五一勞動節，只吃不勞動！

嚟嚟嚟～今晚喬家請食飯，大家唔好客氣，隨便起筷！～XDXDXD～

先嚟一個頭盤，我老豆嘅新產品「蜜汁煙肉燒金蠔」，配埋黃芥辣嚟食，口感確一流。

我老母炮製嘅傑作，香煎蝦球帶子伴西蘭花 + 菜心炒素鮑片，好味得嚟又健康。

小弟嘅招牌菜，XO醬雙丸海鮮公仔麵 + 白灼生菜一碟！
（咁都好意思拎出嚟sell，真係厚面皮到極點！XDXDXD～）

好喇～食飽飽，瞓返個靚覺，聽日仲有大把節目呀！

喂～好起身喇！我哋今朝約咗嫲嫲同兩個姑姐飲茶㗎！再唔出門口就遲到㗎喇！

講起上嚟都好耐冇嚟過好彩飲茶喇！今次一定要食返夠本先得！
坦白講，雖然好彩D嘢一向都係非常之油麻地，但同時亦埋藏咗我好多嘅童年回憶喺入面，

同埋最重要嘅係，同嫲嫲一齊食飯，真係鹹魚白菜也好好味～

鮮蝦餃、叉燒包、椒鹽魷魚鬚，全部都係我小時候嘅賣飛佛！

炸雲吞、海鮮卷、清炒芥蘭、黑椒鹹菜豬肚湯……
再加多籠燒賣同碟蝦腸埋單都係兩舊水左右，價錢都叫做幾合理啦！

《好彩大酒樓》

地址：彩虹彩雲邨彩雲商場第2期3-4樓
電話：2750 1899
營業時間：星期一至日：07:00 - 23:00

各項評分（五個㊣為滿分）

食物質素：㊣㊣
抵食程度： ㊣㊣㊣
服務態度：㊣㊣㊣㊣
環境： ㊣㊣㊣
衛生：㊣㊣㊣

 
飲完個早茶，午餐食乜好？不如就整返碗川粵招牌麻辣大王米線啦！
呢間四川嘢我之前喺一篇飲食Blog度都曾經介紹過，相當唔錯㗎！

食物質素差，失敗！服務態度差，失敗！成個場烏蠅多過人，失敗中嘅失敗！
呢間位於沙田廣場嘅《唯一麵家》，絕對係一間名副其實嘅地獄黑店！ 

超難食！勁難食！超級無敵難食！呢一碟應該係我呢世人食過最難食嘅上海炒粗！
D麵又乾又硬，成碟嘢仲凍冰冰，令到向來最討厭人浪費食物嘅我……
都忍唔住要破例一次！Waiter！麻煩上下一道菜唔該！ 

好似糖水咁甜嘅酸辣湯，你哋飲過未呀？有陣隔夜啤酒味嘅花鵰醉雞，你哋試過未呀？
以咁多味餸嚟講，個回窩肉叫做算唔錯㗎喇！之但係碗菜飯就硬到好似一粒粒石仔咁！
嘩大佬！一餐咁重口味嘅晚飯你居然仲夠膽死收人成三嚿幾水？真係過火D啩？
講真，平時我都好少會踩到一間食店咁盡，但呢次我就想破例提醒一下各位！
呢間嘢同TVB一樣，都係Totally Very Bad！大家千祈唔好中伏呀！

食完一餐咁難食嘅晚飯，梗係要食返餐豐富嘅宵夜當補數啦！
呢間位於佐敦吳松街49-51號地舖嘅《成興大排檔》，

係我好兄弟輝輝近期一個十分靠得住嘅宵夜好介紹。
 
嚟嚟嚟～大大隻扇貝，鮮甜又多汁，一人一隻，大家唔洗爭！

嘩～隻扇貝大到連個碗都裝唔晒！
不過買成四十蚊一隻，值唔值就真係見人見智喇！

輝哥嘅重點推介，十級好味嘅砵仔蠔！㊣㊣㊣㊣㊣

指定動作，一碟鼓椒炒花甲加一碟椒絲腐乳炒通菜。

我成日都覺得，如果想試下一間大排檔個廚房得唔得，
第一件事就必定要試下佢哋個椒鹽鮮魷，

假如pass咗呢一關嘅話，咁呢間大排檔D嘢通常都唔會難食得到邊，
而呢間《成興》嘅椒鹽鮮魷我認為就值80分左右啦！
咬落去幾煙韌，香口得嚟又唔會炸得太乾，而椒鹽同炸粉嘅比例又落得剛剛好。

同樣係椒鹽系列，呢碟椒鹽墨魚咀就差咗少少喇！
個墨魚咀又韌又乾，食落去個感覺就好似一嚿冇晒味嘅香口膠咁，
而D椒鹽同炸粉又落得太重手，搞到成碟嘢又鹹又乾又多粉！嗯～扣分扣分！ 

三個人嗌到成檯都係餸，飲咗八支大青島，
最後埋單大概係五舊水左右，都算OK啦！ 

臨走嗰陣遇到一位好乖嘅小朋友，呢隻貓仔睇落似係剛剛出世冇耐，
唉～而家外面世途險惡，希望佢可以生活得平平安安、快快樂樂啦！

《成興大排檔》

地址：佐敦吳松街49號地下
電話：2770 1682
營業時間：星期一至日：10:00 - 04:00

各項評分（五個㊣為滿分）

食物質素：㊣㊣㊣㊣
抵食程度： ㊣㊣㊣
服務態度：㊣㊣㊣
環境： ㊣㊣
衛生：㊣㊣

另外，最近輝哥三日唔埋兩日就叫我去佢做嘢嗰一間貴價日本料理度開餐，
雖則話間嘢要去到西環嗰頭咁鬼遠，但聽完輝輝嘅描述之後，就立刻令我食指大動，
你哋睇下！連D員工福食都咁正！搵日真係要過去試下先得！
 
喂喂～衰仔！食完咁多好嘢都仲唔夠！仲想食埋我隻手？作死你呀！