2012年10月24日星期三

我的零食物語


某日一個人行行吓超級市場,忽然間好想寫返一篇《零食Blog》,
與其得個諗字不如馬上坐言起筆〞,同各讀者分享一吓小弟嘅一啲至愛選擇。
好~就由我細細個開始講起先啦!有冇人記得呢啲一支支色彩繽紛嘅物體係乜嘢嚟? 
佢哋雖然有一大浸藥水味,但嗰時唔知點解又照樣會買返去食,
嗰陣我好鍾意叫呢支嘢做「啫啫冰」食完之後嗰種透心涼嘅感覺真係幾爽㗎!~
近排上網間唔時就會睇到啲人討論乜嘢巨星雪條呀~檸檬茶雪條呀~穿梭機雪條咁~
我自己就冇食過以上呢三款雪條,喺我嗰個年代最紅嘅一支雪條,就係……
登登登登~鳳仙~ 脆卜卜嘅香蕉脆皮 X 雲呢拿雪糕 X 芒果餡,簡直令人愛不釋口呀!~

講起鳳仙,又點可以唔提一提佢呀?份量十足嘅大~腳~板
羅拔臣啫喱系列,細個嫲嫲經常會整畀我食,加埋花奶個口感仲正。
如果想方便啲嘅話,你哋都可以試吓呢款四方果啫喱,平平哋又幾好食。
講完啫喱雪條,又講吓一啲糖果呀!呢款奶咀糖,唔知大家又有冇食過呢?
呢啲一排排嘅糖叫做BB糖,好好玩,不過就唔太好食。
記得每到新年打開個全盒,我第一時間一定會拎呢款糖嚟食,
點解?貪佢好食得嚟個名又好意頭囉!但係食咗咁多年,我依然都係冇發到達……
近年喺電視度賣得好行嘅二寶糖,其實已經有好耐歷史。
以前,我曾經一度誤以為FOX'S糖係一眾有錢人嘅專屬糖果……
七彩繽紛嘅Skittles,顔色鮮豔,口味眾多,
個人最鍾意係黃色同綠色,最憎嘅係紫色,十足十咳藥水咁味。
相信有好多香港人都好鍾意食呢款可樂糖
若果唔係,《明將》又點會諗得到要拎佢嚟做創意壽司呢?
以下係一則溫馨提示:最正確嘅大白兔糖食法,就係連埋張米紙一齊食。
又平又好綠箭白箭仲有黃箭係,三款除唔到口氣味嘅香口膠。
講完糖,又講吓朱古力,Kinder出奇蛋,一次過滿足晒三個願望,你/妳今日買咗未呀?
究竟食得多聰明豆個人係咪會聰明啲嘅呢?若然屬實嘅話,咁我就完全解釋到點解我份人會咁Q死蠢喇!
停產咗N年嘅加菲朱古力,小朋友嗰時覺得佢哋幾得意,到大個睇返先發現粒嘢查實都幾驚嚇。
呢兩款朱古力就經典喇!左邊嗰款叫煙仔朱古力,我幼稚園嗰陣最鍾意就係擔住佢嚟扮大人;
右邊嗰款叫做眼鏡朱古力,一粒粒七彩嘅朱古力豆,個味道有啲似M&M's,都幾好食㗎!~
積及好到極,人人爭住食,直頭係人間美味!
樂天熊仔餅,一粒令我哋衛生局局長嚇到標屎嘅熊仔餅,事實上係相當之好味。
叮噹至愛嘅豆沙餅,唔知大家又鍾唔鍾意食?
軟綿鬆化嘅紙包蛋糕,可能係世界上最好食嘅蛋糕。
歷史悠久嘅莎莉蛋糕,喺我個年代都算係高檔嘢嚟
呢隻檸檬味嘉頓迷你瑞士卷,真係由細食到大都唔會覺得厭。
呢款零食又係阿嫲介紹我識,最鍾意食白色餡嗰款,甜度啱啱好,超正。
嘉頓時時食,我細個時時都會食㗎!最鍾意食芝士味,一食就停唔到口。
講起芝士,小學時期,我每朝早都好鍾意食一片卡夫芝士當早餐,另加一杯牛奶。

所有7、80後嘅朋友仔應該都唔會對呢款魚仔餅感到陌生喇啩?
仲有呢隻愉快動物餅,有牛油味同紫菜味,兩者之間,小弟就比較喜歡後者多啲。
喺咁多種檸檬夾心餅入面,我最鐘意食嘅牌子係嘉頓因為佢啲餅乾同夾心都唔會太甜,完全啱晒我口味。
呢一筒筒味道酸酸哋嘅山渣餅,唔知你哋有冇拎過佢哋嚟送藥呢?我自己就冇喇!~
原因係小弟我呢份人就唔怕吃苦嘅反而係平時口淡淡嗰陣,先會走去拎啲山渣餅嚟嗒吓!
珍珍呢兩款產品的確係好鬼好食,同時亦都好鬼死多味精,
所以每次食完之後我個喉嚨都會勁乾,搞到要猛咁灌水解喝。
仲有一款又係味精多過乜嘅零食,佢就係學生哥至愛嘅媽咪麵喇!
講完我童年時代嘅零食回憶,又講我嘅中學時代,寶路薄荷糖……
除咗用嚟食之外
其實仲有其他用途㗎!唔知各位又諗唔諗得到呢?
喺呢度,我真心想同每一位畀我用寶路薄荷糖掟過嘅先生同小姐講返聲對唔住,
細佬當時年少無知,咁鬼白痴,正所謂有怪莫怪,細路仔唔識世界呀

