《大鈍裁者》看後感：賤人賤到痺，勁過抽濕機！～

前幾日睇嘅戲，到而家先有時間寫吓睇後感，

本來當日同女朋友去戲院係一心諗住睇《MIB3》嘅，
點知去到後來兩兜友思前想後，就忽然想〝轉馱〞睇吓呢齣騎呢嘢。

第一擊《波叔出城》風趣幽默又夠格，簡直係笑到我肚攣；

第二擊《波兒出城》低俗兼核突，我都頂得住，仲叫做笑得出。

嚟到第三擊《大鈍裁者》，老老柒柒，喺入場之前我係完全冇期望㗎！～
諗住佢都係求其胡鬧一番，然後大家咪笑到隻閪咁就完場散band，
但勢估唔到睇完之後又確係有啲驚喜喎衰鬼！～
冇諗過呢齣嘢仆街得嚟又幾抵死，抵死得嚟又帶到啲meaning出嚟。

老友老友～下面有劇透，有粗口，想睇就埋嚟，唔睇就早抖！～（設計對白）

相比起上兩輯「波叔系列」，《大鈍裁者》啲笑料雖然冇咁密集，但就較為大眾化少少，

冇上兩輯嚟得咁重口味，我自己就好鍾意戲裡面嘅三個爆笑情節，
一係波叔喺間餐館度因為怕畀佢啲仇家認出，於是係咁「看圖作名」；
二係佢喺飛機度同佢個手下對住一對美國夫婦亂鳩咁噏，
殊不知噏吓噏吓就唔覺意噏咗啲同911口音近似嘅相關字，仲畀人當係恐怖份子拉鳩咗；
三係佢幫個大肚婆接生嗰陣無啦啦〝職業病〞發作，
一見到個大肚婆隻〝鮑魚〞就嗱嗱淋除褲拎佢支〝私家棍〞出嚟想隊入去，
跟住又失驚無神向個女人逼供，當知道生出嚟嗰個係囡囡，就即刻想叫人掟咗佢！～XDXDXD～

以一套胡鬧片嚟講，呢齣嘢都算得上係陣容鼎盛，可以話係「星光熠熠耀波叔」。

曾經憑《甘地傳》一片贏得第55屆奧斯卡影帝嘅Ben Kingsley，今次喺戲裡面就會飾演一個大反派。

鍾意睇《Scary Movie》系列嘅朋友，對Anna Faris呢個癲婆應該都唔會感到陌生，
呢次佢喺戲度會飾演一個格甩底長滿黑森林，仲成日畀波叔話係佢戴住個死人假髮扮Justin Bieber嘅矮腳侏儒。

John C.Reilly呢條肥佬喺2012年真係肥過肥仔水喇！～
無論係擔任主角、配角定客串，喺好多套電影入面，我都總係會見到佢嘅蹤影。

嘩～連性感尤物Megan Fox都有？加上Edward Norton同亞諾舒華生力啤嘅「特別演出」，
只係幾廿蚊張飛直頭係抵到爛啦（雖則我係唔使畀錢買飛嘅……）！～

波叔一向愛抽水，今次亦唔例外，由奧巴馬、拉登到金正日……

一路抽到娛樂界嘅佐治古尼同Katy Perry，實行抽盡全宇宙，笑到你作嘔，
尤其係佢喺片頭送畀金正日嘅一段短片，更加係睇到全場觀眾拍爛手掌。

鳩噏咗咁耐，咁查實套嘢究竟係噏乜春嘅呢？各位不如就開包粟一燒再慢慢睇落去啦！～

呢套嘢主要係講由波叔所飾演嘅非洲油國獨裁者Aladeen為人霸道又自私，直程惡撚過共產黨，
任何人只要有小小嘢逆佢意，佢就會立刻落order叫人〝搞掂〞你。
除此之外，佢又要國家大部分嘅嘢都要以佢個名嚟到命名，
即係你去醫生度睇病，個醫生就會同你講：「朋友你定啲嚟～你只係感染咗Aladeen！～」
哈哈～係咪好誇張呢？咁都唔只呀！佢仲離譜到要全國廿四小時不停播放由佢主演嘅電影同電視節目，
所有運動比賽同頒獎典禮，到頭來只係一場自編自導自演嘅私人Solo。

呢幾段荒謬到暈嘅情節，就不禁令我諗起北韓呢個國家，
北韓人民長期受到政府嘅「洗腦式教育」影響，搞到佢哋成班人都冇晒思想，
講真嗰句呀～有時喺電視新聞度睇到班市民嘅〝誇張行徑〞，自己都會忍唔住笑咗出嚟，

