2015年9月20日星期日

《狂小子生活瑣碎雜記》

這陣子實在有太多東西想和大家分享,
但為免姑姑和一眾Blog友每次光臨小弟寒舍都要花那麼多眼力和心神,
故此,本人就決定盡量以一種多圖少字的方式來完成這篇Blog。(波經除外!哈哈~)

《健康篇》
等了一個月,我的驗身報告終於出爐,
報告顯示我的血糖指數為5.3,身體狀況大致正常,呵呵~都總算是還得神落吧!
過去那些年,因為藥物的關係,令我的臉和身型經常都時肥時瘦,
有時還會腫得不似人形和見頭暈,有見及此,
近年我就慢慢養成多菜少肉、均衡飲食及規律作息、運動的習慣。
每星期都會抽三、四天時間出外作緩步跑(30分鐘)或步行(90分鐘),
不分晝夜,務求讓自己的體重能夠維持在一個可接受的範圍之內。
重拾步行這個習慣之後,我的火爆脾氣就明顯變得比較平和,
連生活的步伐也比過去緩慢了許多,而隨著年齡漸長,經歷多了
我對很多事物的看法與想法跟以前亦大有不同,說真的,活到今天……
我的身體雖然依然是怪病多多,但我就慶幸自己還是能行能走能吃能喝;
雖然我經常會病到面目模糊,但慶幸我的眼耳口鼻就總算無崩無爛;
我雖然是個半盲人,但看不清總好過看不見。其實我的要求並不多,
此時此刻,我只要看到我每一個在乎的人仍健在,每天回家摸摸貓貓,那就已經很滿足了!
再一次衷心感謝每一位為我送上祝福與關懷的家人和朋友,
特別是報告出爐當日默默陪伴在側的「您」。
Dear everyone,這條人生路還有很長很長,但願我們可以繼續一起走。

《飲食篇》
報告結果理想,當然要大肆慶祝一番啦!
嗯~想起來,我都有接近十年沒來過《麥文記》食麵了!
$32一碗「細蓉」的確是貴了點,但不得不承認,
麥記的雲吞麵又真是皮薄餡靚湯鮮麵正,可說是貨真價實。
我一向都認為……所有汽水只要放入玻璃樽内就會變得特別好喝,誰有同感請舉手!
食完麵散完步,晚上我和姑姑就去了這間位於佐敦吳松街143號地下的《牛屋餐廳》鋸扒。
打頭陣的餐包非常鬆軟,吃起來牛油香味很濃,口感一流,
可惜那個羅宋湯就只屬一般,沒有什麼特別。
是日頭盤 - 法式田螺焗薯蓉($50)
這道焗威靈頓牛柳($198)聽說是牛屋的招牌菜,
姑姑說它的整體美味度大概有85分左右。
這個是我點的日式帆立貝拼雞扒($82),味道算是不過不失。
總括來說,《牛屋》的食物質素、服務態度和環境都算不錯,在價錢方面亦算合理。
若果你/妳跟姑姑一樣都是「愛扒一族」的話,就不妨到來一試吧!
分享完我們的二人慶祝大餐,又分享一下我在這一個月所吃過一些美食,
這間位於旺角彌敦道655號5樓的《吉壽日本料理》是姑姑最愛的放題之選,
不論食物和服務都算OK,但在用料方面就比不上我先前介紹過的《八幡屋日本料理》,
不過以整體而言,《吉壽》的食物品質則較為穩定一點。
這間位於大埔大元商場1樓的《四季名滬》才剛開業不久經已吸引了大批食客捧場
它的主打是京、川、滬、浙、湘五大省市風味菜餚及中式點心,
水準十分高,是一個很值得推薦的飲茶好去處,
現在我平均一個月就會跟姑姑和她的媽媽、哥哥到此茶聚一次。
近幾個月公司附近開了很多新食店,但吃來吃去,我發現自己最鍾情的……
還是《合發茶餐廳》的抵食常餐,還有就是《金媽媽韓國配菜》的味噌湯飯。
港式茶餐和韓國料理固然是很吸引,但俗語有云:「少吃多滋味,多吃壞肚皮」,
為了自身的健康著想,我的主餐基本上仍是以素食為主。
那當然,無論外面的東西有多美味,有多好吃,
始終就還是及不上一頓溫暖親切的「傳統住家飯」。
一口氣介紹了那麼多款美食,都是時候要喝點東西消消滯!
近日突然迷上《759阿信屋》這兩款韓國茶,
左邊那支枳椇子茶低糖又好喝,還有健肝以及解酒的作用,
至於右邊那支粟米茶就甘香清甜又能去水腫,
並可以促進腸胃消化和降血脂,誠意推介給各位愛茶之人。

《電影篇》
天啊~這一個月居然沒有一齣電影是我看得上眼的!
對於我這個超級戲迷來說,真是相當淒慘呢!
有人見人愛的影壇巨星發哥,有兩屆金像、金馬影后張姐,
有美貌與智慧並重的氣質女神湯唯,再加上唱而優則演的陳奕迅
這應該是我在2015下半年最期待的一部華語片了!
說到期待,又怎能不提這一部改編自《Gone Girl》原作者Gillian Flynn另一部暢銷名著《Dark Places》的懸疑巨作《心蹤罪》呢?

《電玩篇》
最近瘋狂迷上這個被姑姑形容為「超低能,勁無聊」的手機遊戲,
它的名字叫做《Cooking Fever》,不知道大家有沒有玩過這隻Game呢?
嘩~中菜館這一關實在是太難玩啦!救命啊!
呼~千辛萬苦……終於都玩到我最愛的壽司餐廳,
好!下一個目標就是要解開海鮮餐廳和早餐咖啡店的鎖!

