2016年5月13日星期五

《我與黎明的音樂回憶》

喵~I Love You~你會否聽見嗎?你會否也像我?秒秒等待遙遠仲夏~🎵🎵🎵

最近實在是忙得不可開交,所以一直要等到現在……
才有點空閒時間把自己在一星期前已經寫好的一篇文章好好整理一下。
嘩~近日由黎明所掀起的那股「明福俠熱潮」真是一發不可收拾!他在中環海濱長廊一連九場座無虛席的4D演唱會,讓一眾樂迷再度見識到這位於90s香港樂壇紅透半邊天的超級偶像那份一呼萬應的驚人號召力,而正當全城都在高呼「我愛黎明」的同時,小弟亦想在此和大家分享一下自己跟天王的一些音樂回憶……
在四大天王最火紅的那段時期,我所迷的不是擁有最多fans的黎明劉德華,也不是唱藝非凡的歌神張學友,而是歌齡最淺,才剛冒出頭不久的郭富城。那時候,我會儲錢買他的Cassette帶,在上堂時會抄他的歌詞,還很愛模仿他的招牌中分髮型。到長大後,我的耳朵變得十分挑剔,而聽歌的口味亦越來越偏執,時間久了,很自然就會比較偏向欣賞一班唱功了得的實力派,於是,一告別童年時代,城城在我心目中就只剩下“情意結”三個字,而其餘三位天王,張學友的唱片我是買得最多的,劉德華在90s尾到踏入千禧年代之後所拍的電影我幾乎部部都有看過,至於天王,很老實的告訴大家,多年以來,我就只買過他兩張正版唱片,因為我一向都認為,他早年那些甜到漏的糖衣情歌就只適合拿來騙騙女人,根本毫無難度可言。



坦白說,我從來都不是黎明的歌迷,小時候我對他的印象只有十個字,就是:「斯文高大靚仔,沒有別的!」過去有一段很長的時間我都把他歸類為是一個“靠樣搵食”的偶像派,但隨著年紀漸長,我就越來越欣賞他的一套做人哲學,還有就是他那一份獨特的幽默氣質。此外,我亦漸漸注意到他在歌藝上的顯著進步,尤其是踏入Sony Music年代之後,他唱現場的穩定性就越來越好,而在一些慢歌的處理上亦慢慢樹立其獨有的演繹方式,又勇於去開拓自己在音域上的無限可能性。



第一次感受到黎明這位靚仔偶像“識唱歌”,是來自他在96年的一首「情深說話未曾講」,在這首歌裡面他充分將那份自然真摯的感覺表露無遺,令此曲成為了一首永垂不朽的至尊情歌經典,據聞陳奕迅當年亦曾經被這首金曲感動到眼濕濕。
「情深說話未曾講」的空前成功,令黎明與金牌製作人雷頌德正式“撻著”,到後來他們更成為不可或缺的工作伙伴。而在《Perhaps...》大碟之後,黎明無論在歌路上或唱腔上都有著重大的轉變,還開始嘗試各種不同類型的曲風,例如是他在97年推出的這首「100樣可能」,就跟他早期作品的風格完全截然不同,為樂迷帶來不一樣的新鮮感 。記得當時在電台聽到這首歌,驟耳聽還以為是成龍大哥在唱呢(絕無任何貶意)!哈哈~
不過,如果要數黎明在音樂風格上最具革新的一次轉變,那就肯定是他於97年12月推出的這一張《Leon Sound》專輯!這張是黎明於寶麗金的最後一隻唱片,也是小弟自掏腰包買的第一張Leon大碟。
這張唱片主要是以舞曲為主,在當年的香港樂壇可說是相當少見,在專輯內雷頌德花了很多心思在編曲方面,還嘗試藉著各種新穎的曲風來開拓出Leon更多種不同類型的唱腔,例如是Europe Dance Beat、Rock Grooves和Electropop等等……而在整張專輯裡面,我就尤其喜歡「曝光」「貪新忘舊」「招呼你朋友」,在這三首歌入面,Leon煥然一新的突破性演繹,實在是令人刮目相看。
雖然我經常都會揶揄雷頌德為「抄寫王」或是「雷大盜」,但這位人稱「The Sound Of Copybook」的金牌監製又的確是黎明在歌唱事業上的最大伯樂,亦成功在香港掀起過一陣電子舞曲的熱潮,這兩點相信應該沒有什麼人會反對吧!然而,無論你的旋律有多能帶動氣氛和有多能刺激到樂迷神經,跟歌者本身的聲音能否“孭得起”這些作品又是另一回事。在我的認知範圍內,唱快歌最重要的不外乎三件事,首先是好好鍛鍊自己的節拍感,然後仔細注意呼吸、停頓和換氣的地方,還要看看歌者本身是否擁有一種“型得起”的聲音特質,要知道,頭兩點只要你願意花多點精神和努力去不斷改進,絕對是可以將勤補拙,但一個人的聲線有沒有型格,這就是與生俱來,後天是學不來的!而剛好黎明的聲線本身就有一份獨特的冷調在裡頭,因此,當他的聲音和那些節奏強勁的新潮舞曲混合起來,就立刻產生出一種相得益彰之效。
從寶麗金轉投到Sony Music之後,黎明的音樂風格就朝著更多元化的方向發展,例如在這張於98年推出並且在市場大賣雙白金的暢銷大碟《如果可以再見你》內,Leon就嘗試以J-Pop打入主流市場,而踏入千禧年代,他和雷頌德就更將當時還未興起的K-Pop文化帶入香港。

