2008年2月23日 星期六

誘心唔怕遲(I Could Never Be Your Woman)

剛剛喺公司睇完一套新片番嚟!
係由Michelle Pfeiffer主演嘅《I Could Never Be Your Woman》……
中文戲名叫做《誘心唔怕遲》哈哈~都譯得幾九唔搭八
 
呢套戲嘅劇情簡介:
年屆40的洛杉磯單親媽媽Rosie(Michelle Pfeiffer飾),生活上諸事不順:

她製作的電視節目《暴走少女》收視率下降、下屬心存不軌、女兒又進入反叛的青春期……
多年獨身的她,更遇上比自己小11歲的英俊新星Adam(Paul Rudd飾),
他的確是她的理想對象,但她搞不清這個男人是否真正愛她,
或只是利用她來在電視台上位?她是否得再次說一句「I Could Never Be Your Woman」?
 
估唔到套嘢又幾好睇喎!冇乜悶場 
好笑得嚟又有啲感動位!算係一套輕鬆嘅愛情小品。
哈~可能係因為套戲嘅劇情同我自己嘅感情生活實在係太相似啦!
所以有好多位我睇完之後都會有種回心微笑嘅感覺!
例如係女主角Rosie雖然年屆40不過就不失童真
…… 
而性格幼稚嘅男主角Adam就成日刻意扮成熟!
不過,當佢哋兩個人走埋一齊嗰陣又會好似一對小情侶咁!
男方一開始就已經懶理其他人嘅目光一心一意去愛女方
…… 
而女方就由一開始一見鐘情到中段開始失去信心,之後仲諗住放棄呢段感情
就係咁!佢哋兩個就不斷分分合合、出出入……  
但係到最後就依然都係Happy Ending,有情人終成眷屬!
 
喺呢套戲裡面最值得一提嘅……我認為就係女主角Michelle Pfeiffer!
呢位曾經被譽為係「荷里活最美金髮女星」嘅嬸嬸雖然已經年屆50
不過就依然好有女人味!而且身型仲keep得好鬼fit!
所以當佢同細佢成截嘅Paul Rudd拍調情戲嗰陣……
就真係完全冇俾人一種好核突嘅感覺,反而仲令人睇得好舒服添!
 
成套戲我俾80分呀!真係相當唔錯!
至於整齣戲最好笑嗰part我認為就係有一幕…… 
當Rosie好嬲咁鬧緊Adam嗰陣,Adam就忽然間話Rosie好似Demi Moore……
仲話好想成為Ashton Kutcher(細Demi Moore15年嘅現任老公)
之後……Rosie個前夫又突然間跳出嚟話自己好想成為Bruce Willis……
激到Rosie成個彈起!哈哈~真係好低B!但唔知點解……我笑到標眼水!哈哈~

1 則留言: