王子歸位，強勢回歸！

2-0！冇錯！係2-0！我唔係發緊夢！我哋確實係贏咗車路士2-0！
利物浦又喺一致畀人睇淡嘅情況下爆發，贏咗相當漂亮嘅一仗，
平心而論，今場利記的確係打得好好，真係不枉我捱眼瞓都要睇足全場！ 

雖然計埋先前贏拿玻里、保頓同布力般，利記嘅連勝紀錄已經累積到四場，
但好老實講，若果淨係齋計對上贏嘅嗰三場波，其實真係唔算話贏得十分好睇，
不過今場對車仔，我就完全感受到紅軍全隊上下一心嘅嗰一份拚搏精神，
同佢哋之前死氣沉沉嘅表現相比，簡直好似判若兩隊咁！

今場成隊波都好努力，但係喺呢度我特別想讚讚幾位無名英雄！

第一個要讚嘅，係由加盟至今都一直畀我狂插嘅Lucas Leiva，

講起呢位球員，佢喺利記踢咁耐，我就插足佢咁耐，

冇諗過屌下屌下，就終於都畀我哋百屌成才，仲以一己之力搶贏晒個中場，

咁多年以嚟，利記都畀咗好多時間去培育Lucas，希望佢未來會越踢越好啦！

第二個要讚嘅，係我哋嘅「Mr.Duracell」Kuyt，
儘管係傷癒復出，佢就依然係貫徹始終搏到盡，全場走上走落，仲交出一個漂亮助攻，
呵呵～利記牌金霸王、鐵人18，果然唔係浪得虛名！

之後要讚嘅，仲有我哋嘅副隊長Carragher同埋門神Reina，
全靠副隊拚盡200%奶力加上Pepe嘅幾個世界級撲救，球隊先能夠幸保不失，
認真係估唔到，今場力抗Drogba嘅竟然係副隊，而唔係年輕力壯嘅Skrtel，
哈哈～實在多得副隊長搏晒老命，先至成功令到呢隻魔獸威力大減咋！

咁當然，除咗以上四位無名英雄之外，
喺今場表演非常稱職嘅後防新秀Kelly同埋球味十足嘅Meireles……
都為整隊利物浦帶嚟強大嘅士氣同動力。

至於今場嘅Man of the Match，就梗係最型仔嘅西班牙金童Torres啦！

上場贏歐霸，我哋全靠神奇隊長Gerrard，而呢場就輪到王子大發神威！
頭先睇住王子入第二球，我個心情真係異常咁興奮！
今季長期缺態，成日愁眉深鎖嘅Torres，喺開季有多場比賽嘅表演都係備受外界批評，
卒之嚟到今場，佢光芒四射嘅演出絕對稱得上係吐氣揚眉，一洗頹氣，
衷心希望王子可以keep住呢一團火，繼續越踢越有，士哥滾滾來！

哼～邊個再敢話王子係流㗎？王子就要剝你棚牙！！