2010年6月19日星期六

喂~英格蘭!醒D醒D呀!

係Friend都知我一直都係荷蘭嘅Die-Hard球迷,但其實曾幾何時,我都幾鍾意英格蘭,
大概係96年歐洲國家杯嗰陣啦!呢一年隊英芥蘭真係實力星味皆十足,
特別係我最愛嘅“老麥”麥馬拿文,佢當時嘅表現,簡直係光芒四射!
另外,喺前線方面就有頂級射手舒利亞同二傳高手舒寧咸呢隊黃金拍檔,
中場就有大腦加斯居尼、靚仔列納、鬥牛恩斯同老大哥柏列
再加埋阿當斯同神經重炮皮雅斯等人,好老實講,我認為呢隊英格蘭……
先至真正稱得上係「四十年來最強」,至於今年呢隊?嘿嘿嘿嘿~
唔怕刻薄D講句,就只係一隊二流歐洲球隊,我知我咁講可能會畀一眾英軍擁躉鬧死,
但喺我眼中,今時今日呢隊英格蘭,的確係一隊名乎其實嘅「屎波快閃隊」。
咁當然,咁快走去蓋棺定論批死佢會首圈出局,又確實係言之過早,
但係我對於卡比路嘅種種戰術同調動,就認真係摸不著頭腦!
我諗如果佢再係咁執迷不悟,就算最後畀你班波出到線,條路都唔會好容易行。
貴為世界級名牌教頭,我完全唔明白點解佢可以咁鬼冇膽色,明知“雙特”根本係唔work,
就唔該你決斷D是但抽起一個啦!你睇下而家?兩位大哥當正自己係打前鋒咁,
同時又組織唔起個中場,移到兩條邊亦做唔到突破,
最好笑嘅係,前面嗰件獌狗史力加(朗尼)就經常跑鬼咗去打中圈,正宗係吹鳩漲!
仲有一點令我搲晒頭嘅係,因乜解究個個領隊都咁鬼喜歡用大舊(希斯基)打正選?
講真嗰句,我一向都覺得大舊、格連胡禮菲臘斯呢班球員本來就唔夠班打大國腳,
實在好難想像喺一支所謂嘅一線勁旅入面,居然會有一堆咁低質素嘅二、三線球員,
就講阿大舊呀!條友冇射術又冇腳法,要佢做靚二傳又做唔到!喺前面淨係得個撞字!
妖~你英格蘭死要用呢種打法,咁同已經降咗班九世嗰隊《溫布頓》有咩分別?
一早出迪科爾高治咪好囉頂你個肺!佢兩個一入嚟,班波嘅攻勢就即刻多返D!
希望卡比路下場快D攞返條賓周出嚟,試下用迪科爾高治打正選,
再畀個機會祖高爾落場玩下,諗極都唔明,兩場都唔用佢,唔通選佢入隊做站長?

短評今晚英軍球員嘅表現


占士 - 絕對係全隊打得最正常嗰個,至少唔會好似格連咁怯場,喺應付高波方面亦進步咗。
艾殊利高爾 - 攻同守都尚算稱職。
格連莊臣 - 進攻比防守出色,下半場後段仲有幾腳甩漏。
泰利 - 成場99%時間都表現穩定,但臨尾一個大失誤,差D累死占士
加歷查 - 一步一驚心,老紀大,好多時都唔夠人快,不過就好鬼搏命。
巴利 - 四個字:平平無奇。
林伯特 - 上半場隱咗形,到下半場叫做有返D影,可惜就浪費咗好幾個重要機會。
謝拉特 - 打得確係好曳,射波打飛機,帶波帶甩腳,傳波又冇腳準。
艾朗連濃 - 唔知點解要到臨畀人換走嗰陣先肯高速爆返幾段……
希斯基 - 射術差劣,二傳又做唔到,喺前面淨係得個撞字!
朗尼 - 繼續魂遊球場,直頭變咗另一個人咁。
胡禮菲臘斯 - 畀你爆多一兩次,都補唔返你之前甩嗰D……
高治 - 最尾嗰幾腳十足老麥上身咁,不如你下場試下打翼啦!哈哈~
迪科爾 - 一換入嚟就令對方有D壓力,但真係衰在太遲入場。
老老柒柒,頭先若然唔係有老占頂住,英格蘭就分分鐘輸鬼埋!
同埋呢~每次個鏡頭一plan落去咸哥嗰度我就想笑,因為……佢真係似足一塊神主牌!
又係時候要重溫咸哥上場嗰個經典嘅“胡囧囧”表情……

69 則留言:

  1. BECKHAM 話你地咁「屎」,真丟晒架!!

    占士梗好過 green!!!

    唔使驚,下場無查叔,因為他已兩黃!!

    朗尼無影!

    雙特愈打愈沉!!

    回覆刪除
  2. 而家英格蘭出線唔太樂觀。雙特問題都係無改善,
    林柏特無腳好波,好似隱左形。朗尼踢得麻麻。兩翼又出唔到波。

    唔明卡比路點解咁遲先換高治,八十五分鍾點摶啊?
    兩翼唔得,中路又俾人封,應該早d打高波啦。

    下場生死戰,考驗卡比路的排陣,睇下佢敢唔敢唔用林柏特,
    俾祖高爾踢左,謝仔踢中路?又睇下佢點用朗尼?
    或者敢唔敢俾高治正選?加上下場力查唔出得,中堅果位點算?
    [版主回覆06/19/2010 20:26:00]
    高治同Defoe下場應該要打正選啦!~
    中堅果位?可以試下多臣.........

