2016年10月1日星期六

起飛前最後一擊:亂噏一通利物經(加長再加長版)

號外號外!宣傳易廣告時間!憤怒鳥最新一期亂噏雜誌,好評如潮,繼續熱賣中!

九月終極一炮 の 希貓撞正講故王》
Chapter 1:特別的自拍技巧
Chapter 2:Happy Birthday,dude!
Chapter 3:Work Hard,Play Hard!
Chapter 4:九月觀影小記
Chapter 5:Let's Go Shopping!
Chapter 6:每天來點負能量
Chapter 7:世紀鹹濕歌王搲賓周
Chapter 8:亂噏一通利物經

如要訂閱同留言,請按以下網址:
http://timeischanging2013.blogspot.hk/2016/09/september.html


呢篇波經應該會係我喺起飛前嘅最後一篇文章,由於我喺呢度大部分嘅Blog友都唔係球迷,所以今次呢篇Blog我就決定不設留言,但所有想傾波同睇下其他無聊嘢嘅朋友,就仍然可以去我篇亂噏雜誌度發表一下你哋嘅意見同感受,好!廢話少講!憤怒鳥嘅講波MODE,而家正式啟動!⚽🏃
嘩~近排利物浦嘅表現真係勢如破竹!自從爆冷輸咗畀般尼之後,球隊好快就成功收復失地,並且越戰越勇,佢哋除咗先後擊敗近兩屆嘅英超盟主李斯特城同車路士之外,喺上星期仲輕輕鬆鬆咁以5-1大勝「地獄賽程」嘅頭關對手侯城,計埋之前對打比郡嗰場聯賽盃賽事,不知不覺間,原來佢哋已經錄得四連勝嘅佳績。
Come On Boys!唔使驚!爸爸喺大廳!(設計對白)
高普自從喺2015年10月走馬上任之後,佢所立下嘅戰績又豈只令到倫敦淪陷咁簡單?喺上季,佢除咗帶領利物浦罕有地殺入兩項盃賽(歐霸盃、聯賽盃)嘅final之外,到目前為止,利記無論係入球數字、控球率同埋每場嘅平均衝刺時間、攔截次數都係冠絕整個英超!而喺今個球季嘅頭八場比賽入面,佢哋就總共射入咗24球波,成功打破球會之前所創下嘅百年開季入球紀錄。
入球雖然好鬼多,但失波依舊多籮籮!喺過去嘅六場聯賽入面,球隊大大話話已經失咗9球波,每場比賽都唔能夠保持清白之身到完場,情況真係令人擔心!我認為,如果利記立志要重返前列嘅話,就一定要好好正視一下呢一個纏繞著佢哋多年嘅致命缺陷,尤其喺防守死球方面就更加要落多啲時間同功夫去改善。另外,亦希望高普可以慢慢幫隊波辟咗陣海鮮味,唔好再成日劫富濟貧,儘早脫離「英超羅賓漢」之名。
睇見而家隊波不斷進步,仲漸漸打出一個隊型,佢哋啲入球分佈平均咗,喺組織方面又越嚟越多樣化,而班球員似乎亦開始慢慢適應同執行到高普嗰一套極具體力化嘅迫搶戰術,正所謂「上下一心,其力斷金」,實在係可喜可賀,一隊識得打整體戰嘅利物浦,我真係好多年都冇見過!