天地有正氣,Super Lemon認真係酸到痹,食一粒包你一世回味
呢隻牌子嘅棉花糖,係燒嘢食嗰陣必備嘅〝最佳甜品〞
以上呢兩款朱古力條,個人比較鍾意邊嗰款,邊嗰款雖然都好食,但係就好容易整到隻手污糟邋遢。
呢一條條啖啖肉嘅魚肉腸真係令人又愛又恨,
你話邊有啲包裝咁仆街㗎?直頭用棚牙用力咬都未必咬撚得開
我一向都好鍾意食魷魚絲,尤其係時興隆出嘅呢一款,之但係
佢哋所拍嘅廣告,朕就真係不敢恭維,特別係嗰一首難聽到震嘅死人廣告歌
呢隻鱈魚絲舊時賣得好鬼平㗎一包大包裝隨時可以食足一日。
呢隻蒲燒太郎鰻魚乾係我中學時代其中一款最愛嘅口立濕,
佢個味道鹹得嚟又有啲甜甜哋,唯一缺點就係太韌太難咬。
講到口立濕,華園係專家!而喺佢出過嘅咁多款口立濕當中,
我最like嘅就係佢哋嘅齋燒鵝,真係諗起都流口水呀
「又係燒粟米咁橋,一早知你係粟一燒!」
由葛民輝做旁白嘅呢個粟一燒廣告,喺我個年代都可以稱得上係hit爆全港。
呢種外型同味道都同粟一燒好相似嘅粟米條,香港呢邊多數會譯做美味米
除咗魷魚絲,我至愛嘅時興隆食品仲有以上呢兩種,特別推介佢哋嘅辣味卷,極之惹味,超級好食。
中學嗰陣三日唔埋兩日就會走去呃啲女同學嘅蝦條嚟食,
尤其係呢款卡樂B原味蝦條蝦味濃郁又夠香脆,一個字:
講完讀書時期,都係時候要講我返工年代嘅零食回憶,
五年前,即係剛投身放映行業嗰陣我幾乎每日搭車之前都會買返筒能得利軟糖責袋〞,
呢個習慣一路要去到兩年前我先至戒到,我覺得呢類軟糖同橡皮糖係好好食,係衰在太過容易黐牙。
前幾年喺屯門返工間唔中就會幫襯吉野家,最鍾意食佢哋嘅煎雞同東坡肉飯,
而以上呢款牌子嘅果凍係隨套餐附送嘅贈品〞,雖則話係免費附送嘅,
覺得呢個贈品卻係我有生以來食過最好食嘅一款果凍。
猛咁講嚿屎,咁而家又點呢?事不宜遲,又分享吓一啲我由細到大都咁like既零食!~
第一款要同大家分享嘅,係呢隻好好味嘅嘉頓雞片
我有時癲起上嚟,係可以一個人喺一晚之內將屋企嘅存貨全數消清光!~

雞餅要食嘉頓,蝦餅就梗係要幫襯四洲集團啦! 
四洲喺近幾年先後推出咗好多款唔同口味嘅蝦餅,但我就始終都係最鍾意食佢哋嘅呢一款原味蝦餅。
除咗蝦餅之外,我最鍾意食嘅四洲食品就係四洲紫菜
尤其係呢款芥辣味,非常攻鼻,十分過癮。
講到攻鼻,呢一隻牌子嘅芥辣豆都好頂癮試過包你返唔到轉頭。
Glico近幾年出咗好多款唔同口味古靈精怪嘅產品,但就通通都比唔上呢一款沙律味百力滋
細個嗰陣好鍾意食童星點心麵,然後到大個咗,我就瘋狂迷上佢哋個大佬 -
旺旺呢間公司推出過好多種食品,但本人就只係對佢哋嘅燒米餅感興趣。
呢包由日本出產嘅海苔卷米餅,以甘香醬油帶出海苔鮮味,咬落香脆味美。
登登登登~筆者嘅「薯片排行榜」第十名,係呢一袋三文魚壽司味薯片
佢係珍珍喺前幾年所推出嘅一款新產品,味道幾好,但份量就少得可憐。

第九位,係呢一隻鹹到痺嘅珍珍燒烤味薯片,用嚟送啤酒確就最一流。
第八位係喺眾多薯片之中口味最淡嘅Lay's原味薯片
我認為佢款原味薯片薯味都幾重,而且整體嚟講亦都冇其他薯片咁熱氣。
第七位係EDO出品嘅巨浪大切香辣味薯片
呢隻牌子嘅薯片喺剛剛推出嗰時真係賣得好鬼平,我喺屯門返工嗰陣成日都會掃三、四筒返公司食。
第六位係Pringles所出品嘅忌廉洋蔥湯味薯片又名「施文薯片」,
你哋睇吓罐嘢個死人嘜頭,係咪同前英格蘭國腳龍門施文好似樣呢?
第五位係Wise出品嘅蕃茄味薯片,個味道酸酸哋,夠晒醒胃。
第四位,係薯片界嘅天王巨星卡樂B所出品嘅燒烤味薯片。
話咁快就數到三甲位置,第三位係當年被我稱之為「卡樂B惹味孖寶」嘅細孖
細孖夠惹味,大孖夠濃味第二位嘅卡樂B薄餅味薯片,係我當年睇意甲嗰陣必備嘅最佳損友〞。
各位觀眾,榮登筆者「薯片排行榜」第一位嘅係由卡樂B出品嘅熱浪薯片
呢款極惹味嘅薯片好食就梗㗎喇!可惜就貫徹咗卡樂B嘅一貫孤寒風格,即係袋大大,料少少。
卡樂B除咗薯片好食之外,由佢哋所出產嘅薯條一樣都係品貨保證,
例如係呢隻什菜薯條,細細條,脆卜卜,好味得嚟又唔太熱氣。
呢啲一杯杯嘅鹽味薯條薯味好鬼重,食起嚟好似食緊真嘅薯條一樣。
想問有冇Blog友食過呢款零食?如果冇嘅話,咁我就誠意推介畀咁多位!~
呢啲細細包嘅脆片,食落去個味道有啲似蒜蓉包,聽聞係班鬼佬們嘅至愛零食之一。
果汁豬肉乾蜜汁豬肉乾脆豬肉乾,全部都係我最渴望收到嘅手信。
除咗豬肉乾,仲有黑椒牛肉乾五香牛肉乾金裝牛肉乾,都係令人食指大動嘅送禮佳品。
明治Chelsea推出過咁多款糖,個人最愛嘅就係抹茶口味,同埋味道有少少似益力冰嘅乳酪口味。
分享完一堆賣飛彿,順便又介紹一吓細佬最近先認識嘅一班零食朋友,
呢隻紅豆糖係我嘅好兄弟輝哥推介畀我嘅,紅豆味超濃,絕無偷工減料
因為電影《低俗喜劇》而再度翻紅嘅爆炸糖,遲啲會唔會考慮搵DaDa做代言人呢?
呢隻粟子係我哋公司CJ出產嘅其中一款食品,有興趣可以去一啲賣韓國嘢嘅舖頭度搵吓。
呢包嘢嘅咖喱味好重,食落個口感都幾好,但就唔係咁易搵得到,
嗰日去買嘢個sales都同我講,話呢款零食而家只係做緊promote,喺未來仲未必會再入貨喎!~
呢隻小貝京龍蝦片係一包素食蝦片,味道唔錯但就好鬼多油。
咪睇呢樽嘢個外表好似核核突突咁,裡面裝住嘅查實係好食到爆炸嘅西貢辣辣蝦乾嚟㗎!~
前排因為剝智慧牙嘅關係,忽然瘋狂迷上食雪糕,
而呢隻由Dreyer's出品嘅Manila Super Mango雪糕,就成為我近期嘅至愛。
呢隻牌子嘅果凍雖然冇喜之郎咁彈口,但就勝在勁多果肉超抵食。
「死啦啲青春痘!~死啦啲青春痘!~粒粒都鬼死鬼死咁醜~」
食咗咁鬼多熱氣嘢,唔整返盅龜苓膏吔吓又點下到道火呀?