《足球篇》
聯賽三場不勝,歐霸首場慘被迫和,進攻模式毫無板斧,防線依舊一塌糊塗,
球隊接連失利,球迷憤怒之聲不絕於耳,並希望領隊羅渣士能夠早日退位讓賢。
坦白說,我之前一直都堅信渣哥是重建利物浦王朝的最佳人選,
我覺得他行事很有膽識,而且勇於求變,特別是他激活球員的功力,的確是令人深深折服。
此外,他又很願意給機會和鼓勵一班新人,還非常有親和力,能夠與一眾球員打成一片,
所以,儘管上季球隊成績未如理想,但我就依舊對他投下信心一票。
然而,經過一場毫無火氣的雙紅會之後,就讓我對這位北愛少帥徹底死心……
第一季成績平平,但踢法總算有板有眼,並且理念清晰,立場鮮明;
第二季蘇神顯靈,勢兇夾狼,更一度衝擊英超冠軍寶座;
第三季蘇神出走、史獨長唞,球隊進攻乏力,防守漏水,重現昔日傳統的海鮮味道;
來到第四季,沒想到,重金簽入多位猛將的紅軍踢起來就仍是死氣沉沉,進退失據,毫無方向……
喂~渣哥!你到底在搞什麼?你的Pass & Move理念呢?為什麼硬是要賓迪基打單前鋒
為什麼執意要起用錯漏百出的路夫蘭統領後防?為什麼經常要狀態大勇的沙高當後備
為什麼要堅持用眼神制敵戰術來防守對手?為何還是遲遲不肯解決中門大開的問題?
還有,一隊波最重要是什麼?是Passion!正所謂輸人不輸陣……
你看看由你領軍的這隊利物浦所踢出來的風格既無鬥心又沒有凝聚力,
根本就跟其他中游球隊毫無分別!說真的,作為一個資深利迷,
對於球隊的起起伏伏早已司空見慣,但來到今天……
當我看著KOP看台的利迷一個個提早離場,內心那份無比的失落感絕非筆墨所能形容。
Louis van Gaal: "For me, Liverpool is a fantastic club. 
Because I have won every game against Liverpool."

唉~簡直如同當頭棒喝!渣哥!誰叫你每次跟師傅師公交手都要大打擦鞋波呢?
麻煩你回頭看看肥賓、杜sir老侯伊雲斯吧!有哪一個會像你那麼窩囊?

Garry Monk: "For me, Manchester United is a fantastic club. 
Because I have won every game against Manchester United."(設計對白)

嗱嗱嗱~看吧!就連你徒弟都比你有霸氣!唉~

Klopp, Please join us ! OK ?(設計對白)

平心而論,你們是否真心覺得高普會願意來執教利記?
要知道,現時英超爭逐日漸激烈,各支球隊的實力也開始越來越接近,
要帶領利記再度登上Big 4位置,確實不是一件容易的事。
老實說,利記近年在球場上表現出來的絕對不是一支傳統班霸球會該有的風範,
只是,一眾利迷對球會的期望就往往都是用大球會的標準來量度,
誰都知道,執教利物浦是需要承受常人難以忍受的巨大壓力,
因此,還看世界球壇,又有哪個領隊會肯冒這個風險呢?
與其放眼難以捉摸的未來,不如就先把心放在今晚主場對諾域治的賽事上吧
要加油啊利記!在前面還有33場艱難的英超比賽正在等著你們!

《貓狗篇》
各位腦友記!隆重為大家介紹我在公司的兩位best friend!
短尾是一隻自我保護意識極強的惡貓女,性格甚為兇狠,
眼神極之銳利,在剛相處時牠會很防你,但與牠相熟後牠就會很黏人。
這位長尾的靚女是惡貓女的媽媽,性格懦弱怕事,但就相當鬼馬抵死,
常愛躲在角落嚇人,一旦被人發現了牠就會極速狂奔!~XDXDXD~
好了!是時候開餐了!慢慢吃喔~不用急~不用爭~
話說前陣子姑姑家裡的狗狗生了一隻狗BB……
一眨眼,這隻狗BB已經有一個月大,
你們看!牠這種甜到漏的笑容是不是殺死人不償命呢?
另外,三弟文鋒在半個月前也收養了一隻小貓女……
呵呵呵~小朋友~妳真的好Kawaii啊!
唓~有幾Kawaii啊?能跟我比嗎?
Hey~傻Co~你跟那些貓貓是不同的!
你是貓界梁朝偉,是走電眼男神路線的!明白嗎?

《杯子篇》
再見了MickeyMinnieDonaldDaisy
陪伴我工作三年多的米奇老鼠杯終於都要光榮退役!
而取而代之的……是多年前華Dee送給我的這一隻我一直捨不得用並且封塵多時的MJ紀念杯。

《柏靈頓熊篇》
「你要把我拋棄了,似要把我記憶都抹掉,讓我在人間消失……
你已把我擁有了,但你可有好好的照料,讓我們流離失所……」
有天出門上班,無意中看到一隻被拋棄了的柏靈頓熊和一隻無名玩具小狗,
這一刻,讓我感覺到,世界彷彿只剩下他倆……
「孤獨的街,在煙雨中浮現,多想拒絕這苦澀的世界……
傷感的一幕劇中人是我,無法去觸摸只有散場的落寞……」
然後,想不到不到一天,柏靈頓的愛人就被人悄悄偷走了……嗚嗚~真是人間悲劇啊!

《冷笑話篇》
以下是自問自答環節:究竟有多少人認為劉青雲的Facebook……
劉青雲本人彼此是有直接關係的?答案是:「好很多人。」
從前有三隻蝦,牠們的名字叫哈、哈、哈
從前有四隻蝦,牠們的名字叫哈、哈、哈、哈~

《愛國篇》
祖國萬歲萬歲萬萬歲!哪個麻甩佬在9月3日不扯旗就是不愛國!
喂喂喂~你們這班冷血的戲子到底在幹什麼?竟然手執iphone說愛國?
還有!你們通通將自己的兒女送往外國和國際學校唸書,
是否看不起我們偉大祖國的高深教育?哼!真是他媽的!