    回覆刪除
  3. 剃刀・魯鐸克2010年6月19日 下午4:33

    四十四年啦!你仲要令班球迷失望多幾多次?唉,好唔開心..

    回覆刪除
  4. Honestly,Algeria plays much better than England

    回覆刪除
  5. 請把成隊英格蘭送去堆填區唔該(順手送埋Klose)

    回覆刪除
  6. 烏龍查拎黃下場冇得出

    回覆刪除
  7. 下場要睇卡帥點佈陣了...我都唔明點解唔用J. Cole...

    回覆刪除
  8. 荷蘭入波功臣 海尼達
    [版主回覆06/19/2010 22:59:00]
    好X似呀喂呢張!!!~

    回覆刪除
  9. 頭先Holland場波都係嬴得好冇說服力,唔俾人逼和都算夠運

    講番England,Capello真係戇九九,
    希斯基呢兩場根本就同法國個Anelka一九樣廢,點解半場仲唔出Crouch?
    [版主回覆06/19/2010 22:54:00]
    出梗線架啦應該....
    但係入到十六強洛賓一定要出!!~咪鬼出個艾廢利!!!!!!!!!~

    回覆刪除
  10. Hey,而家澳洲嬴緊加納喎,D組真係亂過亂世佳人
    [版主回覆06/19/2010 22:51:00]
    維蝦佬...= ="

    回覆刪除
  11. Kewell,what the hell were you doing?Fuck!!
    [版主回覆06/19/2010 22:52:00]
    佢都唔係有心...球波根本無得避,咁樣就比人趕出場...

    回覆刪除
  12. 雖然我鐘意利記,但唔知點解一路都好憎英格蘭,
    最討厭佢地成日雷聲大雨點小,屆屆都講到點勁點勁,其實只係一隊二流球隊!
    不過與其話憎英格蘭,我更憎英格蘭既香港fan屎,
    成日話有咩情意結,你估自己係英國人咩!
    重有個碧咸真係好cheap,好似今屆咁,唔係話唔俾你黎捧場,
    不過執到正一正咁坐晌當眼位,你黎攞威定想點先?
    唔好意思,激動左少少,因為我真係好憎英格蘭同埋佢地既香港fan屎!
    [版主回覆06/21/2010 05:24:00]
    我當初將英格蘭列為第二最愛,
    只係因為老麥、列納同加斯居尼.......
    老實講,情意結?我真係完全無囉!~
    我後生睇意甲大架!~哈哈哈哈~~~

    同埋....咸哥做咩唔叫埋咸嫂一齊坐喺度做神主牌je!!?哈哈~~

    回覆刪除
  13. Carragher下場停賽紅牌,Rooney又發揮唔到水準,好擔心!淚下雨
    噚晚越睇就越掛住Beckham,佢若在場上定會挺身而出!
    [版主回覆06/21/2010 05:16:00]
    咸哥在場上...他就有如一塊神主牌...與大家同在....阿門!~

    回覆刪除
  14. 睇到英格蘭踢成咁真係有啲心痛

    回覆刪除
  15. HESKEY差到死,J.COLE好明顯應該上,為何不讓他上場?

    回覆刪除
  16. 英格蘭一早就應該改朝換代啦!嗱大膽啲!唔好再用呢班倒米大帝啦!
    用Ronney做核心,然後再用Agbonlahor、Lennon、Milner、Wilshere、
    Micah Richards、Muamba、Walcott、Huddlestone、
    Steven Taylor同Joe Hart呢班後生仔去搏一鋪仲好啦!!
    [版主回覆06/21/2010 05:13:00]
    認同!~但我唔想再見到朗尼呢條無品友!!~

    回覆刪除
  17. 經過呢兩場世盃表現,英格蘭 已經由國際二線球隊跌至三線......
    成隊波表現唔悅目,冇隊型,冇進攻模式,
    攻不克,守不穩,軍心亂,士氣低,冇互信,心態弱.........
    嘩!!! 死得啦!!!!!

    占士真係叫最省鏡,俾隊友 "跣" 幾次都幸保不失 ~

    A Cole 中規中舉,有一腳諗住爆入都做得唔錯 ~

    G 2 下半場明顯腳仔軟軟....

    泰利 怕佢太硬朗了點,如果做埋紅牌阿姑就後防淪陷.....

    歷查 ........... 堅持唔再玩 國家隊 咪好囉。

    巴利 我覺得上半場 30 分鐘前收到貨,之後應該早 D 換。

    林伯 根本融入唔到隊波,或者係唔想同 謝四 建立默契....

    謝四 有心,但冇力! 有兩球應射唔射,兩球應傳唔傳;
    而且 利記 壞習慣又黎,開始怨隊友,亦似乎明顯得唔到隊友支持......
    唉 ~ 我係因為你先支持 英格蘭 咋 `~

    連濃.... 你 D 長處去晒邊呀?失望!

    大舊 有 heart 有品,但亦係所有國家隊中最令人冇信心嘅前鋒,
    勤力得很,有球波靠佢追到自己底線攔截..............

    肥朗 - 夢中人,連控定個波都吃力 ~ ~

    胡禮 - 一向唔睇好...........

    高治 - 最心痛是,換得太遲 ~ ~ 都未熱好身就完場,
    命運似乎同以前 利記 差唔多... 戥佢唔抵!!