      
有幾多朋友仔同我一樣都係咁鍾意周圍去〝掃街〞㗎?
咁唔知喺大家心目中嘅至愛街頭小食又有邊一啲呢?
話時話,呢啲車仔檔喺今時今日認真係買少見少,仲記得以前日日都會見到班小販推住架車〝走鬼〞,
點諗到嚟到今日,啲小販就連鬼都唔使走,因乜解究咁大鑊?咪就係因為偉大嘅領匯集團囉!~
一邊介紹人哋有幾好食,暗地裡就叫人快啲收皮,簡直係「貓哭老鼠假慈悲」,好撚嘔心呀屌!~

韮菜豬紅肯定係本世紀最偉大發明之一,至於佢哋點解會咁夾?學廣西個暴龍哥話齋:呢個係定律嚟㗎嘛
講起韮菜豬紅,又點可以唔提埋佢嘅老友生菜魚肉
仲有就係好食過真魚翅嘅碗仔翅千祈咪賴低佢呀!~
香噴噴嘅勁辣魚蛋,每逢經過旺角花園街我都一定會走去篤返串。
嗱~就係呢間已經消失咗一排嘅舖頭喇!舊底我真係冇諗過,就連篤串魚蛋都可以排晒長龍,
但每次幫襯完,又會覺得自己排咁耐都係值得嘅,鬼叫呢間嘢嘅勁辣魚蛋好味到曉飛,仲會令人食上癮咩
除咗辣辣魚蛋之外,串燒雞腎亦都係我另一樣like爆嘅街頭美食。
雞腎配燒汁,咁鴨腎又應該配啲乜呢?唓仲使問!梗係黃芥辣啦屌!
黃芥辣唔只可以用嚟配鴨腎,拎嚟配生腸墨魚都係一絕。
呢款印尼撈麵都算得上係一眾窮撚嘅恩物,配埋燒賣就更飽肚,有時餓餓哋我仲會嗌埋加底添!~
呢隻經已停產咗嘅噹噹牌日式冷麵加埋Wasabi同日式鼓油嚟撈,個口感一級棒,令人懷念之極。
有段時間我喺西九嗰邊返工,每朝早都例牌會去公司附近啲快餐店度買一個炸雞腿包嚟食,
坦白講,我認為大部分快餐店所做嘅炸雞腿包都非常之好食,
甚至仲好食過M記嗰啲乜嘢脆辣雞腿包同板燒雞腿包添!~

煨魷魚烚粟米熱蔗鹽水馬蹄炒栗子鹽焗鵪春蛋……
有時候都幾懷念以前細個睇戲嗰陣喺戲院門口買嘅嗰啲小食,
仲記得呢堆食物散發出嚟嘅嗰種撲鼻嘅香味,真係隔成條街都聞到。

值得懷念嘅事實在太多,寫到呢度,我忽然之間又諗起細個同老豆去荔園玩嘅一啲點點滴滴,
諗返嗰時都應該算係我同佢相處得最融洽嘅一段日子,所以呢一切一切,都令我萬分懷念……
仲記唔記得呢款舊式嘅棉花糖呀?細個嗰時老豆一見到我唔開心,
佢就即刻會走去買一支棉花糖返嚟畀我,咁我就會立刻開心返晒!
哈哈我哋以前啲小朋友就係咁容易滿足㗎喇!
某日,我喺一個網站度偶然睇到呢幅相,即時令我諗返起以前同老母每年一度嘅「紅屋聚會」。
老豆鍾意帶我去荔園,我老母就high class啲,意帶我去紅屋餐廳度開餐,
爽口彈牙嘅大蝦沙律、又濃又多菜嘅港式羅宋湯、足料又大塊嘅T骨扒
,呢啲都係我每到必點嘅菜式。
食飽飽之後,我就會同老母手拖手行SOGO仲時不時會撞到一班明星,
而喺咁多位Artist入面令我留下最深刻印象嘅,就係喺80年代曾經紅極一時嘅國際巨星尊龍。
回首當時,我呢個小豆丁真係極之冇禮貌,得嗰幾歲人仔嘅我,望住眼前嘅尊龍叔叔……
轉頭就同我老母講咗一句:「媽媽,乜佢咁矮嘅?」你睇吓呢個死
𡃁,真係hurt人唔使本㗎!
但向來見慣風浪嘅尊龍大哥就梗係唔會同我計較啦!相反佢仲好有風度咁行過嚟我身邊同我傾計,
然後就笑口口咁摸下我個頭,呢種毫無架子嘅態度,配上一副親切嘅笑容,時至今日依然令我記憶猶新。
尊龍叔叔,其實喺呢咁多年以嚟,我一直都好想同你講返聲Sorry
咁當然,我都知自己成世都未必再會有呢個機會㗎喇!
寫吓寫吓,唔經唔覺就寫咗成幾粒鐘,我呢個S級長氣袋真係死性不改~XDXDXD~
PS:部份照片是轉載自Openrice、U Food以及各大報章雜誌。
「童稚裡我的一哭一笑劃滿了雪糕車  行盡了史詩式的興替達到哪裡止步」
歷史悠久嘅富豪雪糕,記載住香港人無數嘅集體回憶喺裡面,
衷心希望呢架車可以長久經營落去,切勿
變成領匯美食指南嘅其中一頁廢紙。
細個嗰陣,我覺得快樂係一件好簡單嘅事,一杯雪糕、一串魚蛋或者係一支汽水就足以令我好開心……
但當我長大之後,快樂唔知點解好似離我越嚟越遠咁,到底係我哋越大越幼稚……
定抑或係,我哋由始至終都冇認真去參透過「快樂」呢兩個字入面嘅深層意義究竟係啲乜呢?
嘩~大佬~寫篇零食Blog咋!你又扯到去冇雷公咁遠做乜Q呀?早唞啦你!喵~

189 則留言:

  1. 咪用畀字殘字
    HK一直用比

    [sar回覆10/24/2012 03:11:00]
    SORRY激左D..

    [版主回覆11/04/2012 15:28:00]
    寫篇blog,不用那麼執着吧?

    回覆刪除
  2. 睇完你依篇零食物語, 恨不得馬上去掃街

    回覆刪除
  3. loving JAGABEE!! so so much!

    回覆刪除
  4. Ooohhh I miss spicy fish balls and cuttlefish!

    回覆刪除
  5. Happy if Yahoo HK blog works2012年10月24日 上午6:34

    小時有吃多種零食, 百力枝, 山渣, 薯片, 綿花糖都有,
    但以很久沒有吃, 汽水都很久沒有飲.
    白兔糖都喜歡; 但聽講有至癌成份.
    [版主回覆11/04/2012 15:30:00]
    近年我乜比較少吃!