 

說起來,黎明跟韓國真是相當有緣,而他亦是最後一位能夠在韓國本土引起風潮的香港男星。那時韓國娛樂圈有一個說法,就是任何一個韓國女星只要和黎明合作過便會馬上紅起來,當中最著名的例子就有全智賢金素妍李娜英等知名女星,她們在還未走紅之前都曾經擔任過Leon的MV女主角。



要讓一首情歌成為流傳萬世的經典,除了需要一個漂亮感人的MV和一首淒美動聽的旋律之外,一份能夠引起大眾共鳴的細膩歌詞同樣都是相當重要,在90s初,向雪懷黎明寫下多首冧死女的深情歌詞,成功奠定了他的情歌王子地位。而到後來,在「香港詞神」林夕的金筆一揮之下,就頓時令黎氏情歌的質素提升了幾個層次,並再為Leon打造出多首永恆不變的唯美經典,當中就包括「我這樣愛你」「愛比我重要」「今生不再」「及時擁抱」「兩個人的煙火」等等……

 

黎明的歌藝在後期之所以會有如此大的進步,有一個人絕對是不得不提的,他就是曾為王菲寫下「我願意」的台灣知名音樂人黃國倫。這位於90s創作量非常驚人的製作人和黎明先後有兩次合作,而其中他在97年替Leon製作的「半生緣」,更一舉拿下第37屆金馬獎的最佳原創電影歌曲。其後,黃國倫在多個綜藝節目上也曾提及過他跟黎明合作時的一段往事,他說黎明一直都對自己的歌藝缺乏信心,並認定唱歌是他的最大弱項,從出道至今他就始終找不到唱歌的正確方法,有見及此,黃國倫在配唱的過程中就竭力地協助他,而最終,他有份為黎明製作的兩張國語專輯在市場上縱然沒有引起什麼重大的迴響,但從「半生緣」「我祈禱」「口不對心」這三首歌裡面,我們就不難聽得出黎明的發聲共鳴位置上明顯有別於以往,而且在感情投放方面亦比以前細膩了不少。不論是天意也好,是巧合也好,有緣認識到這位對自己歌唱生涯影響深遠的啟蒙老師,讓黎明心存感激,為答謝其教導之恩,在臨別前他就特意托經理人送了一隻十分名貴的Rolex手錶給黃國倫作餞行禮物。⌚



時至今日,黎明跟“實力派”這三個字依然有著一定的距離,最顯而易見的一點是……感覺上他就只能唱自己的歌,一唱別人的歌便會立刻“出事”。還記得在07年他翻唱歌神的經典金曲「藍雨」,這個版本簡直可以用慘不忍睹來形容!在他的眾多首翻唱作品當中,我覺得就以「我為何讓你走」最為順耳,可是,當衛蘭的靚聲一出,偶像派和實力派的分野便隨即無所遁形。但儘管如此,作為90s的偶像派鼻祖,到現在仍願意繼續去鑽研自身的歌藝,這種不斷求新求變的敬業精神實在非常值得一眾後輩歌手學習。