喺高普嘅悉心調教之下,有多位球員都陸續搵返自己嘅定位,而其中拉蘭拿嘅表現更加係脫胎換骨!作為上季喺英超跑動得最多嘅頭五名球員之一,呢個非常熱愛奔馳嘅超級長氣袋就一再用勤力、努力同實力嚟證明自己並唔係虛有其表,每次落場都必定會拚盡全力!佢除咗喺迫搶、控球同駁腳方面作出咗唔少貢獻之外,有時仲會突然嚟一招「麥馬拿文式怪腳射門」,將對方嘅守衛同門將殺個措手不及。其實,當有部分球迷喺度不斷抨擊同睇死拉蘭拿嗰陣,我就一直堅持自己嘅立場,唔信大家可以翻查下我啲舊文,我好早就預言拉蘭拿嗰種滿場飛嘅踢法肯定會令佢喺利記取得成功,而事實證明,喺咁多場比賽入面,如果你要我喺全隊波當中選出一位MVP嘅話,我就一定會毫不猶豫咁將拉蘭拿三個字填上去!
要令高普現時個戰術體系run得更順,就絕對唔可以缺少費明奴呢一隻重要棋子,經過一季嘅適應期之後,呢位巴西國腳似乎已漸漸趕上英超嘅比賽節奏,表現仲越來越出色,大家千祈唔好畀佢嗰種睇落好似好hea嘅瀟灑踢法蒙蔽雙眼,論跑動,佢唔會比拉蘭拿同軒達臣少,論突破同護球能力,佢更加係全隊之冠,而且又成日都會幫班隊友鋪橋搭路。此外,呢個極具智慧嘅古惑仔仲有一項特殊技能,就係經常都好鬼鐘意喺敵方嘅「盲眼位」神不知鬼不覺咁突然鼠出嚟,呢種世界級嘅走位技術,確係令人防不勝防!我相信阿明仔只要繼續keep住而家呢個狀態,咁佢喺今季就必定會大有作為。
如果單計足球智慧呢一點,喺全隊利物浦裡面能夠同費明奴並駕齊驅嘅就只有古天奴一個人,喺後備席沉澱咗幾場之後,呢位森巴魔術師逐漸開竅,靈氣再現,狀態全面復甦,仲為球隊射入咗幾個相當重要嘅救命波,而佢嗰招失傳已久の終極奧義「展翅射球」,就更加令到對面班龍門個個變哂做紙牌公仔!老實講,冇人會懷疑古仔嘅質素,我一向都認為佢嘅敵人從來就只有佢自己,只要佢願意稍為調整一下自己嘅踢法同心態,唔好再下下死去同鳩射,做返多啲簡單嘅Passing同走位配合,咁佢嘅足球事業就肯定會更上一層樓,希望呢位未來球王喺將來可以好好證明自己嘅級數同能力,繼續帶領紅軍再創高峰。
正當古仔將「展翅射球」練到爐火純青之際,身為紅軍隊長嘅軒達臣就以一招「滑翔衝力射球」嚟回應外界對佢嘅批評。喺近兩季表現患得患失嘅軒仔又再一次用行動嚟打破大家對佢嘅種種疑惑,自從高普將佢由Box-to-Box中場改造成半防中之後,呢位邊緣隊長嘅演出就持續向好,無論喺較炮、路數同位置感方面都有顯著嘅進步,佢除咗一如以往做咗好多Dirty work同埋有效嘅tackles,佢嗰招「軒式手術刀傳球」就不時令到身邊嘅隊友有所斬獲,而到目前為止,呢位開刀聖手喺今季就總共作出咗324次傳球,係全個英超裡面嘅「Passing一哥」,極其標青嘅表現,令到傷癒復出嘅安利簡都要暫時退居後備。



「喝~看招!滑翔衝力射球!」我諗就算你叫軒仔射多一百次,佢都肯定唔會再射出一球咁靚嘅世界波,平時喺呢個距離,佢多數都會將個波直接射上天空!哈哈



嘩屌~隊長食咗春藥呀?射得咁Q靚嘅!(設計對白)

一向任勞任怨、永冇Say NO嘅占士米拿絕對係利物浦隊中嘅最佳員工,作為球隊上屆嘅首席助攻王,呢位「多功能工匠」喺今季就聽從領隊高普嘅吩咐墮後幾格串演左閘,去頂替表演長期不濟嘅摩蘭奴。起初,我以為高普呢個安排只係臨時性,但勢估唔到呢位替工左閘竟然會踢得咁鬼好,佢除咗喺防守方面表現稱職之外,仲額外為球隊提供一條龍服務,後上幫波斬波不特止,就連角球、罰球同十二碼都包埋嚟做,而佢喺場上嘅出色表現,更令佢連續兩星期入選「英超一周最佳陣容」。照咁睇,我哋一班利迷就好應該百分百相信高普嘅眼光,將米拿轉型成為左閘,既可以延長佢嘅職業生涯,同時又能夠畀到佢更多嘅出場機會,加上佢嗰種勤力、有紀律嘅踢法,喺漫長嘅聯賽爭逐戰上亦會為其他隊友帶嚟好多正面嘅影響,正宗係一舉三得!