    回覆刪除
  6. 估唔到你都有我鍾意食0既積及橙餅...
    [版主回覆11/04/2012 15:31:00]
    人間美味啊!

    回覆刪除
  7. 火鳳凰自言自語2012年10月24日 上午6:50

    超級市場的零食滿載大家童年的回憶,
    年紀越長零食就慢慢遠離我們!畢竟這份回憶都幾開心!

    回覆刪除
  8. 嘩!......數之不盡!

    回覆刪除
  9. ice may may 雪美美、子格格2012年10月24日 上午7:09

    我喜歡大腳板呵!

    回覆刪除
  10. 唔怪得你條友依家要戒咁多口啦...
    由細食咁多添加劑,色素入肚....你真係掂啦
    印尼撈麵好似葵芳廣場樓上既小食檔有喎....
    [版主回覆11/04/2012 15:34:00]
    近排積極keep緊fit,塊大電視已經開始搬走了!

    回覆刪除
  11. 早晨:嘩...好多嘢吃.....我很多嘢沒試過...
    詳細介紹..您好細心...謝謝分享!

    回覆刪除
  12. 小吃小吃,人人愛吃。好吃零食,未必有益。

    回覆刪除
  13. 你...你...你真係有〝陰謀〞架?
    下篇post 喺唔喺講如何〝減肥〞呀?
    明知天氣涼了...人哋有幾聲〝咳〞...
    仲整D...Dreyer's出品嘅Manila Super Mango雪糕、
    雪糕車嘅雪糕、四方果啫喱...哼!
    [版主回覆11/04/2012 15:35:00]
    其實,我係鄭子誠。

    回覆刪除
  14. 你的相片資料好詳盡呀!!!!
    小時候最記得食嘉頓忌廉檳同埋孖寶蛋糕…….返學時時都會買來食!!

    回覆刪除
  15. 蜓子...................2012年10月24日 上午9:50

    你都幾為食吓架啵..............

    回覆刪除
  16. 嘩﹗好懷念啊﹗眼鏡朱古力,BB糖,「啫啫冰」,好多童年回憶回來了﹗

    回覆刪除
  17. 嘩嘩....好多零食...有我喜歡的...回味無窮....

    回覆刪除
  18. 咁多零食, 我睇到笑.. 奶咀糖,浪漫些好喎, 我叫佢做鑽石戒指.
    能得利橡皮糖, 我到現在仍戒不掉. 謝謝分享. 週三愉快.
    ☀❤Happy Day❤☀

    回覆刪除
  19. 午安,謝分享,天天愉快,大家開心❤

    回覆刪除
  20. 我細個無得食零食, 以上十樣有八樣未食過,
    有好深刻的印象是時興隆的"三支香",
    因為出國讀書無王管, 買勁多零食上機,
    17, 18 歲先第一次食, 我朋友就話:
    好嘢嚟喎, 三支香. 哈哈. 仲有經典的牛奶樂同咕叻樂.
    [版主回覆10/27/2012 00:06:00]
    三支香真係勁好食!

    回覆刪除
  21. 哈...勾起很多兒時回憶!!

    回覆刪除
  22. 此生最愛的零食, 係童年時代一種叫 結連 嘅軟糖, 可惜絕咗種 lu ~~~~
    [版主回覆10/26/2012 23:52:00]
    冇食過呢!

    回覆刪除
  23. 我的著眼點反而是你"尊龍叔叔"的故事,十分有趣。

    回覆刪除
  24. 仲有汽水粉、橙味香口珠、彊糖!!

    回覆刪除
  25. Bo仔.. 有一次!選舉日,
    議員劉×傑落我部落拉票; 正接受訪問..
    一把聲...:「乜佢咁矮嘅?」
    咪咪: 又喺喎!!

    回覆刪除
  26. 嘉頓隻檸檬夾心餅係好食,不過我都係鐘意食麥芽餅多D~

    回覆刪除
  27. Pandora 香傭講法文2012年10月24日 下午4:02

    睇得好開心呀!! many thanks

    回覆刪除
  28. 年紀大咗, 對以上食物已經不感興趣, 但亦十分之懷念

    回覆刪除
  29. 熱浪薯片真係好正,一食至少要食三包!
    龜苓膏我以前成日都食,但唔知點解食完D瘡就爆得仲勁?
    [版主回覆10/26/2012 23:48:00]
    要知道自己體質同皮膚係對啲乜敏感,我係過來人,我明白。

    回覆刪除
  30. 嘻…嘻…笑呵呵...我又係樹...呢...早晨呀...

    回覆刪除
  31. 哈哈......超級的集體回憶!

    回覆刪除
  32. 鑽石糖同 BB 糖現在不見啦! 不過我都唔食 Lu !
    其他大部份都吃過 ^^

    回覆刪除
  33. 點少得Oreo呀?
    [版主回覆10/26/2012 23:45:00]
    難食到嘔!

    回覆刪除
  34. 見到韭菜豬紅,突然好想食,
    一於去買來做餸

    回覆刪除
  35. 我鍾意食得力素檸檬糖,
    咬開佢時中間D爽心檸檬味勁濃,嘩.......
    [版主回覆10/26/2012 23:45:00]
    我都好鐘意食呢隻糖!

    回覆刪除
  36. 呢篇野好岩我睇.....
    啫啫冰真係令我好鬼怕....
    我係呢度搵到好多童年回憶......

    回覆刪除
  37. 哈哈我食過巨星雪條,檸檬茶雪條同穿梭機雪條呀!
    仲有一款叫做牛奶雪條你有冇食過?一支圓柱型的!
    [版主回覆10/26/2012 23:43:00]
    冇呀!我哋唔係年代㗎!

    回覆刪除
  38. 我的名字叫悲傷2012年10月24日 下午7:27

    有D係未見過的

    回覆刪除
  39. 寫零食有排寫!佩服!哈!!
    [版主回覆10/26/2012 23:42:00]
    我長氣呀嘛!

    回覆刪除
  40. 積及橙餅真係堅正

    回覆刪除
  41. jealous! most of them are only known but never try!
    啫喱加花奶, you really know how to eat! ha ha

    回覆刪除
  42. 我最怕食薄荷糖!
    [版主回覆10/26/2012 23:41:00]
    我都係!

    回覆刪除
  43. 前面講個D我大部分都冇食過。小食我最鐘意食魚蛋燒賣同雞蛋仔。

    回覆刪除
  44. ~喵~~~我不多食零食喎~~~我都去抖了~~~喵~~喵~

    回覆刪除
  45. 大部份我都食過!
    不過牛仔片好鹹,每次都食唔到落個底。
    而家買零食都係去阿信屋!
    [版主回覆10/26/2012 23:35:00]
    我女友都係鐘意去阿信屋,
    我就鐘意去超巿,因為可以一次過掃埋其他嘢!