《老友篇》
「Happy birthday~哈哈哈~嘿嘿嘿~
恭祝您一歲兩歲三歲四歲長命百歲~
煩惱丟掉~蛋糕吃掉~撕掉日曆~生日快樂喲~」
數數手指,原來我身邊有不少朋友都是在八、九月生日的,
在這兒首先祝世上最疼我的好大佬南提老祖生日快樂,
願你每晚鞭鞭有力,棍棍有聲,桿桿入洞,
而最重要的……當然是希望你可以平安無事,大步檻過,從頭來過吧!
,我的好兄弟,我中學年代的最好朋友,
祝你生日快樂,願幸福、平安、健康常伴你一家。
時間過得真快,轉眼跟柏盛已經認識超過廿年,
你說!人生還有多少個跟你相交超過廿年以上又可以互相開任何玩笑和坦白一切的老死? 
喂~阿盛盛!阿二傻!瘋華哥!霍金爺爺!西門吹雪!在此先祝你生日快樂、事事順利,
再祝你身體健康、龍馬精神,最重要是繼續唱多點好歌給我們聽!你的摰友花滿樓敬上。
順帶一提,不曉得大家知不知道……
就是由1950年開始陪伴著一代又一代人成長的卡通界巨星Snoopy,其實也是八月的壽星。

《唱K篇》
自從二傻盛盛和細傻華Dee正式宣佈決裂,我都有一年多時間沒有去過唱K了!
對上一次就是和新地妹倪匡佑的「那些年K聚」,作為三傻組合的團長……
在拆夥後,我這個昔日唱爆咪的「K歌之霸」就早已進入半退隱狀態,
可是,鑑於歌迷反應熱烈,加上適逢二傻生日,於是我們在月五日凌晨……
就臨時舉辦了這一場《2015甩毛劍客西門吹雪大戰九流盲俠花滿樓紀念癲唱會》。



Woo~這個Opening真是令人看得血脈沸騰!尤其是中間那一段讓郭富城看到都為之汗顏的晨運舞!



離螢幕那麼近都可以不停唱錯歌詞,真不愧是盲俠花滿樓



你們說,譚詠麟開演唱會可以不唱「愛在深秋」嗎?李克勤開演唱會可以不唱「月半小夜曲」嗎?
同樣道理,假如柏盛開騷整晚不唱「愛不是遊戲」的話,觀眾們還豈會輕易放過他?



好歌不妨Encore再Encore!但對不起,由於客席攝影師大俠笑到快往生的關係,
因而導致整段片的拍攝風格就有如迷幻片一樣搖晃不停……



哼!你們認為粤曲會難倒盛哥嗎?這也未免太小看他了吧?



嗶嗶嗶!將近六小時的馬拉松癲唱會終於來到尾聲!咦~這不是大俠的首本名曲嗎?
怎麼唱到尾段會給人一種上氣不接下氣之感?難道他在上台前又忘記啪偉哥?喂~回水!回水啊!

189 則留言:

  1. 資料豐富, 圖文並茂, 一次看也消化不了, 謝謝你用心的分享!

    回覆刪除
  2. 運動強身, 對正面思維都有好處, 堅持 !
    唔止汽水, 連維他奶入左玻璃樽都好飲好多(你夠膽唔舉手呀拿XXD)
    尋日睇左來自星星的PK, 還可以啦叫做:)
    班偽人爭住敬禮, 真係仲賤過班政棍, 冇言詞可以形容佢地既醜陋 !!!
    旺星bb超超超打意呀..呀..呀~~~~

    回覆刪除
    回覆
    1. 我都舉手, 紙盒維他奶有陣紙味
      我最失望係而家已經飲唔到辣哂咀嘅熱維他奶, 7仔個D溫溫吞吞, 唉

      刪除
    2. 毛豆:舉咗喇!熱維他奶是我在冬天必喝的寶物!
      來自星星的PK外界評價好似唔錯,有機會都想睇睇!

      刪除
    3. 阿毛:現在的飲品和零食品質和味道都比以前差了,熱浪薯片就是當中的表表者。

      刪除
    4. Ruby:我自己就比較懷念讀書時代在7仔所買的泰國啤酒!XDXDXD~

      刪除
    5. 我以前鍾意食珍珍薯片

      刪除
  3. 人健康了,的確是樂事,要keep住啊!

    回覆刪除
  4. 1. 飲食篇: 紅磡我地頭喎, 不過我唔知開左金媽媽 XD, 而家又想起雞蛋仔 (可唔可以叫老板係我每次買時, 都問我係咪因為好好食而黎買呢? )
    2. 電影篇: 我唔明點解華麗上班族都有3D
    3. 電玩篇: 我最 like 就係呢D time management game 架, e.g. XX Dash 都係我飛佛, 千祈唔好話低能

    回覆刪除
    回覆
    1. 金媽媽很正,誠意推介!
      華麗上班族剛看了,感覺一般,但張艾嘉的魅力和氣場還是沒法擋。
      Dash我沒玩過,請問是什麼game來的?

      刪除
  5. 從前有三隻蝦,牠們的名字叫哈、哈、哈~
    從前有四隻蝦,牠們的名字叫哈、哈、哈、哈~

    祝福你永遠笑哈哈!!

    回覆刪除
  6. 都覺得樽裝汔水較冰凍好飲!
    大貓、小貓的樣子都好似, 貓"媽生"既!

    祝你身體健康!

    回覆刪除
  7. 很欣賞柏盛盛唱歌,真的,不是想說他唱得好與不好……
    而是他實在唱得很開懷,使聽者也感到歡樂!

    回覆刪除
    回覆
    1. 他是我的開心果!嘻嘻~不過我們的笑點就只有我們自己才會真正懂得!XDXDXD~

      刪除
  8. 麥文記豬手麵,我至愛!!
    一個月大的狗BB,勁可愛!!
    一班偽人向中共致敬,極可恥!!
    狂兄唱嘅風繼續吹,超靚聲!!
    呢篇生活瑣事雜誌,好好睇!!

    回覆刪除
  9. 嘩,你點可能記得晒咁多嘢架 ;)

    回覆刪除
  10. 最開心當然係身體状况正常喇!係值得開餐慶祝嘅 :)
    見你甘有恒心 keep fit,我都要唙起心肝做運動 :P

    回覆刪除
  11. 身體狀況大致正常。呵呵~戥你飲得杯落!恭喜!
    姑姑家有喜事,恭喜!
    祝你一班老友生日快樂、事事順利!恭喜!
    恭喜你生活健康,身體也健康!恭喜!

