2014年5月2日 星期五

五一勞動節,只吃不勞動!

嚟嚟嚟!今晚喬家請食飯!大家唔好客氣!隨便起筷!~XDXDXD~

先嚟一個頭盤!我老豆嘅新產品「蜜汁煙肉燒金蠔」!配埋黃芥辣嚟食,個口感真係一流呀!

我老母炮製嘅傑作香煎蝦球帶子伴西蘭花 + 菜心炒素鮑片,好味得嚟又健康!
小弟嘅招牌菜,XO醬雙丸海鮮公仔麵 + 白灼生菜一碟
(咁都好意思拎出嚟sell,真係厚面皮到極點!XDXDXD~)
好喇!食飽飽,瞓番個靚覺!聽日仲有大把節目呀!
喂!好起身喇!我哋今朝約咗嫲嫲同兩個姑姐飲茶㗎!再唔出門口就遲到㗎喇!
講起上嚟都好耐冇嚟過好彩飲茶喇!今次一定要食番夠本先得
老實講,雖然好彩D嘢一向都係非常之油麻地 
不過呢度就真係埋藏我好多嘅童年回憶…… 
同埋最重要嘅係……同嫲嫲一齊食飯真係鹹魚白菜也好

鮮蝦餃、叉燒包、椒鹽魷魚鬚……全部都係我小時候嘅賣飛佛!
炸雲吞、海鮮卷、清炒芥蘭、黑椒鹹菜豬肚湯……
再加多籠燒賣同碟蝦腸埋單都係兩舊水左右,價錢都叫做合理啦!
《好彩大酒樓》

地址:彩虹彩雲邨彩雲商場第2期3-4樓
電話:2750 1899

營業時間:星期一至日:07:00 - 23:00

各項評分(五個為滿分)


食物質素:㊣㊣
抵食程度: ㊣㊣㊣

服務態度:㊣㊣㊣

環境: ㊣㊣㊣

衛生:㊣㊣㊣


 
飲完個早茶,午餐食乜好?不如就整番碗川粵招牌麻辣大王米線啦!
呢間四川嘢我之前喺一篇飲食Blog度都曾經介紹過,相當唔錯㗎!
食物質素差,失敗!服務態度差,失敗!成個場烏蠅多過人,失敗之中嘅失敗!
呢間位於沙田廣場嘅《唯一麵家》,真係一間名副其實嘅地獄黑店! 
超難食!勁難食!超級無敵難食!呢碟應該係我呢世人食過最難食嘅上海炒粗!
D麵又乾又硬,成碟嘢仲凍冰冰!令到向來最討厭人浪費食物嘅我……
今次都忍唔住要破例一次!Waiter!麻煩上下一道菜唔該! 
好似糖水咁甜嘅酸辣湯,你哋飲過未呀?有陣隔夜啤酒味嘅花鵰醉雞,你哋試過未呀?
以咁多味餸嚟講,個回窩肉叫做算唔錯㗎喇!不過碗菜飯就硬到好似一粒粒石仔咁!
嘩大佬!一餐咁重口味嘅晚飯你居然仲夠膽死收人哋成三舊幾水?真係過火D啩?
講真,平時我都好少會踩到一間食店咁盡!但今次我就真係好想提醒一下各位
呢間嘢同TVB一樣,都係Totally Very Bad!大家千祈唔好中伏呀!
食完一餐咁難食嘅晚飯,梗係要食番一餐豐富嘅宵夜補數啦!
呢間位於佐敦吳松街嘅《成興大排檔》,係我好兄弟輝輝近期嘅一個宵夜好介紹!
 