    回覆刪除
  46. 嘩,這篇真是害人不淺,嘻。

    回覆刪除
  47. 晚上好...嘩! 咁多野食呀???

    回覆刪除
  48. 隨士多消失, 冰條媽咪麵都愈來愈少見了.
    尊龍叔叔睇落(電影中)點都有1.7 米喎...
    [版主回覆10/26/2012 23:01:00]
    其實我都唔知點解我當時會講句咁嘅嘢!
    可能我細個第一批接觸嘅華人明星就係發哥,
    所以喺我心目中佢呢啲先叫高佬。

    回覆刪除
  49. 鳳仙雪條係我的至愛呀!
    珍珍燒烤味薯片都好食~
    其實你隻貓咪叫乜名,我唔記得咗呢??
    [版主回覆10/26/2012 22:54:00]
    佢叫CoCo呀!

    回覆刪除
  50. 睇到溜口水~~~好多好多都是我喜愛的﹗OH NO....

    回覆刪除
  51. 嘩)) 哈哈 )))
    真是生鬼阿你, 有咁鬼多零食, 真係好吸引,
    有 d 曾經食過, 也有 d 是未見過嘅 ...
    我最鍾意食嘅呢就係" BB 糖" 喇,
    因為可以食好耐, 又可以一路食一路吹bb , 很開心呀 ~
    至於 尊龍, 我沒有機會遇見他, 真可惜,,
    咁你都好幸運啦, 見到佢真人,, 哈哈 ,,
    寫得很有趣呵~~^^~~

    回覆刪除
  52. Good morning, Time is Changing!
    ...以上種種零食, 大部份令我垂涎三尺, 尤其是"百力滋"!!!
    ...http://www.youtube.com/watch?v=RdDBpxDcF3s
    超有個性的狗!吃零食要握手 大發火...

    回覆刪除
  53. 我鐘意食福麵多過媽咪麵!

    回覆刪除
  54. 懷念的零食 !

    回覆刪除
  55. 嘩.....咁多零食.....很多都我呀.....

    回覆刪除
  56. 呢期喉嚨唔多妥,但係睇完你篇blog,又好想食........
    家陣山楂餅勁甜! 紅屋我以前只係去過銅鑼灣果間!
    [版主回覆10/26/2012 22:49:00]
    Matthew兄,抖抖先再食啦!身子要緊呀!

    回覆刪除
  57. 朱古力煙仔餅,人生的第一支煙。

    回覆刪除
  58. nice collections of the first pic!!!

    回覆刪除
  59. M&M 朱古力、金莎朱古力、麥提沙朱古力

    回覆刪除
  60. 早晨好謝謝你, 祝你愉快

    回覆刪除
  61. 最懷念從前係戲院門口ge煨魷魚檔,除咗唧唧冰之外仲有一種冰..益力多冰!
    以前覺得佢又平又抵食,不過而家就越來越貴同難買,
    唉..冇計啦!話說益力多可以豐胸美白同防癌喎,D"聰明人"仲唔爭住去搶咩?
    [版主回覆10/26/2012 22:45:00]
    哈哈~~對呢班人感到無言。

    回覆刪除
  62. 又係燒粟米咁橋,一早知你係谷德昭

    回覆刪除
  63. 禾最愛的零食是麥提沙及甜筒。

    回覆刪除
  64. 真係好詳細喎,零食我就一般啫,好想抱下貓貓訓下好過喇。

    回覆刪除
  65. 好多零食都食過, 哈哈!~
    我都好想知間勁辣魚蛋去咗邊, 好懷念呢!~
    * 超市唔畀影相架, 有次見到有個人影相畀職員話!~

    [版主回覆10/26/2012 22:24:00]
    我完全冇畀人話過喎!

    [joan.小雲回覆10/26/2012 22:34:00]
    咁咪即係你好彩囉

    回覆刪除
  66. 你的到來....使我甜思思樂滋滋....謝謝你狂小子

    回覆刪除
  67. 牛仔片好好味!!不過真係好多味精!!
    [版主回覆10/26/2012 22:13:00]
    冇錯。

    回覆刪除
  68. 嘩, 豐富到吖, 好勁呀!

    回覆刪除
  69. 好多款我都中意食呀

    回覆刪除
  70. ohhhh我都好鐘意食鳳仙!! 但依家更鐘意食軟雪糕 :P
    [版主回覆10/26/2012 22:09:00]
    我以為妳係鐘意唱添!

    回覆刪除
  71. 哈哈貓咪好cute ar

    回覆刪除
  72. 琳瑯滿目的零食令人眼花瞭亂。有的是以前的至愛。現在也一樣。

    回覆刪除
  73. 除了街邊小吃,我只愛:啫喱!

    回覆刪除
  74. 超市可以影相嗎?
    [版主回覆10/26/2012 21:46:00]
    唔可以,不過冇人話我我咪照影囉!

    回覆刪除
  75. Time Is Changing你細個個樣真係好Q。
    [版主回覆10/26/2012 21:43:00]
    細個好cute,大個好招!

    回覆刪除
  76. 紙包蛋糕...蕃茄味薯片....
    棉花糖...煨魷魚...碗仔翅...
    韮菜豬紅..蜜汁豬肉乾..
    富豪雪糕...看見就吃一筒...山渣餅....常買。
    紙包蛋糕/看見就買=幾好。
    朱古力=各項都常買。雪糕和雪條...記起就買。
    家中好多小吃。熱氣/會剩...
    尤其是很多小餅/今天是很多品種- - -
    多了多間....有看- - -冇買。我唔吃....新品種。
    雪過的食物...我多不吃....
    我少吃街的食品/除炸的小吃.....
    我認為死的食品是有屍毒。
    好多小吃都會試.............晚安- -祝健康
    [版主回覆10/26/2012 21:42:00]
    我現在也節制了。

    回覆刪除
  77. 以前在紅屋留下不少腳毛, 哈!

    回覆刪除
  78. 原來你見過尊龍嗎..貓貓!
    我好鐘意睇佢個套末代皇帝溥儀的..做得好好..好有巨星氣質!
    [版主回覆10/26/2012 21:41:00]
    佢好有貴氣。

    回覆刪除
  79. 嘩! 你介紹嗰d 全部都食過喎...我諗係正常囉.....
    話時話 CO CO 瞓得好甜呀!
    [版主回覆10/26/2012 21:40:00]
    張床一向都係個衰仔霸先㗎啦!

    回覆刪除
  80. 咁多?我些我都食過!

