2017年6月9日星期五

穿著窄身西裝的潮店老闆 - 李克勤三十周年紀念專輯《30克》


我對上一隻買嘅克勤唱片,數數手指,已經要數返去2013年嘅《復克》。其實,自從畀陳詠謙大師首〈姐姐〉嚇親之後,搞到我有一段時間唔太敢再去接觸克勤嘅新歌,而事實上,除咗〈鑽石人生〉 、〈紙牌屋〉、〈生活大爆炸〉同〈戀愛為何物〉之外,克勤喺2012年至2015年呢段期間所推出嘅嗰堆作品,我真係大部分都聽唔入耳!
喺新專輯方面,今年克勤嘅舊公司環球就幫佢出咗隻《復克II》。我起初見到隻碟個封面咁有型,都有少少興趣將佢買返屋企!但當我仔細咁望一望啲曲目之後……妖~原來全部都係揀返佢喺《我是歌手》唱過嘅嗰堆歌!咁都唔只,喺隻碟入面,克勤仲要首首歌都係用埋啲死人罐頭式唱法去演繹,所以我只係試聽咗一陣就頂唔順要放低個耳筒。
喺上年6月,當克勤對外宣佈將會加盟英皇娛樂嗰陣,有唔少勤迷都唔太相信同願意接受呢個事實。嚟到今日再調返轉頭一睇,唔知大家又覺得克勤當日呢個決定又有冇為佢嘅歌唱事業帶嚟一啲新嘅衝擊呢?嗱~我份人就唔係咁市儈嘅!佢嘅轉會費有幾多?夠唔夠供兩個仔去外國讀書?呢啲嘢真係關我餐蛋治咩?我哋做歌迷最關心同最在意嘅就梗係佢啲歌嘅質素啦!當舊公司環球仲喺度不停炒緊冷飯嘅時候,新東家英皇就一心要打造一個全新面貌嘅李克勤出嚟。於是,佢哋就搵咗喺咁多年以來一直同王菀之合作無間嘅馮翰銘(Alex Fung)幫佢監製呢一張蓄勢以待嘅頭炮大碟。呢位80後音樂才子喺過去為王菀之同容祖兒等歌手寫過好多膾炙人口嘅hit歌,亦幫克勤監製過唔少作品,而我先前提及過嗰一首嚇到我打冷震嘅驚世巨作〈姐姐〉,剛巧就係出自呢位人兄嘅手筆。所以,當我知道克勤隻碟將會搵佢做製作人嗰時,個心就當堂涼咗一截!喂~你兩位大哥唔係諗住又玩返喺《在森林和原野》入面玩過嘅嗰啲花臣吓嘛?唔好喇啩!我當年就係畀呢隻碟嚇到我唔敢再買克勤嘅唱片,呢個陰影仲足足跟咗我五年咁耐!勤哥~呢隻話晒都係你嘅三十週年紀念專輯呀~唔好搵啲咁嘅嘢玩好喎!不過又話分兩頭,佢今舖冇走去搵陳詠謙同Johnny Yim做幕後班底,查實我已經要謝天謝地兼柯彌揭諦!



我諗係明眼人都睇得出,克勤近年係好有心想迎合一班後生樂迷,而出嚟個效果好唔好呢就真係見仁見智喇!你哋可能會覺得我喺度雞蛋裡挑骨頭,冇突破又話人哋不思進取,試新嘢又話人哋攞嚟搞!但大家仔細啲去諗下,一個四十幾歲仲要有兩個仔嘅已婚男人成日走去啲賣潮tee嘅boutique度揀衫,當大部分人都笑緊你衣不稱身嘅時候,你就仍然堅持要keep住行呢種路線。其實,所謂突破有好多種,無需要經常去做一啲同自己風格唔吻合嘅嘢嚟話畀人知你有幾緊貼個潮流!當你嘅大師兄張學友已經升華到識用餘生去愛嗰陣,你就選擇繼續喺廣東歌市場度不停兜圈,完全冇諗過去苦練下自己嗰口爛到爆嘅國語,反而樂此不疲咁屢次拎呢樣嘢嚟做賣點搞爛gag!更大煲嘅係,你本身擁有咁紮實嘅填詞功底,居然就接受到〈姐姐〉同〈你最重要〉呢類齋睇啲字就想作嘔嘅歌詞,仲要拎埋佢哋嚟做主打歌!計我話呢兩份歌詞莫講話張學友同陳奕迅,連尹光同朱咪咪睇到都唔一定會收貨啦!



記得當時我睇完克勤同陳詠謙幫〈姐姐〉平反嘅呢一段訪問,嗰陣我心諗:「點解你哋兩個可以用一個咁樂觀嘅心態去分析一件咁撚荒謬嘅事?」另一方面,喺訪問中陳生就解釋話〈姐姐〉唔係一首膠歌,而係一首Cult歌。哦~原來係咁呀!但聽完陳大師嘅呢番解說之後,就真係令到小弟更加摸不著頭腦喇!Ed Wood、Quentin Tarantino、三池崇史、園子溫……佢哋會唔會走出嚟同大家講自己係Cult片界嘅代表人物先?一部電影或者係一首歌Cult唔Cult,唔係應該由我哋觀/聽眾嚟定奪嘅咩?邊有人會咁唔知醜稱自己為Cult界乜乜乜㗎?同埋,我仲想講多樣嘢,就係以歌頌菲傭為題材嘅歌曲喺香港樂壇其實一啲都唔罕見!早喺N年前,林海峰同周博賢就分別寫過〈最菲精選〉同〈菲情歌〉,前者風趣抵死鬼馬到肉兼而有之,後者則道盡晒一眾菲傭離鄉別井嘅嗰份辛酸同無奈嘅心情。有時候,如果你啲作品係好嘅,自然就會有人欣賞,根本無須喺度諸多解釋(掩飾)。