嘩!大大隻扇貝,鮮甜又多汁!一人一隻,大家唔洗爭!
你哋睇下!隻扇貝大到連個碗都裝唔哂!
不過買成四十蚊一隻,值唔值就真係見人見智喇!
輝哥嘅重點推介,十級好味嘅砵仔蠔!㊣㊣㊣
指定動作!一碟鼓椒炒花甲加一碟椒絲腐乳炒通菜……
我成日都覺得……如果想試下一間大排檔個廚房得唔得……
第一件事就一定要試下佢哋個椒鹽鮮魷!假如佢哋pass咗呢一關嘅話……
咁呢間大排檔D嘢就通常都唔會難食得到邊!
而呢間成興嘅椒鹽鮮魷我認為就值80分左右啦!
咬落去幾煙韌,香口得嚟又唔會炸得太乾,而椒鹽同炸粉嘅比例又落得剛剛好! 
同樣係椒鹽系列,呢碟椒鹽墨魚咀就真係差咗D喇!
個墨魚咀又韌又乾,食落去個感覺就好似一舊冇哂味嘅香口膠咁!
而D椒鹽同炸粉又落得太重手,搞到成碟嘢又鹹又乾又多粉!嗯……扣分扣分 
三個人嗌到成檯都係餸,飲咗八支大青島……
最後埋單大概係五舊水左右!都算OK啦! 
臨走嗰陣遇到一位好乖嘅小朋友,呢位小朋友應該都係出世冇耐……
唉~而家外面世途險惡!希望佢可以生活得平平安安、快快樂樂啦!
《成興大排檔》

地址:
佐敦吳松街49號地下
電話:
2770 1682
營業時間:星期一至日:10:00 - 04:00

各項評分(五個為滿分)


食物質素:㊣㊣㊣

抵食程度: ㊣㊣㊣

服務態度:㊣㊣㊣

環境: ㊣㊣

衛生:㊣㊣


另外,最近輝哥就成日都叫我有時間就去佢做嘢嘅嗰一間貴價日本料理度開餐!
雖然間嘢去到西環嗰頭咁遠,不過聽完輝輝嘅描述之後……
就令我呢個日本料理發燒友立刻食指大動!
嘩!你哋睇下!連員工D福食都咁正!搵日真係要過去試下先得!
 
喂喂!衰仔!食完咁多好嘢都仲唔夠!仲想食埋我隻手?作死你呀!

188 則留言:

  1. 唔好話你食指大動,我都俾你嗰啲相片引到流哂口水,真係正到痺!

    回覆刪除
    回覆
    1. 回你哋嗰陣睇到D相,又想去食喇!XDXDXD~

      刪除
  2. 《唯一麵家》雖然在沙田廣場屹立多年,我曾光顧感覺水凖一般,已經再沒有幫趁了!

    回覆刪除
  3. 回覆
    1. 早已經發福咗一個碼!XDXDXD~

      刪除
  4. 呢個勞動節都十分 “勞碌” 啵 :D
    不過我對間大排檔都有興趣,尤其砵仔蠔... 嘿

    回覆刪除
  5. 港英餘孽當奴曾2014年5月2日 上午9:28

    乜野叫福食?

    回覆刪除
    回覆
    1. 應該係指留俾員工的膳食。

      刪除
  6. 回覆
    1. 但真係好叉貴!食一隻差唔多等如兩個M記餐!

      刪除
  7. 食!食!食! 你嘅勞動節真係快樂!睇起上嚟,你老豆老母嘅烹調技術好有專業水準喎!

    回覆刪除
    回覆
    1. 我一向覺得佢哋D水準仲勁過酒店D大師傅!XDXDXD~

      刪除
  8. Ummm.......咁樣勞動,好有意思﹗﹗Very nice!!!

    回覆刪除
  9. 嘩嘩 , 果然好擦得 !! 好耐冇見你喇 , 有d 掛住你呢 !!

    回覆刪除
  10. 要學; 1. 蜜汁煙肉燒金蠔 2. $26 學生餐抵食. 3. 扇貝成四十蚊一隻, 收錢那個, 抵 !
    醉巧味.. 老豆隻手 ! =.=

    回覆刪除
    回覆
    1. $26學生餐都睇到!咪咪姐觀察好強呀!

      刪除
  11. 你又話對d海鮮敏感,又食咁多?
    果間黑店黑成咁你仲俾錢買單?叫佢回水啦!

