步到以下網址：

兒時的偶像 - 郭富城
http://timeischanging2013.blogspot.hk/2009/09/aaronkwok.html

我與黎明的音樂回憶
http://timeischanging2013.blogspot.com/2016/05/LeonLaiMusic.html

不日出版 - 華語樂壇永遠的歌神傳奇 - 張學友（Jacky Cheung）