    迪科 - 可能因為衰在唔靚仔,所以一直冇得打正正選,唉.....

    仲有唔該唔好再影住 咸哥 啦...... 有乜謂呢?
    下場如果 卡生 再執迷不悟,就可以早 d 執包袱走佬 ~ ~
    [版主回覆06/21/2010 05:12:00]
    英格蘭班球員一向心理質素都好鬼差.....
    你睇下佢哋班人射十二碼就知啦!!~
    但我就真係好耐無見過占士個樣咁鬼有信心!~超型!~哈哈~~
    A.Cole一向都好好,我一直都覺得佢係現今英格蘭最出色o既左閘!~
    Johnson Baby真係似翼多過似閘!~哈哈~~
    力查....唉....好認同你呀!~見好就收啦!!~
    謝四同林伯真係四個字...貌合神離.......
    大舊....我一向都好欣賞佢o既球品同拚搏精神...
    但作為國腳前鋒...佢真係唔夠班.....
    咸哥?我幾時都話靚仔大哂架啦!~
    你試下如果係手球佬加利仔話想隨隊呀!?鬼理你呀!!~哈哈哈哈~

    回覆刪除
  18. 咸哥睇到班衰仔踢到咁都好燥, 唉
    又唔出Joe Cole, 死都要A Cole落底, 有得揀都仲係要用Heskey,
    Lennon咁鬼快唔爆, 都唔知係戰術問題定係自己懶...
    左右兩邊根本供應唔到, 真係有幾多大牌球員都無用, 都係亂踢
    [版主回覆06/21/2010 04:55:00]
    Lennon真係好好笑....俾人換走先肯高速爆番幾下……

    回覆刪除
  19. 英格蘭踢咁鬼耐都仲係玩高Q大棍,但又入唔到波,
    最後踢到高治都要自己過關斬將,你話死唔死?
    另外你講得啱,卡比路真係一條莫薑怪!換人方面真係好有問題,
    太保守唔放棄雙特,又唔選禾確特,用胡禮條廢柴都唔用祖高爾,
    希斯基個仆街邊線插花兼底線傳底又唔換佢!
    最後我要屌爆謝拉特,可唔可以話比我知佢喺度做乜9嘢?
    [版主回覆06/21/2010 04:53:00]
    係lor!~禾仔外圍賽打得咁好都入唔到......
    唔知係咪因為有D傷呢!?

    回覆刪除
  20. 英芥蘭 你等住出局啦 呵呵呵

    回覆刪除
  21. 英格蘭兩戰不敗,幾有皇者風範.

    回覆刪除
  22. 有冇人覺得Gerrard個樣好似Edison陳冠希呀?
    [版主回覆06/21/2010 04:48:00]
    哈哈~~一直都覺得好似,但謝四個樣老成D!~

    回覆刪除
  23. 我覺得Capello今次真係選錯人,我一早就估到King唔會踢得耐,
    但其實Carragher仲衰,佢今季喺利物浦已經係不停為對方送大禮,
    但竟然仲可以打世杯..真係笑話!
    [版主回覆06/21/2010 04:48:00]
    我覺得真係可以試下用多臣!~

    回覆刪除
  24. 胡禮仔真係好廢,一味尻爆,踢波又唔用腦,一味做跑狗
    [版主回覆06/21/2010 04:45:00]
    Give me ten,brother!~

    回覆刪除
  25. 都唔好對英格蘭有太大期望喇!!
    [版主回覆06/21/2010 04:45:00]
    我從來無對英格蘭有期望過...

    回覆刪除
  26. 巴西VS科特迪瓦賽後感:
    一場大龍鳳...又打交....又做戲...
    又手球....又多入波 .....又收山腳....

    回覆刪除
  27. 北泡菜萬歲
    [版主回覆06/22/2010 05:30:00]
    0-7出咗局啦!~

    回覆刪除
  28. 亞軍荷蘭女球迷事業線落寞
    [版主回覆06/22/2010 05:28:00]
    沒有希望了, Tommy 仔!~

    回覆刪除
  29. 多謝來訪!英格蘭今屆又唔駛太愁,要論「不知所謂」,點都會有法國墊底......
    [版主回覆06/22/2010 05:28:00]
    若明晚法國真的出局,其實也只是當還債而已(手球淘汰愛爾蘭)!~

    回覆刪除
  30. 只覺得班友好似係hea住踢,又無乜章法,完全唔似係英格蘭,
    唔講仲以為係新西蘭添呀,新西蘭至少還有多點拚勁呢!
    鏡頭都成日影咸哥架啦!下仗不如畀兩個啦啦隊毛毛球過佢啦,等佢唔駛咁鬼悶
    [版主回覆06/22/2010 05:25:00]
    不如俾隻錶或者俾盒朱古力佢擺下pose影下硬照啦!~

    回覆刪除
  31. 你說得對!九六的英格蘭的確很強,前中後都有一級戰將。
    但今年的英格蘭,後防不穩,中場缺乏攔截和創造力,
    前線就更是人材凋零!真的很懷念舒利亞和連尼加。
    [版主回覆06/22/2010 05:24:00]
    當年英格蘭D前鋒,真係多到用都用唔哂....
    舒利亞、舒寧咸、伊恩.胡禮、科拿....
    而B隊都仲有瑟頓同高爾等人.....