陳詠謙有一段時間幾乎成為咗克勤嘅御用填詞人,亦明顯睇得出克勤同樣都好欣賞呢位詞壇後輩,由買物寫到碌卡,由非凡人生寫到高山低谷,論創意論話題性,陳詠謙絕對係有嘅!有時我喺佢啲歌詞入面仲會隱約見到80's詞壇鬼才林敏聰嘅一啲影子。咁當然,同樣係創意無限,但兩人嘅寫詞功力同文字根基就實在係差天共地!若以電影人嚟作比喻嘅話,林敏聰就肯定係王家衛嗰種級數,而陳詠謙頂多只會係黃精甫、杜緻朗之流。我覺得阿陳生填啲詞係有構思亦有畫面,但就成日都好鐘意喺一啲稜角位度玩下花巧掩眼法嚟魚目混珠,好似〈天河〉呢類輕輕幾筆帶過嘅小品,可能仲畀你呃呃騙騙過到骨,再深入寫落去嘅話,就難免會漸漸出現破綻百出嘅情況,不停喺唔應該落筆嘅地方落筆,感覺上似係喺度玩緊填字遊戲咁,尤其係喺早年,佢就更加將呢種特色推到極致,每次只係將所有啱音嘅文字都放入首歌裡面,然後就搏命左塞右塞,完全忽視咗成份歌詞嘅結構同內容,呢種空洞、鬆散嘅寫詞手法,喺當時唔只辣㷫一班資深樂迷,同時亦惹嚟唔少年輕網民給予負評。
面對洶湧而來嘅劣評,陳詠謙當時嘅選擇就係立刻搬晒成個樂壇出嚟做掩護。每次睇見陳大師出嚟做訪問嗰個沾沾自喜嘅招積樣同埋佢嗰一份莫名其妙嘅自信嗰陣,都會不其然令我諗起林子善喺電影《半支煙》入面嘅一段對白:「嘩~你咁春蠢㗎!厄爾尼諾現象都唔知點解!嗱~厄爾尼諾現象呢就即係話……好Q勁咁解!」識得固步自封當然係能夠永遠處於一個不敗之地,但如果連半句批評都包容唔到嘅話,咁成個香港樂壇同啲圍威喂嘅小圈子選舉又有乜嘢分別呢?咁我都好明白,有某班音樂人真係周身都係G點㗎!最鐘意就係將啲問題推晒落班樂迷身上,責怪人哋理解能力低,先無辦法領悟到佢哋嘅境界,然後繼續肆無忌憚咁亂寫一通,呢班人心裡面最想得到嘅唔係樂迷嘅用心支持,而係需要一份居高臨下、萬人膜拜嘅假風光。喂~你班大帝自我感覺良好,呢啲係閣下嘅事!我哋唔一定需要奉旨配合你㗎吓話?一個消費者用真金白銀去買咗一張正版唱片返嚟,唔通就連想寫下真實嘅內心感受都唔得?嘩~咁你班人咪仲惡過共產黨?
大家唔好以為我對香港大部分嘅填詞人都好有偏見,亦唔好以為我係一個只會懷緬過去嘅人,相反,我一向都好尊重一啲用心創作嘅好詞人,佢哋喺文字早就差唔多畀人用盡嘅時候仍然可以定時交出一堆好作品,單係呢一點已經令我深感佩服。仲有就係,舊一代嗰堆填詞人雖然的確喺樂壇立下咗好多豐功偉績,但亦唔代表新嗰批後輩就肯定個個都冇貨賣,好似小克、林若寧、周博賢、Tim Lui,同埋喺克勤今次隻碟度包辦咗大部分歌詞嘅梁栢堅,佢哋個個都係喺2000年後先開始寫詞,亦一樣寫過唔少令人留下深刻印象嘅好歌。
李克勤 X 梁栢堅,當住家好男人遇上爛鬼作詞人,到底會產生啲乜嘢化學作用出嚟呢?望一望梁栢堅幫克勤寫嘅嗰四份歌詞……嗯~可能係為咗遷就克勤嘅風格啦!又或者係克勤本身都唔想喺呢張三十週年大碟度搞咁多風風雨雨……所以,向來詞風挑釁又踩界嘅PK(梁柏堅)今次就好明顯比以前「規矩」咗好多!既冇寫出好似〈C餐〉呢類抵死到肉仲將啲字玩到出神入化同〈篋神〉呢類盡情諷刺時弊又極具爭議性嘅歌詞,亦唔見有〈雲圖〉呢種寫得咁細膩同有意義嘅作品,但係喺〈恭喜你〉同〈30克〉入面,我哋就依舊可以睇到呢位惡搞詞神鬼馬風趣嘅一面。
或者係我個人真係已經out晒date啦!當身邊有好多後生仔都走埋嚟同我講:「喂~阿叔!而家聽粵語流行曲就梗係旋律同編曲行先,其次就係Vocal,啲歌詞填得好唔好就冇乜所謂啦!如果歌詞對一首歌真係咁重要嘅話,咁你聽英文歌同埋日文歌嗰陣又知唔知人哋噏緊乜先?」嗱~即係唔係話我睇唔起香港個樂壇,亦唔係話外國嘅月光就特別圓!只係我想問下,自從流行音樂界國民教育「搞靚衫」開始大行其道之後,有幾多首廣東歌嘅旋律同編曲係勁揪到可以衝出國際先?自己嘅音樂都未做到人哋個水準就要啲聽眾跟你嘅步伐去行?會唔會開玩笑咗少少呀?好老實講呀~假如你張碟啲音樂係能夠做到達哥隻《麻木》咁嘅水平,我仲會同你理咁多其他嘢咩?我咁講絕對唔係要貶低香港啲作曲人同編曲人,而係假若按照班後生仔個邏輯嚟睇嘅話,咁點解詞壇大師林夕到今時今日都仲會畀人當係神咁拜?點解開親作品展嘅就大部分都係啲填詞人?你哋再諗遠啲,若然周杰倫冇咗方文山,佢喺華語樂壇嘅成就仲會唔會好似而家咁高?羅大佑同李宗盛之所以會畀人稱為大師,主要係因為佢哋喺邊方面嘅才華呢?再唔係嘅咪試下上網摷返舊陣時嗰啲乜鬼嘢《台灣百大唱片排行榜》嚟睇下囉!喺個榜上面排頭幾位嘅嗰幾張專輯,基本上一概都係以歌詞行先。
有好多時下嘅年輕人都認定我哋呢班老屎忽咁注重啲歌詞係一種行為上嘅倒退,但站喺我嘅立場嚟睇,身為一個土生土長嘅香港人,又點可能對自己最熟悉嘅語言毫無要求呢?我知道呢類咁主觀性嘅問題就算再繼續拗落去都係唔會得到一個明確嘅答案……與其再永無止境咁爭論落去,不如就嘗試尊重一下大家嘅諗法啦!正所謂鹹魚青菜各有喜好,聽歌呢樣嘢就從來都冇高低之分嘅!正如一碗拉麵最重要嘅到底係麵質,湯底定抑或係啲配料?相信每個人嘅選擇都會唔一樣!先唔好理人哋個準則係點,就只從一個客觀嘅角度去睇,我始終都認為,要成為一首流傳萬世嘅華語經典,係必須要具備好多條件,除咗旋律、編曲同歌詞,仲要配合埋天時地利人和同歌手本身嘅音樂Sense先成就到成件事。須知道音樂Sense呢家嘢就唔係人人都有嘅!咁若果你係冇嘅咪交畀你經理人同啲幕後人員去搞囉!要知道你個人幾叻都好,都要揀返啲適合你自己嘅嘢嚟做先得㗎!即係你唔會見到甄妮有一日會無啦啦走出嚟同人講佢要轉型去做一個熱力四射嘅勁舞Dancing Queen,趙傳喺個演唱會度亦唔會不停唱一啲超低音嘅歌嚟折磨觀眾,呢啲嘢真係唔可以亂咁嚟㗎大佬!你哋試幻想下,如果由第一日開始就將關正傑同張國榮啲歌冚唪唥掉換嚟唱,聽完包保嚇到你瞓唔著呀!
嘩~聽你咁講,好似李克勤呢類齋賣靚聲嘅歌手除咗繼續行演奏廳同發燒碟路線之外,咪即係點搞都係死路一條?咁就當然唔係啦!要數喺歌詞上嘅重大突破,2009年嘅《Threesome》絕對係當中嘅表表者,而成件事亦好適合佢呢類感情比較內斂嘅歌手去做,特別係碟入面嘅第三Plug〈二十四城記〉,嗰種令人痛到入心嘅無力感真係一巴巴咁打落去嗰班經常批評佢唱歌似機械人嘅樂迷塊臉度。至於喺旋律同編曲上嘅重大突破,喺同年推出嘅《Today Special》專輯入面,克勤就請咗一班後輩歌手為佢度身訂造咗好多首唔同類型嘅歌曲,出嚟嘅效果仲相當唔錯,嗰份濃濃嘅麻甩佬浪漫情懷瀰漫住成隻碟,聽落去個感覺都幾過癮㗎!
可惜嘅係,呢兩張專輯喺當時所引起嘅迴響就唔係咁大,迫使佢後嚟又要走返去扮後生仔,而所揀嘅歌亦開始越嚟越商業化,一次又一次推翻自己嘅「西裝論」。直至近幾年,呢一位著住老西嘅潮店老闆仲經常會利用「撚聲」嚟取悅一班年輕客仔,好似今次呢隻新碟嘅第二Plug〈C3PO〉,就係一個好典型嘅例子。講真呀~呢種Gimmick大過一切潮童氣味又咁鬼重嘅「兵仔歌」若然係交畀方力申、周柏豪同吳業坤佢哋唱就OK啫!嗯~我諗古巨基都可以嘅!但係環觀成個香港樂壇,又有幾多把「不老童音」先?查實呢~阿勤哥喺N年前染晒金毛唱〈高妹〉,當時我已經覺得個feel有啲怪怪哋,更何況你而家差唔多成五十歲人先走去行埋呢啲兵仔路線,咁咪即係似足無記以前啲電視劇叫汪阿姐同司棋姐佢哋扮返學生妹,又或者係叫劉華唔著唐裝著Hip-hop,同埋要梁朝偉去演葉念琛電影裡面啲角色一樣!冇話唔得㗎!只係成件事望落去好Q夾硬囉!總之做嗰個又尷尬,睇嗰個仲尷尬!



相比之下,同樣由克勤所填詞嘅〈五十路〉就討好得多!雖然呢首歌嘅歌詞同〈C3PO〉一樣都係「歌名大過歌詞」,而喺內容方面亦都係冇乜中心點,跟住去到Chorus部分咪又係左砌右砌咁囉!幸好,輕快清新嘅旋律配上克勤悠然自得嘅寫意演繹,就成功幫呢首歌爭返唔少分數,聽完成首歌就好似遊完一場車河一樣,令人心曠神怡。



個歌手可唔可以將歌詞入面嘅意境帶到出嚟?佢把聲夾唔夾首歌?佢個人本身適唔適合做呢件事?呢三樣嘢確實係好緊要㗎!我夠膽講,而家香港有一半歌手唱歌嗰陣都唔係唱緊首歌入面所講緊嘅嘢!先唔講嗰啲五音不全淨係齋賣樣嘅偶像派,因為呢班人根本唔配被稱之為歌手!我家吓想講嘅,係嗰堆有啲資歷而唱功又有返咁上下嘅實力派!呢班前輩好奇怪,一到咗某個階段佢哋啲打公仔心態就會浮晒出嚟,每次出show就如同例行公事咁,有時都冇細心睇下人哋份歌詞寫乜就拎起支咪唱,總之求其唱啱晒啲音就算。我試舉一個例子,大陸有一位經常唱爆咪嘅巨肺歌后,佢個名叫做韓紅,呢支樂壇重型大炮曾經完成過一個極之驚人嘅創舉,就係用唱〈義勇軍進行曲〉嘅嗰一種方式嚟去演繹趙傳首〈我很醜可是我很溫柔〉,然後出嚟個效果仲恐怖過你入戲院睇十次《失眠》。睇到呢度,可能有啲學生哥會話:「喂~我哋係香港人嚟㗎!大陸嘅嘢關我哋叉事咩?」好!唔講大陸,就近近哋講返我哋香港本土嘅唱家班!記得幾年前喺一個乜鬼群星演唱會入面,葉振棠無啦啦就唔知挑起邊條筋走去翻唱楊千嬅首〈小城大事〉, 點知唔唱由自可,經佢一唱之後,小城大事當堂即刻變咗做好大件事!或者你又會話:「唓~王菲同Eason夠成日hea唱啦!咁點解人哋又唔會有呢啲問題呢?」係!我當然明白,有種人天生就係有本錢打天才波,所以陳奕迅唱現場即使有幾唔穩定,啲人都係照樣會仆街咁仆去睇佢嘅演唱會!無論佢唱得有幾衰,表現得有幾咁晦氣,佢有樣嘢就始終都係獨一無二,就係唔理你將乜嘢歌擺落去佢個口度,佢都可以將佢哋唱得好通順,永遠唔會畀人有一種好古怪嘅感覺。而王菲就仲犀利,我相信佢就算係企喺個台度乜都唔做,成晚淨係喺度依依哦哦,佢都一樣有本事可以感動到你!呢啲係天分,唔係話你想學就一定會學得到嘅!之但係好似佢哋呢一類能夠將腐朽化為神奇嘅天才型歌手,真係廿年都唔知出唔出到一個!