    回覆刪除
  81. 咁夜睇呢篇blog,真係邪惡...好想食呀~
    你係咁影超市零食相,唔知其他人見到會唔會以為你係「格價專員」呢?haha~
    [版主回覆10/26/2012 21:38:00]
    唔怪得我影咗咁耐都冇人話過我啦!

    回覆刪除
  82. 你講得啱!領𠥔正仆街,好撚柒嘔心!

    回覆刪除
  83. 你兼職做格價人員?
    [版主回覆10/26/2012 21:37:00]
    No la!

    回覆刪除
  84. 。。。I love花街朱古力 嘉頓朱古力手指 雪芳蛋糕。。。^^。。。
    [版主回覆10/26/2012 21:36:00]
    朱古力手指,正!

    回覆刪除
  85. TIC你好!謝謝分享!
    令人回味無前窮的美食/零食!
    有人說:"常吃香口膠,可保牙齒健康!究竟係真唔係真?"
    [版主回覆10/26/2012 21:35:00]
    我自己就唔太信。

    回覆刪除
  86. 鳳仙!雪糕 芒果餡,真係令人愛不釋口呀!~
    琳瑯滿目的零食令人眼花瞭亂。有的是以前的至愛 .......

    回覆刪除
  87. 有冇食過一排6粒 , 但叫三粒糖呀
    [版主回覆10/26/2012 21:34:00]
    應該冇呢!請問有沒有圖看看呢?

    回覆刪除
  88. 早晨:你好! 韮菜豬紅..唔錯...以前經常買來吃....現在少吃...
    [版主回覆10/26/2012 21:33:00]
    我都係!

    回覆刪除
  89. 白月兔子_冰糖2012年10月26日 上午8:42

    奶咀糖~我細個果時~d人叫介子糖~~!!
    =w=不過~仲有南乳餅都好好食ar!
    [版主回覆10/26/2012 21:32:00]
    南乳餅,未食過添!

    回覆刪除
  90. 蜓子...................2012年10月26日 上午10:25

    我好少食零吃..........
    [版主回覆10/26/2012 21:31:00]
    咁妳一定好fit!係咪?

    回覆刪除
  91. 你呢個零食篇好正呀~~ 勾起左好多童年既回憶﹗

    回覆刪除
  92. 雪糕車富豪雪糕,唔好食,又貴。
    [版主回覆10/26/2012 21:27:00]
    我認同富豪雪糕真係唔係十分好食,不過佢帶畀我哋嘅回憶真係好多。

    回覆刪除
  93. 以前細個時還會吃點零吃,現在就甚少甚少會吃零吃。
    [版主回覆10/26/2012 21:27:00]
    我都節制咗!

    回覆刪除
  94. 煙仔朱古力,細個食完佢最鐘意戴住佢黎扮超人。

    回覆刪除
  95. 芝士味時時食, 衣加食緊!
    大蝦沙律, 以前80年代,大會堂餐廳最大碟夾好味, 龍記也好, 不過貴!
    [版主回覆10/26/2012 21:25:00]
    而家啲大蝦沙律全部都係等於以前嘅mini版!

    回覆刪除
  96. 好懷念 [sosad] [sosad] [sosad] [sosad]
    珍珍牛仔片我到依家都好鐘意食:P
    [版主回覆10/26/2012 21:23:00]
    我冇食好耐了!

    回覆刪除
  97. 彩斯乳酪糖:P
    近排仲出埋軟糖,都好正#good#
    [版主回覆10/26/2012 21:23:00]
    軟糖我都係鐘意食能得利。

    回覆刪除
  98. 我試過煮老母麵黎食[sosad]
    分享下我之前食過既感受[sosad]
    煮完黎食之後真係好想跳樓
    因為老母麵煮完之後,係臭架[sosad] [sosad] [sosad]
    [版主回覆10/26/2012 21:21:00]
    煮媽咪麵?諗到都驚!

    回覆刪除
  99. 巴打睇黎大家都係同期應該#good#
    我既最愛
    乖乖
    圖哈多
    爆炸糖
    4方德國可樂糖
    2條包裝既炸物,我愛咖哩味
    戒子糖 奶咀糖 唇膏糖
    時興隆X魚絲 (好很貴)
    [版主回覆10/26/2012 21:20:00]
    我一直以為你係中學生!

    回覆刪除
  100. Time Is Changing經歷左好多時代既變遷....嘻嘻.....

    回覆刪除
  101. 嘩,你幾乎乜零食都食過.

    回覆刪除
  102. 好衰ar你~~人地減緊肥ga ma~~

    回覆刪除
  103. 加菲口既朱古力,絕版多時,
    但佢口既卡通片而家繼續有,
    係每逢星期一下午,不過係返工時間冇得睇.
    我想知口係山1崎買一個'多啦A夢' 啪3豆沙包盛惠多少元`?
    [版主回覆10/26/2012 21:18:00]
    張相我轉載U Food的,所以不太清楚呢!

    回覆刪除
  104. 午安小子,我年紀唔細,比較小食垃雜野.
    [版主回覆10/26/2012 21:19:00]
    講笑咩?山sir你咁fit!

    回覆刪除
  105. 你家寶貝又肥美左咁喎!

    [版主回覆10/26/2012 21:16:00]
    我一向好節制佢,係我老豆成日寵壞佢!

    [吉孖媽回覆11/04/2012 22:19:00]
    健康米得囉!

    回覆刪除
  106. 鳳仙都係我童年回憶!

    回覆刪除
  107. \(◕‿-^。)/BLOG留言通知信發送方式,如下:
    (1)系統設定該則網誌當有用戶
    「首次留言」Blog主才會收到
    (2)該則網誌「Blog主」
    首次回覆留言者,該留言者才會收到
    若「Blog主」或「留言者」再次於該
    「相同網誌」中回應內容,
    則系統不會再寄送留言與回應通知信
    ,不便之處、敬請原諒 @@

    回覆刪除
  108. 樣樣都係經典!!!!!!!!!!
    好有心機啊樓主
    特登去影晒全部?!
    [版主回覆11/04/2012 15:42:00]
    不!有些相片是轉載的。

    回覆刪除
  109. 域 流亦詩 Louis Rick2012年10月27日 上午12:33

    連BB糖都有、認真佩服。各類食物都能反映出一種時代感。謝謝分享。週末愉快!

    回覆刪除
  110. 甘大枝、萬里望花生、汽水糖、蛋撻、香蕉榚、叮叮糖、
    珍寶珠、鴨仔豆、印水紙、吹波膠、雞仔餅、米通、肚臍餅.