    回覆刪除
  32. 占士 - 全隊打得最正常果個,至少唔會好似格連咁怯場,同埋應付高波進步咗!
    你睇下大舊!佢冇射術又冇腳法,要佢做靚二傳又做唔到!喺前面就真係得個撞字!
    你英格蘭死都要用呢種打法,咁同以前英聯降咗班九世果隊《溫布頓》有咩分別?
    一早出迪科爾同高治咪好囉其實!你睇下佢哋一入嚟,班波攻勢就即刻多番D!
    希望卡比路下場真係可以大膽D,試下用迪科爾同高治打正選啦!
    最好就俾埋祖高爾落場試下啦!真係唔明……兩場都唔用佢,都唔知選佢嚟做咩鳩!
    100%agree
    image014.gif No Eye See

    回覆刪除
  33. 看來今屆,沒得看阿根廷 對 英格蘭了..
    歐洲球隊離開了歐洲,好似唔識踢咁
    [版主回覆06/22/2010 05:14:00]
    現在首要是出線了........

    回覆刪除
  34. 可惜碧咸哥唔落場

    回覆刪除
  35. 見到碧咸個樣好落寞咁............唉
    每次面對英格蘭踢世界賽都對自己講唔可以對佢有太大期望
    明知技術唔夠, 但哩d情意結真係好難話放底就放底
    所以近年都係奢望佢過到分組賽算了
    [版主回覆06/22/2010 05:12:00]
    拋開咸哥有點過份show off的行為,
    個人其實也對他的退出而為英格蘭感到十分惋惜....
    畢竟他的「七旋斬」的確是英格蘭的最大殺著!!~

    回覆刪除
  36. 西班牙VS洪都拉斯賽後感:

    西班牙最後雖然以2-0獲勝,
    但老實說,出線形勢仍然不是十分樂觀!~
    我稍嫌西班牙下半場初段踢得有點hea....
    而韋拿射失那球十二碼就更是十分可惜....
    我雖然不是西班牙支持者,但也很希望他們能夠進身次圈!~
    因為以一個純球迷角度來看,西班牙的踢法的確是相當悅目!~
    另外,本人也不想再在十六強中,再看到一大班死守的悶蛋球隊!~
    所以西班牙....希望你們加油吧!!~

    最後.....也希望王子能早日重拾佳態!~
    盡快擺脫利記天才型射手早熟早殘的慣例!~

    回覆刪除
  37. 英格蘭真係前後左右中都唔掂, 捧荷蘭好, 只係後唔掂姐
    [版主回覆06/22/2010 20:09:00]
    捧荷蘭也不見得安全!~

    回覆刪除
  38. 金將軍買重左外圍葡萄牙贏 咁你話佢地可以踢成點?
    [版主回覆06/22/2010 20:09:00]
    一定係啦!~

    回覆刪除
  39. 個人心水預測:

    A組:烏拉圭(首名)、墨西哥(次名)
    B組:阿根廷(首名)、尼日利亞(次名)
    C組:美國(首名)、英格蘭(次名)
    D組:德國(首名)、塞爾維亞(次名)
    E組:荷蘭(首名)、丹麥(次名)
    F組:巴拉圭(首名)、意大利(次名)
    G組:巴西(首名)、葡萄牙(次名)
    H組:瑞士(首名)、西班牙(次名)

    回覆刪除
  40. 照你咁估又唔錯,起碼下個round有場巴西vs西班牙睇吓
    [版主回覆06/23/2010 04:59:00]
    希望!~

    回覆刪除
  41. 一龍心水預測:

    A組:烏拉圭(首名)、墨西哥(次名)
    B組:阿根廷(首名)、南韓(次名)
    C組:斯洛文尼亞(首名)、美國(次名)
    D組:加納(首名)、塞爾維亞(次名)
    E組:荷蘭(首名)、丹麥(次名)
    F組:巴拉圭(首名)、意大利(次名)
    G組:巴西(首名)、葡萄牙(次名)
    H組:智利(首名)、瑞士(次名)
    [版主回覆06/23/2010 04:59:00]
    一龍兄...已中兩組....

    回覆刪除
  42. 李健和講波真係好撚廢[sosad][sosad]
    南非南非上呀#yup# #yup# #yup#炒柒法蘭西[369][369][369]

    回覆刪除
  43. 英格蘭VS斯洛文尼亞賽後感:

    呢場波若論精彩程度,
    我認為就唔及對面嘅美阿之戰咁好睇!
    但亦恭喜哂英格蘭可以順利進身次圈……
    雖則佢地今場其實真係嬴得絕對唔輕鬆,
    不過慶幸嘅係……佢地終於都算係打出個隊形!
    同埋一出迪科爾,果然係立刻見效!
    希望卡比路可以keep住用佢打正選啦!
    另外,再一次証明「雙特」依然係唔work……
    謝四今場打得好好,甚至比對美國果場打得仲好!
    林伯就依然係踢到好似六神無主咁……
    Johnson Baby今日就瞻前顧後,表現搶鏡!
    占士……你好鬼型呀哈哈!仲越打越有信心添!
    希望入到十六強,卡比路就唔好再做縮頭烏紗啦!

    另外,亦都要恭喜哂首名出線嘅美國!
    其實以佢地呢幾場嘅表現,絕對係值得我哋大力鼓掌!