    回覆刪除
    回覆
    1. 我唔係對所有海鮮都敏感的!全部都敏感嘅話我就真係生不如死喇!XDXDXD~

      刪除
    2. 我的敏感清單(食物篇):

      「重災區」
      牛、蟹、果仁、花生、茄子、芒果、牛油果、朱古力

      「可吃小量」
      鵝、羊、蛋、筍、奇異果、荔枝、奶類食物

      「可吃普通分量」
      鴨、蝦、酸辣麵、煎炸食物

      刪除
  12. 好想知你朋友做嘢間貴價日本料理個地址呀,碟Sashimi好吸引!

    回覆刪除
    回覆
    1. 井川日本料理
      堅尼地城吉席街55-57號美新大廈地舖

      刪除
  13. 喬家出品好得喎, 包括你既公仔麵 ...hahah
    間爛鬼黑店有無即場開佢波?掟返比佢自己食!

    回覆刪除
    回覆
    1. 開佢波又唔會,最多以後唔去啫!

      刪除
  14. 沙田間唯一以前OK架!唔知點解而家D野差左咁多...
    成興好耐之前去過,都唔錯...叫你拎隻貓仔番去啦!唔使心卦卦...呵..

    回覆刪除
    回覆
    1. 拎番去個衰仔實嬲死,咪搞!XDXDXD~

      刪除
  15. 個砵仔蠔好似好正咁!...

    回覆刪除
  16. 十年冇食過大排檔野,(自閉隱青冇人陪)好回味,大哥老豆乜都識整,真係仲勁過D大廚!

    回覆刪除
  17. 你很愛吃香口的東西, 正!
    家常菜很温馨啊!

    回覆刪除
  18. 四十蚊一隻扇貝
    真要用吃法國生蠔心情去享受

    回覆刪除
  19. 好好食神呢!見到都流口水啊!

    回覆刪除
  20. 出力食來勞動 , 真是个快樂滿足的勞動節喲

    回覆刪除
  21. 40元一隻扇貝好吸引喎!

    回覆刪除
  22. 成篇Blog我對喬家出品最有興趣,尤其是那碟甘蠔。

    回覆刪除
    回覆
    1. 喬家出品,必屬佳品!XDXDXD~

      刪除
  23. 你一次過SHOW哂出嚟? 正呀! 謝謝分享!

    回覆刪除
  24. 正呀!特別是親朋好友聚餐!
    貓咪無份食, 你食完果D食物氣味, 佢聞到架!!!

    回覆刪除
    回覆
    1. 個衰仔成日都借D意咬我㗎啦!哼!

      刪除
  25. 仲未煮飯o架,見到已經好肚餓,妖

    回覆刪除
  26. 食得快樂的勞動節!我的勞動節,平平淡淡就度過了。

    回覆刪除
  27. 心中充滿喜悅....週末愉快........

    回覆刪除
  28. 間大排檔好似幾正,搵日兩兄弟一齊去!

    回覆刪除
  29. 我對蜜汁煙肉燒金蠔和其他海鮮好有興趣.
    成興大排檔的 scallops 好大隻, 真想吃.

    好彩大酒樓
    酸辣湯多了第三種味, 糖?? 有趣~~
    服務態度差我最憎, 廚藝是其次. 酒樓不及大排檔?? 真失敗.

    回覆刪除
    回覆
    1. 食物和服務態度皆差是唯一麵家不是好彩呢!XDXDXD~

      刪除
  30. 要客刺身,兩隻扇貝,一個砵仔蠔,一打藍妹唔該!

    回覆刪除
    回覆
    1. 整多碟紅伶芥辣墨魚就一流喇!

      刪除
  31. 回覆
    1. 唔知係靚仔定靚女呢?XDXDXD~

      刪除
  32. 喬家原來都是廚藝高手,失敬失敬。

    回覆刪除
  33. 「蜜汁煙肉燒金蠔」配埋黃芥辣嚟食,個口感一流.. 真想吃!
    你老豆嘅廚藝技術好有專業水準喎!

    回覆刪除
  34. 哈哈,個喬家套餐點賣?

    回覆刪除
  35. 吃都是好好的勞動! 哈哈哈
    「好似糖水咁甜嘅酸辣湯 ...... 有陣隔夜啤酒味嘅花鵰醉雞 ...... 碗菜飯就硬到好似一粒粒石仔咁!...... 咁重口味嘅晚飯你居然仲夠膽死收人哋成三舊幾水?真係過火D啩?」今個月的最佳文學獎,哈哈哈

    回覆刪除
  36. 下午好,Teddy!
    好豐富喔!
    吃喝愉快!