    回覆刪除
  12. 回覆
    1. 我之前在公司附近的雜貨店、中藥房和菜檔都有認識到一些貓朋友!
      http://timeischanging2013.blogspot.hk/2010/09/160910.html

      刪除
    2. 如果啲食肆有貓,我一定會時時幫襯

      刪除
    3. 心情都會好啲!同埋有貓就證明間舖唔會有好多老鼠打横打!╮(╯▽╰)╭

      刪除
  13. 祝你身體健康......生活愉快 !!

    回覆刪除
  14. 體檢正常就好了 ! 值得恭喜 !
    愛貓愛狗的人,都是很有愛心的。祝你和姑姑百年好合 !

    回覆刪除
  15. 先恭喜你收到一份可觀的身體報告,你們那餐慶祝大餐真是看到我流口水。華麗上班族我自己就麻麻地期待,因為知道發哥同湯唯肯定只係會客串幾場,我諗套戲個焦點應該大部分都係集中在陳奕迅身上。心蹤罪我之前都好有興趣,但不知道點解佢個映期就一拖再拖,真激死。

    回覆刪除
    回覆
    1. 兩套我都看了。心蹤罪比預期中差,主要是導演眼高手低的問題,浪費了原著的精彩的故事情節。湯唯在華麗上班族不是客串的,她是第二女主角,戲份都頗多,至於發哥的戲份也比想像中多。不過全片有一個很大的問題,就是找一堆五音不全的演員和陳奕迅演歌舞片,看起來感覺真的很滑稽。⊙_⊙

      刪除
  16. 神軒踢法似我2015年9月21日 上午1:04

    五場不勝la巴打!炒得渣屎未?

    回覆刪除
    回覆
    1. 羅神話:一聞到魷魚香我就會自動反底!( ̄∇ ̄)

      刪除
  17. 人地就貓有貓樣,狗有狗樣,點解阿貓個樣越來越似人???
    乜你咁無聊架連我煮餐飯都要放上網ge???

    回覆刪除
    回覆
    1. 歌頌您啲廚藝又唔滿意呀?阿Co如果係人就世界大亂喇!啲女實畀佢溝哂!

      刪除
  18. wei你隻game真係好低能呀!點解你仲可以玩咁耐架???

    回覆刪除
    回覆
    1. 夠您玩嗰啲低能?全部都係一式一樣嘅嘢!

      刪除
  19. 尋晚岩岩睇完李克勤容祖兒演唱會~
    今朝再睇你d片,先發現原來你唱歌真係同李克勤好似~~
    btw,like爆貓狗篇 & 飲食篇~

    回覆刪除
  20. 瑣碎雜記其實都係人生大事,一世嘅記憶!

    回覆刪除
  21. 你講得啱,飲品始終係樽裝最能夠保持原味。我雖然唔係利記 FANS,但我都想佢擊敗曼魚,點知.................上周六睇愛隊阿仙奴,睇到水都滾埋,最慶就係賽後摩年奴竟然話廸阿高哥斯達係最佳球員!喼住運動有益健康,千祈唔好半途而癈!

    回覆刪除
    回覆
    1. 噚晚利記同阿記一齊贏波,實在係可喜可賀!哈~哥斯達呢個球壇賤種簡直就人人得而誅之,淨係停佢三場真係便宜咗佢!

      刪除
  22. 先恭喜大哥,祝你身體永遠健康。今季人渣士為保飯碗,打得非常保守,成日玩穩守突擊,但就守不穩而且冇突擊原素,即係一啲快速既人,搞到賓迪基經常一個人喺前面打得好辛苦。講真噚晚嗰場其實算打番出個隊形,而恩仔又交到功課,但米仔又偏偏喺呢個關鍵時刻發波瘟,跟住你羅記見到咁嘅情況,竟然仲收起一個前锋鋒打番單箭頭,你話你條昏君係咪存心靠害?我真係頂佢個肺!一班好球員就咁比你條粉人浪費左!Rogers out!Klopp in!now!

    回覆刪除
    回覆
    1. 而家羅sir畀我個感覺完全係進退失據,仲有啲走火入魔,又越嚟越多9up廢話!就好似噚晚場波就已經證明咗雙箭頭係work,同埋佢種進攻模式根本就唔啱中鋒踢!就算係勁到杜奥巴咁都係咁話!所以我真係唔明佢當初係咁高價狂追賓迪基到底係為咗乜?用三千幾萬英磅嚟打造plan B?但我又睇唔出你有幾多套戰術可以替換!唉~講真,睇住賓迪基一個人喺前面孤立無援,認真替佢感到難過!但係,暫時最令我覺得難受嘅,都係2900萬英磅嘅費明奴……因為佢畀我個感覺真係好水貨feel……

      刪除
  23. 好開心見到你同姑姑開開心心過日子,繼續幸福快樂﹗祝福你們﹗

    回覆刪除
  24. Time Is Changing,首先,報告理想,恭喜恭喜!

    第二,我其實咁大個仔都未食過麥文記,我多數去沾仔記,牛屋我只會去舊果間,即係你地去果間,新果間試過一次我就永久blacklist佢,妖!食物又差服務仲差,成日趕客走,真係請都唔會去...

    第三,你好犀利呀!第一次唱到有人響K房唱千億個夜晚,仲要係拉闊呢個高key版,超勁揪,為你鼓掌!拍拍拍!

    回覆刪除
    回覆
    1. 新嗰間我冇去過,但舊呢間我覺得無論係食物質素同服務態度都幾好!

      刪除
  25. 你嘅身體好,戥你開心!
    你講完個餐包,我立刻有啲餓。。。。。。

    回覆刪除
  26. 汽水都是玻璃樽最好,夠氣夠味
    身體好就爽啦,KEEP住呀)))))仲要笑多d
    牛屋都想一試^^

    回覆刪除
  27. 每次來Teddy 的 Blog 都覺得你 生活瑣碎事,,,,, 資料豐富 ...祝你繼續幸福快樂﹗多多保重呀!

    回覆刪除
  28. 懂得享受生活就懂得享受身邊一切•*¨由其食喇
    っˆヮˆ)っ•:。2Ѽ15年❣❥・゚゚ღ中秋節快快樂樂...喵喵喵
    *My L❤ve Friend•°*。♥.天天開心萬事得喇喂*・♡
    .⊹*☁✬*¨✫good night♦・゚*◇甜夢喇喂•★・゚*☾*¨Zzz

    回覆刪除
  29. 我舉手,我認同用樽裝嘅汽水係好飲D。

    回覆刪除
  30. 一碗「細蓉」要$32 , 真的是唔平, 身體健康係最重要呀!