喺上季表現平穩嘅佳尼嚟到今季嘅表現就有些少失準,但喺我心目中佢就仍然係現時英超嘅三大最佳右閘之一,希望佢可以儘快操返起個狀態,然後平時喺場上就嘗試做返多啲疊馬式助攻,仲要花啲時間去提高自己嘅傳波質素,唔好一拎住個波就例牌亂Q咁畀,事關喺高普嘅戰術體系裡面,兩邊翼衛參與進攻同觸球嘅機會相對上就會比以前多咗,因此,一啲踢法過份保守嘅後防球員可能就會漸漸畀佢淘汰。不過話分兩頭,喺右後防呢個位置上,暫時又確係冇一個人可以直接威脅到佳尼嘅正選地位,我絕對相信,呢位英格蘭國腳只要肯扚起心肝打返喺修咸頓年代嗰時嘅八成水準,咁佢喺球隊嘅前途依然會係一片光明。
記得喺路夫蘭剛加盟利記嗰陣,一班利迷每次只要一睇到首發陣容有佢個名,就必須要準備一個平安鐘同埋幾箱救心,但幸好,呢位荒失失奇兵喺往後嘅日子就憑著堅定嘅決心同毅力,成功挽回領隊同球迷對佢嘅信任,而嚟到今時今日,佢就更成為高普旗下嘅其中一名後防核心,可謂守得雲開見月明。
高普喺今個球季開鑼之前雖然一口氣放走咗13個球員,但佢喺買賣球員方面嘅作風就依然保持著節儉實際,應洗則洗嘅態度,除咗沙迪奧文尼同韋拿杜姆,佢所完成嘅每一單交易都唔超過500萬英鎊,喺成個夏季轉會窗結束之後仲令球會得到900萬英鎊盈餘,更令人欣慰嘅係,呢班新兵嘅表現到目時為止就大部分都十分對辦,尤其係身價高達3400萬英磅嘅沙迪奧文尼,仲有就係兩位嚟自德甲嘅防守大將馬迪普同卡拉雲。
不如就先同大家分享一下我對喀麥隆國腳馬迪普嘅一啲感受先啦!呢位身高高達1米95,又入選過「德甲全年最佳陣容」嘅前史浩克04中堅頂上功夫了得,仲擁有不俗嘅速度、視野同身體質素。佢嘅踢法有少少高章但就冇沙高咁拖泥帶水,仲畀人有一種成熟穩重、沉著冷靜嘅感覺,甚有領袖風範。早前,利物浦名宿艾德列治喺一個訪問入面就盛讚馬迪普擁有前紅軍隊長大佬希嘅影子,坦白講,咁快將佢同一個咁傳奇嘅前輩級人馬相提並論似乎真係有啲言之尚早,我始終認為一個防守球員要喺英超取得成功,就必須要同一班快如閃電嘅老鼠仔較量過先至叫做正式通過測試,但能夠一毫子轉會費都唔使出就覓得如此猛將,呢單交易確實係抵到爛!