咁一個歌手如果冇天分,係咪即係等於乜嘢都唔使玩呢?嗯~又唔一定嘅!好似林憶蓮同張學友咁,一個係由零變有嘅最佳模範生,一個即使上到歌神呢個地位都仍然會不斷咁去發掘自己喺歌路上嘅無限可能性。咁若果你又冇天分但又唔想努力嘅話,咁又可以點呢?咁就唯有交畀你嘅Producer去搞囉!一個Producer嘅重要性究竟有幾高?你淨係睇下以前黎明同鄭伊健嗰堆hit歌就知道啦!另外,唔知大家仲記唔記得,郭富城喺出道嗰時咪成日都畀人話佢唱歌把聲似足雞仔嘅!但係佢就偏偏屎忽撞棍用呢把雞仔聲將一堆充滿少男情懷嘅糖衣情歌演繹得鬼咁入心!咁就證明咗一件事,所謂夾唔夾同唱功都唔一定係有關係嘅,即係雖則我就點都冇法子接受到麥浚龍同周國賢嗰種無病呻吟嘅扯蝦式唱法,每次聽呢兩位人兄唱歌都好想即刻走去買個氧氣筒畀佢哋!不過,人哋就至少係喺度唱緊一啲啱自己Style嘅歌,成件事睇落去都叫做係合情合理呀!反觀克勤……我唔知係佢本身嘅音樂Sense有問題定係佢班Producer有心整鬼佢啦!當好多小朋友都準備要考上大學嗰陣,身為教師級人馬嘅李生就竟然要走返去幼稚園學ABC!喺呢十幾年裡面,我經已唔只一次聽過啲製作人話要將李克勤慢慢tune返做一個正常人,而克勤本人似乎亦好樂意朝著呢個方向去行……到後來,呢班製作人就經常都會要求克勤唱得粗豪啲,甚至係搞爛自己把聲,務求達到佢哋想要嘅嗰種真實效果,卒之就將克勤嘅所有缺點暴露晒出嚟。



你話我個人保守又好,死板又好,刻意用一啲方法去谷出嚟嘅感情,又會有幾真實呢?再者,一個出色嘅Producer就應該同化妝師一樣,係要適當咁將Artist嘅缺點遮蓋,而唔係將佢唔好嘅地方畀晒人哋睇!喺呢方面,馮翰銘喺克勤今次隻新碟裡面就表現得相當稱職。將呢張《30克》反覆聽咗幾十次之後,我發現除咗〈C3PO〉 同〈一個都不能少〉之外,碟入面大部分嘅歌都畀我有一種煥然一新嘅感覺,無論喺曲風同唱法上都好有突破,同時又可以喺中間攞到個平衡,特別係克勤喺演繹〈恭喜你〉呢一類頹廢味比較重嘅歌嗰陣,唱起嚟就終於都唔會好似斯文佬講粗口咁,呢個轉變實在係非常之唔容易。

稍為有返少少資歷嘅勤迷應該都會記得,克勤自從開完04年嗰一次《左麟右李》之後,把聲就突然廢咗一半武功,以致佢後來每唱到一啲比較高音同需要用到「實聲」嘅歌嗰陣,通常就會出術用混音同假音輕輕帶過!而隨著年紀變化,佢嘅唱腔同埋用聲嘅方法亦同以往有好大分別,佢啲假音同混音聽起嚟個feel十分之陰陽怪氣,啲高音又變得好模糊同好唔集中,十足十啲漏氣耳筒咁!喺呢段時間,克勤就作出咗好多新嘗試嚟keep住自己嘅人氣同賣碟量,例如係叫好又叫座嘅《演奏廳》系列同搵Eric Kwok幫佢轉過另一種唱法去迎合潮流,仲因此而得到佢人生第一個「金曲金獎」。



〈花落誰家〉嘅成功,就畀到克勤喺唱腔上有一個全新嘅啟發,並決定要繼續沿用呢種避重就輕嘅唱法去演繹歌曲,因而令到佢把聲長期都處於一個好唔自然嘅狀態,呢種冇神冇氣嘅情況一直要去到2009年先至有返少少改善。喺重傷過後,克勤嘅唱功就始終都係冇法子同佢「高清亮」嗰段時期相比。有見及此,當時環球就即刻將佢掟去Hi-Fi碟市場企圖混淆視聽,但就畀佢哋誤打誤撞殺出一條新血路,亦令我哋發現克勤嘅中音同低音原來仲未打柴,而且仲比以前更加醇厚同有味道。只可惜,與此同時,環球對佢投放嘅資源就明顯地減少咗好多,以致克勤喺各方面嘅發展都畀人有一種停滯不前嘅感覺。



直至兩年前,因為大陸嘅一個歌唱節目《蒙面歌王》,令我感覺到克勤嘅狀態開始有回勇嘅跡象。雖然《蒙面歌王》喺香港嘅評價絕對係閪多過Like,但一首有如行雲流水嘅〈富士山下〉,加上同容祖兒喺紅館嗰十二場好評如潮嘅演唱會,就成功省靚返克勤呢部「人肉CD機」個生招牌。而喺同Joey合作嘅過程裡面,我認為克勤或多或少都有受到呢位後輩所影響,尤其係喺唱法方面,除咗越嚟越跟貼到個潮流之外,同時亦保留到佢自己嘅個人特色。



吸收咗多位後輩嘅日月精華之後,克勤喺掌握一啲風格較為新潮嘅歌嗰陣就顯然冇以前嚟得咁拘謹!我自己就特別鐘意佢喺呢張新碟度同RubberBand主音6號合唱嘅〈黑膠〉,李克勤,繆浩昌(6號),一杯係入口溫醇嘅紅酒,一杯係口味濃郁嘅威士忌;一個係出道於黑膠唱片年代嘅資深前輩,一個係喺千禧世代崛起嘅80後Band友,估唔到呢兩把聲混合埋一齊竟然會毫無衝突同違和感,而克勤喺合唱嘅部分就更突顯到自己嘅靚聲特質。雖然有部分樂迷認為克勤嘅表現應該可以再Chillax啲,但個人就覺得而家個feel已經啱啱好,再Chillax啲就唔係李克勤嚟㗎喇!此外,亦想讚一讚馮翰銘嘅編曲實在係做得極其到位,柔和抒情嘅氣氛配合埋嗰堆鳩噏到上太空又懶有品味嘅歌詞,令成首歌聽起嚟個感覺就好似兩條中產麻甩走咗去一間好高級嘅清吧入面扮上等人,然後就坐喺個吧檯度拎住杯酒無無謂謂咁吹咗成晚水。「看!最簡單的對話是如此!」講得啱!有時候,麻甩佬傾偈啲內容本來就係咁Q無聊!



若果抽起啲歌詞,淨係留意〈給歌迷梁小姐的公開信〉嘅旋律同編曲,驟耳聽落去你或者會以為佢只係一首好普通嘅溫馨小品。不過,當大家細心嗒真下啲歌詞,就會發現喺呢層糖衣底下原來係暗藏咗一個鋪滿洋蔥嘅催淚故事喺入面。冇利用一啲Sad到爆嘅音樂同一堆慘絕人寰嘅歌詞去製造煽情效果,亦冇搬晒啲滿天神佛出嚟同你瘋狂說教,反而就以一種好輕鬆嘅態度去同一位已經唔喺人世嘅歌迷Say聲Hello,成首歌畀人個感覺好正面,嗰份感動係慢慢咁滲出嚟,雖然用詞簡單,但又不落俗套。



〈失魂記〉成首歌都畀我有一種似曾相識嘅感覺,尤其係前段同後段嘅旋律同陳奕迅首〈Shall We Talk〉真係至少有七成相似,而個編曲手法亦令我諗起Do As Infinity首〈Yesterday & Today〉。喺歌詞方面,林若寧就嘗試從枕邊人嘅角度出發,一步步咁去探索佢哋面對失智病患背後嘅嗰一份徬徨同無助,雖然寫得有啲平鋪直敘,但喺推進上就尚算自然流暢。旋律順耳入心,歌詞寫得感人,咁克勤嘅演繹喺成首歌入面又有冇起到畫龍點睛嘅作用呢?我覺得大致上都算OK,特別係喺開段嘅氣聲唱法,有感情得嚟又唔算好做作,慢慢咁將歌詞裡面嘅故事一層層表達出嚟,稍為有啲美中不足嘅……係每當克勤唱到一啲比較高音嘅部分嗰陣,把聲就畀人有一種乸乸哋嘅怪雞feel。



作為克勤加盟英皇後嘅首支單曲,〈一個都不能少〉喺質素上無疑係合格有餘。呢首歌嘅旋律悅耳流暢又易記,同時又Show到克勤一貫長氣嘅犀利好唱功。至於Wyman份歌詞論故事性就唔係咁強,需要配合埋個MV先可以令成首歌個畫面感大大提高,但就勝在簡單易明,喺結構上亦比其他作品較為完整,又能夠發揮到激勵人心嘅作用,絕對係一首不可多得嘅佳作!不過,將呢類風格咁鬼成熟嘅作品放喺呢張潮味十足嘅專輯裡面,畀人個感覺就有些少格格不入。



當我第一次聽到呢張紀念專輯嘅點題作〈30克〉,只係聽咗30秒左右,我就由心而發咁笑咗出嚟!先用七首經典勤歌做Background Music,再以A Cappella嘅形式去編排,成首歌個Concept都幾盞鬼,但聽落去又唔覺突兀,唯一缺點係首歌嘅長度太短,似足啲唱片公司特登將每首歌cut到淨返十幾秒嗰啲新碟試聽版咁。由出道、拍劇唱到做無記契仔拎勁歌金曲獎,再由老婆盧淑儀、偶像譚詠麟唱到阿叔食煙同蒙面啟賢,最抵死嘅係連送禮事件都搬埋入歌詞,中間仲要搵嚟譚炳文客串唱返兩嘴,當中嘅幽默係肯定要有返咁上下資歷嘅克勤歌迷先至可以感受得到!