    回覆刪除
  31. 早晨,Teddy!
    你之生活如此豐富呀!!

    回覆刪除
  32. 恭喜DiDi~~賀喜DiDi~~搞好皮膚,養好身體,下一步就要養番好把靚聲la!!!千祈唔好浪費左你把金嗓子ar!!!仲記得10幾年前你可以坐喺度唱哂成板林子祥都面不改容ga~~~

    回覆刪除
  33. 支持多菜少肉、均衡飲食的素食生活,加油。

    回覆刪除
  34. 祝福你永遠快樂,身體健康。很喜歡你的貓狗篇,總覺得Bondi你是一個非常善良並且還懂得多種動物語言的人。不然的話,怎麼每次你所拍攝的動物照牠們都總是會乖乖望著鏡頭?

    回覆刪除
  35. I hope you will continue to enjoy good health.

    回覆刪除
  36. 先恭喜你報告正常 , 原來你好懂吃 , 哈哈 !

    回覆刪除
  37. 食得是福,祝大家身體健康
    : )

    回覆刪除
  38. 報告正常, 恭喜晒, 祝你繼續健康!
    我希望利記可以重振聲威啦~~ >.<
    小貓咪好可愛呀!!! 我睇到流晒口水~~
    最近屋企都收養了兩隻奶B, 要幾個鐘餵一次奶, 好攰呀。

    回覆刪除
    回覆
    1. 這是快樂的疲累啊!我也想利記可以重振聲威,但想了十年這個願望都還是沒有實現……(^_-)

      刪除
  39. 麥文記貴到痴線又細碗,冇一舊水一位都唔飽xx(
    但好食,值得去,好食過麥奀,無豬肉雲吞:P
    去麥文想飽就食豬手撈麵,有四隻豬手#yup#
    另外佢d牛腩都炆得好香,不過d樓面真係好X串

    牛屋係好味不過兩間牛屋服務都西到仆街,特別係舊牛屋個紋身男人xx(
    d態度西到好似同佢講數咁!不過舊牛屋有條女幾正[sosad] [sosad]

    吉壽價錢唔算貴,刺身算ok,食物款式都唔少,又唔會漏單,真係唔錯#good#

    回覆刪除
    回覆
    1. 麥文記我只鐘情佢哋嘅雲吞麵,至於樓面串唔串我就唔太清楚喇!因為我自己都好耐冇去過!牛屋個紋身佬我嗰日好似冇見到,淨係見到一個波衫仔,都幾好禮貌。吉壽我自己就麻麻,都係鐘意去八幡屋多啲!不過佢哋啲食物品質又的確係好唔穩定!講到尾就係因為個老闆娘衰孤寒又太刻薄,唔肯出錢請夠人手,所以班手下咪做到冇哂心機囉!真係好可惜,佢哋拎啲貨喺放題嚟講真係好高質!

      刪除
  40. 比左3年時間羅渣士,用左二百幾M 買人,搞左D咩出來 xx(
    主場比人大炒,明知lovern 癈又成日用 xx(

    羅渣士上任後買既所有球員一覽

    Fabio Borini - 邊緣人
    Joe Allen - 契仔,能力上ok, 但易傷
    Oussama Assaidi - 無料到,已走
    Nuri Sahin - 有料到,羅渣on9
    Samed Yesil - 未有機會發揮
    Daniel Sturridge - 最佳收購,但傷多過踢
    Philippe Coutinho - 紅軍未來,未來巴狗青訓
    Luis Alberto - 無料到,已loan走
    Iago Aspas - 無料到,已走
    Simon Mignolet - 質素平庸,應該買個更有CLASS既KEEPER
    Kolo Toure - 做sub ok
    Aly Cissokho 無料到,已走
    Mamadou Sakho - 有質素有身高,但唔肯出佢
    Tiago Ilori - 未有機會發揮
    Victor Moses - 無料到,已走
    Rickie Lambert - 未有機會發揮
    Adam Lallana - 完全踢唔番修咸頓水準
    Emre Can- 重新移任中場,希望可以成為主力
    Lazar Markovic - 未有機會發揮
    Dejan Lovren - 災難
    Divick Origi - 災難
    Javier Manquillo - 未有機會發揮
    Alberto Moreno - 轉打左中有運行
    Mario Balotelli - 有料到,羅渣on9

    新加盟既暫時唔點評,想帶出既係BR買左咁鬼多人
    但得S15同古天樂係真正有用,其他真係廢到癲 xx( xx(

    btw,諾域治痛失2分,利申,雀迷 :~( :~( :~( :~( :~( :~(
    and羅渣士教到依家仲未有銅像,真是唔公平,求你繼續教落去 #hehe#

    回覆刪除
    回覆
    1. 講真,我覺得羅渣士而家已經完全迷失咗,仲有啲走火入魔,又越嚟越多9up廢話……屌~你明明係打開進攻波好心你就唔好學人打大巴啦!即係,你明明係流緊伊雲斯嘅血液,但係你而家就好似喺度不停模仿緊老侯咁!喂喂!頭兩季隊波嗰種熱血同有系統嘅進攻模式去晒邊?仲有,當年老侯就算幾老鼠拉龜都好,都仲有希比亞,軒索斯兩個頂住後面!再加埋隻快馬奧狗喺前面,嘔血起嚟點都有睇頭過而家!坦白講,隊波輸多幾場都唔緊要!最慘嘅係個領隊而家冇哂自我,冇哂靈魂!踢咗咁多場都仲未搵到套進攻板斧出嚟,場場都係靠班球員打天才波!上場就靠史杜,之前就靠古仔!呢下先係最令人心up嘅地方!不過,最近我見到有好多利迷竟然將而家隊波同鶴頂紅年代相比,對於呢種睇法,我真係當堂嚇一跳,然後得啖笑……我只可以講,唔該佢哋再重溫番鶴頂紅年代嘅所有比賽先再講啦!一個可以將利物浦拉落降班邊緣嘅天才,唔係咁都可以上神檯呀?