呵呵~說了那麼久,最後在這兒不如就和大家分享一下我所喜愛的一些Leon好歌吧!🎵🎵🎵🎵🎵🎵

我最喜愛的黎明歌曲
第一位 - 愛比我重要 試聽
第二位 - 招呼你朋友 試聽
第三位 - DNA出錯(國語)試聽
第四位 - 貪新愛舊 試聽
第五位 - 情深說話未曾講 試聽
第六位 - 會客室 試聽
第七位 - 神經質女主角 試聽
第八位 - 100樣可能 試聽
第九位 - 聽身體唱歌 試聽
第十位 - 長情 試聽
第十一位 - 口不對心(國語)試聽
第十二位 - 喜 試聽
第十三位 - 曝光 試聽
第十四位 - 你係我嘅 試聽
第十五位 - 一比一 試聽
第十六位 - 越夜越有機 試聽
第十七位 - 感應 試聽
第十八位 - 中毒的愛情(國語)試聽
第十九位 - 及時擁抱 試聽
第二十位 - 半生緣(國語)試聽

Leon入行30週年有獎問答遊戲環節:以上這四幅圖到底是來自黎明的哪一齣電影呢?🎬
答中而又被抽中的朋友,將會得到CoCo限量版閃卡一張,送完即止!
在這個千變萬化的華語流行樂壇裡……其實還有許多首被眾人遺忘了的「天王冷門好歌」未見天日,下次有機會我再和大家一一介紹吧!拜拜~後會有期!
要看類似的文章,請移玉步到以下網址:

兒時的偶像 - 郭富城
http://timeischanging2013.blogspot.hk/2009/09/aaronkwok.html

177 則留言:

  1. 我以前同你一樣,覺得四天王中黎明除了靚仔外實才是較差一位,到後來覺得還可以吧,早期的歌較喜歡。

    回覆刪除
    回覆
    1. 我卻很討厭他早期的糖衣情歌,這些歌只能用來呃女人,對男人不太奏效。😆

      刪除
  2. 從未喜歡過, 也不覺他有多帥XXD

    回覆刪除
    回覆
    1. 那毛毛覺得誰才是真正的帥哥?😎

      刪除
    2. 帥有屁用, 有智慧才是王道😎

      刪除
    3. CoCo表示不服!😾 帥絕對有用!😼

      刪除
    4. 你又在假借CoCo咀說出你自己的心聲😼

      刪除
    5. 但黎明最近有句嘢真係好正!一定要同大家分享下!☝
      就係:「多謝周柏豪提議為我寫歌😊,但我唔會再出碟!😐」
      😂😂😂😂😂😂😂😂😂😂😂😂😂😂😂

      刪除
    6. 笑Q死,周柏豪同佢挽鞋嘅資格都未有啦,同漁民樂條菠蘿雞返去打NBA啦

      刪除
    7. 而家好明顯係黎明高攀佢哋啦!😂😂😂

      刪除
  3. 最近非常繁忙,要晚上或明天才能一一探望各位,敬請見諒。😥

    回覆刪除
    回覆
    1. 做完忙的事情先吧~~有時間先逐一拜訪吧!!
      近排黎明在處理危機真係出晒位~~你以上的黎明精選CD我都有喎!!

      刪除
    2. 咁唔知森伯又喜歡黎明啲乜嘢歌呢?有興趣都可以同大家分享一下!😆

      刪除
    3. 最近都係忙於進修同埋諗緊新去向,所以就連睇戲都冇時間……😃

      刪除
  4. 回覆
    1. 以前同你一樣都覺得黎明沒太特別,反而近年才有點令人眼前一亮,至少仍有新歌,開騷又玩新意,以前一輩歌手而言非常難得...
      佢以前唱唔少電訊廣告歌和劇集歌也不錯(like原振俠果首願你今夜別離去),不過咁多年以前最喜歡仍是《我的感覺》,是代表作!!
      電影方面有看過半生緣但印象不太深,玻璃之城那些也不突出,但他拍了三更之回家就很令人刮目相看,主唱的電影主題曲《好像在我耳旁》也是佳作

      刪除
    2. 嘩~你推介嗰首歌係正嘢嚟㗎喎!多謝哂!😍

      刪除
  5. 識得道歉,公關典範,宜出選下屆特首. 我會投票.

    回覆刪除
  6. 四大天王令我有好多回憶,位位都有好多金曲﹗

    回覆刪除
    回覆
    1. 有機會再將其餘兩位天王的好歌好戲介紹給大家!✌🎧🎥

      刪除
  7. 其實我一向對黎明沒有甚麼好感(並非厭惡佢),直至最近佢處理演唱會被迫暫停手法,不能不令眼相看。

    回覆刪除
  8. 我對佢印象不深, 只記得佢唱歌都係著西裝 Armani??
    戲就最記得黎小軍

    回覆刪除
    回覆
    1. sorry搭一下咀,甜蜜蜜我最記得豹哥,一個搶盡主角風頭的最佳男配角。

      刪除
    2. Ah Mo:佢不嬲都係官仔骨骨,行公子哥兒路線。🎩

      刪除
    3. 徐大導:曾志偉一向都係一個比人嚴重低估咗嘅超級演技派!👍

      刪除
  9. 他的外型真是無敵,但演戲戲路甚窄,多年就只有一部三更之回家叫做見得下人,其餘什麼梅蘭芳,甜蜜蜜,半生緣都是給女主角襟著黎砌,但最好笑都是十月圍城的乞衣look,當年一出場,全場爆笑。