    回覆刪除
  44. Capello可能係偷睇咗你呢篇嘢,佢今場真係聽哂你話wor!
    [版主回覆06/25/2010 06:47:00]
    哈哈哈哈~~總之我寫:
    「換咸哥入去啦!~淨係做下神主牌,射下FK...
    分分鐘都打得好過占士.米拿!~」

    回覆刪除
  45. 好彩英格蘭都入到16強. 如果似法國咁返去...............
    [版主回覆06/25/2010 06:44:00]
    希望佢哋入到次圈可以踢得好D,向支持佢哋嘅球迷交代下啦!~

    回覆刪除
  46. 德國佬中伏了[sosad] [sosad]
    原來加納先係走線高手[banghead][banghead][banghead]
    噢耳屎番去實畀路維屌菊花............唔 好 呀
    [版主回覆06/25/2010 06:42:00]
    要面對的,終須還是要面對的。

    回覆刪除
  47. 意大利VS斯洛伐克賽後感:

    呢場波我只有四個字嘅評語:「優勝劣敗」!
    意大利整個上半場都喺度發白夢!
    一直要到派路出嚟成隊波先叫似樣番D!
    只可惜……意大利雖然曾經係全世界防守最好嘅球隊,
    但今場佢哋嘅防守就真係錯漏百出,成班人都好唔集中!
    尤其係大簡,真係只能夠講句年華已去……
    而上場逼和嘅功臣迪羅斯就更加係全場打得最差果個!
    至於球隊可以喺最後階段連追兩球……
    其實都只係因為對面嘅斯洛伐克已經索哂氣嘅關係……
    而唔係佢哋打得特別好!

    喺呢度再一次恭喜哂斯洛伐克同我哋利記自己人史基泰爾!
    以佢哋今場嘅表現,絕對係值得進身次圈……
    而佢哋十六強嘅對手,就係本人嘅愛隊荷蘭!
    意大利意外出局,我覺得荷蘭應該要引以為鑒……
    千其唔好輕敵!一定要打醒十二分精神呀!

    回覆刪除
  48. 上屆冠亞軍同時出局,真係少見...
    [版主回覆06/26/2010 00:26:00]
    打得不好,歸家也是對的!~

    回覆刪除
  49. 八強巴西同荷蘭好有機會碰頭啊.

    回覆刪除
  50. 都好激啵,果然係恨鐵不成剛嗰隻,我都冇眼睇隊英格蘭囉!

    回覆刪除
  51. 十六強 - 德國VS英格蘭 賽後感 :

    雖然今場英格蘭係大敗俾德國,
    但喺形勢上,德國其實都並唔係全場一面倒架!
    英格蘭之所以輸到呢個地步,其實同果球問題球真係有好大關係!
    好明顯個波已經入哂白界裡面啦!班旁証球証簡直就係發雞盲!
    老實講,如果果球波入咗,個結局可能真係會改寫架!
    不過輸到四球咁多,查實英格蘭自己班球員都要負好大責任!
    例如係巴利……我都唔明佢喺中間究竟有乜作用?
    叫佢分波佢又分唔到,缺乏創造力之餘又唔夠硬淨!
    講真失第三球波……佢真係有好大責任!
    另外,今場「雙特」嘅表現終於都叫做係有番D交代!
    謝老四一如以往夠搏夠搶,林伯特今場終於唔再做隱形人,
    入唔到波真係只能夠講句:「你唔夠運!」

    仲有……我對於今場卡比路嘅種種戰術同調動,
    依然係相當摸不著頭腦……點解球隊輸緊三粒俾人……
    你都仲係咁鬼死板架?竟然換走全隊最有威脅嘅迪科爾出去?
    喂你明知史力加(朗尼)已經無著射門鞋架啦!
    而家你仲要擺個更唔識入波嘅大舊(希斯基)入嚟……
    喂卡比路!你真係唔想嬴咩?我真係唔明……
    高治明明係而家英格蘭入球率最高嘅一位球員,
    點解你到咗呢個關頭都仲唔換佢入場搏下呢?

    不過亦都要讚讚今場德國D突擊真係打得好好!
    尤其係第三球波,德國小將奧爾斯真係處理得非常冷靜!
    攞波果下佢已經攞得好靚,之後仲要望到定哂先交俾梅拿射入……
    我覺得呢位新秀,真係好有前德國名將慕拿嘅影子。

    最後我仲想讚一讚德國嘅中堅費特列治,
    佢絕對係今場德國嘅一位無名英雄。

    回覆刪除
  52. 十六強 - 阿根廷 VS 墨西哥 賽後感 :

    今屆世界盃,到目前為止應該係最多錯判嘅一屆啦……
    老實講,墨西哥開段表現出色,戰術靈活、極具侵略性,
    打到對手阿根廷班球員真係氣都咳,咁樣俾個錯判影響真係好唔抵!
    墨西哥輸第一球極具爭議,但第二球就真係完全係輸自己啦!
    因為後防一個「白痴失誤」,令球隊再度陷入萬劫不復之地!