    回覆刪除
  37. 可以的話,我想去你朋友的公司打工!嘻..

    回覆刪除
    回覆
    1. 請留下姓名、電話、地址,我會盡快覆你!XDXDXD~

      刪除
  38. 呢個假期,食左唔少喎

    回覆刪除
  39. 好充實美味的勞動節哩!週末愉快. (^ O ^)

    回覆刪除
  40. Mark低左間大排檔,遲D同兄弟去宵夜,thx...

    回覆刪除
  41. 扇貝好似幾正喎,睇見咁多食物,流晒口水添!^ ^

    回覆刪除
  42. 食指大動呀, 流哂口水添!

    回覆刪除
  43. 啊呀 來遲吃多些啦。。。。我! 很美味呢! 等我試一試做先! (≧∇≦)

    回覆刪除
  44. 等我記下店的地址,回來試一試先! (⌒▽⌒)

    回覆刪除
  45. 唯一麵家?下!唯一好食? #ng#唯一好難食就真!xx(xx(xx(
    加完價仲要連d貨都變埋質!D服務員更加係無禮貌!xx(xx(xx(
    又話係蔡爛心水食店,我估佢係咪收左$賣廣告?xx(xx(xx(

    回覆刪除
    回覆
    1. 唔收錢佢會同你免費宣傳?XDXDXD~

      刪除
  46. 如果想試下一間大排檔個廚房得唔得……第一件事就一定要試下佢哋個椒鹽鮮魷!

    I know this feel bro!#yup# #yup# #yup#
    我敢講港式椒鹽鮮魷係香港最偉大嘅發明之一!#yup##yup##yup#
    仲一定要係大排檔整出黎果d先夠火喉!#yup##yup##yup#
    再加支青島,可以講得上係冇得輸呀!#yup##yup##yup#

    回覆刪除
  47. BTW巴打,一睇你碗麵就知你係煮公仔麵高手啦!#hehe# #hehe# #hehe#

    回覆刪除
  48. 貴價日本料理在那裡 ?
    好正喎 !

    回覆刪除
    回覆
    1. 井川日本料理
      堅尼地城吉席街55-57號美新大廈地舖

      刪除
  49. 唉 ~ 而家食乜都冇味啦 ! 等左廿幾年既冠軍就咁冇左 ...

    回覆刪除
  50. 我剩係鍾意貓貓。。。。。

    回覆刪除
  51. 第一時間就俾你爸爸碟蜜汁煙肉燒金蠔吸引左!

    回覆刪除
  52. 第一幅已非常啱口味!

    回覆刪除
  53. 你屋企人煮d野好吸引.......
    唔知係咪睇左上面頭幾張d圖....
    就算第四張個碟生菜都好想食......
    (點解d post永遠最後都要有壽司?? 好肚餓呀.....)

    回覆刪除
    回覆
    1. 小晴,因為壽司永遠都係我嘅最愛!嘩哈哈!

      刪除
  54. 得罪講句,彩雲真係劣食天堂!
    最近巴士總站附近仲開埋間世界級垃圾食堂意樂餐廳,
    將成個彩雲變成飲食界練獄,真係好懷念陽光同仲未變質嘅冬菇亭...

    回覆刪除
    回覆
    1. 唉~我好明白呀!以前陽光D薯條同快餐真係冇得輸!好掛住嗰個好似徐少強嘅水吧叔叔呀!冬菇亭以前有檔蛋旦粉真係全港最正!不過轉咗手比佢班仔搞之後就差咗好多喇!

      刪除
  55. Good night My █▄❤vE Friend Teddy Kiu
    \(◕ヮ◕)/貓貓好可愛的

    回覆刪除
  56. 個貓樣好嗲呀~~小朋友無人養架?

    回覆刪除
    回覆
    1. 唔知呀!我問過大排檔D人,佢哋又話唔係佢哋養㗎喎!