    回覆刪除
    回覆
    1. 十月圍城個look真係超級經典,感覺上佢真係完全carry唔到古裝造型!😂

      刪除
    2. Btw,我覺得佢喺無間道3入面都演得唔錯!🎬

      刪除
  10. 及時擁抱和半生緣真的好聽,但我自己就最喜歡只要為我愛一天,要贏人先要贏自己!最重要是當年采妮真是靚到癲。

    總括來說,在歌這方面我就始終都是比較鐘意學友,電影方面就當然是華仔啦!最後女方面就最崇拜城城,嘻。

    回覆刪除
  11. 我覺得黎明有自己歌路,他唱不到別人的,而別人也難唱到他的歌!
    亦感到他跟雷頌德很夾….
    不過我對電訉歌裏的風景和美女會喜歡多些呢!

    回覆刪除
  12. 佢D廣告歌,Slogan同MV女角真係完全冇得輸!!好欣賞佢睇女星嘅眼光!!

    回覆刪除
  13. 響度,我清唱,對不起我愛你!!!

    回覆刪除
    回覆
    1. 其實佢咁多年就淨係大柒過一鑊,但估唔到呢單嘢就比人笑足佢成世!真係用埋鏹水都洗唔甩!😂😂😂

      刪除
    2. 仲有輸俾洋腸同拍無間3俾劉德華一槍打9死

      刪除
    3. 堂堂黎天王都要輸比條洋腸……😭🍆

      刪除
  14. 多謝介紹,今次中國帳篷,帶來意想不到的效果,或者要寫番隻新歌《中國帳篷》賀一賀了。

    回覆刪除
  15. 我唔係好鍾意聽佢唱歌,如果一定要二揀一,我寧願聽國貨城

    回覆刪除
  16. 最鍾意眼睛想旅行同越夜越有機,一聽到就會即刻聞歌起舞high到爆!!!

    回覆刪除
    回覆
    1. 含住你~鹹鹹哋~難為你衣yeah衣yeah~~~~🎤💃💃💃

      刪除
  17. 回覆
    1. 我愛黎明!我愛黎明!😍✋✋
      https://m.youtube.com/watch?v=NyGb9cytTSg

      刪除
  18. 我覺得黎明靚仔架,歌就麻麻,但經過今次風波,對佢有點另眼相看。

    回覆刪除
    回覆
    1. 非常有頭腦,仲可以間接同個演唱會做宣傳,又上咗幾日報紙頭條,真係厲害厲害!👏👏👏

      刪除
  19. 冇鐘意過佢一首歌或者係一部戲,到而家都係覺得佢淨係得個樣,但近年覺得佢講野又真係幾抵死

    回覆刪除
  20. 我對他只有一個印象,十幾年前,有人送我兩張黎明演唱會門票。當晚,我不停跟身邊人講:只聽到音樂聲,聽不到他的歌聲啊!

    回覆刪除
    回覆
    1. 以前佢唱現場的確係好差,鼻音重、唔夠氣、音又唔準,係一個完完全全的偶像派。但近幾年佢唱live就真係突飛猛進咗好多。👍

      刪除
  21. 我都是leon粉c,我d cd比你多~~哈哈
    佢開演唱會我去左日本,一知道佢會夜晚live,馬上返酒店睇^^

    回覆刪除
  22. ★。゚*☆好友☁・゚☾甜夢安睡✬。。゚♦
    ❥°¨º❤大家❣ღ╠╣aΡpy週末♥*¨♡

    回覆刪除
    回覆
    1. 好友♦・゚☀早晨&午安☼・゚☁
      ❥°¨º❤大家❣ღ週末╠╣aΡpy♥*¨♡
      ╔══•ೋ₡*¨*•♪.¸¸♫。゚ഐ*.══╗
      ❀█▄█.█▀█.█▀█.█▀█.█▄█ʚïɞ*❉¨ƸӜƷ
      ✿█▀█.█▀█.█▀▀.█▀▀.─█* ҈ *佛誕Ѽ
      ╚══✾•ೋϠ*¨*♬•.¸♩¸。゚ഐ══╝