但與此同時，個心又會默默為呢班困住喺個籠度嘅無知婦孺感到嘆息。

至於Aladeen要人哋夾硬將啲獎頒晒畀佢嗰一幕，
就立即令我諗起香港嘅特首選舉同一啲電台、電視台所搞嘅樂壇頒獎典禮，
話之你支持AV仁、狼振英定唐英廉呀～你鍾意投白票又好，黑票又好……
理得你叫晒啲兄弟姊妹、姨媽姑姐同叔伯兄弟去投阿醫神做亞皆老街最受歡迎男歌手啦！～
總之入圍名單，由佢控制！投票結果，任佢鳩噏！邊個攞獎，由佢話事！～
卒之睇嗰個又辛苦，攞嗰個仲辛苦，吓？乜你唔喜歡呀？咁咪唔好撚睇囉！問你死未？

講到呢度，又引申到另一個問題，就係一個國家係咪只要擁有足夠嘅自由、民主同人權就一定會好呢？
我唔知道其他人點諗，個人就覺得，無論係乜嘢地方都好，都唔能夠畀啲人有過份自由同埋冇晒制度，
好似喺《大鈍裁者》裡面Zoey（Anna Faris飾）間舖啲員工咁，
偷懶嘅偷懶，hea做嘅hea做，有啲仲衰到〝穿櫃桶底〞，
我諗如果唔係多得Aladeen立心去實施一啲嚴厲嘅管理制度嘅話，
班員工就肯定會一路咁樣錯落去，到最後，呢班冗員仲可能會連累埋成間公司。

有時候做人咪就係咁鬼矛盾囉！畀你爭取到平等，但同時又攞唔返個平衡，
喺度同你哋講個親身經歷呀！四年前小弟喺一間大型戲院入面做projectionist，
呢間公司就最鍾意請埋啲智商或者係精神有問題嘅人入嚟做嘢，
你話佢哋係咪好好心地呢？梗係啦！呢班人嘅人工足足低過我哋成一半有多呀陰功！～
喂喂喂～乜你份人咁Q衰格㗎？好似喺度歧視人哋咁！～
我可以舉高三隻手指對住燈火講：本人從未歧視過任何一個同事，
只係有時有啲嘢唔得就係唔得，並唔係話你畀心機同搏命做就會成功，
每日教佢哋點樣上好一套片，轉頭就唔記得，教足一年都仲要日日夜夜輪流同班友〝執手尾〞，
今日同你玩上錯菲林，聽日幫你扭轉支鏡頭，失場退飛通通都係等閒事！好～咁都算啦！～

更離譜嘅係，呢班心口掛住免死金牌嘅VIP只要衰親啲乜，個鑊反而就會由班正常員工去孭，

平心而論，呢種只求收割光環罔顧他人感受嘅做法又公唔公道先？

或者又換一個講法呀！近幾年中港台三地咪又興返嗰啲乜乜歌唱／才藝比賽嘅，
咁通常入面就一定至少會有三至四組嘅參賽者係一啲毛都未出齊嘅細路哥，
你哋問心呀～有啲細路明明係唱得好Q難聽兼且跳得勁鬼肉酸㗎！～
之不過，正因為佢哋係小朋友，大家就必需要包容佢哋！～
「你唔可以咁快foul咗佢哋㗎！咁樣做會傷害班小朋友嘅弱小心靈！～」
就係咁妳一句我一句，呢種無形嘅壓力，往往就會令到班評判左右做人難，
既然係咁，點解電視台方面又唔索性整一個小童組嘅比賽出嚟呢？
打拳都有分輕量級同重量級啦！讀書都有分幼稚園、小學、中學同大學，
你吓吓迫啲大人同班細路仔隻揪，認真去睇都真係幾肉酸吓！～

講開又講，唔知你哋仲記唔記得……

有一年，梁朝偉喺康城影展爭影帝輸咗畀個年僅14歲嘅日本小演員，
返到香港之後，一向脾氣唔錯嘅偉哥竟然就一反常態咁話：
「我真係好失望！最初我以為Geoffrey Rush先係我勁敵，最後居然輸畀個小朋友！
小朋友有乜演技呀？我演技未至於出神入化，但都算係爐火純青呀！」
此話一出，隨即引起全城圍插，當時有好多人都鬧梁朝偉，

話佢冇風度兼小鳩器，咁大個人仲喺度恰細路，
但諗深一層，偉哥咁氣頂都係情有可原嘅，堂堂影帝輸畀個細路喎大佬！～

俗語有云：針冇兩頭利，正所謂「順得哥情又失嫂意」，
更何況係做一個國家領導人，世事有好多嘢，真係唔係我哋想像中咁簡單。

嘩～無端端扯到冇雷公咁遠！馬上又講返齣戲先！～
當一個殘暴不仁嘅獨裁者失去晒一切權力，其後仲流落到一個非常陌生嘅地方，

喺呢種情況下，呢位暴君又會唔會因此而變得溫和些少呢？
睇到戲入面Aladeen流落美國街頭嘅呢一幕，我腦裡面就突然間浮現出一個疑問……
大家試諗吓！如果～係如果咋！如果拉登未死嗰陣畀人剃晒啲鬚同剪短咗把頭髮，