至於卡拉雲嘅踢法就令我諗起前副隊加歷查,不過,同樣係作風穩定紮實嘅防守球員,呢位愛沙尼亞國家隊隊長嘅用波能力就遠勝後者,至少唔會經常喺後場施展「藍天解圍大法」,一隊波有多幾個識得用腦嘅中堅,成條防線就點都會高返幾個Level,有佢同馬迪普喺側邊傍住路夫蘭,我深信平安鐘同救心嘅銷量喺未來肯定會直線下降,我唯一有啲擔心嘅,係當睇咗幾場比賽之後,我就發現到卡拉雲喺1 on 1嘅對抗性方面就稍為弱咗少少,但幸好就有經驗同路數搭夠,到底呢個係唔係我嘅錯覺?喺嚟緊嘅賽事真係要落足眼力再觀察下!
自麥馬拿文之後,利物浦都好耐冇試過擁有好似沙迪奧文尼呢一種有速度、有技術同時又有突破能力嘅高質翼鋒。喺修咸頓渡過咗兩個年頭嘅文尼,本身就唔存在水土不服呢個適應問題,此外,呢隻塞內加爾快馬驚人嘅爆發力,亦為球隊帶嚟另一種進攻元素。雖然價值不菲,但暫時睇落嚟,呢位即插即用嘅雷霆新兵絕對係物超所值!
被一眾香港利迷稱為「韋拿老母」嘅荷蘭中場韋拿杜姆係高普喺今夏嘅最後一宗收購,呢位25歲嘅前紐卡素主將雖然喺入球方面未有任何建樹,但就經已為球隊貢獻咗兩個助攻,仲喺中後場做咗好多唔起眼嘅串連工作,作為球隊嘅其中一位無名英雄,佢同拉蘭拿、軒達臣、米拿、文尼呢四個長氣袋就令整對波嘅行軍速度大大提升。
年僅20歲嘅古積係高普喺上任之後嘅首單收購,呢位塞爾維亞年輕國腳加盟利記至今並唔係得到好多上陣嘅機會,但係佢喺軒達臣射入金球後突然變身做 「O咀馬國明」呢一幕,就令佢成為一眾球迷嘅CAP圖對象。
上季一度成為球隊核心主力嘅陳仔,喺傷癒之後唔知點解就一直都操唔起個比賽狀態,每次落場都撞板多過食飯,睇嚟佢要喺短期內從大熟大勇嘅軒仔身上搶返個正選位置,實在唔係一件容易嘅事。
所謂年年難關年年過,作為利物浦陣中碩果僅存嘅五朝元老,盧卡斯喺現任領隊高普揮下就依然可以搵到自己嘅定位同價值。以一個客串中堅嚟講,Lucas哥偶然都會有發瘟嘅情況出現,但係以整體嚟計,佢喺場上嘅表現就絕對係合格有餘,無論喺掃蕩、搶截同補位方面都做足功夫,希望呢一位深受球迷愛錫嘅忠臣喺嚟緊嘅日子可以好好利用自己嘅經驗去鞏固球隊嘅板凳深度,進而再扶持一班後輩,例如係古積、史超活同艾羅尼等等……
喺美國之旅期間玩嘢玩出火嘅MAMA沙高唔經唔覺已經成為球隊嘅第五中堅,隨著路夫蘭、馬廸普、卡拉雲甚至盧卡斯都喺球隊搵到自己嘅定位,呢一位26歲嘅前法國國腳睇嚟都係時候要好好考慮一下自己嘅前途同去向。
同樣喺球隊失去位置,丹尼艾格斯就選擇留喺U23繼續默默耕耘,靜待黎明來臨……呢位鐵血戰士打不死嘅精神,真係不禁令我諗起古治。
喺熱身賽踢到曉飛嘅奧歷治嚟到球季開鑼突然瘋狂跌watt,前幾日仲喺操練時再度撞傷……唉~真係禍不單行!