      刪除
    2. 好友★•*◇☾好夢☁。゚☆晚安♦・゚✬
      ❥*¨❣週日♥♡╠╣aΡpy喇喂❤°¨ºღ

      刪除
    3. 好友♦・゚☼早晨&午安*☁`☀
      ❥*¨❣週二╠╣aΡpy喇喂❤•。゚*ღ

      刪除
    4. 好友★。゚☾乖乖瞓覺嚟☁*¨*☆甜夢安睡喇喂♦・゚✬
      明天神公休息*我又瞓飽就吃*吃飽就瞓*唔上網嚟

      刪除
  23. 後生好憎老黎,覺得佢個人好串好扮野,但大個咗先發覺其實佢先係四個面最有腦同活得最自在果個,相反我對牛華就越來越反感,事關呢條老油條真係越老越虛偽,尤其係每次見到佢唱中國人果個死人賴共樣,真係隔夜飯都嘔埋出嚟!真係唔明點解到今時今日仲有人叫佢做民間特首?呢條PK擺明就係深藍絲!!

    回覆刪除
    回覆
    1. 華特首呢個gag其實都玩咗好多年啦!由金雞2玩到金雞SSS,真係你唔厭我都厭!😥

      刪除
  24. 我歌3之後好耐冇見過你寫咁詳細ge樂評,一如以往勁有見地勁有point,值十個正呀!!你講得啱,Leon ge音樂風格的確系四個裡面走得最前嗰個,我最鐘意佢首酸同全日愛,喺嗰個年代嚟講真系IN爆!反而最唱得ge學友都要去到好後期先敢玩下jazz同搖滾。Andy就一直都系潮州腔冇改過,城城個腔口就轉得最勁,由雞仔聲變到依家咁粗獷,有效日期同純真傳說當年真系聽到O哂咀。

    回覆刪除
    回覆
    1. 其實我唔係咁鍾意郭富城後期個唱腔,搞到自己成個老粗咁,把聲擺明就係夾硬chok出嚟!😫

      刪除
  25. 好想拎貓咪閃卡但真係估唔到ar~~長頭髮果張係咪少年賭神牙?~~

    回覆刪除
    回覆
    1. 哈哈哈哈哈哈哈哈哈哈哈哈哈~😂😂😂😂😂😂

      刪除
  26. 想不到一場不合規格的演唱會,黎明處理突發的事故表現被家讚賞不已!!
    晚上好,Teddy!

    回覆刪除
  27. 黎老明成世人除咗戴綠帽同華東水災走音之外,基本上係無敵

    回覆刪除
    回覆
    1. 靚仔唔怕戴綠帽啦!大把女人排住隊等佢揀……👭👭👭👭👭👭👭👭

      刪除
  28. 黎明早期的歌, 同電訊廣告歌.... 我較喜歡!

    回覆刪除
  29. 一向不是太喜歡他的歌,可是很欣賞他做老闆的果斷敢言。
    後來聽到他在電視台公開演唱了一首舊歌,唱得很有特色!音域廣,感情充沛,真是令人耳目一新!到現在還很懷念。可惜忘記了那首歌叫什麼名字。
    更令人佩服的是:當時他已經是一個成功的唱片公司老闆,竟然還在歌藝上鑽研,唱出超水準之作,真真令人感動!

    回覆刪除
    回覆
    1. 佢係好低調咁進步,冇刻意咁話比人聽!👏👏👏

      刪除
  30. Leon Sound成隻碟編排得好好,由頭聽到落尾,有晒連貫性,先用舊約 (電子音樂歌曲) 做開頭,連續三首都係快歌,最後用你令愛了不起(慢版情歌)做結尾。

    回覆刪除
    回覆
    1. 呢張唱片都可算係佢音樂風格嘅其中一個轉捩點……🎤🎧🎶

      刪除
  31. I Love Leon too !! Immediate respond to His CM with 100毛。

    NESCAFÉ 極品白咖啡呈獻:
    黎明 Leon Lai x 林日曦
    4D音樂特輯《情深咖啡未曾飲》
    腦細空肚飲咖啡
    黎明型過電單車
    https://www.facebook.com/100most/videos/902063266587988/

    回覆刪除
    回覆
    1. 真係冇諗過黎明會肯同佢哋癲!😂😂😂

      刪除
    2. 雖然我一樣係唔鐘意睇100毛!😂😂😂

      刪除
  32. 唔鐘意聽天濛光,但覺得你寫得勁有見地,
    超超超期待你介紹學友D冷門靚歌,快快快!你嘅樂評只此一家一定超有保證!!

