食在「紅磡」

而家喺出面食飯，有時都幾頭痕……
無論去到邊度，都差唔多要畀成四十幾蚊左右先食得到一個正常嘅飯餐，
早排有網民喺某知名論壇貼出一張《大家樂》嘅新餐牌出嚟，
其中有一個名為「金牌燒鵝髀套餐」就要成七十蚊先有交易，簡直係離撚晒大譜！

數數手指，我都有好多年冇去過D連鎖快餐店度食晚餐，
比如去《大家樂》，我都只係會幫襯佢哋個下午茶餐。
就喺前幾日，我經過公司附近間《大家樂》，
居然就畀我發現我食開嗰個「雞脾 + 紅豆冰茶餐」突然〝變相加價〞，
價格貴咗不特止，仲將杯紅豆冰轉埋做檸樂，真係頂佢個肺呀！

因工作關係，經常都會喺紅磡到處〝覓食〞，
上次推介完當地一間好有特色嘅車仔麵店，
今次又介紹下紅磡另一D平民化嘅抵食好去處畀各位啦！

大家好～我係你哋今日嘅靚女導遊 - 喵喵，就等我嚟帶咁多位去四處〝搵食〞。

朝早食D乜嘢好？不如先去啪返個豐富嘅港式早餐！

呢間位於紅磡黃埔街嘅《民食燒味漢堡茶餐公司》，係一間開張冇耐嘅新舖，
裡面所賣嘅茶餐同飯餐，味道合格之餘，價錢亦算合理。

想向大家大力推介呢《民食燒味》嘅「炒蛋茶餐」，

D炒蛋香滑夠大份，個蒜蓉包又好香脆，若果你唔鍾意食蒜蓉包嘅話，
亦可以將佢轉做厚多士，然後將D炒蛋同火腿夾埋一齊食，個口感仲正！
至於個叉燒通粉就不過不失，冇乜特別。
呢個〝大件夾好食〞嘅茶餐，價錢賣廿八蚊，都尚算OK，
唯一比較美中不足嘅地方係D火腿太過〝凍冰冰〞。

價值$28嘅腩仔飯，D腩仔都還算OK，但D飯就稍為硬咗少少。

《民食燒味漢堡茶餐公司》 

地址：紅磡黃埔街6號地下
電話：2766 3666
營業時間：星期一至日：11:00 - 22:00

各項評分（五個㊣為滿分）

食物質素：㊣㊣㊣㊣
抵食程度：㊣㊣㊣
服務態度：㊣㊣㊣㊣  
環境：㊣㊣㊣ 
衛生：㊣㊣㊣㊣

受女朋友影響，有段時間我瘋狂迷上食酸辣粉，貪佢夠醒胃，又能夠驅寒，

而講到食酸辣嘢，紅磡就有一間相當唔錯嘅舖頭叫做《川粵米線大王》。

《川粵》主要以供應麻／酸辣米線同紅薯粉為主，並採用車仔麵嘅模式等客人自選配料，

我自己就幾鍾意食佢哋個口水雞同埋紅薯粉，貪佢隻雞夠惹味，D薯粉又夠煙韌好咬口，
配料方面，呢度嘅蘿白、粵式腩肉同麻辣魚蛋都十分值得推介。

以前我成日都會嚟呢間嘢買外賣返公司食，同呢度D員工都算幾熟，
我覺得以一間人流算係幾多嘅食肆嚟講，《川粵》班阿姐嘅服務態度都稱得上係極之優質，

招呼周到之餘態度又好友善，就算係幾繁忙嘅時間都唔會見到佢哋黑口黑面，
仲會自動自覺幫你個外賣D粉同湯分開放添！

近排因為要戒口嘅關係，基本上我都有成半年冇去過《川粵》度食嘢，
儘管呢間嘢之前曾經傳出過「一滴香」事件，仲畀某D網民質疑佢喺D檸茶度落香精，
不過個人認為，出得街食飯，我就一向都係「冇眼屎乾淨盲」，
好老實講，市面上有好多食物其實都有落化學用品同埋嗰D乜乜素㗎啦！根本上就避唔到……
學我一個做廚房嘅老友話齋，D白雲鳳爪同牛柏葉咪又係用D雙氧水溝白醋漂出嚟！
D彈牙嘅牛丸呀～爽口嘅墨丸呀～絕大多數都係用硼砂打成嘅！
仲有香港人好鍾意食嘅麥當勞同即食麵，都係含有大量防腐劑，
計我話，除非係自己親手煮，唔係嘅話，出得去開飯真係唔驚得咁多，
全港大大話話有咁多間食肆，有D可能只係未畀人爆料唧！
如果下下都要驚，咁你返到大陸咪樣樣都唔使食？