因為戰術問題,曾經係球隊頭號射手嘅史杜暫時只能退居後備,但喺我心目中,無論喺技術、射術同把握力方面,佢仍然係隊中最有質素同最具級數嘅一位前鋒。
若要成才,必先放入雪櫃,喺經過一輪急凍冷藏之後,摩仔到底會唔會有破繭而出嘅一日呢?咁就真係要睇下高普嘅功力喇!但我自己對呢位西班牙左閘喺球隊未來嘅發展就認真係唔太睇好,事關佢啲企位同判斷力絕對係死症嚟,都係唔似會有得救㗎喇!
究竟邊個先至係你心目中嘅頭號門將人選呢?係蓄勢待發但就未受考驗嘅卡利奧斯?定係成日甩碌但又偶有神救嘅米奴列?喺現階段,我肯定會毫不猶豫選擇前者……
冇錯!論表現,米仔喺今季暫時嚟講都唔算係好失禮,而且喺接高波呢個弱點上亦有明顯嘅改善,可惜嘅係,佢喺出迎同處理生波呢兩方面依然都係相當騰雞,我覺得……高波可以練,反應可以練,但係心理質素呢樣嘢就係天生嘅!相比之下,卡利奧斯似乎就冇受過乜嘢真正嘅考驗,但喺對打比郡嗰場聯賽盃賽事當中,我就睇到呢位德國門將極具膽識同自信嘅一面,而最重要嘅一點係,佢嘅長短傳能力真係高班過米仔好多,須知道,要成為一個頂級嘅門將,唔係話反應快同埋夠穩定就得嘅!識得點樣去控制節奏亦都係好重要,講真呀~米仔每次開生波都要搞咁多花臣,畀人迫一迫佢就會唔理三九廿七將個波兜嘢踢出界,再唔係就直接助攻畀對手打反擊,長此落去,實在唔係辦法……
點都好啦!希望卡利奧斯呢個靚仔龍門可以好好把握今次呢個機會,早日解除「晏菲路必出神經門將」呢個千年魔咒,千祈唔好令到我哋一班fans失望,加油呀卡仔!紅軍嘅大門以後就要靠你好好守住喇!
妖~爭咩呀?兩個溝埋變做米奴奥斯呀笨!(設計對白)
難離難捨想抱緊些~茫茫人生好像荒野~如孩兒能伏於爸爸的肩膊~哪怕遙遙長路多斜~~
「我不喜歡賭博,不太明白這些。我們現時只踢了六輪聯賽,是非常早階段。我滿意球隊的成績,但和季尾距離仍是漫漫長路。」被問及紅軍目前成為奪標次熱門,高普就有咁嘅回應。
的確,而家只不過係季初,實在不宜J得太多,正如我之前喺度都講過,論執教水平,為多蒙特贏過兩次德甲冠軍嘅高普當然係毋庸置疑,但要知道,現時英超爭逐日漸激烈,各支球隊嘅實力亦開始越來越接近,所以,高普要喺短期內帶領呢一隊千瘡百孔嘅利物浦再度登上Big 4位置,絕對唔係一件容易的事。古語有云:「羅馬非一日建成」,真正嘅重建行動,並唔係一朝一夕嘅!因此,我哋一眾球迷而家唯一可以做嘅,就係耐心等待球隊成長,千祈唔好諗住一步登天,先打好個根基,爭冠軍呢啲嘢不如就留返季尾嗰陣先再去諗啦!咁當然,我知道我一個人嘅諗法並唔能夠代表所有利迷,但喺度我真係好想不厭其煩咁再講一次:「無論未來幾年成績如何,我都十分慶幸利物浦曾經有過高普呢一個頂級教頭。」
高爸,睇X住呀!嚟緊仲有排你跌呀!我勸你都係嗱嗱聲搵返間大啲嘅眼鏡公司做sponsor啦!哈哈哈~
各位朋友,後會有期!東京、台北之旅之後再同大家見面!See You all Soon!👋