    阿根廷入嘅頭兩球,都好似入得唔係好夠說服力……
    不過迪維斯所入嘅第三球,就真係完全係無話可說啦!
    嘩個波靚到呀!十足十《足球小將》入面小志強嘅猛虎射球一樣!
    墨西哥個龍門佩雷斯真係飛到盡都救唔到……

    墨西哥雖然輸波,但老實講班波嘅表現真係絕對唔失禮!
    尤其係後衛沙斯度同埋新仔查維亞.靴南迪斯就更加係令我眼前一亮!
    前者嘅腳頭甚重,D遠射下下有譜!
    而後者嘅出色表現就比對面嘅美斯更搶鏡!
    呢位球員速度快走位又靈活,而且埋門質素亦不俗!
    唉!又俾曼聯買到件好嘢添……

    回覆刪除
  53. 尋晚場波好精彩,雖說有個世紀問題球,但係英格蘭班後衛究竟做乜,
    第一球,好明顯輸兩個後衛,其實占士早d出有得救..第二球入得好靚,
    但當下半場,我見到英格蘭班後衛根本唔多點去欄波..
    總結英格蘭係輸在問題球(成為轉捩點),同班後衛,
    [版主回覆06/29/2010 22:48:00]
    係....英格蘭太多球會級球員..........

    回覆刪除
  54. Netherlands GoGoGo!!!!~

    回覆刪除
  55. 十六強 - 荷蘭 VS 斯洛伐克賽後感 :

    荷蘭整場波俾我嘅感覺係佢哋根本就仲未放盡嚟踢!
    班波踢出嚟個風格……老實講,真係好似以前果隊意大利!
    首先喺領隊方面,放棄咗名牌雲巴士頓,改用實而不華嘅雲馬維克,
    成隊波雖然喺踢法上悶咗好多,但俾人個感覺上就比以前穩定咗!
    須知道以往荷蘭俾人個感覺都係「有頭威無尾陣」……
    但今屆成隊波一路打起嚟就比以前沉實咗好多!
    不過老實講,其實荷蘭由首圈到十六強,
    都未算叫做話遇到D棘手隊伍!
    所以我希望下場佢哋可以踢得再進取D!
    因為面對巴西呢類頂級球隊,如果踢法再唔進取D,
    就一定會久守必失!講真,如果荷蘭無咗洛賓……
    成隊波嘅進攻範數就會減少!單靠狀態未top fit嘅雲佩斯喺前面……
    老實講,真係唔夠!同埋希望下場荷蘭班球員守越位守得好D啦!
    如果人地斯洛伐克班球員finishing好D嘅話,你哋可能己經輸緊啦!

    最後我想讚讚荷蘭嘅幾位嬴波功臣,
    首先係入第一球嘅洛賓,老實講,人人都知你係一招走天下架啦!
    但偏偏又真係明知道你想點,但都要食你塵!呢D咪級數囉!
    第二個係入第二球波嘅史尼達,我覺得佢係今場賽事裡面嘅MVP!
    佢今場助攻又助守,分波準確,而且又搶到個中場控制權!
    第三個就係史迪基倫堡,呢位守門員喺今場比賽尾段屢救險球……
    並且喺之前嘅賽事裡面,都一直保持著穩定嘅表現!
    我相信……荷蘭一代門神雲達沙都應該可以放心退位讓賢啦!
    第四個要讚嘅……係我哋利記自己人「金霸王先生 - 古治」!
    講真……我真係越嚟越欣賞古治呢位球員!
    論技術佢當然係唔及雲佩斯同洛賓啦!但佢就勝在夠勤力!
    佢成場不停走上走落,又幫波又拉邊又助守!為成隊荷蘭帶嚟動力!

    但老實講,以荷蘭今場嘅表現,實在未夠班去挑戰皇者巴西!

    回覆刪除
  56. 英格蘭也到了改朝換代的時候了,英德大戰,撇除林伯誤判的一球,
    英格蘭完全被技術性擊倒,不論是體能、速度以至整合作性全被德國壓着踼,
    只能說優勝劣敗,四年後捲土重來吧!!至於兄台另一心水荷蘭隊,恭賀殺入八強,
    表現越來越有說服力了。明早雙牙對決,還看西班牙~
    [版主回覆06/29/2010 22:48:00]
    支持西班牙!!~

    回覆刪除
  57. 好老實說,荷蘭場波好悶..荷蘭入左一個波後就想守..
    下半場若非斯落伐克有幾球把握唔好,根本巳一比一,
    場波就會改變..荷蘭若這樣踢,我睇好巴西..
    [版主回覆06/30/2010 17:03:00]
    我當然希望荷蘭過到巴西....
    但老實講....好難........
    荷蘭再這樣踢,肯定會被巴西血洗!!~

    回覆刪除
  58. 十六強 - 西班牙 VS 葡萄牙賽後感 :

    「兩牙」相爭,必有一傷!
    最後落敗的,是表現較為保守的葡萄牙!
    葡萄牙在初段的穩守突擊做得不錯,
    但可惜個別球員始終質素有限,以致未能好好把握多次機會!
    而最令人失望的,相信都是C.Ronaldo了!
    他今場的表現可以說是乏善可陳!他全場盤球走動都不多……
    完全給對面西班牙的皇牌射手David Villa搶盡風頭!
    但其實有留意C.Ronaldo的人應該都知道,
    他在大型賽事裡,通常都會化身隱形俠……
    而他的失準,亦導致葡萄牙的進攻範數大大減少!

    反觀西班牙就是勝在球員有質素,
    加上領隊Del Bosque調動球員得宜……
    果斷的換入高大中鋒Llorente來代替今場仍是表現平平的F.Torres……
    Llorente雖然高大擅頂,但腳下功夫亦不俗!
    這個調動很快便收到成效!
    Llorente的制空能力和David Villa的射手觸覺,
    成為了西班牙的取勝關鍵。

    另外我亦想讚讚西班牙的一位無名英雄,他就是Joan Capdevila啦!
    這位維拉利爾左閘今場助攻助守表現搶鏡,
    但完場前他有沒有被R.Costa侵犯……我就還是有所保留啦!哈哈哈~~
    但老實說,其實我認為這張紅牌,對賽果實在影響不大!