《30克》好歌推介:黑膠、給歌迷梁小姐的公開信、失魂記、一個都不能少、30克


眨下眼就做咗克勤嘅歌迷廿幾年,睇住佢由有頭髮變冇頭髮,再由冇頭髮變咗做金頭髮又變返做黑頭髮,當中有好多轉變實在係令我有啲意想不到……
哈~我唔知道有冇人會有過我呢種感受,就係當你默默欣賞咗一個人好多年,然後到有一日你先漸漸發現……原來呢個人嘅思想、思路、思維同真實嘅一面同你一直以嚟所諗嘅完全係背道而馳!細個嗰陣我一直都以為克勤係一個天生嘅歌唱家,喺將來應該係會走Andy Williams嗰種路線,殊不知幾年前佢竟然走出嚟同大家講話自己嘅目標係想做一個爛gag歌王,仲話要學人開「棟篤唱」添!坦白講,作為一個廿幾年嘅忠實歌迷,除咗一啲個別嘅真心膠事件之外,我真係從來冇一刻覺得李克勤好笑過,我認為佢嘅強項就只有唱歌,他所演嘅劇集、電影同主持嘅綜藝節目,我通通都唔懂欣賞!
經過咗好多年之後,我先發現係我自己諗多咗!克勤其實係冇我想像中咁有藝術家脾氣,佢甚至比香港好多打工仔更能屈能伸!唱歌撈唔掂咪去拍劇囉!冇碟出咪走去做勁歌主持囉!做厭勁歌主持咩?我直頭撈埋講波佬都仲得!問你死未?
我諗克勤喺星光年代都曾經對自己嘅歌唱事業好有抱負,佢試過專誠走去美國學唱歌,嘗試修正震音過多同唱腔守舊呢兩個問題,又作出過好多大膽嘅突破,佢唱過搞Gag怪歌,唱過Jazz,唱過Blues,就連Rap都唱過!喺嗰陣佢啲高音粒粒都爆到盡,每次企喺台上唱歌都畀人有一種揮灑自如嘅感覺,我認為就只有呢個時期嘅克勤先至真正配得上「零瑕疵歌手」呢個稱號。但可惜,只能夠講句時也命也,克勤喺唱功達到最巔峰嘅時候反而就得唔到應有嘅輝煌成就,而1995年嗰十場票房慘淡嘅演唱會,仲搞到佢一蹶不振,之後個人就變得越來越莫薑……
可能係受到佢偶像譚詠麟嘅影響,喺2002至2003年當佢憑著〈高妹〉同左麟右李一躍成為最受歡迎男歌手,佢成個人嘅行事作風同待人接物嘅態度就突然嚟個180度改變!佢講嘢越來越圓滑,啲歌就越來越商業,畀人個觀感似係一個生意佬多過似一個歌手,而當有咗小朋友之後,佢嘅心態更加似足一個打工仔咁!我以前成日都會諗……假若克勤嘅偶像唔係譚校長而係張國榮,咁成件事係咪會即刻唔同晒呢?佢嘅人生同歌唱事業又會因為哥哥而起咗啲乜嘢變化呢?
曾經有一段時期,克勤「hea唱」嘅功力可以話係登峰造極!當我以為李生團火已經熄晒嘅時候,佢喺《蒙面歌王》首集嘅表現令我知道條友唔揸流灘原來係可以唱到咁嘅水準,之後佢上《我是歌手》同郎朗即席現場合作嘅〈我不會唱歌〉,就更加Show埋畀所有人睇其實佢仲有大把貨賣!喺近年有好多香港人都屌柒佢成日上大陸搵人仔,又話參加《蒙面歌王》呢類節目對於佢嚟講係一個恥辱,但個人就覺得……唓~家陣佢都係玩下蒙面啫~做歌手都要搵食㗎!仲有呀~唔上《我是歌手》唔通上《勁歌金曲》咩大佬?只要佢唔好學似某啲天王巨星咁……對住我哋香港人就亂鳩咁唱閪晒口面,然後上到大陸就即刻施展國粹玩變面咁咪OK囉!
數十年匆匆過去,到今日,睇見克勤依然堅持要走一條隨波逐流嘅商業路線,內心雖然都係會有啲戥佢可惜……但如果站喺佢個角度去睇,今時今日嘅李克勤就絕對稱得上係一個人生大贏家!佢有家庭有地位有身家有人脈,仲有車有樓有舖頭,圈中老友又多到數唔晒……而家佢得閒就同啲屋企人去下旅行,唔係就同老婆去英國睇下波,同兩個仔砌下Lego,呢種寫意嘅生活態度都唔知幾咁happy!
PS:部份照片係轉載自各大報章同李克勤嘅Facebook專頁。
我相信我絕對係大部分歌手眼中最乞人憎嘅嗰一類樂迷,雖然我同普羅歌迷嘅諗法都係一樣,都認為要支持自己鐘意嘅歌手,最直接嘅方法當然係行入唱片鋪買佢哋嘅正版唱片。唔同嘅係,一般歌迷對住偶像通常都會採取一種有讚冇彈嘅態度,再Die-hard啲嘅就直頭會帶埋隻碟去參加個歌手嘅簽名會,實行同佢哋嚟一個近距離接觸。有啲人會希望有一日可以同自己深愛嘅藝人成為朋友,有啲仲更加會將佢哋當係屋企人咁看待。而我嘅諗法就比較現實,我拒絕盲目崇拜,更討厭時下嘅造神文化,我欣賞一個歌手,就只會單純去欣賞佢喺歌唱方面嘅成就。至於佢嘅為人係點?佢嘅政治立場係乜?佢鍾意啲乜嘢球隊?佢有冇包二奶或者係畀帽人戴?我真係完全冇興趣知道!喺我心目中,歌手同歌迷之間只係一買一賣咁簡單,唔需要包含太多私人感情喺裡面,咁當然,好似林志炫呢一類對於我嚟講有特殊意義嘅歌手又另作別論。
我不嬲都有一個習慣,就係每次買隻唱片返嚟都會即刻將佢擺落部機度重覆聽十幾次,然後就會寫一篇短短嘅聽後感做一個紀錄。喺Yahoo Blog仲好鬼盛行嘅嗰段時期,都有唔少人睇過我所寫嘅一啲唱片聽後感。當年,我嗰種諸多挑剔十足百彈齋主嘅寫文作風,就曾經為我樹立咗好多「網上仇家」,有啲比較激進嘅歌迷仲試過瘋狂轟炸我Email同咒我死全家添!但我當時心諗……我本身又唔係啲乜嘢出名嘅Blogger,只係一個純粹鐘意分享音樂同電影嘅無聊人,況且我都係就返件事實話實說啫,又冇對任何人作出人生攻擊,區區嗰幾十隻網絡小螞蟻,真係怕佢有牙咩?所以喺往後嘅日子我就一直都堅持沿用返呢種風格去寫樂評/影評。直至近呢幾年,因為眼疾日漸嚴重嘅關係,我開始逐漸減產,有時就算係寫好咗一啲感想都未必會將佢哋放落去自己個Blog度。諗起嚟,自《紙牌屋》之後,我已經足足有四年時間冇寫過一篇完完整整嘅唱片聽後感,萬萬估唔到,事隔四年,我終於有意欲再次執筆寫樂評,而篇文入面嘅主角居然咁啱得咁蹺又係同一個人,世事往往就係咁鬼玄妙。
追加感想:話說噚晚我無意中見到有一位認識咗一段時間嘅舊Blog友喺佢嘅社交平台上分享我呢篇看後感,仲寫咗一大段文字去回首當年嘅一啲點點滴滴,真係諗唔到自己嘅文章曾經令到咁多人產生過共鳴,呢一切實在係太滾動喇!音樂果然係全世界最好嘅溝通語言!🎶
因為我寫嘅文章而令到更多人認識到一啲石沉大海嘅好歌同好唱片,呢個就係我一直堅持寫Blog嘅最大動力。

230 則留言:

  1. 專輯名稱:30克
    歌手名稱:李克勤
    發行日期:2017年5月29日
    語言:粵語
    出品商:英皇娛樂集團

    專輯曲目:

    01. 黑膠 x 6號@RubberBand
    02. 五十路
    03. C3PO
    04. 恭喜你
    05. 給歌迷梁小姐的公開信
    06. 失魂記
    07. 一個都不能少
    08. 30克

    回覆刪除
  2. 李克勤 Hacken Lee & 6號@RubberBand《黑膠》
    https://www.youtube.com/watch?v=iyBl0PtAiH8&t=21s

    回覆刪除
  3. 李克勤 Hacken Lee《五十路》
    https://www.youtube.com/watch?v=sptmEKHyS_4

    回覆刪除
  4. 李克勤 Hacken Lee《C3PO》[Official MV]
    https://www.youtube.com/watch?v=rB9nToIV3WI

    回覆刪除
  5. 李克勤 Hacken Lee《恭喜你》
    https://www.youtube.com/watch?v=nu58Kj-xcGE

    回覆刪除
  6. 李克勤 Hacken Lee《給歌迷梁小姐的公開信》
    https://www.youtube.com/watch?v=fMhiLP05asU

    回覆刪除
  7. 李克勤 Hacken Lee《失魂記》
    https://www.youtube.com/watch?v=D0aiafYH6Po

    回覆刪除
  8. 李克勤 Hacken Lee《一個都不能少》[Official MV]
    https://www.youtube.com/watch?v=pC76Eq6F79c

    回覆刪除
  9. 李克勤 Hacken Lee《30克》
    https://www.youtube.com/watch?v=d2VTVKPKwB0

    回覆刪除
    回覆
    1. 文中有提及到嘅歌曲🎧

      李克勤 - 鑽石人生
      https://www.youtube.com/watch?v=XfaWfGmoGUs

      李克勤 Hacken Lee 《紙牌屋》MV
      https://www.youtube.com/watch?v=1OEygLPPPvs

      李克勤 - 生活大爆炸
      https://www.youtube.com/watch?v=SXtFKQV9FZQ

      李克勤 -《戀愛為何物》 (Feat. AGA江海迦) MV
      https://www.youtube.com/watch?v=22DhJf5vAiE

      唔知點解最近一加啲Link落去啲文字度啲字就會自動變大好肉酸……😂

      刪除
    2. 謝安琪 - 菲情歌
      https://www.youtube.com/watch?v=k4Ru0z2HLXk

      謝安琪 - 篋神
      https://www.youtube.com/watch?v=in3rlNzmjFU

      謝安琪 - C餐
      https://www.youtube.com/watch?v=mspl5HOrNbA

      Kolor - 雲圖
      https://www.youtube.com/watch?v=vMRayqyJS38

      刪除
    3. Hacken Lee 李克勤《二十四城記》MV
      https://www.youtube.com/watch?v=4iG1EV12Rl8

      李克勤 Hacken Lee《C3PO》[Official MV]
      https://www.youtube.com/watch?v=rB9nToIV3WI

      李克勤 - 高妹
      https://www.youtube.com/watch?v=OG6pL98HXCg

      刪除
    4. 韓紅 - 我很醜可是我很溫柔
      https://www.youtube.com/watch?v=JQ9omTV3r1w

      李克勤 - 花落誰家
      https://www.youtube.com/watch?v=pxp94Q7GeUM

      〈富士山下〉李克勤 @ 「幪面歌王」19/07/2015
      https://www.youtube.com/watch?v=8O2uBG95fTE

      刪除
    5. [蒙面歌王]李克勤 - 忘記你我做不到
      https://www.youtube.com/watch?v=osxBroW5XDQ

      李克勤《我不會唱歌》- 我是歌手第四季第11期
      https://www.youtube.com/watch?v=fk_7K8ZXIa4

      李克勤 + 陳冰 - 大雨 - 江蘇衛視金曲撈第5期
      https://www.youtube.com/watch?v=j0eTRTjn6DI

      刪除
    6. 佢唱國語真係好鬼怪雞,佢身邊冇人話過佢呢樣野架咩?

      刪除
    7. 「忘記你我做不到」已經叫做唱返以前七成水準,但啲咬字都係好撚怪!😅

      刪除
  10. 佢唱功真係唔差, 不過演譯方法真係十年如一日
    近年對佢印象真係麻麻, 點解要參加埋D蒙面天王, 仲有佢D膠post
    可能佢會話, 搵食啫, 唔駛咁認真

    回覆刪除
    回覆
    1. 其實好現實,因為啲歌手淨係留喺香港真係好難搵到食……🍚

      刪除
  11. 呢篇你寫得好長又好詳盡。。。
    葉振棠唱個首歌,真係唔唱好過唱,我都聽到打冷震呀!

    回覆刪除
    回覆
    1. 佢唱第一句我就已經想笑,似足殯儀館啲喃嘸佬咁!😂

      刪除
  12. 終於有機會再睇到狂兄勁癲喪多字既砲彈式樂評,超懷念!!真係等左好Q好Q耐!!!果然就只有送禮勤先可以逼到你再出手!!!花左幾個鐘頭睇曬成篇文,裏面所講既樂壇怪現象真係勁到point!!!!

    先從歌詞講起,再點出香港既旋律同編曲一式一樣,繼而又深入咁去分析歌手響演繹方面既問題,超鍾意你用韓紅同葉振棠呢兩首歌黎做例子,貼切得黎又不失你一貫既幽默風格,睇到你話送禮勤成日要走去扮後生去取悅時下班樂迷,其實我老早之前就已經發覺呢個問題,條友真係冇乜音樂sense,淨係睇佢同其他一線歌手揀歌既審美觀就好明顯見到個分別響邊,所以之前佢同阿lam開演唱會,我唔駛睇就已經知道佢地唔會有火花,呢個組合肯定唔work,睇到你講話而家d小朋友成日話聽廣東歌無論係聽邊個歌手,有理冇理都係應該聽左d旋律同編曲先,呢d言論又係戇撚柒鳩!!你聽李克勤呢類vocal行先既歌手就梗係會比較著重歌詞同唱功呢兩方面啦,就好似你去睇Celine Dion同Pink Floyd既演唱會,你對佢地所要求既野都一定會唔一樣啦!!!個個歌手都有佢既長短處,班戇鳩kid子成日話人一成不變,學你話齋Bob Dylan會唔會作首Justin Bieber風格既歌俾自己唱??唔通你叫玉置浩二走去唱boy band music???咪撚笑大人個口啦!!!!

    回覆刪除
    回覆
    1. 講得啱呀~正如你去睇達明一派都唔會期望佢哋個show係會以唱功為主,但你去睇李克勤同張學友個show就肯定會留意下佢哋嘅現場水準有冇退步到!另外我都想Eminem兄你留意下佢今次隻新碟真係有啲驚喜,唔再係好似以前啲,整幾首類似〈禮拜六冇節目〉呢啲Gag歌又或者係〈Victory〉同〈嘭門〉嗰類一味靠噏得快就當係突破!😂

      刪除
    2. 所以我咪好認同你講話如果有一張唱片可以做到達哥隻麻木咁既級數,仲邊撚度有人會同你計較d歌詞寫得好唔好同個歌手唱得好唔好架?弊就弊在而家啲傻鳩最鍾意拎d垃圾黎當藝術品!

      刪除
    3. 我有試聽到佢隻碟,響唱腔上係有少少突破,但我覺得佢都係唱一個都不能少呢類歌先發揮到佢最自然既一面,C3PO如你所講,呢d兵仔歌真係唔唱好過唱,簡直係有失身份!你會唔會聽到張學友走去唱呢d歌?唔好話張學友,就連黎老明而家都唔會唱啦!

      刪除
    4. 冇計啦!呢樣嘢係個歌手本人自己想做,咁都冇辦法!😂

      刪除
  13. 希望未來可以再睇到你呢類型既長樂評或者係長影評,千其唔好怕長氣,你寫多多我都會睇曬,事關響香港呢個音樂文化沙漠入面,呢d咁用心既文章真係好珍貴。

    回覆刪除
    回覆
    1. 謝謝你,老Blog友!真的很懷念以前跟一眾知音互相交流的日子,記得那時候他們打的回應往往都會比我的文章還要長。來到現在,我的文章雖然還有不少人觀看,只是,願意真心交流的人就越來越少了。所以,非常感謝你的用心回應。✏

      刪除
    2. 另外,剛才我看見一個認識了一段時間的舊網友在她的社交平台分享我這篇文章,還寫了一大段文字回首當年追看我Blog的點點滴滴,然後就這樣跟她聊了一個晚上,真想不到原來自己的文章曾經令那麼多人產生過共鳴,這一切實在是太滾動了!音樂果然是全世界最有用的溝通語言!🎶

      刪除
    3. 我都成日會睇你d文章去搵碟聽,不過多數就係英文唱片居多,嗰陣年年都跟你個排行榜去買,幾乎破產咁濟,哈

      刪除
    4. 所以我決定結束我嗰個年度回顧系列其實都係一件好事,咁樣就可以幫好多Blog友慳返啲錢,都算係做咗件功德……😂

      刪除
  14. 有錢唔代表有智慧,有立場,有骨氣!

    回覆刪除
    回覆
    1. 佢似係真心膠,唔係當年點會支持葉劉?😂

      刪除
  15. PK今次好明顯係留有一手啦,Barcode勤唱完北京北角仲唔見過鬼都怕黑咩?不過真是好屎耐冇睇過你寫咁長嘅音樂文章,難得你仲可以保持住咁高嘅水準,就算我唔係Barcode嘅歌迷都會好有興趣一路睇落去,可以寫到咁多字真係唔容易呀…

    回覆刪除
    回覆
    1. 本身只係寫咗千幾字左右,點知後嚟加下一段加下又一段,卒之就搞成咁!😅

      刪除
  16. 回覆
    1. 哈哈~是日金句呀Mok兄!總之用呢個topic名啦!😂

      刪除
  17. 估唔到非偶像嘅李克勤咁襟撈,我諗全靠佢有些唱功吧!

    回覆刪除
  18. 完美分析,精彩絕倫,我諗你了解李克勤嘅程度已經超越咗盧淑儀:D

    回覆刪除
    回覆
    1. 哈哈~好似唔似你一個Blog友有咁樣講過!但成件事聽落去好有gay味!😂

      刪除
  19. 好高汁,巴打做乜唔貼上連登高登?:o)

    回覆刪除
    回覆
    1. 我見到淨係喺facebook啲歌迷互相share都好多人,反應都幾好,總算冇白費到一番心機!其實呢~近幾年主要討論嘅人大多數都唔喺啲網上論壇度,好多時睇一睇個瀏覽數字,就單計你所講過嗰兩個網站就已經有幾千個瀏覽點甚至更多,不過願意討論嘅人就越嚟越少,有好多都會好似你咁選擇直接走入個Blog度同我傾,所以而家我寫完啲有關音樂嘅文章通常都係最後有時間先放上去。😄

      刪除
  20. 好長好長好長~終於都有機會再見識到你ge正宗痴線式樂評,好懷念~~😂你回顧hacken,但我一路睇篇文反而就一路響度回憶起以前追睇你d電影同音樂post ge日子~~💞記得yahoo年代真係個個禮拜都會黎睇下你有冇新文章推出~~👈 果陣yahoo成日都會幫你宣傳d文,一有親音樂文章推介你就肯定係排頭幾位~~👍 我好欣賞你分析獨到之餘又會有好多好搞笑ge觀點,會吸引到人將一篇水蛇春咁長ge文章一次過睇完~~👀呢d係你ge獨有魅力~我以前除左美容blog根本就唔會睇其他blogger寫ge野~~😘 最後想講,音樂之外都好掛住你寫ge電影文章,你ge影評成日都會加入一d自己經歷過ge生活點滴入去~又係好好睇👏但近年好似真係好少見你寫類似ge文章~~😕

    回覆刪除
    回覆
    1. 有關電影嘅長文應該好難會再有,因為我本身唔係咁識寫一啲比較專業嘅影評,通常都係好似妳咁講套用返自己嘅生活經歷落去,但係我而家先做咗三十幾年人,仲邊有咁多經歷寫呀大佬?😂

      刪除
    2. 唔怪得知你咁耐都唔寫影評la~原來係因為呢個原因~~😜

      刪除
  21. 真係服咗你,可以寫一篇咁內容豐富嘅網誌,除咗資料搜集外,還要花時間處理同撰寫。睇完你篇大作,我對李克勤叫做有少少認識。

    回覆刪除
    回覆
    1. 話晒做咗廿幾年歌迷,絕對唔可以寫得咁馬虎!✏💪

      刪除
  22. 癲佬,睇到我頭暈,
    不過尋晚見到你響facebook擺出黎之後個反應好熱烈喎,
    我個facebook通知成晚都響個不停

    回覆刪除
    回覆
    1. 你哋就係鐘意我份人夠癲夠喪啫!乜唔係咁嘅咩?😮

      刪除
    2. 估唔到淨係李克勤啲歌迷喺facebook度互相share就已經令篇文嘅瀏覽數字飆到接近一萬!😲

      刪除
    3. 巴閉!乜李克勤的fans冇鬧你咩?你咁樣話佢地個偶像😂

      刪除
    4. 做得克勤歌迷通常都係上咗年紀嘅人,仲邊度會咁衝動?😂

      刪除
  23. 一贯咁pro,超級樂評人,當中嘅觀點大部分都好認同!!
    首30克幾過瘾,但我不會唱歌嗰度抄咗邊段我聽唔出???

    回覆刪除
    回覆
    1. 應該係開頭鋼琴嗰段intro,我都唔知點解佢會抽呢段出嚟!😐

      刪除
    2. 果然係忠實歌迷!咁都畀你聽到!!

      刪除
    3. 其實我都係聽咗十幾次先留意到!😅

      刪除
  24. 始終都係鍾意寶記年代嘅克勤,嗰陣佢唱歌好有朝氣.

