天神橋筋壽司之最 - 春駒（Harukoma）🍣

喺大阪天神橋筋區嘅壽司店當中，歷史最悠久嘅春駒都算得上係人氣最旺， 無論係平日定假日，日頭定夜晚，呢度都會有唔少人喺門口外面排隊，有時候未到晏晝十二點就已經會見到人龍出現，若然撞正人多嗰時，分分鐘就要等成一個鐘頭先入得到去。👉🏻

排緊隊嗰陣春駒嘅店員就拎咗疊Menu同一張紙仔畀我哋落住單先，落單嘅過程一啲都唔複雜，你只需要將所揀嘅壽司號碼寫落張紙度，然後一入門口就將張紙交畀是但一個店員就OK。👌🏻

春駒嘅壽司用料非常新鮮，全部即叫即整，每碟壽司嘅份量夠大唔在講，而且價錢又極之合理，特別推介佢哋嘅拖羅壽司 (¥400) 同生八爪魚壽司 (¥400) 畀大家，肥美肉厚嘅Toro鮮味十足，咬落去又冇筋。嫩中帶脆嘅生八爪魚好鬼煙韌，相當有咬口，絕對係本店嘅必叫之選。🖐🏻

緊接上枱嘅三文魚腩壽司 (¥400) 肥瘦度適中又冇乜腥味，再嗌多客正話食完回味無窮嘅生八爪魚壽司，感覺Ichiban！👍🏻

油甘魚壽司 (¥300)、池魚壽司 (¥300)、吞拿魚壽司 (¥200) 🤤

鯛魚壽司 (¥300)、八爪魚壽司 (¥200)、烏賊壽司 (¥200)，另外，由於先前食嗰兩件吞拿魚壽司實在係太好味喇～搞到我都忍唔住要嚟多個Round！🤩

鯖魚壽司 (¥300)、比目魚側緣橙醋漬壽司 (¥300)，食落都幾腬，要飲返兩杯熱茶消吓滯先可以繼續作戰。😝

劍魚壽司 (¥300)、蝦蛄壽司 (¥300)，即係香港人平時食開嘅瀨尿蝦，肉質比較結實有彈性，味道仲好清甜。😋

呢兩隻生蝦 (¥300) 個賣相認真麻麻，不過食落個feel又唔錯，加少少豉油上面就更正！😁

話咁快就嚟到本人最喜愛嘅貝類系列！色澤鮮明嘅鳥貝壽司 (¥400)、榮螺壽司 (¥400) 爽口彈牙，口感一流，十分抵讚！😍

鮑魚壽司 (¥400)、赤貝壽司 (¥400)，My all-time favourite！🤗

晶瑩飽滿嘅三文魚籽軍艦 (¥400)、入口即溶，令人陣陣回甘、齒頰留香嘅海膽軍艦 (¥400)，咁嘅價錢就可以享受得到，簡直係抵到爛！😬

呢碟嘢嘅正式名堂係咩我真係唔係太清楚，照字面直譯嘅話就係叫做明太子貝柱軍艦，價錢大約係¥300至¥400左右。🤔

老友order嘅極上級燒鰻魚壽司 (¥450)，連我呢個完全唔鍾意食鰻魚嘅人都覺得勁掂呀！🤪

春駒壽司（Harukoma）🍣

地址：大阪府大阪市北區天神橋5丁目5−2

點去：JR大阪環狀線天滿駅步行約5分鐘即可抵達

電話：+81 6-6351-4319

營業時間：11:00–22:00，魚生用完即停止營業，週二定休

Facebook專頁：請㩒入去呢條Link度比返個Like佢哋啦！<--------

品嚐完咁豐富嘅壽司大餐之後，當然就要食返啲飯後甜品先夠完滿！呢間位於梅田阪急三番街北館B2F UMEDA FOOD HALL入面嘅YORKYS Creperie係唔少年輕人嘅IG打卡熱點，佢哋嘅班戟皮薄鬆軟，配埋香濃嘅奶油同多款水果，食完包你返唔到轉頭！🥰

同場加映 - 疫下自家製 👩🏻‍🍳👩🏾‍🍳👨🏻‍🍳🥣🥘🍳🍲🍛

肺炎疫情持續擴散，全球人心惶惶，為咗避免受到感染，由3月尾停工到而家，基本上有九成時間我都係選擇留喺屋企食自己！而喺呢段百無聊賴嘅日子裡面，我就乘機跟老母偷師學習煮返幾味好餸，實行做個住家好男人！😌

去親茶記必定會食嘅涼瓜排骨飯，一睇就知啲飯落得唔夠水，啲涼瓜又煮得過腍，成碟嘢只能夠用六個字嚟形容，就係失敗中嘅失敗！👎🏻

搞咗咁耐都係得個吉，我不如就求求其其煮返個鮑魚公仔麵／通粉慰勞吓自己仲好啦！🍜

漢子賣餃子～實在好吃耶～皮薄餡多滋味好～實在好吃耶～🥟

餃子湯底搵乜搞？兩匙雞粉再加啲頭抽，再加啲麻油，溝埋黑醋同胡椒粉，方便易記又Easy！🧂

喂～阿哥！啲咁普通嘅嘢都夠膽攞出嚟sell？係咪想笑死街坊呀？喵～😹

嗯～既然你咁講，咁我就唯有吹雞call阿娘返嚟整返餐大鑊飯平息一吓民憤先！🤨

嘩～呢塊遠近馳名嘅霹靂無敵大肉餅睇怕都夠我哋一家人食足三日三夜⋯⋯🤣

係咁咦炒碟豉油王炒麵都可以炒得咁鬼靚仔，高手即係高手～👏🏻

清熱潤肺、滋陰養顏、止咳化痰，功效多到數唔完嘅喬家腐竹白果粥，毋需冷藏，亦不含防腐劑，係男女老幼調理脾胃嘅最佳好幫手！🤓

滷水雞翼～我鍾意食～但係我老母講我就快釘！越係快釘之所以越要整多隻～如果而家唔食以後冇機會再食～🎶

自製滷水大雜燴，材料包括雞蛋、魚蛋、冬菇、墨魚條，做法好簡單，好似肥媽教煮餸咁將啲嘢一鳩揼落個煲度起勢咁滾就搞撚掂！🔥

今晚姑姑請食飯！隨便坐！三餸一湯，白飯任裝！各位唔好客氣，請起筷！🥢

嗱～我一早都勸咗你咪鬼走入女人嘅私家戰場度搗亂㗎啦！明明有兩個煮嘢咁叻嘅超級女廚神喺你側邊，唔該你就疊埋心水坐埋一二角，做一個終日等食嘅幸福小男人，至於廚壇嘅事你都係唔好再叉隻腳埋去喇！喵～😼

夏日熱辣辣～吃西瓜消暑解渴！夏日熱辣辣～喝一杯冰凍綠茶！熱辣辣～熱辣～熱辣辣～一起慳電！熱辣辣～熱辣～熱辣辣～心靜自然涼！一齊嚟！熄冷氣！同降溫！環保願大家一起響應～熄咗佢！飲冰水！涼透心！齊齊潑扇～沖凍水涼～熱得好開心～🍉

下場預告 - 膽顫心驚・險過剃頭・不堪回首 之 醉爆台北遊！🍺🤢🤮🍺