《川粵米線大王》

地址：紅磡黃埔街22號地下
電話：2994 8871
營業時間：星期一至日：11:30 - 00:00

各項評分（五個㊣為滿分）

食物質素：㊣㊣㊣㊣ 
抵食程度：㊣㊣㊣
服務態度：㊣㊣㊣㊣㊣
環境：㊣㊣
衛生：㊣㊣㊣

朝頭早唔想食太多嘢又想搵D嘢頂下肚嘅話，

坐低食碗熱辣辣嘅魚蛋粉或者係雲吞麵就最好不過！
呢間位於紅磡必嘉街嘅《榮發粉麵專家》，係當地嘅一間三十年老號，
呢度時常都人來人往、客似雲來，事關有好多人都貪佢哋D嘢平平哋又幾好食。

特別推介《榮發》嘅鳳城水餃麵畀大家，雖然比唔上《麥文記》嗰種水準，

但就一定超越《好旺角》級別，而更重要嘅係，佢只係賣十七蚊碗咋！

另外都想讚一讚佢哋嘅魚蛋粉，聲稱D魚蛋係親手打嘅，
咬落去彈牙得嚟又幾有魚味，但個河粉就認真唔多掂，又粗又乾身。

個牛腩撈麵就尚算可以啦！喺冇湯底襯托之下，D鹼水味都幾明顯。

四年之內加咗三次價，但以整體嚟講，價錢都算係可接受水平。

《榮發粉麵專家》

地址：紅磡必嘉街88號
電話：2142 0918
營業時間：星期一至日：07:00 - 01:00

各項評分（五個㊣為滿分）

食物質素：㊣㊣㊣
抵食程度：㊣㊣㊣㊣
服務態度：㊣㊣㊣
環境：㊣㊣
衛生：㊣㊣㊣

我頭先都講過，家陣喺外面叫個普通飯餐，分分鐘要成四十幾蚊先至有交易，

好似某D茶記賣嘅嗰D所謂「經濟客飯套餐」，絕大部分都係搵鳩人笨柒居多，
即係碟餸就細細碟，碗飯就細細碗，咁就收人四十幾五十蚊，確實係好過去搶！

幸好，最近多得公司一位好同事介紹，
我就發現紅磡曲街嗰度原來有一間經濟又實惠嘅港式大排檔，

入面所賣嘅客飯套餐，正宗係大件夾抵食，完全係貨真價實。

四餸一湯，白飯任裝（呢個講笑咋～XDXDXD～），都只係二十七蚊，
而且D餸又嚟得快去得快，保證新鮮，但係我就略嫌佢D嘢落得太多油。

《錦記粥粉麵飯》

地址：紅磡曲街37號地下
電話：2330 7672
營業時間：星期一至六：10:00 - 13:00，17:00 - 23:00

各項評分（五個㊣為滿分）

食物質素：㊣㊣㊣
抵食程度：㊣㊣㊣㊣㊣
服務態度：㊣㊣㊣
環境：㊣㊣
衛生：㊣㊣㊣

話咁快就嚟到「紅磡覓食之旅」嘅最後一站，呢間快餐店我諗都唔使細佬再多作介紹喇啩！

《時新快餐店》喺紅磡呢區都算係出晒名㗎喇！喺openrice.com得到超過八百個好評，
個老闆印喺飯盒個標語仲好串咁話：「喺香港未食過時新漢堡包，點算係食過漢堡包！」

或者係我個人向來都唔係太好呢類快餐嘅關係，

所以我嚟《時新》嘅次數真係一隻手數得晒，
但可以同大家肯定嘅係，呢度D嘢食味道確係唔錯，絕對係值得推介。

《時新快餐店》

地址：紅磡黃埔街1A地下
電話：2362 1279
營業時間：星期一至日：06:00 - 21:00

各項評分（五個㊣為滿分）

食物質素：㊣㊣㊣㊣㊣
抵食程度：㊣㊣㊣
服務態度：㊣㊣
環境：㊣㊣
衛生：㊣㊣㊣

歡樂嘅時光過得特別快，又係時候講拜拜喇！
我係靚女喵喵……條仔夜貓子，拉閘！放貓！閃閃～886～

「妖～有好嘢食都唔預埋我～你點做人大佬㗎？」

死肥仔～好心你就減下肥啦！一日到黑淨係掛住食！

PS：部份照片是取自OpenRice.com。