    回覆刪除
  111. 一樣又一樣的零食,全是童年時代的至愛。

    回覆刪除
  112. 你呢篇blog真係無得輪, 一見到個topic即刻想入黎搵返我既童年

    回覆刪除
  113. 仲有喜歡的旺寶雪條.
    [版主回覆11/04/2012 15:46:00]
    我屋企仲有一條喺度!

    回覆刪除
  114. 皮禮士糖簡直經典, 你全部儲起哂!?
    仲有唧唧冰, 白兔糖, 眼鏡糖.....陪住小黃大, 哈哈!
    真巧合, 買左爆炸糖, 一路擺埋一邊,
    一個月後就出低俗喜劇先記得佢!
    [版主回覆11/04/2012 15:47:00]
    唔係!嗰張相係轉載的。

    回覆刪除
  115. 估唔到阿你會喜歡食零食。。
    看了一整篇。我覺得你簡直是零食界的暴龍。。哈哈

    回覆刪除
  116. 珍貴的不是圖片,是童年過往的回憶。
    [版主回覆11/04/2012 15:48:00]
    對。

    回覆刪除
  117. 小食我最愛章魚丸,いちばん!

    回覆刪除
  118. .......... _.;_' .-._.... _.-.'_;._
    ..........{`--....-.'_}{`--... -.'_ }
    ..........{;...,__...-'}{;..., __...-'}
    ............`'--.._..-.'`-`'-- .._..-.'`
    ...................\\......... //
    .....................\\ .....//
    ..................../_\\ //_\
    ...................(_,-}={-,_)
    .....................\_//||\_/
    .......................//..\\
    ......................(/....\)
    週末偷快喇time is changing S(^-^)/////////
    見親你都有好嘢分享,查實你係xx後嚟

    回覆刪除
  119. 我就係最鐘意食珍珍薯片送beer

    回覆刪除
  120. Wa~~~DiDi~~~你呢篇會害死好多減緊肥ge人~~~

    回覆刪除
  121. i love 皮禮士糖

    回覆刪除
  122. 晚安好謝謝你 ,祝你開心健康快樂

    回覆刪除
  123. 貓咪比你講到瞓左教

    回覆刪除
  124. 好多款零食都好好味道呀

    回覆刪除
  125. Superlemon真係酸到仆街!

    回覆刪除
  126. 早晨你好謝謝你到訪, 祝你假日開心快樂

    回覆刪除
  127. 你搞到我好想食~~

    回覆刪除
  128. 好多野食,都有很多回憶!!

    回覆刪除
  129. 晚安呀.....祝健康...。

    回覆刪除
  130. 你好啊!我想問下呢..
    個arnotts shapes pizza味 香港邊到仲有得買啊??
    我細個勁鐘意食.. 但大個搵唔番 >< 可以幫幫手嗎?
    [版主回覆10/29/2012 01:34:00]
    大型的百佳應該都有,我是在馬鞍山的一間百佳買的。

    回覆刪除
  131. 你很好此道. 全部有吃過但不是FAVOURITE,
    反而喜歡吃臭豆腐, 那檔灣仔想吃時有關門.
    旺角那間就好似不再太臭. 水準下降

    [版主回覆11/05/2012 20:16:00]
    我最怕就是食臭豆腐了!

    [桂花與桂英回覆11/18/2012 21:47:00]
    哈哈. 我是全港去追回來吃

    回覆刪除
  132. 好齊全!thx for refreshing memories : D

    回覆刪除
  133. 可樂糖同大白兔都係我至愛 ^0^/
    當然唔少得kinder出奇蛋, 可惜轉左樣喇 /w\
    細個好中意食牛仔片同熱浪, 珍珍, 依加怕熱氣哈哈~ :p
    [版主回覆11/05/2012 20:19:00]
    而家出嗰啲Kinder出奇蛋好難食!

    回覆刪除
  134. 好多我都唔識, 證明我係老餅

    回覆刪除
  135. 呵!原來你甘為食的 , 甘到現在還剩牙多少?
    小時阿媽話食零食会甩牙, 甘就無買俾食啦, 除了去剝牙有雪條食之外
    [版主回覆11/05/2012 20:23:00]
    其實而家已經少食咗好多喇!

    回覆刪除
  136. 画画的紅豆--Adzuki2012年10月30日 上午12:49

    正喎~好味道!!

    回覆刪除
  137. 可以做個朋友嗎
    [版主回覆10/30/2012 14:40:00]
    好啊!

    回覆刪除
  138. 我都記得箭牌香口膠,真係甜到痺架!
    [版主回覆11/05/2012 20:24:00]
    哈哈!係呀!

    回覆刪除
  139. 你係男定女?幾歲?@@我見你好像勁中意食零食,我都係:)
    [版主回覆11/05/2012 20:28:00]
    我係男人!

    回覆刪除
  140. 呢篇網誌,老友係唔係一路寫,一路食?

    回覆刪除
  141. 哈哈,我以前好中意食話梅,甘草檸檬, 加應子架。

    [火鳳凰自言自語回覆11/04/2012 17:12:00]
    哈哈,好中意食埋的鹹濕涼果架。

    [Mia回覆11/05/2012 01:00:00]
    真的好好味架!

    回覆刪除
  142. Morning, Time-is-Chaning^^
    Happy Halloween^^
    Thanks for sharing those 零食 wor...

    回覆刪除
  143. 嘩,你的圖片引起我的零食欲念....
    你列出來的,十之有九我都喜歡食,冰條細個時記得有一隻係士多自製的....
    仲有,街上小販推的那些格格車仔,一格一種零食,最鐘意食魚條....
    仲有一串串的沙嗲.......大白兔糖、煙仔糖...
    細個覺得煙仔糖好fancy,不過唔敢買...二寶我覺得超好食............

    回覆刪除
  144. 哈,我好同意你最後一段話
    細個時,有幾毛子買一排飛碟糖、一包蝦餅都開心好耐...
    而家我同老大,有時去街會買一杯雪糕一路行一路食,一樣好開心
    雖然人大了,要一次過買一二百蚊零食唔會覺得肉赤,
    但係原來買少少來食,開心度更高....小食多滋味

    [版主回覆11/05/2012 20:35:00]
    而家啲零食就嚟貴過正餐㗎喇!

    [busueyip回覆11/05/2012 21:07:00]
    買番舊屎那些,應該會平D...
    零食物語那類日本零食真係好貴....
    一盒細細盒朱古力分分鐘二十多元

    回覆刪除
  145. wa @@ 好豐富,有不少小時愛吃

    回覆刪除
  146. 全部都有食過,仲有眼鏡朱古力和乖乖

    回覆刪除
  147. 天氣涼了, 保重身體

    回覆刪除
  148. 晚安安....我出了幾個網誌...來比比意見

    回覆刪除
  149. 狂小子,皮禮士糖,久違了,週日愉快!