    回覆刪除
    回覆
    1. 寶記多經典,星光最高質,藝能最耐聽。💿

      刪除
    2. 但星光藝能d歌,唔知點解佢唔係好想唱,可能對佢嚟講係事業最失意嘅階段

      刪除
    3. 佢唱嚟唱去咪又係「希望」、「一生不愛別人」、「一個人飛」同「好戲之人」呢啲……😠

      刪除
    4. 條友叫人係fb live叫人點歌,自己想唱嘅就見到,唔想唱嘅就時運高,睇唔到

      刪除
  25. LIHKG睇到不過冇login
    十卜,寫得好pro十足essay一樣
    可惜而家網上唔興呢D用心分析音樂嘅文
    更何况係送禮呢D就更加不合時宜,不過都好欣賞你咁用心

    回覆刪除
    回覆
    1. 講真呀~唱片呢樣嘢有一日可能真係會完全被淘汰㗎!我哋真係要好好珍惜!同埋呢~幾年先出一次呢類型嘅文章係應該要比心機啲寫嘅!😂難得又真係有朋友願意肯等,所以只要一日仲有人睇我都會繼續堅持寫落去!有時見到有啲朋友因為睇咗我寫嘅嘢而真係走去買嗰個歌手嘅唱片返去聽,嗰種感覺真係好開心㗎!呢啲快樂真係用錢都買唔到!😆

      刪除
  26. 終於終於終於等到Time Time新鮮出爐ge碟評~👏
    我一買完隻30克幾日就即刻走過嚟睇下你有冇出文,點知一直都等唔到,當時真係有少少失望,但而家睇到真係好開心ar!

    我覺得今次隻碟做得好好呀,充份感受到EEG對呢位新加盟員工嘅嗰份誠意同尊重,至少肯揼本拍好似一個都不能少呢D陣容咁強勁嘅mv同埋歌曲嘅質素又明顯係提高咗好多,證明佢今次轉會絕對係正確。

    C3PO我有一半認同,如果就咁聽首歌真係有你所講嘅感覺,但睇埋個mv見到佢同大V嘅互動又覺得成首歌即刻合情合理好多仲好感動。

    睇到你寫完碟評之後寫嗰幾段都好有感觸,我同你唔同,我係比較盲目嘅fans,所以成日睇到出面啲人話佢乜唱歌機器其實我係會唔開心㗎,如果出邊班人可以好似你咁客觀去分析佢嘅唱功我就無話可說,最弊我覺得佢哋只係人云亦云,人講乜佢就講乜,呢種生態真好可悲,就係咁香港樂壇先會搞到壽終正寢。

    喂我想講你知,唔係淨係上面位網友試過跟住你個blog黎買CD㗎,我以前年年都係照住你嘅年度回顧去唱片鋪掃貨㗎!😄

    回覆刪除
    回覆
    1. 再一次証明呢條友啲小宇宙係要人迫先會爆發出嚟,十足十《龍珠Z》個悟飯咁!呢個亦都係佢咁多年唔上唔落嘅主要原因!另外,你話而家啲人成日話佢唱歌機器呢個問題,我反而就覺得其實係因為佢有一段時間爆紅咗,啲人先會係咁屌鳩佢唱歌冇感情啫!佢dup嘅時候邊度有人屌鳩佢呢樣嘢㗎?如果佢一直不溫不火,班後生仔就肯定會好似形容陳柏宇咁形容佢,話佢係乜Q嘢低調高手之類!😈

      刪除
    2. 仲有,呢班人聽得佢幾多首歌呀?學下面隨染俗流兄話齋,而家啲人都係流行哭腔同透大氣,然後就一句歌分三截唱。好似我喺另一個網站同人討論呢個問題,竟然就有唔少人話彭羚都係唱歌機器,你話仲有乜嘢好講?心諗如果羅文未死,肯定都會比你班後生屌撚到屎眼都爆!💩🙏

      刪除
    3. 最憎D人成日話人唱歌冇感情,有冇感情係你一個人定㗎咩👎

      刪除
    4. 我一向都唔會同呢類人爭論太多,根本就係對牛彈琴!😅

      刪除
    5. 每逢佢有d宣傳或有d起色就會有呢類post,我有懷疑過係打手所為,但點講佢都好,演唱會或唱片銷量係最誠實嘅!

      刪除
  27. 個人評分🎧(5👍滿分)

    黑膠 x 6號@RubberBand 👍👍👍👍
    五十路 👍👍👍
    C3PO 👍👍👍👍
    恭喜你 👍👍👍
    給歌迷梁小姐的公開信 👍👍
    失魂記 👍👍👍👍👍
    一個都不能少 👍👍👍👍👍
    30克 👍👍👍👍

    回覆刪除
    回覆
    1. 唔知最後會將幾多首歌拍成MV呢?🎬

      刪除
    2. 迷魂記已經拍緊,仲有修哥同鮑姐做女主角👍

      刪除
    3. 我覺得女主角如果搵返羅蘭姐拍就perfect,雖然我都好鐘意鮑姐!😆

      刪除
  28. 此用戶未有用戶登記2017年6月10日 下午10:42

    嘥氣啦ching,你寫到咁深入咁詳細班連登仔點會同你討論
    班小學雞根本都駁吾刀你,上面D人傾kpop㗎咋:o)

    回覆刪除
    回覆
    1. 年代唔同,自己都要接受呢個事實!😂只係估唔到隔咗五年成個年代都唔同晒!記得以前我開啲音樂同電影post喺高登都幾多人討論仲試過推到上報,但而家放上去直頭係完全冇人理咁滯,個個睇完都唔留言就咁行咗去!😂

      刪除
  29. 跟貼到個潮流之外,同時亦保留到佢自己嘅個人特色。

    回覆刪除
  30. 我好叻一字不漏全篇睇曬..哈,聽曬你上面果D試聽,我最鍾意迷魂記,克勤唱得好有感情之餘要讚下佢D節拍真係冇得彈!給歌迷梁小姐的公開信聽完好有感觸,多謝你咁有心機打咁大篇文又介紹咗咁多好歌比我哋,THX&LIKE

    回覆刪除
    回覆
    1. 「給歌迷梁小姐的公開信」係越聽越覺得感動!🎧

      刪除
  31. 雖然我對克勤興趣不大,但睇完你嘅詳盡介紹,有啲意欲聽吓😉

    回覆刪除
  32. 雖然我對克勤興趣不大,但睇完你嘅詳盡介紹,有啲意欲聽吓😉

    回覆刪除
  33. 失魂記歌詞好有意思,題材夠貼地,克勤唱功一貫好水準。

    回覆刪除
  34. 典型世界仔,滑頭擦鞋專埋巨星堆,明明唱功係世界級但公關就災難級,明明生得四四正正但就專做柒嘢,証定唔係天王材料

    回覆刪除
    回覆
    1. 都唔係嘅!佢同梁榮忠咪friend過打band!😂

      刪除
  35. 依稀記得我之所以有幸認識到你的blog,就是因為你寫的李克勤音樂文章。第一次看我就已經覺得你的文筆很特別,但也同時感覺到你的寫作手法是肯定不會在香港大行其道的。因為你的樂評詞風太銳利,雖然內容大多都一擊即中,但在現今社會尤其是偽善當道的香港是不可能會受大眾所接受的。你有何時會見到一個歌手會願意把一些批評他的言論放在自己的社交網站上?儘管那些言論是客觀的就像你一樣。在社會上尤其是娛樂圈這個大染缸,是沒有人會喜歡真實的話的。最重要是,現時香港年輕一代都是較為喜歡快餐式的無聊笑料,比如什麼100毛,King jer,不談八卦不談聲色犬馬,政治,運動是很難引起注意的。真可惜,你寫得那麼好本來是應該可以給更多人看到的。抱歉有點離題,只是忽然有感而發。

    回覆刪除
    回覆
    1. 我唔談論其他人嘅選擇,不過我認為喺自己個Blog度講啲嘢就一定會係好主觀!講真,我又唔係乜嘢網絡打手,又唔係有乜嘢利益輸送,我只係喺度發表一啲我自己嘅所思所想,唔通仲要客客氣氣好虛偽咁?我覺得冇咁嘅必要囉!即係我每次寫音樂又好,電影又好,其實都只係為自己當時嘅嗰一份感覺做一個紀錄,呢種風格鐘意睇嘅人就會繼續睇落去,唔鐘意嘅人自然就會兜路走!根本就冇需要為咗任何人而改變。再者,我想要結識嘅係一班志同道合嘅人,而唔係純粹要一個虛無縹緲嘅瀏覽數字。好老實講,我寫得一篇咁長嘅文章出嚟就當然係想有多啲人認識到我推介嘅音樂同電影,但我亦唔會強求,因為如果你不斷強求成件事就唔幸福㗎喇!😆

      刪除
  36. Welcome back~最強樂評人Time Is Changing!!呢篇真係勾起好多回憶,我又何嘗唔係成日睇住你個BLOG搵歌搵戲睇呀!睇下睇下搞到連gf都識你,仲做埋你忠實讀者,嘻嘻=)

    睇完你呢篇咁長嘅分析特登聽曬克勤隻新碟,我最鍾意黑膠!個feel 有少少似以前無線一個深夜訪談節目首主題曲(係阿公嘅深夜宣言~)但D歌詞擺明係亂來個技倆好多年前林敏聰喺跳舞街已經玩過再玩多幾次就冇新鮮感。學你話頭而家D作詞人都係成日語不驚人死不休,我就唔係咁欣賞啦,都係以前啲作詞人好,文筆至少通順有講到個故事出嚟,而家嗰D歌詞好多時真係唔知佢哋up乜:D

    回覆刪除
    回覆
    1. 咁犀利?😲仲影響埋你嘅另一半?😂不過今年我都有少少興趣想做一個類似以前年度回顧咁嘅記事,因為今年我聽過啲歌同睇過啲戲相比起前兩年真係多返好多!😆✌

      刪除
    2. 你又講得幾啱喎!蘇永康唱呢類型嘅歌簡直就係不作他人之選!如果再拉埋譚耀文一齊合唱,我一合埋眼就已經幻想到成個feel出嚟會有幾正!😍

      刪除
    3. 喂係咪真㗎?唔好氹我開心喎~我最鍾意睇嘅就係你D年度回顧專輯!!我同gf都話舉手贊成呀=)