    最後我想讚讚幾位打得非常好的葡萄牙球員,
    他們分別是左閘Coentrao和守門員Eduardo!
    尤其是完場哭慘了的守門員Eduardo……
    我想若不是他的話,葡萄牙一定不只輸一球!

    回覆刪除
  59. 雖然荷蘭贏了,但我還是認為巴西技術較好,
    我係上半場完前落賓,點解佢帶住個波咁耐都唔射?
    跟住成班巴西後衛返晒來..
    下半場當巴西一個球員被逐,落後時,
    荷蘭根本巳有幾次單對單對龍門,
    但又唔起腳,咁即擺明有波都唔入..
    [版主回覆07/04/2010 04:53:00]
    尤其上半場真係踢得好差!~
    成隊都唔知想點!~踢到患得患失.....
    好彩有D運仔,但老實講,仲未有足夠實力爭冠軍!~

    回覆刪除
  60. 八強 - 荷蘭 VS 巴西賽後感(二) :

    至於荷蘭……我覺得除咗個別球員之外,
    整體嚟講都係打得非常一般!尤其係上半場……
    成隊波打得最Sharp果個,反而係最粗枝大葉嘅Kuyt!
    今屆我其實已經唔只一次讚佢,
    但估唔到今場對住實力強橫嘅巴西,佢嘅表現依然係相當對板!
    除咗尾段救咗個空門之外……當荷蘭落後巴西一粒果陣,
    佢單人匹馬殺入巴西禁區狂抽果球真係好勇猛!
    另外……守門員Stekelenburg亦都Keep住有十分好嘅演出!
    特別係救Kaka果球絕妙遠射,真係令人拍爛手掌!
    不過講到今場荷蘭嘅MVP,就真係非中場指揮官Sneijder莫屬啦!
    講真今場Robben和Van Persie都打不出水準,
    若果唔係Sneijder,可能真係一粒都入唔到!
    最後我要讚讚領隊Van Marwijk!當荷蘭領先巴西一粒果陣,
    佢竟然夠薑用前鋒換前鋒,擺明就唔想同你死守!呢個做法好正面!
    不過我真係好擔心今年荷蘭果班前鋒嘅埋門質素……
    講真……Van Persie一冇態,Huntelaar同Babel點擔大旗呀?
    唉!與其選呢班敗家仔,不如搵番正宗中鋒射手馬面徐榮好過啦!

    賽後有好多巴西球迷話荷蘭好賤,收買球證又插水……
    我想講……大家半斤八兩吧!先講黑哨呢個問題,
    係……荷蘭今場係好多毛手毛腳!Van Bommel喺比賽尾段連環踢人,
    再加埋Sneidjer犯手球……但就竟然黃牌都冇張!
    不過我覺得如果球證係偏幫荷蘭嘅話……
    咁Lucio喺禁區裡面犯手球點解又唔比十二碼先?
    之後Daniel Alves蓄意踩Van Bommel咪又係無攞牌!
    我覺得與其話人黑哨,不如話個亞洲球証吹得唔好啦!
    呢條友仔根本就控制唔到個場面!但係真係冇黑哨冇偏幫囉!
    如果你話球証偏幫荷蘭,咁我夠可以話球証偏幫巴西啦!
    再講Robben果球插水,我初頭都以為佢真係扮嘢……
    但之後睇翻慢鏡先知原來真係有條友勾到佢隻後腳架!
    我覺得巴西自己應該先反醒下,點解上下半場防守完全兩回事……
    先再講黑唔黑哨呢個問題啦!
    講真我唔認為個球証影響到今場個賽果好多囉!
    不過我覺得今屆D球証水準真係好曳!
    令到我哋某D球迷睇得甚無癮!就係因為你班球証亂咁吹,
    搞到嬴嘅又唔光彩,輸嘅又覺得唔抵!真係激死!

    回覆刪除
  61. 八強 - 荷蘭 VS 巴西賽後感(一) :

    荷蘭今場嬴到巴西,其實真係有D運仔!
    因為基本上佢哋上半場成班就好似遊緊魂咁!
    一直要到下半場Melo球Own Goal出現,班友先識醒!

    巴西上半場順風順水,個勢真係好似入梗四強咁制!
    但就係因為呢個Own Goal,搞到成隊波踢到慌失失兼走晒樣……
    之後俾Sneijder頂入多粒,成班友直頭散哂……
    至於後尾Melo一腳踩落Robben度,呢張紅牌就又係食得非常無謂!
    我真係唔明……堂堂足球王國,球員心理質素點解可以差成咁?
    最好笑係一開始巴西領先緊一粒果陣,班球員已經係好躁底!
    尤其係Robinho同領隊Dunga,講真連身為教頭都失去冷靜……
    嬴緊一粒都仲係場邊好似標童咁!真係唔知佢為咩?
    同埋我始終覺得Dunga係前線調動方面真係好有問題!
    即係好似只有Plan A但冇Plan B咁!
    講真Fabiano唔差,但同巴西以往D World Class前鋒比……
    真係仲差好多皮囉!你睇Fabiano一冇狀態……
    球隊根本就冇第二個前鋒可以用!
    Grafite?大熟大勇已經係前季嘅事……
    Nilmar?Sorry……完全唔知佢嘅作用係乜!
    但最慘係成隊波今年冇一個靠得住嘅重心人物……
    而唯一靠得住嘅Kaka又一直操唔起個狀態!
    去到呢個時候,大家係咪會好懷念大細哨同Rivaldo佢哋呢?