    回覆刪除
  150. hello~~~hello~~~我回來了~
    你上面講哥d超市零食我都有食過呢~~~
    [版主回覆11/05/2012 20:39:00]
    Welcome Back!

    回覆刪除
  151. 加菲朱古力?我咁鍾意加菲貓都竟然唔知有D咁嘅朱古力!
    [版主回覆11/05/2012 20:42:00]
    有呀!不過好快就停產咗!

    回覆刪除
  152. 按圖吃一次,
    都要頗多時間呢。
    .
    軟糖同橡皮糖食到尾黐牙,
    就要擺另外一粒或幾粒入口「黐」番出來,
    真係冇得停。
    .
    由零食講到
    快樂嘅深層意義,
    好野。
    其實食多 d 就會明。
    [版主回覆11/05/2012 20:41:00]
    食得是福呢!

    回覆刪除
  153. 紅屋餐廳有兩間! 其中一間近克街, 當時首創24小時西餐雀局!
    [版主回覆11/05/2012 20:38:00]
    厲害!咁都記得!

    回覆刪除
  154. 零食...我鍾意熊仔餅及卡樂B呀............

    回覆刪除
  155. 師兄!><
    果隻ARNOTT'S
    SHAPES Pizza味邊到仲有得賣啊><??

    [版主回覆11/07/2012 10:57:00]
    一些大型百佳應該都有!

    [Taz Fung回覆11/10/2012 22:11:00]
    哦!! 我試下搵下先!! 麻煩哂你=) 順帶一提
    若然你得閒經過見到有 麻煩講過地址黎聽下啊=] 跪謝

    回覆刪除
  156. 以上小吃,我唔試,魷魚机的產品,我喜愛..色香味全。快拾年,再看不見。
    以上小吃,像條形的,我當是化學的食品=我不買。...栗子未見這牌子。
    晚安...祝愉快

    回覆刪除
  157. 哈! 哈! 呢篇真的勾起我很多回憶啊! I Missed those 零食!

    回覆刪除
  158. 我終於可以上網. 我屋企有電, 但上星期唔可以上網同睇TV.
    我現在network back to normal, 但唔知會唔會stable?
    可能又上唔到網, 現左出面落大雪....
    Wow............... oh...man...
    I wish I can come back to eat,
    you made me feel crazy for the snake!

    回覆刪除
  159. 食BB糖先吹一輪哨子.
    你漏咗水泡餅喎, 咬落冇乜味道得成口粉嗰隻.
    [版主回覆11/09/2012 08:19:00]
    係喎!

    回覆刪除
  160. 你要快啲出過篇新嘅,我部老爺機仍然睇唔到你新的一篇啊!
    [版主回覆11/16/2012 19:03:00]
    OK!

    回覆刪除
  161. 勾起很多回憶~
    兒時拿起包支鄰居送的朱古力煙仔來扮大人,
    父母也被我騙到呢,以為我真的吸煙

    回覆刪除
  162. 哈哈!搬紙過字,覆印一篇,也是我的零食篇‧

    回覆刪除
  163. 咁樓主有收集開皮禮士糖盒架@_@?
    [版主回覆11/16/2012 19:02:00]
    不!張相是轉載報章的!

    回覆刪除
  164. 彩的一篇blog, 好好心機呀! 仲比我想番好多童年回憶!

    回覆刪除
  165. Your article is, as usual, very detailed, comprehensive, and engaging.
    I do love snacks! I always bought Roller Coaster when I was in P6.

    回覆刪除
  166. 有半數都係小朋友小時候愛吃的

    回覆刪除
  167. 那出奇蛋, 甜到震, 初接觸已不愛.
    仲有一種筷子糖, 係硬身的,
    後來因為會啜得好尖, 怕刺傷人, 小學禁止我們吃.
    [版主回覆11/16/2012 19:00:00]
    Kinder出奇蛋其實一D都唔好食!

    回覆刪除
  168. 好懷念山楂餅, 記得係睇中醫一定有
    [版主回覆11/16/2012 18:59:00]
    Yeah!

    回覆刪除
  169. 殷師奶 HeBi Yuen2012年11月12日 上午1:09

    媽咪麵真係好經典~~好多款都食過,
    不過家下年紀大唔能夠食太多
    睇見咁多零食都好開心~~開心可以好簡單
    [版主回覆11/16/2012 18:58:00]
    我都少食咗!

    回覆刪除
  170. 正呀!好多童年回憶,紅屋加我鐘意食的發達糖!

    回覆刪除
  171. 你好有心機, 真係好多零食呢!
    我鐘意綠箭, Kinder出奇蛋,眼鏡朱古力, 樂天熊仔餅 …….
    (其實多到數唔灑) 睇完好想去超市買d番屋企食 ^^

    回覆刪除
  172. 嘩, 真係有太多選擇啦! 眼都花埋...
    樣樣都係伴著我長大的...零食呀!
    YumYum... 忽然覺得很幸福呢,
    因為有很多孩子都沒有機會試過這些零食呢!

    回覆刪除
  173. 好多都食過哈哈哈----所以我咁肥
    講得啱,小時快樂就是這麼簡單

    回覆刪除
  174. 重有花塔餅...肚臍餅

    回覆刪除
  175. 許多也是小時候吃過的!很懷念啊,大部分都已經很久沒吃過了。

    回覆刪除
  176. 一支支色彩繽紛係叫水吱~~ 冰左唔好食~飲好味~

    回覆刪除
  177. 無敵的介紹!!

    回覆刪除
  178. 個間勁辣魚蛋搬咗去花園街街頭(定街尾?), 近旺角方向, 八珍甜醋對面!
    [版主回覆05/08/2013 22:41:00]
    thx。

    回覆刪除
  179. JAGABEE好像比台灣便宜耶?港幣十元=>>台幣四十 (ㄅ過在台灣要賣50元上下!)
    我哥超愛吃印尼泡麵(用煮ㄉ) 因為我哥ㄉ老婆是印尼人~ ~
    我是1980生 所以沒聽過尊龍 只知道李小龍跟成龍
    [版主回覆05/08/2013 22:42:00]
    尊龍代表作 - 未代皇帝溥儀

    回覆刪除
  180. Oh my goodness, I always like your movie/concert review, but this is by far my favorite! My husband calls me a snack queen! I can eat snack for dinner! Guess we're probably from the same generation as many old ones are the one I recognize! Thanks for sharing this and it really makes me so happy just by looking & reading this!

    回覆刪除
  181. 你呢篇真係正〜勾起好多童年既感覺〜
    我細個仲好鐘意大咀鳥朱古力,入面仲有大咀鳥玩具送〜
    仲有款雪糕杯,入面雖然得一半,
    但另一半係放左個公你玩具。細個超開心!有得食有得玩!

    回覆刪除