      刪除
    4. 但就算係都應該唔會好似以前種形式咁樣!😆

      刪除
  37. HK NO1.Critics👍
    全碟D歌都好好聽👍你d評論仍然係長而高質👍👍

    回覆刪除
  38. 寫呢類型ge野邊度有人夠你黎?果個仲要係送禮勤!更加係冇得輸

    回覆刪除
  39. didi點解唔講下你由K場鄭中基轉化成K場CD勤ge經過???😛

    回覆刪除
    回覆
    1. 點解會係尹光??😂我完全冇辦法將你兩個聯想埋一齊~~~😂😂

      刪除
    2. 我覺得我而家一唱到某啲高音把聲就會有啲似尹光!😅

      刪除
    3. 冇D咁ge樹~~~😛係由靚聲王變搖滾男~~~~🎸🎤

      刪除
  40. 雁巴打無論寫利記定音樂電影都係習慣N年磨一劍
    真係等到人頸都長 但係見你次次都咁足料又嬲唔落你XD

    回覆刪除
  41. 其實李克勤的歌唔算好喜歡,只是幾首好聽而已...
    講開又講家中有隻克勤親筆簽名的CD~~

    回覆刪除
  42. 克勤是唯一一位80年代出道,直至現在仍活躍的香港歌手。所謂時勢做英雄,他不是出現在香港樂壇最好的時候最紅的那一群,要不,他現在應更好。
    或許自己是老一派的人,我覺得克勤的歌藝在香港樂壇可説是無出其右,有時覺得有些人批評唱得穩定及技巧無瑕疵所以好悶,真有點不明所以,莫非要每次唱到滿是瑕疵荒唐走板才算過癮?真不敢苟同。
    對我來說,恰到好處的感情總比現在似乎流行的哭腔及透著大氣一句歌分三截唱吸引。當然,每個人都可以有不同的喜好,但總不能把一個專業歌手應有的技巧視爲缺點吧。
    正因如此,如你所言,我其實也對李生因爲現在的潮流故意唱得差了,刻意加進了不少陳奕迅式的沙啞,透氣及間斷等,覺得有點失望。個人認爲,他最不紅的90年代初的歌唱其實是最FIT的,但現在以很少可以聽到他這樣歌唱了。
    最後要讚讚你的文章一如以往寫得很到位,雖然你用的是地道的香港用語,但無損文章的可觀性,真謝謝你的超級用心分享。

    回覆刪除
    回覆
    1. 佢可以喺呢個充斥住浮誇漏氣嘅潮流樂壇度走到今時今日實在係唔容易!好似喺文中我曾經提到陳奕迅同王菲呢類歌手係廿年難得一見,其實又講返轉頭,克勤呢類歌手喺華語流行樂壇又何嘗唔係十分罕見?佢一出道啲唱功已經達到專業歌手嘅水平,啲音準同技巧簡直就係超齡兼嚇死人!但可能就正因為咁所以外人就睇唔到佢有乜嘢進步空間,加上佢條友本身又係hea底,冇計!所以今次睇到佢漸漸可以carry到一啲young啲嘅歌,感覺上都有少少驚喜。雖然到而家我都係唔太接受佢走呢種路線,但既然佢立心要做一個潮店老闆,亦肯落苦功去學,唔係諗住淨係棟篤企喺度等收錢,呢種精神都算係對歌迷有返個膠袋嘅!🎧

      刪除
    2. 市場和藝術往往是不能共存的,當年黃家駒就很想將自己喜愛的音樂帶入香港流行樂壇,但偏偏樂迷最喜愛的就是真的愛你這類老掉牙的肉麻親情歌曲。

      刪除
  43. 真係死撐都無謂、講實話通常會得罪人、但講假話又對唔住自己個良心。有一點不能否認嘅事就係、本地樂壇實在有太多沽名釣譽之輩矣!歌典由多元化走到去多餘化、都咪話唔悲咯。不過這現象好似全世界都係咁嘅、香港只是其中一分子而矣!

    回覆刪除
    回覆
    1. 香港而家啲音樂人太鐘意自己打飛機,呢種圍爐取暖嘅心態絕對係死症!😈

      刪除
  44. 作為一個利迷真係好難會鐘意送禮兄!但係就從來唔敢否認佢嘅歌藝!佢當年唱嘅世界盃主題曲真係經典!!
    都要畀個like Blog主你,你D文章一如過往比本身嘅作品仲要精彩呢!!

    回覆刪除
  45. 天啊就一個李克勤你怎麼可以打那麼多字?你已經寫了那麼多有關他的樂評竟然還可以再寫出那麼多觀點出來?厲害,我服了你啊。我覺得李克勤聲很靚,很擅長唱些中版和慢版情歌。但有一個大問題,或者係弱點,就係唱不到快歌,亦沒有台風,歌路較窄,有礙當年走上大紅之路。我甚至可以話,他唱快歌根本係駕馭唔到,反而被首歌駕馭了,聽聽他在左麟右李演唱會唱愛情陷阱和捕風的漢子這類型的歌大家就會一清二楚。

    回覆刪除
    回覆
    1. 搭下咀 唔使愛情陷阱夏日寒風呢啲
      淨係獨醉街頭 你知我知 elaine呢三首已經夠玩死佢

      刪除
    2. 寂寞先生:佢把聲偏向係林志炫同殷正洋嗰種,又未至於去到張信哲甚至係費玉清嗰類咁虛無飄渺,不過就已經局限咗佢嘅歌路,好似佢哋呢啲咁拘謹嘅人唱快歌自然就會突顯到佢哋嘅性格特質。但係,我就唔係太認同唱唔到快過就肯定做唔到巨星呢一點!你睇下羅文同我上面所提及嘅張信哲同費玉清,佢哋就係可以靠一個唱腔走天下嘅靚聲歌手,咁當然,克勤把聲就梗係未去到佢哋嗰種天籟級數。😆

      刪除
    3. 一龍兄:譚校長後生把聲同唱功真係好鬼掂,仲成個松本潤咁嘅樣,都算係香港第一代嘅偶像實力派!👍

      刪除
    4. 查實喺星光時期都有一首算係幾爆嘅歌(以佢嚟講😂),首歌個名叫做「蜜月花車」!🚗
      http://www.gogovip.top/yymedia/TXpRME56Y18_.html

      刪除
    5. 你咁講起又有少少似 主要係個咀 但係阿倫後生靚仔好多

      刪除
    6. 當年他和周啟生的合作真是很有火花,可惜市場反應冷淡,促使他們很快就要分道揚鑣。

      刪除
  46. 兄弟估下我係邊個?2017年6月12日 下午8:07

    有邊個唔知你鍾意李克勤呀?連樓下個看更都知啦!

    回覆刪除
    回覆
    1. 連樓下賣菜婆婆都知你係鹹濕歌王萬歲萬萬歲!😚

      刪除
  47. 哥日我媽先講左句:李克勤都30年喇!!!唔怪得阿姐都50年!!

    回覆刪除
    回覆
    1. 50年咋咩?😲我仲以為係60年……😂😂😂

      刪除
  48. ✨好友☁。゚♦╠╣aΡpy週一🌟晚上安好
    ⚡下午5:30🌀卦起八號風嚟☔你回家未
    我個人都真係已經out晒date啦,而家聽D粵語流行曲,聽唔明D歌詞

    回覆刪除
    回覆
    1. 我哋做戲院十號風球都要返㗎啦!而家先啱啱返到屋企咋陰功!😪

      刪除
    2. 嘩...咁陰功十號風球都要返㗎

      刪除
  49. 我覺得李克勤始終還是無法重拾飛花和三千零一夜那個時期的感動。

    回覆刪除
    回覆
    1. 二十四城記、紙婚和鑽石人生我覺得唱得很細膩很入心。❤

      刪除
  50. 克勤歌唱得好而有風格令他紅了數十年 !

    回覆刪除
  51. 好耐冇睇過你寫咁長ge hacken碟評。。好懷念。。\(^o^)/

    聽哂隻30克,我認為 "黑膠" 唱得好夾、聲音好一致、轉音好穩定、好好聽 。

    "五十路" 唱得 音質好清脆、好舒服、聲線好連貫性 。

    "恭喜你"最鍾意呢首!唱得聲線好洪壯、史上最大驚喜。

    "給歌迷梁小姐的公開信" 唱得好有感情、好慈性、好感觸、高低音好厲害 。

    "失魂記" 唱得好有節拍、歌詞好好。

    "30 克" 唱得 好花心思、聲線好連貫性、零走音、十個正 。

    好期待9月個30週年演唱會唷。。。(⌒∇⌒)

    回覆刪除
    回覆
    1. 暫時睇落呢隻碟打歌都打得好正路,唔會有以前「皮球打歌,多數坎坷」嗰種感覺……🏉

      刪除
    2. 希望仲會有第四五plug。。。~>_<~

      刪除
    3. 其他嗰啲歌好似比較難拍成MV……😅

      刪除
  52. 嘩嘩嘩狂小子流行音樂教室打到嚟!我覺得克勤都算係廣東歌壇嘅驕傲嚟㗎,你睇下同佢同期嗰啲artist好似黃翊,黃寶欣,黃澤鋒,基本上當年同佢拍淘氣雙子星嗰陣班人大部分都已經冇響娛圈,係國貨城一個彈起咗,阿paul都返大陸好多年,膠強就日日食老本,唯獨克勤仲年年有新歌仲成日有新碟出,你都咪話唔好嘢!

    回覆刪除
    回覆
    1. 不過講開又講,以前嗰代啲歌手唱歌真係點都有返啲水準!你睇下黃翊,就算轉行去搞大排檔然後咁多年出返嚟唱現場都仲係咁好,啲高音仲要係粒粒清!👏

      刪除
    2. 黃翊《黃昏戀人》《哭著笑》《一世濃情》@「流行經典50年」
      http://youtu.be/MnkEEc36xNM

      刪除
    3. 【人走茶涼知冷暖】當年淡出娛樂圈…究竟對話中指的是誰?令黃翊想起也難掩淚光
      http://youtu.be/_fe7KYIHpqc

      當日呢個訪問一出,唔知點解我就諗到佢講嗰個歌手就係克勤!雖然好多人都話係王菲……😂😂

      刪除
    4. 我覺得唔係阿faye,佢應該唔會無啦啦成日同你黃翊傾電話lor!

      刪除
  53. 看過周慧敏同克勤的 MV, 好有老同學錯愛的感覺! 到位!