      刪除
    2. 再補充,羅渣士種足球理念根本就只有世界級球員先可以執行到!講真呀!唔識打防守又死唔肯請個教練番嚟執,仲死唔買防中,搞到中間成日打開個閪門畀人任中出!唉~你咁搞法,咁就算畀個全盛時期嘅希比亞同軒索斯你都死啦!

      刪除
    3. 再再再補充:
      Luis Alberto - 無料到,已loan走
      Iago Aspas - 無料到,已走

      唔認同,前者番西甲場場keep住有表現,助攻多又有入波!後者就更加係踢到識飛,所以絕對唔係冇料到!只係領隊唔識好好運用佢哋……

      刪除
  41. 汤岳霖 青雲哥每個發文都好有人生道理跟意義。
    Like · Reply · 1 · 8 August at 15:40

    Carroll Li 青雲,我還是喜歡好心直言的你!
    Like · Reply · 1 · 8 August at 16:39

    Amy Li 劉青雲,我就是喜歡你的分享。
    突然覺得你說的話真的很中肯。原來都是曾經經歷過的痛。
    為什麼青雲能懂這麼多
    每次看完你的文章我都掉淚了
    Like · Reply · 1 · 8 August at 16:39

    [sosad][sosad][sosad][sosad]

    劉青雲個fb條link都寫住fan club,但發覺好多真心膠[sosad]
    真係笑到仆街,d人仲好真心,青雲性格唔似會日日係fb 9up囉[sosad]
    其實真係好撚on9,借人個名黎叫春[sosad]
    如果冇用劉青雲個名,邊有咁多共嗚,而家D人乜9都like[sosad]
    依d港女用黎打飛機,又on9又懶感性既文章[sosad]
    劉青雲堂堂真男人既性格盡萎,真係多得依個page唔少[sosad]

    回覆刪除
    回覆
    1. 劉青雲好似一早就已經出嚟否認咗,但有好多人就選擇繼續相信!最好笑係劉青雲話有個女人仲同佢講話就算明知啲文唔係佢出都會照樣當係佢出!哈哈~睇完段新聞,我終於都明白點解啲韓劇喺香港同內地會咁有市場!

      刪除
  42. 閱兵向強國致敬愛國偽人名冊

    張智霖 澳洲籍
    王敏德 美籍
    丁子高 到紐西蘭就讀奧克蘭大學
    楊千嬅 垃圾
    李克勤 2個仔讀港島區著名學校: 加拿大國際學校
    陳小春 在美國拉斯維加斯註冊結婚,老婆美籍,惠州政協
    李亞男 加拿大籍
    王祖藍 老婆加拿大籍,要入籍好容易,用紅米note
    余文樂 垃圾
    梁烈唯 反hktv,反佔中
    李蘊 雞
    吳孟達 跳樑小丑
    朱晨麗 榮獲甘迺迪表演藝術中心全額獎學金赴美國華盛頓深造與交流
    鍾鎮濤 2個女讀國際學校
    譚詠麟 獨仔譚曉風英國讀書
    周杰倫 不嬲有前科, 佢話自己係中國人
    彭丹 甘肅省政協
    呂頌賢 反佔中
    陳偉霆 耀中國際學校
    翁虹 雞
    楊張新悅 70年的平安,笑撚死我
    莫少聰 垃圾
    蔡少芬 戇鳩耶撚,大陸老公
    Cammi 雞
    溫兆倫 奶共狗屎眼 of the king
    蔡卓妍 雞
    Angelababy 垃圾雞
    Janice Man 雞
    陳嘉上 跳樑小丑
    應昌佑 垃圾
    何家勁 反佔中
    吳國敬 垃圾
    陳少霞 垃圾
    徐小明 垃圾
    關之琳 雞
    龔嘉欣 雞
    馬浚偉 垃圾
    李治廷 加拿大藉
    陳法蓉 雞

    班豬欏究竟知唔知當時共匪點所謂抗日,點對待抗日國軍
    向祖國致敬? 究竟知唔知當時邊個政府[369][369]

    其實共匪搞咁大壇野其中一個目的就係想人覺得抗日戰爭佢哋有好大功勞
    啲對歷史毫無認識嘅盲毛藝人或市民就中晒招[369][369]

    回覆刪除
    回覆
    1. 嘩大佬~佢哋有好多喺香港撈極都紅唔起,而家致個敬就有金執喎!你估講笑㗎!人格破產點都好過身家破產呀!就好似讓一切隨風咁……就係當中嘅(賤人)典範喇!

      刪除
  43. 巴打睇到你情況一直向好真替你開心呀 #good#
    我最鐘意睇你D唱K片,勝在成班夠癲夠喪,睇得你地係真心enjoy唱K #good#
    你老友二傻盛盛台風勁正,激光中好撚爆 [sosad][sosad]
    你唱風繼續吹好撚似送禮勤,但高音爭DD #hehe##hehe#
    千億個夜晚又係痴撚線,雖然最後一段好揸袋feel [369][369]
    但已經好癲,呢個仲要係呢首歌所有版本中最高 xx( xx(

    Btw好掛住你另一個老友既歌聲:~( :~( :~( :~( :~( :~(
    唱Bee Gees果個,佢真係好有做膠歌王既潛力:~( :~( :~( :~( :~( :~(

    回覆刪除
    回覆
    1. 我前幾日先同佢唱過K,下篇Blog就放上嚟畀你欣賞下!⊙_⊙

      刪除
  44. 當人大了, 會明白到無論友情, 感情, 身體...樣樣都要用心維繫~~
    肯付出雖然唔一定有好回報, 但唔付出就一定冇回報...

    回覆刪除
  45. 早晨,有愛心的小子,加油啊!其實血糖達5.3都好正常但就唔算係一個十分靚既數字.
    信我!運動雖然唔係能醫百病,但就絕對有益身心.support!keep running!
    我明白某D藥食完D後遺症真係好慘.我有個女性朋友又係好似你咁..
    佢直程係節食又日日游水都成日腫腫咁,就係因為佢之前甲狀腺有事既關係.