仲身無分文喺旺角街頭度四圍騰，喺嗰一刻，你可能只會當咗佢係一個曬到黑古勒突嘅吳啟華，
喺呢個時候，拉登個人會唔會變得冇咁邪惡我就唔敢講喇！～
我淨係知道，一個冇財冇勢又冇晒鬍鬚嘅拉登，真係搵鬼驚你咩！～

所以話呢！作為一個leader，行出嚟個勢確實係好緊要，
好似前英國首相戴卓爾夫人咁（前排睇咗梅姨套《The Iron Lady》……），
佢在任嗰陣經常都同啲工黨打對台，最終搞到兩敗俱傷，仲一度令英國經濟陷入低潮。

根據某啲報道所講，其實戴卓爾夫人好多時都知道自己有啲決定未必一定係啱晒，
但係為咗要堅守個人立場同埋想保住個勢，先迫住要〝死雞撐飯蓋〞，一於就輸人唔輸陣。

ami，vous avez raison～你完全講中晒我嘅心聲！～（設計對白）

計我話～呢個世界根本唔會有一個領袖係冇人反對佢嘅，
事關每個人把尺都唔同，就算強如國父孫中山都有好多鮮為人知嘅黑歷史啦！～
係呀～佢係推翻滿清呀！但係佢試過搞過一個未夠秤嘅妹妹仔喎！～
咁唐朝第二位皇帝唐太宗李世民呢？佢係中國史上公認嘅好皇帝喎！～
之但係，佢為登皇位而射殺親生大佬一事，喺史書度亦都有記載落嚟，

但另一方面，喺佢在位期間，社會就國泰民安，個個都豐衣足食，
咁佢都仲唔稱得上係一個100分嘅好皇帝？唔係吓化～
「喂～唔係喎！佢監生殺咗個阿哥又囚禁個老豆喎！唉～總之我就唔理啦！
呢個李世民個心腸咁狠毒，就點都唔會係一個好皇帝嚟㗎喇！」
我相信，全香港有九成嘅老母都會咁樣答你。
好～重點嚟喇！我知……殺自己大佬梗係唔係好……妖～直頭就唔撚係人添啦！～
不過又話分兩頭，乜有人講過身為一個成功嘅好領袖就一定要做盡好事㗎咩？

喺二戰期間屠殺600萬猶太人仲有「希魔」之稱嘅希特拉，
係一位眾所鳩知嘅獨裁者，但就依然有好多人推祟佢嘅嗰一份納粹主義同埋忠心為國嘅精神。

我深信就算係拉登、毛澤東、鄧小平、布殊同薩達姆，都一樣會有自己嘅忠心fans，
我認為，只要個領袖係夠guts嘅，就必然會有人支持佢，
你話學似腥港班高官咁冇撚用就話啫！正一係劉天王話齋：
「講你又唔聽，聽你又唔明，明你又唔做，做你又做錯，
錯你又唔認，認你又唔改，改你又唔服，唔服你又唔講～」

耶～～唔制呀～～你話人！唔準講真話！再講我就話畀媽咪知！～（設計對白）

妖～～都唔係話你！你呢期out咗㗎喇！麻煩過主啦唔該！～

我想哭但是哭不出來～等到思念像海～淹沒我而愛已不再～（設計對白） 

開講都有話「錯就要認，最緊要淡定」，喂阿哥～你唔認錯都唔緊要呀！～
為乜要整埋個喊苦喊忽十足屙屎唔出咁嘅衰樣畀我哋全港市民睇啫！～
屌～～你扮委屈我都算啦！但真係唔好眼屎都冇滴呀Donald叔叔！～
你家吓係咪想喺卸任之前拎返屆「金話梅影帝」留為紀念先？
妖～～你連扮嘢都扮得咁冇誠意，認真係盧海鵬試咪呀！～

總言之政治呢家嘢真係好撚黑暗㗎！～

我之所以成日避談呢樣嘢，係因為我清楚明白個社會本來早就冇Q得救，
同埋最重要嘅一點係，我最近識咗一個朋友，佢叫做愛迪生……
呢位人兄教曉咗我兩句金石良言，令我即時茅塞頓開睇通睇透，
佢話：「擺左擺右冇意思，天下烏鴉一樣嬌。」

吓？咁即係點呀？咁即係黑鳩炆炆，鏹水都洗唔甩囉！～

又講到冇雷公咁遠！你呢篇到底係乜嘢東東嚟？你依家係咪存心走嚟混吉㗎！喵～

 

咳咳～呢條傻佬永遠廢話多多，好心咁多位就專心睇片咪鬼啋佢啦！～

唉～真係服咗呢條友！成Q日都咁鬼長氣嘅！正宗係老人院都唔……Zzzzzzzzzz……