泰園極品泰式風味餐 & BBQ 7080滋味韓燒夜

兩條麻甩去開餐，泰韓美食輪住嘆！
上星期，適逢細傻華Dee呢個十月壽星牛一，作為大哥嘅我就梗係要帶佢去擦返餐勁啦！

好！事不宜遲，即刻帶大家嚟到「麻甩覓食兩人行」嘅第一站，
位於尖沙咀金馬倫廣場2樓一間名叫《泰園》嘅泰國餐廳。

呢度嘅裝修同格局都幾high-class，完全有別於一般嘅泰國餐廳。

呵呵～一坐低第一時間當然要試下呢樹嘅生蝦刺身（$108）先啦！

我絕對認同華Dee所講，《泰園》嘅生蠔確係新鮮過唔少日式居酒屋，
而更重要嘅係……佢哋只係賣$88半打咋！嘩～屌你正呀喂！

泰式酸辣無骨鳳爪（$88）爽口又滑牙，
伴埋唐芹、生菜、蔥同番茄，用嚟做開胃前菜就最一流。

嗯～一口氣食咗咁多生冷嘢，
唔飲返碗熱辣辣嘅冬蔭功（$98）驅驅寒又點對得住自己呀？

沙嗲串燒半打（牛、豬、雞），售價$108，
咬落去肉質嫩滑又夠Juicy，並且肥瘦分明，再配埋黃芥辣，
味道濃郁，十分之惹味，真係好食到停唔到口！

呢個菠蘿炒飯（$128）由賣相到味道都相當有水準，我畀90分！

呢碟蝦醬通菜炒鮮魷（$90）就唔多掂喇！
味道過鹹又唔夠鑊氣，咬落去仲成口渣，
再一次印證一樣嘢，就係最簡單嘅食物往往係最難煮得好。

既然兄弟生日咁開心，就破戒飲返杯透心涼嘅啤酒賀一賀佢！
呢款白啤清清甜甜，仲帶有芳香果味，飲落去個口感就好似啤酒混香檳咁，
最適合一啲少飲酒或者係唔鍾意飲苦味啤酒嘅朋友。

嗱！華仔，又大一歲喇！喺度先祝你生日快樂，身體健康，
再祝你戀運亨通，溝女成功！喂老友～你咪成日諗住個暴胸老蟹先得㗎！
計我話，做人應該向前望，一於飲返杯忘情水，再唱返首活得比妳好，
待日出時讓戀愛終結，睇下朱朱幾時同你講你是我的小呀小蘋果，
一齊生返個笨小孩，咁到時咪佢的名字，你的姓氏，然後咪愛是永恆囉！
信我啦！你終有一天等到佢㗎！Come On Vincent！Cheers！

《泰園》

地址： 尖沙咀金馬倫道23-25A金馬倫廣場2樓A號舖
電話： 3746 9966
營業時間：星期一至日：12:00 - 15:00 ；18:00 - 23:00

各項評分（五個㊣為滿分）

食物質素：㊣㊣㊣㊣㊣
抵食程度： ㊣㊣
服務態度：㊣㊣㊣
環境： ㊣㊣㊣㊣
衛生：㊣㊣㊣㊣


嘆完一餐咁豐富嘅極品泰菜，
隔幾日我哋又去咗一間位於旺角兆萬中心13樓嘅人氣韓燒店《BBQ 7080》度一嘗地道嘅韓式滋味。

一踏入間舖，我就覺得呢度嘅裝修好鬼特別，
無論係牆上嘅手繪壁畫擺設同銀色嘅圓檯、煙囪同燒烤爐都充滿住韓國嘅風貌，
再加上綿綿不絕嘅K-Pop歌曲同一班親切有禮嘅韓籍侍應，真係會令你恍如置身韓劇世界一樣。

啱啱入座櫈都未坐暖，有位靚女侍應就馬上呈上各式各樣嘅韓式冷盤配菜……

登登登登～主角嚟喇！首先出場嘅係烤羊架（$88）同埋濟州島黑毛豬五花腩（$156）。

跟住就係烤辣醬魷魚（$118）同烤雞腎（$98）。

個人溫馨建議（一）：
啲魷魚最好燒到有少少燶燶哋先夾嚟食， 咁就可以辟走陣雪味。

個人溫馨建議（二）：
兩個麻甩佬坐埋開開心心傾下計，然後一邊食烤雞腎，一邊飲韓國清啤，簡直係人生一大享受！

是日重點推介 - 煎海鮮蔥餅（$88）

試咗咁多款「小食」，臨尾嗌返煲石鍋什錦飯（$98）暖下個肚，咁先叫完滿！

總括嚟講，《BBQ 7080》嘅食物質素同服務態度都算唔錯，
係衰在啲食物個份量就較為細咗啲。
另外，我同華Dee嗰日兩個人嗌咗唔係好多嘢埋單都要成九舊水，
對比起上面間《泰園》個價錢確實係貴咗少少，
但係又話分兩頭，其實我哋去《泰園》都差唔多要成千蚊先落到樓，
只係人哋收$1000就有新鮮刺身同生蠔供應，仲可以食到你打橫抬出去，
而喺你哋嗰度擺低$900就只可以食到一啲好普通嘅大路嘢，
仲要碟碟都咁鬼細件，真係食完都唔覺飽！

《BBQ 7080》

地址：旺角西洋菜南街1N至1X號兆萬中心13樓
電話： 2612 1682
營業時間：星期一至日：16:00 - 02:00

各項評分（五個㊣為滿分）

食物質素：㊣㊣㊣㊣
抵食程度： ㊣
服務態度：㊣㊣㊣㊣㊣
環境： ㊣㊣㊣
衛生：㊣㊣㊣

同場加映 - 大傻 & 細傻Neway再Encore！

由於我同二傻柏盛喺上個月所舉行嘅紀念癲唱會造成空前嘅震撼同迴響，
為咗滿足一眾歌迷，喺上星期我就特意搵咗已經退隱歌壇多時嘅二傻華Dee……
同我臨時舉辦咗呢一場《Holiday爛聲王之華麗喊驚懷舊癲唱會》，
不過非常抱歉，因為版權問題，所以我就只能夠節錄當晚癲唱會嘅部分內容畀大家睇。



率先為你哋帶嚟嘅係細傻嘅首本名曲「狂潮」，聽完包保個個有高潮！



再嚟係2015年度金曲大熱，殺死人冇命賠嘅催淚湯氏情歌「像我這一種傻撚」。



為咗四日後嘅「台北炫迷同樂會」，小弟決定先嚟個熱身，
試唱呢一首位列林志炫玩命歌曲排行榜十大嘅「Killing Me Throat With His Song」。



最後係小弟每次去唱K都必定會點嘅Eason NO.1飲歌「綿綿」。


飲飽食醉，唱個夠皮之後，都係時候要同咁多位Blog友講聲Bye Bye喇！
各位，我哋喺下一篇《Trip To Taipei》再見！See you all soon！