      刪除
  57. 嘩!隨咗碟地獄粗炒,有得食任何一味都笑到唔出的聲!

    回覆刪除
    回覆
    1. 仲有碗酸辣糖水同石頭菜飯!XDXDXD~

      刪除
  58. 晚安小子,我以前都好鐘意食椒鹽鮮魷,不過而家年紀大少食左.

    回覆刪除
  59. I was a fan of Japanese food too, Sushi and Sashimi, So Delicious!

    回覆刪除
  60. 充實美味的勞動節 Yummy~Yummy~ 好豐富喔!



    回覆刪除
  61. 嘩,真係由朝食到晚,正!

    回覆刪除
  62. 嘩!八支青島咁少點飲呀?加多2支藍妹啤黎先啦!!

    回覆刪除
  63. Time Time,跪求輝哥貴價日本料理地址!

    回覆刪除
    回覆
    1. 井川日本料理
      堅尼地城吉席街55-57號美新大廈地舖

      刪除
  64. 呢種blog真係害人不淺,哈哈

    回覆刪除
  65. 咁多美食, 你手腳冇勞動, 口呀腸胃呀…全部都應五一勞動節~~~哈哈哈

    回覆刪除
  66. 咁多美食~駛唔駛我幫你食d 呀

    回覆刪除
  67. 彩雲好彩真係好經典,咁多年依然仲做得住!
    XO醬雙丸海鮮公仔麵 + 白灼生菜一碟===>我覺得唔厚臉皮喎,好多人連即食麵都唔識煮架XXD不過如果有時間不妨同阿世伯學返兩手絕技傍身都好嘅XXXD
    我覺得貓貓唔似係要食你隻手喎,反而似係叫你下次拖埋佢去食好嘢XXXXD

    回覆刪除
    回覆
    1. 好彩、彩龍同成發都算係彩雲飲食界少有仲企得住嘅食巿!

      刪除
  68. 望梅能否止渴就唔知、之但係望圖流口水我就領略到喇!

    回覆刪除
  69. 一些回憶的味道有時候往往比珍饈百味更讓人來得深刻,更重要是坐在餐枱旁邊的人是誰。,

    回覆刪除
  70. 大排檔已經係香港最具風味嘅食巿,希望可以永久保存!

    回覆刪除
  71. 哈哈,放假梗係玩啦,要勞動就唔好要呢個節喇 :P

    回覆刪除
  72. 真係食不停wor, 放假係要咁! yeah!!
    你隻貓好睡著個樣好可愛, 捉住你隻手個時又好過癮呀...

    回覆刪除
  73. 辛苦志在搵黎食嘛~~ yummy!

    回覆刪除
  74. 我最欣賞蜜汁煙肉燒金蠔....加埋黃芥辣!~讚!

    回覆刪除
  75. 好多貓貓相。。^^。。。

    回覆刪除
  76. 哈!QQ都係喜歡睇貓貓多d...............!^^

    回覆刪除
  77. 原來你呢個貓迷唔只鐘意貓 , 仲鐘意周圍食呢~!!

    回覆刪除
  78. 佐敦那條街有大排檔我都冇留意,那隻貓仔同你隻貓的花色有些像呢

    回覆刪除
  79. 好恐怖呀...1日可以食咁多野既~~~~~

    回覆刪除
  80. I savour, result in I discovered exactly what I was having a look for.
    You have ended my 4 day long hunt! God Bless you man.
    Have a great day. Bye

    Also visit my blog post; ancient roman clothing

    回覆刪除
  81. 想点呀!有得睇無得食,引c人咩?

    回覆刪除
  82. 好吸引!深夜見到這些食物相,真係令人垂涎三尺。
    椒鹽魷魚鬚真係永遠叫人欲罷不能的食物!

    回覆刪除
    回覆
    1. 椒鹽鮮魷係一定要配埋一支冰凍嘅啤酒先至得㗎!

      刪除
  83. 唔,
    怪不得叫做
    唯一(不要光顧的)麵家了。

    回覆刪除
    回覆
    1. 哈哈~還是red_yellow兄夠絕核!

      刪除
  84. 潔潔來遅了,但也感到是開心快樂的一天。

    回覆刪除