    回覆刪除
    回覆
    1. 多謝山sir!我絕對清楚、明白、了解你朋友嘅痛苦!-_-#

      刪除
  46. 報告理想你平安無事就好,恭喜你ar。
    我都好鐘意飲呢隻粟米茶㗎,不過759唔係成日有貨~

    回覆刪除
  47. 報告咁靚仔 , 一定要同姑姑慶祝一吓啦 , 不過唔好太過份呢 , kaka ~!!
    又話少咗好多字 , 都係要睇咁耐架???????

    回覆刪除
    回覆
    1. 圓咕碌媽媽,信我!下一篇真係堅少字!呵呵呵~L(^o^)」

      刪除
  48. 在堤岸邊漫步、看着遼闊嘅海洋、人的確會變得間朗些、想法自然會樂觀些。

    回覆刪除
  49. 柏靈熊bear好慘啊。。。ToT。。。
    狗BB同小貓女巧得意。。。(>﹏<)。。。
    當然傻Coco都好型好靚貓啦。。。\(^o^)/。。。
    我都有玩Cooking Fever,我覺得甜品店已經好難玩。。。-_-#。。。
    最後恭喜你報告safe。。。風繼續吹唱得幾好聽啊。。。^_^。。。

    回覆刪除
    回覆
    1. 甜品店嗰關其實只要你個心唔好亂就得!一亂啲嘢就會係咁delay同做錯!

      刪除
  50. "近年我就慢慢養成多菜少肉、均衡飲食與規律作息、運動的習慣。"

    沒錯, 只有這樣, 才有健康, 有健康什麼都能做.

    為什麽看您的 BLOG , 時時肚餓??

    貓只有兩樣嘢先"痴埋"嚟:
    1) 肚餓
    2)身癢要你摩.

    其他時間"請勿近!"

    回覆刪除
    回覆
    1. 呵呵~CoCo比較怪,佢無時無刻都咁黏我!(╯з╰)

      刪除
  51. 恭喜你身體健康先~keep住呀~~~~~
    仲有哥首風繼續吹真係不得之了~~~~~~勁!!

    回覆刪除
  52. 好啦, 你身體好就好了, 繼續KEEP 住身體好, 人生就包無問題

    回覆刪除
  53. 恭喜你呀Blog主,身體健康真係好緊要!!我真係諗唔明FSG,高普同安76都表明立場唔介意教利記,但亨利哥就死都要護住BR!!真係乜解究??

    回覆刪除
    回覆
    1. 此留言已被作者移除。

      刪除
    2. 史提芬:主要原因係夠後生又冇名氣,會比較易控制啲……

      刪除
  54. 恭喜哂狂兄,希望響未來可以睇到更多關於你既好消息,加油..
    千億個夜晚我都好鐘意呢首歌,但你叫我唱我就認真唔敢,就算係側田個降幾個key ver都係咁話,你真堅揪,聽住你一路升key個感覺真係好爽
    講起利記,我地紐記同你地認真係難兄難弟,等左咁多季,鬧左個死肥佬n年條肥Mike終於冇揸流灘,洗錢只係僅次於曼城同49000,仲多過利記,車仔同阿記,完全令我地一眾紐迷有d始料不及,但更加諗唔到既係佢地竟然請左廢蛇昔日抓牙麥卡倫黎教隊波,屌,而家條防線對住中游都完全冇乜抵抗力,咁就算馮德倫識將魔術融入足球都冇7用啦,頂

    回覆刪除
    回覆
    1. 真係唔知紐記搞乜?留唔住柏祖都算啦!點解要請個麥卡倫番嚟搞衰隊波?

      刪除
  55. 我終於搵翻嗰陣為咗佢買NDS既game喇,手機版仲複雜,多咗嘢做之餘仲睇唔到人客滿意度,我仲停留在快餐店階段 :P

    回覆刪除
    回覆
    1. 信我!呢隻game會越玩越變態,越玩越上瘾!└(=^‥^=)┐

      刪除
  56. 狗BB好Q呀!
    身體健康就好了!
    美女厨神溫暖親切的「傳統住家飯」,真的幸福滿瀉啊!

    回覆刪除
  57. 其實響fb、ig、weibo甚至wechat都有一個好怪好on9嘅現象,就係不論係邊個都好,只要放張明星或者係索女相,無論真假都好都會一大堆傻閪同狗公add你like你,有次我仲試過響wechat俾一個成日上康熙來了嘅通告女藝人(好似叫乜嘢黃思佳)撩我上酒店爆房,話收我千五蚊全套,我心諗,屌你老母究竟有乜傻鳩會中埋d咁on9嘅招?學你話頭,答案係好很多人...好很多隻蝦!!

    回覆刪除
    回覆
    1. 有啲其實一睇就知係假!真係唔知點解仲會有咁多人中招?最好笑係有部分麻甩佬仲畀人呃埋錢!(^_-)

      刪除
  58. 呢班向中共殘暴極權主義致敬的腦殘垃圾偽人應該全部落十八層地獄!

    回覆刪除
    回覆
    1. 咁又唔使咁嚴重!將佢哋同班仔女推去大陸住一世咪算囉!~XDXDXD~

      刪除
  59. 恭喜你身體健康,哩兩日睇住下任賠率,哩d資料可能都係其中一個好大嘅參考
    http://www.skybet.com/football/specials/manager-specials
    五六點睇高普係2/1,以家1/1,希望快封盤

    Next Premier League Manager to Leave
    Brendan Rodgers 13/8 at day time, and now is 10/11
    睇來BR走硬

    btw King做咗兩季唔夠仲贏過盃仔都炒,擺明係得罪老闆先會被炒。
    羅渣士唯一勁過King就係......後生啩!?擦鞋啩!?

    回覆刪除
    回覆
    1. 只能夠講,FSG嘅耐性真係比我哋利迷高好多!

      刪除
  60. 我看了《Dark Places》,可能是我對這部片太過寄與厚望吧!整場電影下來並無特別高潮之處,有點略顯平淡,本片的線索感覺非常的淺顯易懂,線索都會自動送上門來,所以未完場我就開始深深的懷念起David Fincher。雖然兩部電影的原著作者都一樣,但是導演不一樣,使整部片的走向及風格差距甚大,明顯讓我失望了。但是,對於一部推理懸疑的片來說,《Dark Places》就算是拿到了一個剛好及格的分數。

    回覆刪除
    回覆
    1. 認同。個故事本身好好,係導演眼高手低先拍到不倫不類咁。

      刪除
  61. Time Time恭喜哂!克勤同Joey個演唱會會出DvD呀!

