長江7號（CJ7）

早排工作太忙，一直都冇時間認認真真去睇過呢套嘢，
今日見得閒，小弟就終於都買咗套戲嘅DVD返屋企慢慢欣賞。

星爺呢套《CJ7》喺之前畀人彈到九彩，
而當中批評得最多嘅，通常都係話星爺唔再好笑喇！
星爺走下坡喇！星爺技窮喇！星爺變質喇等等……

可能係因為星爺以往嘅喜劇作品實在係太經典，
所以大家總係會鐘意懷緬過去，但老實講呀～畢竟人始終都係會老㗎嘛！
正如我都唔會期望克勤到今時今日仲可以將「紅日」唱到好似以前咁朝氣勃勃，
認真㗎～我認為星爺今次選擇轉型，絕對係明智之舉！
喂～成四十幾歲人，唔通仲要扮廿幾歲後生仔哄人開心咩？
你哋睇下郭富城咁babyface而家拍戲都要接返啲燥底麻甩角色嚟做啦！
 
講返套戲，整體嚟講算係不過不失，成個故事非常簡單，
啲劇情仲易估過TVB啲劇集，總之笑料新意通通欠奉，
但係我自己就反而幾鐘意呢種返樸歸真嘅感覺，
講真呀～家吓啲港產片唔係妳搶我我搶你就係愛生愛死，
再唔係就成套戲喺度打打殺殺拼過你死我活，
去到近幾年，好似《CJ7》呢類適合一家大細去睇嘅親情片已經賣少見少！
嗯～勉強嚟計都仲有嘅！咪譚家明套《父子》囉！但有冇人夠薑帶埋個仔去睇先？

我覺得如果可以放低一直以嚟對星爺「無厘頭笑片」嘅期望，
咁《CJ7》都稱得上係一部唔錯嘅電影，至少套嘢簡單易明、有感動位，
又有好多正面嘅訊息帶到出嚟，亦充分反映到貧富懸殊呢個現實。
雖然喺戲裡面有好多劇情的確係普通過唔普通，但就依然有唔少令人眼紅噴淚嘅感動位，
例如係七仔為救周鐵而犧牲，同埋周鐵對個仔默默付出嘅嗰一份父愛。

其實我哋一眾星迷真係好應該畀返啲掌聲周星馳，
能夠勇於放低舊有風光作出新嘗試，並唔係容易嘅事，
雖則話到現時為止佢所拍嘅電影確實係存有好大嘅進步空間，
不過淨係勇於求變呢一點經已值得一讚啦！你哋話係咪？
 
再講，若果《CJ7》真係如外間所講係一套爛片嘅話，
咁嗰啲乜Q嘢《十分愛》、《我的最愛》又係啲咩嚟呢？
咪就係一堆比《古惑仔》更加荼毒青少年嘅垃圾狗屎電影囉！
喺工作上無可奈何睇過呢位鹹片大師孽大導嘅作品N次，嘩～簡直係大開眼界！
一個個灑狗血灑到無倫嘅劇本、一班爛到透嘅演員、
一堆既hardsell又爛gag到爆嘅低智對白，完全歪曲時下年青人嘅愛情觀念，
成日想學人哋《Love Actually》嗰種多線拍法又次次都眼高手低，
咁嘅爛片竟然都可以收成千萬？真係不得不佩服娛樂圈魔法師蔡寶奇柏高！

最後我想講，『情場如戰場，要愛就要搶』，設計呢句對白條友認真係無卵得再難頂！