    回覆刪除
    回覆
    1. 出道前已經識,然後一齊參加新秀同十九區,再各自喺娛樂圈打滾咗咁多年到今時今日都仲咁好朋友,真係好難得!👍

      刪除
  54. 我以前就已經成日諗 如果你係alan忠實fans你話幾好
    逐張逐張唱片去評論 到時肯定係所有倫迷嘅福

    作為倫迷睇完呢篇咁精彩嘅文章 我都講返少少感覺啦
    克勤唱功無可置疑但星味真係爭啲 呢樣嘢係點都補救唔到㗎
    我覺得阿倫真係好錫佢 佢自己都話佢英皇之前都問過阿倫
    alan諗咗一諗就即刻放佢走 話曬都係環球其中一個老闆喎
    因為佢都睇得出佢同容祖兒呢條水實有排食
    佢自己反而冇所謂 你睇下佢一拍大哥SAM十場飛話咁快就賣曬

    回覆刪除
    回覆
    1. 偏愛譚詠麟個網主咪仲犀利過我!我嗰陣都有睇佢個網站㗎!不過講真,如果要將譚校長啲碟逐張逐張咁寫,我諗真係寫到我瞓入棺材嗰日都未寫完……😂😂😂

      刪除
    2. 其實無論係做咩嘢行業,可以遇到好似譚詠麟咁嘅貴人真係好幸福!雖然佢成日都做燈神,但睇得出佢做每一樣嘢都係真心為克勤好!呢種亦師亦友嘅關係實在非常難得!👍

      刪除
    3. 偏愛個網改咗版之後冇咁好睇 嚮前幾年仲冇再update
      我覺得真係好可惜 要經營呢啲嘢真係唔係咁容易 所以我欣賞你

      刪除
    4. 畢竟呢啲都只係興趣,如果冇時間打理都冇辦法!😩

      刪除
  55. 佢去蒙面歌王搵人仔畀香港人鬧 我覺得呢啲又真係好多餘
    你班香港人尤其後生嗰輩 仲有幾多個會拎錢出嚟買正版唱片
    你唔支持人但又要人無條件放棄生活 有冇離譜咗啲
    歌手咪又係人 有人拎學友出嚟講 我覺得身份唔同
    學友話曬已經上到某個地位 克勤唔同佢同阿倫
    佢唔參加呢類節目根本冇可能響香港以外嘅地方響朵
    所以我好認同你所講 唔上我是歌手唔通上垃圾勁歌金曲
    好心而家班香港人睇嘢就唔好咁短視 有錢唔通唔搵

    回覆刪除
    回覆
    1. 上《蒙面歌王》同《我是歌手》呢啲節目真係冇計,你睇今年連林憶蓮咁嘅級數都要上啦!同埋我覺得有啲說話呢~你係至少要去到學友咁嘅級數先會夠薑講出嗰啲說話,而佢之所以夠膽講,主要都係因為佢真係喺各個地方都撈得掂,你試諗下如果佢喺樂壇個地位好似克勤咁唔上唔落,我相信佢就唔可以表現得好似而家咁有骨氣。所以,相比之下我真係好佩服Deanie姐同明哥,佢哋呢啲就真正叫做有風骨,佢唔似得何韻詩呢啲咁樣擺明抽政治油水,利用完呢樣嘢呃人入場睇佢演唱會,然後就喺facebook笑鳩班示威者,呢啲就係所謂嘅正宗偽人。👎

      刪除
    2. 豆腐詩就算鳩數把啦 抽完自己師傅水就抽班示威者水
      簡直就影衰曬梅姐 叫佢返屋企瞓覺啦 唱歌又冇氣

      刪除
    3. 以前都幾欣賞佢啲音樂,但佢笑示威者嗰單嘢真係過撚晒底線!講真如果妳本身係藍底就冇乜所謂,但最慘妳由頭到尾都係諗住拎呢樣嘢嚟幫妳宣傳演唱會同宣揚妳嗰啲同性戀理念,屌柒妳拎完光環然後就走去做埋啲咁仆街嘅嘢,你講得啱!簡直就影衰晒梅姐!👎

      刪除
  56. 超強樂評呀~我睇到O曬嘴~
    一路聽隻碟ge試聽~一路睇你d評語~
    你真係全部講曬當中ge重點~好犀利呀你~

    回覆刪除
  57. 對克勤始終有份情意結,畢竟由後生聽到老!
    甚麼時候他才可以雲淡風清,唱自已喜歡的歌。。。 走自己愛走的路???

    回覆刪除
    回覆
    1. 可能他現在所唱的,就是他現在所喜歡的歌,畢竟人到了一個階段就會有不同的心態。😆

      刪除
    2. 我想你由李克勤嘅詞分析返佢個人嘅內心世界,
      早期寫嘅係失戀歌居多,大會堂演奏廳,深深深,舊日的小提琴,眷戀
      中期打後無寫失戀,反而變咗兵仔,空中飞人,高妹,C3PO

      刪除
    3. 佢比較得意,細個嗰陣就寫大人歌,大個咗就寫細路仔歌……😂

      刪除
  58. 同你上面最尾提個朋友一樣睇左你blog已經有好多年,
    由細細個開始睇,由讀書睇到出黎做野,但你一出文我就會追,
    系你呢度認識左好多正歌同好睇既戲,真心想入黎同你加油ar.

    回覆刪除
    回覆
    1. 多謝!會唔會有人係由細路女睇到做人媽媽㗎?😆

      刪除
  59. 好的音樂自然由人共鳴.....
    反之九流,整個背後創作團隊應重新正確檢討問題和精結所在,協助歌者發掘另一面的曲風或挑戰音樂上遇到的頸瓶,甚至是聲線上的不同運用加以改進,才會有下一次共嗚.

    回覆刪除
    回覆
    1. 現在的音樂人似乎沒有想到這一點……

      刪除
    2. 我只是喜愛聽歌者,有時好主觀,只要觸動心靈令上隱,一首好歌已誕生.除著一個誕生加上不同因素變出一個流行音樂.
      主打歌固然有期出色之處但多數是較商業性,忽略了非注流有期獨特之處一些較倉海遺珠,極其可惜.

      刪除
  60. 正!完美分析曼狗勤點樣由全港硬件最強男歌手變成一個呃飯食嘅商業歌手…

    回覆刪除
    回覆
    1. 硬件最強男歌手……呢個名好!😂👍👏

      刪除
    2. 響90年代佢嘅硬件的確係全港最強,只係條友自己唔爭氣…

      刪除
    3. 90年代四大天皇當道,果個時勢偶像派比較吃香,佢又唔識搞吓自己個形象,舊歡如夢呢d老土到核爆嘅歌都夠膽推,咁邊會有運行呀!

      刪除
    4. 所以話~一個歌手本身有冇音樂Sense呢樣嘢真係好鬼緊要!😂

      刪除
  61. 李克勤, 無55, 都50了, 不是40幾呢.

    回覆刪除
  62. 失魂記好撚正呀#hoho##hoho#
    隻碟未曝光既歌基本上正過哂之前plug果兩首
    首首都好有特色,唔會好似環球個堆聽完無乜印象[sosad]
    黑膠同6號合唱估唔到幾好,30克自抽得黎又唔覺核突
    如果要爭獎就梗係plug失魂記,30克同黑膠可以做3/4plug
    雖然隻碟塊面好老土,但認真有驚喜#yup##yup#

    回覆刪除
    回覆
    1. 如果佢仲有心攞獎,失魂記應該放年尾plug,不過蛋記打歌應該無問題嘅,容祖兒,張敬軒就係好例子

      刪除
    2. 無記而家嗰啲獎真係唔攞好過攞……😅

      刪除
  63. 梁栢堅填詞個幅度好廣闊,好多題材都夠膽寫,kolor好多歌都出自佢手#hoho#
    佢講政治、填詞都係嬉笑怒罵,成日無無聊聊乜鳩都串一餐#hoho#
    新世代填詞人黎講真係算幾標青,邊同陳詠謙條個on9?:o)
    仲有,雖然佢文字造詣拍馬都追唔上前人,但媾女方面就追到[sosad]
    佢成日填甜詞,所以我一開波已經覺得佢好咸濕
    所以當年偷食單野同佢形象簡直就match撚到爆完全唔覺意外[sosad]

    回覆刪除
  64. 我講咗九百次都係咁講,送禮勤根本就係響香港俾人低估得最嚴重嘅歌手
    佢除左比譚校長捧死,送禮同曼狗之外,仲有咩問題?:o):o)
    唱功以香港男歌手黎講算數一數二,又敬業(把聲keep得幾好,唔似單春)
    仲有樣好撚勁就係佢可以將其他人既歌變成自己既歌
    令其他人唔知以為佢先係原唱,好似傻女同16號愛人佢就唱得好撚好#yup#
    屌勁到咁撚樣點解仲上唔到神台?一句到尾咪就係香港人戇鳩囉
    下下用個歌手個性格黎到定好與壞, 根本就唔係睇返果個歌手個唱功:o)
    不過你話佢地全部都係咁又唔係喎,最鍾意就將單春捧上宇宙:o):o)
    Between,903最近播得最多嘅男歌手係李克勤,你話諷唔撚諷刺:o):o)

    回覆刪除
  65. 其實我明點解巴打你話D讀者就算你咁耐出一次精都會願意等你
    因為你嘅風格真係無出其右,係得你有#yup#
    其他人就算文筆好過你又寫到個觀點,
    但D行文風格同思路都一定唔會有你咁痴線[sosad]
    響外面睇到果D所謂電影同音樂評論就算寫得有幾深奧幾難明
    其實講到尾就係想表現自己有幾撚勁即係拋書包
    唯獨你就冇俾呢個感覺我,你真係想屌就屌,好似一棍毆落去咁#hoho#

    回覆刪除
  66. 嘩.........又咁長篇大論 , 下次不如分上下集會睇得舒服啲呢~!!

    回覆刪除
  67. 等咗咁耐終於都等到你寫音樂論文,好精采,睇到眼都唔眨!~

    回覆刪除
  68. 聽失魂記佢唱live果陣我都覺得佢高音好似真係唱得無以前咁好咁完美......
    好想聽下其他歌手如果翻唱會唔會唔同呢?

    回覆刪除
  69. 我覺得佢有實力,但係冇大驚喜,無大突破,個演繹方法好狹窄,比唔到新刺激聽眾,就會令人覺得悶

    回覆刪除
    回覆
    1. 如果聽華語歌,我可以接受個歌手咁樣唱。

      刪除