    回覆刪除
    回覆
    1. 出唔出其實都冇所謂,因為我真係完全提唔起興趣買!

      刪除
  62. 哈狂小子我發覺你真係好鐘意小動物,利物浦同日本料理
    每次見你出雜記文都一定例牌會見到貓,壽司或刺身同利物浦記事
    首愛不是遊戲我一路睇一路跟住你笑 你d笑聲真係好盞鬼
    喂你首風繼續吹真係幾得喎 d低音共鳴做得幾好 我比90分
    最後一龍祝你身體一路健康,永遠做一個開心既幸運星 醒D醒D呀

    回覆刪除
    回覆
    1. 多謝一龍兄,我當時真係差啲笑到缺氧!~XDXDXD~

      刪除
  63. 我手機成日玩cooking fever同古惑仔online,成日玩到唔訓教,哈哈~..

    回覆刪除
  64. 釋迦牟尼說過,健康是最好的天賦,知足為最大的財富,信任為最佳的品德。加油,並祝你永遠健康快樂。

    回覆刪除
  65. 自己還是能行能走能吃能喝。。。恭喜晒成
    祝花滿樓狂小子。。。風繼續吹,
    順祝美女琪厨神和摯愛中秋節快樂!

    回覆刪除
  66. 靚仔我俾你個《冷笑話篇》笑死我la~~我心諗終於都有人講呢樣野la~~難為我班fd仲成日like~~我又唔好意思話佢地wor~!

    回覆刪除
    回覆
    1. 哈~我哋又何必要刻意去破壞人哋嘅美好幻想世界呢?

      刪除
  67. 中秋快樂.迪哥哥...........

    回覆刪除
  68. 中秋節快樂,鋸扒我通常都會去outback或Ruby Tuesday。

    回覆刪除
    回覆
    1. 我一開始都係諗住去《Outback》,不過姑姑話唔抵食所以後來先改咗去《牛屋》。

      刪除
  69. 自己友 , 恭喜哂 ! 查實情緒真係會間接影響埋好多野 , 我以前個人都好火爆 , 後來迷上左行山之後老婆都話我成個人收憸左好多 ...

    麥文記雲吞麵叉燒撈呢D真係食過就翻唔到轉頭 , 同你之前介紹間紅伶一樣 ...

    喂隻MJ盃同你隻貓咪一樣 , 型到爆呀 !!

    回覆刪除
    回覆
    1. 呢個就係我一直都唔捨得用隻杯嘅原因,實在係太靚喇!

      刪除
  70. 其實BR而家比我感覺係 ... 佢根本就唔愛利物浦。佢只是打份工 , 輸贏佢不在乎的。講到尾佢都只係為自己 , 真係睇唔到個愛字 , 講真就算講打份工佢而家都係唔合格 ... 場場都要好似馬德鐘咁扣佢50分 !!!!!! 所以仲比三場機會FSG真係多九餘 ! 輸多三場去到榜尾先換人 ?? 快D叫高普黎啦 ! 佢係最合適利記 !

    回覆刪除
    回覆
    1. 講真,就算我以前幾憎老侯都好,但係就點都會俾番幾分尊重佢!因為佢功績好,又真心愛利記,所以即使佢當年同湯臣夾埋迫走科拿同破壞利物浦多年嚟嘅傳統打法,我都可以令自己將呢幾件事分開,唔會用一種偏激嘅睇法嚟看待佢!嗯~King同肥賓呢兩個就唔使多講啦!我覺得佢哋比謝拉特仲更愛利記!鶴臣呢個廢蛇走狗就唔好提喇!至於伊雲斯所帶出嚟嘅紅軍我認為就係最有血性同最有球味嘅!呢樣嘢羅渣士喺頭兩季就令我重拾番呢種感覺!呢個亦都係我起初點解會咁撐佢嘅主要原因!不過,喺上季開始,渣哥畀我個感覺就已經係完全走火入魔!亦都失去咗佢以往嗰種願意一個人出嚟承擔失敗嘅大將風範!佢而家已經唔再係當日嗰個就算淋住雨都會出嚟拍手鼓勵球員嘅渣哥!又或者呢個先係佢嘅真面目,但係點都好啦!我始終都認為,FSG根本就唔會喺短期内炒佢!所以嗰啲乜嘢新帥傳聞,我諗大家都係當八卦新聞睇下就算喇!

      刪除
    2. 而家又有傳打比戰之後無論輸贏羅渣士一樣都要落鑊 , 至於謝四就算把啦 ! 當年夾埋加歷查迫走肥賓推薦鶴頂紅入隊 , 早排本自傳仲表明自己依然好buy鶴臣同羅渣士果套 , 計我話第時真係唔好俾呢條球霸番黎做領隊 , 唔係肯定大碌過桑拿士 !

      刪除
    3. 但好多球迷好似完全唔係咁諗,仲好唔願意接受呢個事實。

      刪除
  71. 兄弟,估下我係邊個?2015年9月26日 下午8:10

    感激我這個多年的好兄弟。無論我做什麼,你也對我不離不棄。

    回覆刪除
  72. 祝你同貓地中秋節快樂!

    回覆刪除
  73. 你介紹的只吃過麥文記,真不錯。

    回覆刪除
  74. 相信Jürgen Klopp可以為球會帶來改變,但正如佢所講,利迷又好,球員又好,,職員都好,現在都應該團結一致,相信與自信,同樣重要。下場比賽你唔會見到有咩嘅大改變,一切都要時間。雖然未見到佢點帶領球隊,但欣賞佢對傳媒嘅態度,希望佢成功啦!

    回覆刪除
    回覆
    1. 期望不要過高,我預計短期內球會應該不會有太大變化。

      刪除
  75. 人愈大,愈覺快樂與健康最重要,但兩個元素往往不能並存,我在努力平衡中

    回覆刪除