    回覆刪除
    回覆
    1. 真係要有空閑時間先,我唔想匆匆忙忙咁出文……😆

      刪除
  33. 我最近都勁like明福俠ar~佢真係越黎越cute~~
    佢ge歌我最鐘意眼神騙不過同今生不再~勁lum~~~
    你寫blog真係好有心機~雖然有時好耐先update一次~~
    但就出親都好好睇~好有慢工出細貨feel~support~~~~

    回覆刪除
  34. 小時候超愛Leon啊,身材高大外型俊朗心地善良唱歌又溫柔!

    回覆刪除
    回覆
    1. 我有親戚識佢一個朋友叫做孫敬安,佢哋都話黎明份人好念舊又夠義氣!😺

      刪除
  35. 我對四大天皇的歌沒有特別研究,唯獨是我覺得張學友的唱腔較其他三個雄渾。你的分析十分詳盡,很有水平,我俾你100個 like!

    回覆刪除
  36. 我只聽張學友的歌,Leon的…不懂!

    回覆刪除
    回覆
    1. 其實都好正常,因為喺呢四個人入面的確就只有張學友可以稱得上為實力派。🎤👑

      刪除
  37. 黎生的公關智慧,劉生的刻苦勤奮,張生的真材實料,郭生的無限活力,都是時下年青人的榜樣。

    回覆刪除
    回覆
    1. 可唔可以加埋送禮李嘅默默耕耘同打不死嘅小強精神?😂💪🐜

      刪除
  38. 分析得好好,
    希望巴打唔好咁懶,得閒出多d文,
    一直keep住有睇你d樂評影評

    回覆刪除
    回覆
    1. 學黎明話齋,出文呢樣嘢同撞鬼一樣都係要講緣份……👻👻👻

      刪除
  39. 在下還是認為黎明演戲優於唱歌的。

    回覆刪除
    回覆
    1. 以前或許是,但現在我的想法反而就跟域兄相反。😆

      刪除
  40. 當年勤勤就係因為Leon嘅堀起而敗走寶麗金轉會星光,
    所以我一直都對黎生冇乜好感,不過佢響90年代的確係屈哂機 ~

    回覆刪除
    回覆
    1. 咁又冇得咁講嘅!事實上克勤行出嚟個人又的確係冇乜霸氣,須知道天王氣質係天生,呢D嘢係冇得勉強……😸

      刪除
  41. 「那萬人迷 走音走爆咪 包裝多過一切 多少耍失禮」
    當年呢首歌擺明就係用嚟諷刺黎明,但係估唔到而黃粉強唱live仲衰過佢,真係該燴,btw篇野寫得好好,一貫水準.

    回覆刪除
    回覆
    1. 人哋就不斷進步,你就係咁喺度食老本又回曬塘……🎸👎

      刪除
  42. 黎唱歌麻麻哋,金句一籮籮!

    回覆刪除
  43. I like“夏日傾情”&“我的親愛”。。。^_^。。。

    回覆刪除
    回覆
    1. 第二張Meow Meow好cute好cute。。。(>﹏<)。。。

      刪除
    2. 我最討厭就係佢首我的親愛!😹😹😹

      刪除
  44. 現在佢D 女FANS 都快滿40了, 嗚, 再不開個唱, 就要等到佢 D 女FANS 到 55退休之年,

    回覆刪除
  45. 午安小子,我最鐘意Leon套阿sir早晨同套劇主題曲,唔知你又知唔知?

    回覆刪除
    回覆
    1. 陽光(電視劇「阿Sir早晨」主題曲)🌞
      https://m.youtube.com/watch?v=ave9_GodAaE

      刪除
  46. Teddy 終於又出動!
    角度很深入。

    回覆刪除
  47. 我很喜歡他的《月亮下求你一吻 》,一首二十年前的舊作,改編自 Southern All Stars 的エロティカ・セブン EROTICA SEVEN,放在當年的《天地豪情》專輯上,並不算特別搶耳,但在今次演唱會它換上全新的編曲,時代感大大增加,令人耳目一新,非常 ichiban 。

    回覆刪除
    回覆
    1. 改編完首歌真係即刻變得好有型!👍👏👏👏

      刪除
  48. 月亮下求你一吻
    https://www.youtube.com/watch?v=wvShsnsIODA

    月亮下求你一吻 - Random Love Songs 4D in Live 2016
    https://www.youtube.com/watch?v=tM9NG5DPA9g

    回覆刪除
  49. 90年代 - 香港樂壇最後的光輝時代.