    回覆刪除
  62. 八強 - 烏拉圭 VS 加納 賽後感 :

    呢場波實在太經典,一路精彩到最後!
    明明贏咗99%都可以輸番,真係好睇過戲!
    未到最後一分鐘,都唔知邊隊贏!
    真正嘅波迷睇到呢場經典,真係有今生無來世!

    加納方面,我真係要向Gyan鼓掌致敬!
    先射失果球關鍵嘅十二碼……
    然後到互射十二碼果陣佢竟然選擇第一個出嚟射……
    喺邊度跌低就喺邊度起番身!真係好嘢!
    不過可惜加納班球員真係空有體能無技術……
    尤其係互射十二碼果陣就更加可以見到!
    射十二碼唔好唔助跑,阿叔以前已經成日講架啦!

    至於最多人爭議嘅……就肯定係Suarez果球手球救空門啦!
    我自己就覺得……無話公唔公平嘅……
    而家紅牌有俾,十二碼又有俾,你自己把握唔到關人忍事呀?
    講真籃球都有犯規戰術啦!我相信比著邊個球員都會咁做!
    但最抵死都係球証俾紅牌Suarez果陣,
    佢仲要指一指自己個心口扮無辜!嘩!幾鬼好演技!

    回覆刪除
  63. 鄧加算把啦,悶都算啦!但而家波又唔好睇,盃又拎唔到
    但老老實實,荷蘭今場自己都踢到成pat屎咁,要靠死球先入到波
    [版主回覆07/04/2010 04:50:00]
    把握力唔好,好幾球應該入都無入到....

    回覆刪除
  64. 決賽見
    [版主回覆07/04/2010 04:50:00]
    德國對荷蘭,吐多次口水!~

    回覆刪除
  65. 八強 - 德國 VS 阿根廷 賽後感 :

    無話可說!真係無諗過阿根廷會俾德國炒四蛋!
    德國隊證明咗現代足球係唔可以單靠一個人去踢嘅!
    今年隊德國真係好恐怖!有技術之餘仲有Teamwork……
    但阿根廷就真係只可以純粹靠前鋒嘅個人技術去闖關!

    我承認我之前真係有少少低估咗德國隊嘅實力!
    我之前一直都以為巴西同西班牙先至係今年嘅大熱門!
    因為一向都覺得德國隊班球員個別質素真係唔算太高……
    好似Klose咁!我一向都覺得佢技術平平,一D都唔勁!
    今年佢喺拜仁就真係更加係踢到影都冇!
    但估唔到一著起件德國隊波衫,就立刻好似變咗另一個人咁!
    其實唔只係老將Klose,今場一班德國新秀又係踢到識飛咁!
    上屆世盃就已經有Podolski同Schweinsteiger架啦!
    今屆仲要加埋Ozil同Thomas Muller呢兩個!嘩!真係犀利!

    回覆刪除
  66. 四強 - 荷蘭 VS 烏拉圭 賽後感 :

    場波幾好睇!每球入球都入得好靚!
    尤其係雲邦賀斯果球,簡直就係2010世界盃金球!
    老實講,荷蘭球球都死角入,烏拉圭個龍門都幾無奈……

    今場荷蘭同上幾場一樣,都係有D運咁贏……
    但我覺得佢哋今場就至少做番出應有嘅水準(進攻方面)!
    好似第三球,就完全係戰術成功!
    咁當然……古治出波個落點又真係靚絕嘅!

    但當荷蘭領先3-1果陣,佢哋嘅老毛病就又發作啦!
    就係衰輕敵同唔集中!成鬼日回傳,真係唔知衰!
    同埋呢……阿保拉奴斯真係好鬼炸彈囉!
    下場唔該真係唔好再用佢啦好冇?

    最後我亦要向落敗嘅烏拉圭致敬!
    佢哋今場真係打得好精彩好熱血!雖敗猶榮啦!

    回覆刪除
  67. 四強 - 西班牙 VS 德國 賽後感 :

    今場西班牙贏波,完全係贏球員嘅個人質素!
    真不愧為地上最強,控球指數高到爆哂燈!
    成班波又好穩定!除咗開段沙比傳失過幾腳波之外……
    其餘時間失誤都好少!令一向擅長打突擊嘅德國完全無從入手!
    我始終都覺得德國今場實在係踢得有D過份保守!
    唔敢主動搶攻之餘又搶唔到個主動權,個中場完全輸晒俾人!
    但最搞笑都係德國班高佬竟然俾矮佢哋成截嘅佩奧爾頂入致命一球!
    哈哈~~真係無計啦!西班牙繼Euro 08之後,
    再一次格食格揮低大肉腸!不過我始終都覺得,
    西班牙如果再係下下要玩到咁幼細嘅話……
    遲早可能真係會害死自己!哈哈~~我熱切期待著!

    最後我想鬧爆果個柏度!死獨食怪!你當王子透明架?

    回覆刪除
  68. 幫頂,寫得非常好~~~~~
    恭喜上精選喔~歡迎有空到我家逛逛!!

    回覆刪除