    回覆刪除
    回覆
    1. Twins一日仲可以喺紅館開演唱會,香港樂壇都唔洗旨意再翻到身!👭💩

      刪除
  50. LEON 呢排咁HIT, 攪到我唸返起將佢剪報痴響書包;將佢D poster痴晒響下格床包括上面床板比阿媽話我訓官才;爭d因為"sarah不要愛他"改名做sarah.....唉我唔想再記得!!!

    回覆刪除
  51. 此留言已被作者移除。

    回覆刪除
    回覆
    1. 此留言已被作者移除。

      刪除
    2. 抱歉,剛才的字突然變了亂碼,如有阻礙請刪除。

      刪除
  52. 其實....我小學一年級是黎明的忠粉...
    常常都傻痴痴的唱著愛情影畫戲.................

    回覆刪除
    回覆
    1. 哦~唔怪得知妳而家成日眼睛想旅行啦!呵呵~✈😹

      刪除
  53. 我的飲歌:無名份的浪漫 + 沒名字的歌 沒名字的你,理由不解釋。嘿嘿…………

    回覆刪除
  54. 唱功唔夠班,做戲一碌木,佢後期唱live係進步左但都係好叉難聽.唉,题外話,尋晚場波真係黑哨合理化,痴線..

    回覆刪除
    回覆
    1. 三更就係叫佢做一碌木,所以即刻拎影帝!🌳🌚😹😂

      刪除
    2. 呢場歐霸決賽係黑哨中嘅經典賽事,一定會名留千古!😡😠⚽🏃

      刪除
  55. 我鍾意傻痴痴同一夜傾情~

    回覆刪除
  56. 黎明高大有型, 一些如夏日傾情的名曲, 流行一時!

    回覆刪除
  57. 九十年代黎明紅起來,的確是個異數,當時唱自己來自大陸(北京),簡直等同事業自殺,奇怪就是他死不了,是他的高帥外表使他成功,當然他的朗朗上口情歌也記一功,比張學友的更易上口,這種例子後無來者了。

    回覆刪除
    回覆
    1. 其實主要都係因為靚仔😹,同埋佢真係好識得與時並進,好有生意頭腦!👍👍👍

      刪除
  58. 寫得好好喎👍
    的確!Leon 唱歌系愈來愈好!聽佢訪問真係好正,d轉數快到痴線,勁,智者👍

    回覆刪除
    回覆
    1. 聽佢講嘢真係學到嘢!😸☝📚

      刪除
    2. 同埋我覺得佢個性格真係比王傑更加似浪子!😎

      刪除
  59. 如果你問我 ,四大天皇中最喜歡那一個 , 我答案肯定係黎明 , Leon是我最喜歡的...

    回覆刪除
  60. 最愛leon首100樣可能,型呀

    回覆刪除
    回覆
    1. 當時你有冇感覺佢個新唱腔真係好似成龍大哥?😂😹

      刪除
  61. 四大天王我都係最鍾意黎leon wor~~又高大又有善心又風趣幽默,邊似得隻死牛華咁樣假到死連個結婚都唔可以大大方方!!唱歌唔好聽做戲又做來做去都係牛華mode份人又虛偽到死!!!同leon根本就完全冇得比~~~~

    回覆刪除
  62. 曾經都算是他的歌迷,但長大後就轉為支持阿哲,
    但比較特別是,我從來不覺得他靚仔,儘管他在四大天王當中外型的確是最出眾的。

    最喜愛的Leon歌曲:

    第1位 - 一夜傾情
    第2位 - 今生不再
    第3位 - 願你今夜別離去
    第4位 - 無名份的浪漫
    第5位 - 那有一天不想你
    第6位 - 情深說話未曾講
    第7位 - 夏日傾情
    第8位 - 如果這是情
    第9位 - 愛比我重要
    第10位 - 對不起,我愛你
    第11位 - 送你一瓣的雪花
    第12位 - 你令愛了不起
    第13位 - 愛情影畫戲
    第14位 - 及時擁抱
    第15位 - 孤單的人孤單的我
    第16位 - 你很愛我
    第17位 - 我這樣愛你
    第18位 - 藍色街燈
    第19位 - 大綱與細節
    第20位 - 別舔傷口

    回覆刪除
    回覆
    1. 講真,如果齋講個樣唔講身型,我覺得梁朝偉同郭富城都靚仔過佢……😼

      刪除
    2. 睇嚟天娜都係鐘意聽佢D慢歌多D喎!🎧😼

      刪除
  63. 很强的樂评,like

    回覆刪除
  64. 我都唔係黎明粉絲 , 覺得佢唔識唱歌 , 不過今次佢企出嚟認錯 , 對佢另眼相看呢~!!

    回覆刪除
  65. 以前:黎明>>>>>張學友>劉德華>郭富城
    鍾意黎明靚仔唱歌做戲

    而家:黎明>>>>>>>張學友>郭富城>劉德華
    除左黎明唱歌做戲 仲鍾意佢份人
    有愛心,真 唔奉承傳媒
    有名有利 做老細,BBS+MH,大把有錢佬 高官frd

    有人話佢寸 但以我認識佢咁耐........
    好多人對佢誤解太多啦 同佢俾傳媒寫得太衰啦[sosad]

    回覆刪除
  66. 以前頒獎視氣氛好好
    成半個埸都係黎明FAN
    我唸唔止半個埸
    有一年903去埋香港大球埸搞

    黎明對樂壇有深厚影響力追車,舉牌,儲相...
    全部由佢班fans發揚光大, 直到依家:)
    無論金曲、fans數量、廣告、電視
    黎明一定係最紅
    原振俠/名sir早晨hit到嘔。
    金曲金獎有成4首
    廣告歌/名句,紅到係香港人都知。
    d fans多向左走向右走到,年年勁歌班獎都係坐滿佢d fans
    個時有邊個唔知阿may係黎明女朋友,
    十個女仔9個想做/改名叫阿may。[slick]

    當年老黎d c9車向左走向右走完劉華,學友忍唔住講野叫4個同台唱朋友既片#adore#
    http://www.youtube.com/watch?v=5I6b6Aod_7E

    回覆刪除
    回覆
    1. 嗰陣D頒獎禮的確係好睇好多,直到許志安拎完之後就已經開始冇咗呢個氣氛……😪

      刪除
  67. 99年香港大學生票選偶像,黎明第一,
    90年代黎明就在歐洲巡迴演唱會,
    在越南開演唱會的第一位華人明星第二位海外人士,
    日本萬人影評家協會評選香港最佳演員,
    幾乎每次都是張國榮,黎明是唯一一個從他手中拿走一次的人。
    黎明是唯一一位演唱過韓國電影主題曲韓國電視劇主題曲的華人明星,
    韓國很多節目和電視劇都提到黎明和黎明的歌、電影,
    中國很多電視劇、電影、小品、動畫片、綜藝都提到黎明。

    所以話泡菜國新一代剩識黎明,或者依家eason唔係無道理#yup#

    回覆刪除
    回覆
    1. 反而佢喺台灣大陸就冇乜代表作,呢點真係幾有趣!

      刪除
  68. Overall,90年代最紅一定係黎明同劉華(劉華直頭無停過咁濟),
    一個和記廣告, 一個電視電影,
    張學友就係品味之選, 好多人欣賞,
    但就唔會係好多FANS會跟會追個隻紅,
    城城我就覺得係最遲令人覺得佢真係好紅,
    佢舞台皇者個朵都好似係2000年之後開左幾次好好睇既CONCERT先爆出黎#good#

    回覆刪除
    回覆
    1. 張學友點都係最值得人尊重嗰嗰,始終人哋真係純靠實力!👍

      刪除
  69. http://www.discuss.com.hk/viewthread.php?tid=26116980&page=7&extra=page%3D1

    你好,我係Leon ge一個小fans,響Hk discuss ge一個黎明討論專區度見到有歌迷share你篇文,想讚你寫得真係好用心,好有point,好欣賞你呢種咁用心聽歌嘅人。

    回覆刪除
  70. 路過! 識貨啵, 不嬲我個人都係覺得老黎歌係全個樂壇最廣最上肯試既人, 可惜佢同傳媒關係太太太太差, 老作+踩+抹黑既報導令到唔少人, 未聽到老黎既歌只見黎明兩字已落判斷.

    LEON SOUND呢隻碟堅係走前人地十年(當時計)...
    但結果就係老黎唯一(或最)仆直的一隻大碟...當年紅爆但呢隻碟竟慘淡收場. 當年聽歌人士仲係比較單純, 難接受唔同歌路.

    回覆刪除
    回覆
    1. 不嬲我個人都係覺得老黎既歌路, 係全個樂壇最廣最肯試新野既人

      刪除
  71. 我由perhaps,即係mark lui掌舵時代開始留意leon,嗰時覺得佢冇咁悶,歌路多元化咗。個人最愛大碟係leon now,成隻碟都啱聽

    回覆刪除